ಶ್ರೀಸತ್ಯಾತ್ಮತೀರ್ಥಶ್ರೀಪಾದವಿರಚಿತಂ
ಶ್ರೀಸತ್ಯೇಷ್ಟತೀರ್ಥಾಷ್ಟಕಮ್
ಶ್ರೀಸತ್ಯಕಾಮಸಂಜಾತಂ ಸತ್ಪರಾಕ್ರಮಸದ್ಗುರುಮ್ ।
ಶ್ರೀಸತ್ಯೇಷ್ಟಮಹಂ ವಂದೇ ಸತ್ಯಸದ್ಗುರುಭಕ್ತಯೇ ॥೧॥
ಕೇವಲಂ ದಕ್ಷಹಸ್ತೇನ ಮೂಲರಾಮಸಮರ್ಚಕಮ್ ।
ಶ್ರೀಸತ್ಯೇಷ್ಟಮಹಂ ವಂದೇ ವಿಧ್ಯುಕ್ತಾರ್ಚನಸಿದ್ಧಯೇ ॥೨॥
ಹೀರಹೇಮಬೃಹತ್ಪೀಠೇ ನಿತ್ಯಂ ರಾಮಸುಪೂಜಕಮ್ ।
ಶ್ರೀಸತ್ಯೇಷ್ಟಮಹಂ ವಂದೇ ವೈಭವಾರ್ಚನಸಿದ್ಧಯೇ ॥೩॥
ಪೂಜಾಕಾಲೇ ತ್ವೃಗರ್ಥಸ್ಯ ಶ್ರೋತಾರಂ ನಿತ್ಯಮಂಜಸಾ ।
ಶ್ರೀಸತ್ಯೇಷ್ಟಮಹಂ ವಂದೇ ಹ್ಯೃಗರ್ಥಜ್ಞಾನಸಿದ್ಧಯೇ ॥೪॥
ಸತ್ಸೂತ್ರಪರಮಾನ್ನೀಯಸುವರ್ಣಚಷಕಾರ್ಪಕಮ್ ।
ಶ್ರೀಸತ್ಯೇಷ್ಟಮಹಂ ವಂದೇ ಸುವರ್ಣಾರ್ಪಣಸಿದ್ಧಯೇ ॥೫॥
ಸತ್ಯವಿಷ್ಣುಸದಿಷ್ಟತ್ವಾತ್ ಸತ್ಯಶಾಸ್ತ್ರೇಷ್ಟಕತ್ವತಃ ।
ಶ್ರೀಸತ್ಯೇಷ್ಟಮಹಂ ವಂದೇ ವಿಷ್ಣೋರಿಷ್ಟತ್ವಸಿದ್ಧಯೇ ॥೬॥
ಆತಕೂರುಕೃತಾವಾಸಂ ಕೃಷ್ಣಾತೀರಸಮಾಶ್ರಯಮ್ ।
ಶ್ರೀಸತ್ಯೇಷ್ಟಮಹಂ ವಂದೇ ಸುನದೀಸ್ನಾನಸಿದ್ಧಯೇ ॥೭॥
ಗುರುಸನ್ನಿಧಿಸಂವಾಸಂ ಭಕ್ತಾಭೀಷ್ಟಪ್ರದಂ ಬುಧಮ್ ।
ಶ್ರೀಸತ್ಯೇಷ್ಟಮಹಂ ವಂದೇ ಗುರುಸನ್ನಿಧಿಸಿದ್ಧಯೇ ॥೮॥
ಸಾತ್ಯೇಷ್ಟಮಷ್ಟಕಂ ಸ್ಪಷ್ಟಂ ಸತ್ಯಾತ್ಮೇಷ್ಟಂ ಸಕಷ್ಟನುಃ ।
ಯಸ್ಯೇಷ್ಟಂ ತಸ್ಯ ತತ್ಕಷ್ಟಂ ನಷ್ಟಂ ಚೇಷ್ಟಂ ನ ನಷ್ಟಕಮ್ ॥೯॥
॥ ಇತಿ ಸುವರ್ಣಪುರೀಕ್ಷೇತ್ರೇ ಶ್ರೀಸತ್ಯಾತ್ಮತೀರ್ಥವಿರಚಿತಂ ಶ್ರೀಸತ್ಯೇಷ್ಟತೀರ್ಥಾಷ್ಟಕಮ್ ॥
***
No comments:
Post a Comment