ಭದ್ರಕಾಲ್ಯಷ್ಟಕಮ್ भद्रकाल्यष्टकम् bhadrakalyashtakam

Shri Bhadrakalyashtakam  ಶ್ರೀ ಭದ್ರಕಾಲ್ಯಷ್ಟಕಮ್ 

ಘೋರೇ ಸಂಸಾರವಹ್ನೌ ಪ್ರಲಯಮುಪಗತೇ ಯಾ ಹಿ ಕೃತ್ವಾ ಶ್ಮಶಾನೇ
     ನೃತ್ಯತ್ಯನ್ಯೂನಶಕ್ತಿರ್ಜಗದಿದಮಖಿಲಂ ಮುಂಡಮಾಲಾಭಿರಾಮಾ ।
ಭಿದ್ಯದ್ಬ್ರಹ್ಮಾಂಡಭಾಂಡಂ ಪಟುತರನಿನದೈರಟ್ಟಹಾಸೈರುದಾರೈಃ
     ಸಾಸ್ಮಾಕಂ ವೈರಿವರ್ಗಂ ಶಮಯತು ತರಸಾ ಭದ್ರದಾ ಭದ್ರಕಾಲೀ ॥ 1॥

ಮಗ್ನೇ ಲೋಕೇಽಮ್ಬುರಾಶೌ ನಲಿನಭವನುತಾ ವಿಷ್ಣುನಾ ಕಾರಯಿತ್ವಾ
     ಚಕ್ರೋತ್ಕೃತ್ತೋರುಕಂಠಂ ಮಧುಮಪಿ ಭಯದಂ ಕೈಟಭಂ ಚಾತಿಭೀಮಮ್ ।
ಪದ್ಮೋತ್ಪತ್ತೇಃ ಪ್ರಭೂತಂ ಭಯಮುತ ರಿಪುತೋಯಾಹರತ್ಸಾನುಕಮ್ಪಾ
     ಸಾಸ್ಮಾಕಂ ವೈರಿವರ್ಗಂ ಶಮಯತು ತರಸಾ ಭದ್ರದಾ ಭದ್ರಕಾಲೀ ॥ 2॥

ವಿಶ್ವತ್ರಾಣಂ ವಿಧಾತುಂ ಮಹಿಷಮಥ ರಾಣೇ ಯಾಽಸುರಂ ಭೀಮರೂಪಂ
     ಶೂಲೇನಾಹತ್ಯ ವಕ್ಷಸ್ಯಮರಪತಿನುತಾ ಪಾತಯನ್ತೀ ಚ ಭೂಮೌ ।
ತಸ್ಯಾಸೃಗ್ವಾಹಿನೀಭಿರ್ಜಲನಿಧಿಮಖಿಲಂ ಶೋಣಿತಾಭಂ ಚ ಚಕ್ರೇ
     ಸಾಸ್ಮಾಕಂ ವೈರಿವರ್ಗಂ ಶಮಯತು ತರಸಾ ಭದ್ರದಾ ಭದ್ರಕಾಲೀ ॥ 3॥

ಯಾ ದೇವೀ ಚಂಡಮುಂಡೌ ತ್ರಿಭುವನನಲಿನೀವಾರಣೌ ದೇವಶತ್ರೂ
     ದೃಷ್ಟ್ವಾ ಯುದ್ಧೋತ್ಸವೇ ತೌ ದ್ರುತತರಮಭಿಯಾತಾಸಿನಾ ಕೃತ್ತಕಂಠೌ ।
ಕೃತ್ವಾ ತದ್ರಕ್ತಪಾನೋದ್ಭವಮದಮುದಿತಾ ಸಾಟ್ಟಹಾಸಾತಿಭೀಮಾ
     ಸಾಸ್ಮಾಕಂ ವೈರಿವರ್ಗಂ ಶಮಯತು ತರಸಾ ಭದ್ರದಾ ಭದ್ರಕಾಲೀ ॥ 4॥

