(10 August 2020)
।। ಅಥ ದಶಾವತಾರಸ್ತುತಿಃ ।।
ಪ್ರೋಷ್ಠೀಶವಿಗ್ರಹ, ಸು-ನಿಷ್ಠೀವನೋದ್ಧತವಿ-ಶಿಷ್ಟಾಂಬುಚಾರಿಜಲಧೇ
ಕೋಷ್ಠಾಂತರಾಹಿತವಿ-ಚೇಷ್ಟಾಗಮೌಘ ಪರ-ಮೇಷ್ಠೀಡಿತ ತ್ವಮವ ಮಾಮ್ ।
ಪ್ರೇಷ್ಠಾಕಸೂನುಮನು-ಚೇಷ್ಟಾರ್ಥಮಾತ್ಮವಿದ-ತೀಷ್ಟೋ ಯುಗಾಂತಸಮಯೇ
ಸ್ಥೇಷ್ಠಾತ್ಮಶೃಂಗಧೃತ-ಕಾಷ್ಠಾಂಬುವಾಹನ, ವ-ರಾಷ್ಟಾಪದಪ್ರಭತನೋ॥೧॥
ಖಂಡೀಭವದ್ಬಹುಲ-ಡಿಂಡೀರಜೃಂಭಣಸು-ಚಂಡೀಕೃತೋದಧಿಮಹಾ-
ಕಾಂಡಾತಿಚಿತ್ರಗತಿ-ಶೌಂಡಾದ್ಯ ಹೈಮರದ-ಭಾಂಡಾಪ್ರಮೇಯಚರಿತ ।
ಚಂಡಾಶ್ವಕಂಠಮದ-ಶುಂಡಾಲದುರ್ಹೃದಯ-ಗಂಡಾಭಿಖಂಡಕರದೋ-
ಶ್ಚಂಡಾಮರೇಶ ಹಯ-ತುಂಡಾಕೃತೇ ದೃಶಮ-ಖಂಡಾಮಲಂ ಪ್ರದಿಶ ಮೇ॥೨॥
ಕೂರ್ಮಾಕೃತೇ ತ್ವವತು, ನರ್ಮಾತ್ಮಪೃಷ್ಠಧೃತ-ಭರ್ಮಾತ್ಮಮಂದರಗಿರೇ
ಧರ್ಮಾವಲಂಬನ ಸು-ಧರ್ಮಾಸದಾ ಕಲಿತ-ಶರ್ಮಾ ಸುಧಾವಿತರಣಾತ್ ।
ದುರ್ಮಾನರಾಹುಮುಖ-ದುರ್ಮಾಯಿದಾನವಸು-ಮರ್ಮಾಭಿಭೇದನಪಟೋ
ಘರ್ಮಾರ್ಕಕಾಂತಿವರ-ವರ್ಮಾ ಭವಾನ್ ಭುವನ-ನಿರ್ಮಾಣಧೂತವಿಕೃತಿಃ॥೩॥
ಧನ್ವಂತರೇಂಽಗರುಚಿ-ಧನ್ವಂತರೇಽರಿತರು-ಧನ್ವಂಸ್ತರೀಭವ ಸುಧಾ-
ಭಾನ್ವಂತರಾವಸಥ, ಮನ್ವಂತರಾಧಿಕೃತ-ತನ್ವಂತರೌಷಧನಿಧೇ ।
ದನ್ವಂತರಂಗಶುಗು-ದನ್ವಂತಮಾಜಿಷು ವಿ-ತನ್ವನ್ ಮಮಾಬ್ಧಿತನಯಾ
ಸೂನ್ವಂತಕಾತ್ಮಹೃದ-ತನ್ವಂತರಾವಯವ-ತನ್ವಂತರಾರ್ತಿಜಲಧೌ॥೪॥
ಯಾ ಕ್ಷೀರವಾರ್ಧಿಮಥ-ನಾಕ್ಷೀಣದರ್ಪದಿತಿ-ಜಾಕ್ಷೋಭಿತಾಮರಗಣಾ