ಸದ್ಯಸ್ತಂ ರಕ್ತಬೀಜಂ ಸಮರಭುವಿ ನತಾ ಘೋರರೂಪಾನಸಂಖ್ಯಾನ್
     ರಾಕ್ತೋದ್ಭೂತೈರಸಂಖ್ಯೈರ್ಗಜತುರಗರಥೈಸ್ಸಾರ್ಥಮನ್ಯಾಂಶ್ಚ ದೈತ್ಯಾನ್ ।
ವಕ್ತ್ರೇ ನಿಕ್ಷಿಪ್ಯ ದಷ್ಟ್ವಾ ಗುರುತರದಶನೈರಾಪಪೌ ಶೋಣಿತೌಘಂ
     ಸಾಸ್ಮಾಕಂ ವೈರಿವರ್ಗಂ ಶಮಯತು ತರಸಾ ಭದ್ರದಾ ಭದ್ರಕಾಲೀ ॥ 5॥

ಸ್ಥಾನಾದ್ಭ್ರಷ್ಟೈಶ್ಚ ದೇವೈಸ್ತುಹಿನಗಿರಿತಟೇ ಸಂಗತೈಸ್ಸಂಸ್ತುತಾ ಯಾ
     ಸಂಖ್ಯಾಹೀನೈಸ್ಸಮೇತಂ ತ್ರಿದಶರಿಪುಗಣೈಸ್ಸ್ಯನ್ದನೇಭಾಶ್ವಯುಕ್ತೈಃ ।
ಯುದ್ಧೇ ಶುಮ್ಭಂ ನಿಶುಮ್ಭಂ ತ್ರಿಭುವನವಿಪದಂ ನಾಶಯನ್ತೀ ಚ ಜಘ್ನೇ
     ಸಾಸ್ಮಾಕಂ ವೈರಿವರ್ಗಂ ಶಮಯತು ತರಸಾ ಭದ್ರದಾ ಭದ್ರಕಾಲೀ ॥ 6॥

ಶಮ್ಭೋರ್ನೇತ್ರಾನಲೇ ಯಾ ಜನನಮಪಿ ಜಗತ್ತ್ರಾಣಹೇತೋರಯಾಸೀತ್
     ಭೂಯಸ್ತೀಕ್ಷ್ಣಾತಿಧಾರಾವಿದಲಿತದನುಜಾ ದಾರುಕಂ ಚಾಪಿ ಹತ್ವಾ ।
ತಸ್ಯಾಸೃಕ್ಪಾನತುಷ್ಟಾ ಮುಹುರಪಿ ಕೃತವತ್ಯಟ್ಟಹಾಸಂ ಕಠೋರಂ
     ಸಾಸ್ಮಾಕಂ ವೈರಿವರ್ಗಂ ಶಮಯತು ತರಸಾ ಭದ್ರದಾ ಭದ್ರಕಾಲೀ ॥ 7॥

ಯಾ ದೇವೀ ಕಾಲರಾತ್ರೀ ತುಹಿನಗಿರಸುತಾ ಲೋಕಮಾತಾ ಧರಿತ್ರೀ
     ವಣೀ ನಿದ್ರಾ ಚ ಮಾಯಾಮನಸಿಜದಯಿತಾ ಘೋರರೂಪಾತಿಸೌಮ್ಯಾ ।
ಚಾಮುಂಡಾ ಖಡ್ಗಹಸ್ತಾ ರಿಪುಹನನಪರಾ ಶೋಣಿತಾಸ್ವಾದಕಾಮಾ
     ಸಾ ಹನ್ಯಾದ್ವಿಶ್ವವನ್ದ್ಯಾ ಮಮ ರಿಪುನಿವಹಾ ಭದ್ರದಾ ಭದ್ರಕಾಲೀ ॥ 8॥

ಭದ್ರಕಾಲ್ಯಷ್ಟಕಂ ಜಪ್ಯಂ ಶತ್ರುಸಂಕ್ಷಯಕಾಂಕ್ಷಿಣಾ ।
ಸ್ವರ್ಗಾಪವರ್ಗದಂ ಪುಣ್ಯಂ ದುಷ್ಟಗ್ರಹನಿವಾರಣಮ್ ॥ 9॥

ಇತಿ ಶ್ರೀಭದ್ರಕಾಲ್ಯಷ್ಟಕಂ ಸಮ್ಪೂರ್ಣಮ್ ।
********

श्री भद्रकाल्यष्टकम् 
घोरे संसारवह्नौ प्रलयमुपगते या हि कृत्वा श्मशाने
     नृत्यत्यन्यूनशक्तिर्जगदिदमखिलं मुण्डमालाभिरामा ।
भिद्यद्ब्रह्माण्डभाण्डं पटुतरनिनदैरट्टहासैरुदारैः
     सास्माकं वैरिवर्गं शमयतु तरसा भद्रदा भद्रकाली ॥ १॥

मग्ने लोकेऽम्बुराशौ नलिनभवनुता विष्णुना कारयित्वा
     चक्रोत्कृत्तोरुकण्ठं मधुमपि भयदं कैटभं चातिभीमम् ।
पद्मोत्पत्तेः प्रभूतं भयमुत रिपुतोयाहरत्सानुकम्पा
     सास्माकं वैरिवर्गं शमयतु तरसा भद्रदा भद्रकाली ॥ २॥

विश्वत्राणं विधातुं महिषमथ राणे याऽसुरं भीमरूपं
     शूलेनाहत्य वक्षस्यमरपतिनुता पातयन्ती च भूमौ ।
तस्यासृग्वाहिनीभिर्जलनिधिमखिलं शोणिताभं च चक्रे
     सास्माकं वैरिवर्गं शमयतु तरसा भद्रदा भद्रकाली ॥ ३॥

या देवी चण्डमुण्डौ त्रिभुवननलिनीवारणौ देवशत्रू
     दृष्ट्वा युद्धोत्सवे तौ द्रुततरमभियातासिना कृत्तकण्ठौ ।
कृत्वा तद्रक्तपानोद्भवमदमुदिता साट्टहासातिभीमा
     सास्माकं वैरिवर्गं शमयतु तरसा भद्रदा भद्रकाली ॥ ४॥

सद्यस्तं रक्तबीजं समरभुवि नता घोररूपानसङ्ख्यान्
     राक्तोद्भूतैरसङ्ख्यैर्गजतुरगरथैस्सार्थमन्यांश्च दैत्यान् ।
वक्त्रे निक्षिप्य दष्ट्वा गुरुतरदशनैरापपौ शोणितौघं
     सास्माकं वैरिवर्गं शमयतु तरसा भद्रदा भद्रकाली ॥ ५॥

स्थानाद्भ्रष्टैश्च देवैस्तुहिनगिरितटे सङ्गतैस्संस्तुता या
     सङ्ख्याहीनैस्समेतं त्रिदशरिपुगणैस्स्यन्दनेभाश्वयुक्तैः ।
युद्धे शुम्भं निशुम्भं त्रिभुवनविपदं नाशयन्ती च जघ्ने
     सास्माकं वैरिवर्गं शमयतु तरसा भद्रदा भद्रकाली ॥ ६॥

शम्भोर्नेत्रानले या जननमपि जगत्त्राणहेतोरयासीत्
     भूयस्तीक्ष्णातिधाराविदलितदनुजा दारुकं चापि हत्वा ।
तस्यासृक्पानतुष्टा मुहुरपि कृतवत्यट्टहासं कठोरं
     सास्माकं वैरिवर्गं शमयतु तरसा भद्रदा भद्रकाली ॥ ७॥

या देवी कालरात्री तुहिनगिरसुता लोकमाता धरित्री
     वणी निद्रा च मायामनसिजदयिता घोररूपातिसौम्या ।
चामुण्डा खड्गहस्ता रिपुहननपरा शोणितास्वादकामा
     सा हन्याद्विश्ववन्द्या मम रिपुनिवहा भद्रदा भद्रकाली ॥ ८॥

भद्रकाल्यष्टकं जप्यं शत्रुसंक्षयकाङ्क्षिणा ।
स्वर्गापवर्गदं पुण्यं दुष्टग्रहनिवारणम् ॥ ९॥

इति श्रीभद्रकाल्यष्टकं सम्पूर्णम् ।
***********