ಪ್ರೇಕ್ಷಾಪ್ತಯೇಽಜನಿ, ವ-ಲಕ್ಷಾಂಶುಬಿಂಬಜಿದ-ತೀಕ್ಷ್ಣಾಲಕಾವೃತಮುಖೀ ।
ಸೂಕ್ಷ್ಮಾವಲಗ್ನವಸ-ನಾಽಽಕ್ಷೇಪಕೃತ್ಕುಚಕ-ಟಾಕ್ಷಾಕ್ಷಮೀಕೃತಮನೋ-
ದೀಕ್ಷಾಸುರಾಹೃತ-ಸುಧಾಽಕ್ಷಾಣಿ ನೋಽವತು, ಸುರೂಕ್ಷೇಕ್ಷಣಾದ್ಧರಿತನುಃ॥೫॥
ಶೀಕ್ಷಾದಿಯುಂನಿಗಮ-ದೀಕ್ಷಾಸುಲಕ್ಷಣ-ಪರೀಕ್ಷಾಕ್ಷಮಾ ವಿಧಿಸತೀ
ದಾಕ್ಷಾಯಣೀ ಕ್ಷಮತಿ, ಸಾಕ್ಷಾದ್ರಮಾಽಪಿ ನ ಯ-ದಾಕ್ಷೇಪವೀಕ್ಷಣವಿಧೌ ।
ಪ್ರೇಕ್ಷಾಕ್ಷಿಲೋಭಕರ-ಲಾಕ್ಷಾರಸೋಕ್ಷಿತ-ಪದಾಕ್ಷೇಪಲಕ್ಷಿತಧರಾ
ಸಾಽಕ್ಷಾರಿತಾತ್ಮತನು-ಭೂಕ್ಷಾರಕಾರಿನಿಟಿ-ಲಾಕ್ಷಾಽಕ್ಷಮಾನವತು ನಃ॥೬॥
ನೀಲಾಂಬುದಾಭ ಶುಭ-ಶೀಲಾದ್ರಿದೇಹಧರ, ಖೇಲಾಹೃತೋದಧಿಧುನೀ-
ಶೈಲಾದಿಯುಕ್ತನಿಖಿ-ಲೇಲಾಕಟಾದ್ಯಸುರ-ತೂಲಾಟವೀದಹನ ತೇ ।
ಕೋಲಕೃತೇ ಜಲಧಿ-ಕಾಲಾಚಲಾವಯವ-ನೀಲಾಬ್ಜದಂಷ್ಟ್ರಧರಣೀ-
ಲೀಲಾಸ್ಪದೋರುತಲ-ಮೂಲಾಶಿಯೋಗಿವರ-ಜಾಲಾಭಿವಂದಿತ ನಮಃ॥೭॥
ದಂಭೋಲಿತೀಕ್ಷ್ಣನಖ-ಸಂಭೇದಿತೇಂದ್ರರಿಪು-ಕುಂಭೀಂದ್ರ ಪಾಹಿ ಕೃಪಯಾ
ಸ್ತಂಭಾರ್ಭಕಾಸಹನ, ಡಿಂಭಾಯ ದತ್ತವರ ಗಂಭೀರನಾದನೃಹರೇ ।
ಅಂಭೋಧಿಜಾನುಸರ-ಣಾಂಭೋಜಭೂಪವನ-ಕುಂಭೀನಸೇಶಖಗರಾಟ್-
ಕುಂಭೀಂದ್ರಕೃತ್ತಿಧರ-ಜಂಭಾರಿಷಣ್ಮುಖ-ಮುಖಾಂಭೋರುಹಾಭಿನುತ ಮಾಮ್॥೮॥
ಪಿಂಗಾಕ್ಷವಿಕ್ರಮ-ತುರಂಗಾದಿಸೈನ್ಯಚತು-ರಂಗಾವಲಿಪ್ತದನುಜಾ
ಸಾಂಗಾಧ್ವರಸ್ಥಬಲಿ-ಸಾಂಗಾವಪಾತಹೃಷಿ-ತಾಂಗಾಮರಾಲಿನುತ ತೇ ।
ಶೃಂಗಾರಪಾದನಖ-ತುಂಗಾಗ್ರಭಿನ್ನಕನ-ಕಾಂಗಾಂಡಪಾತಿತಟಿನೀ
ತುಂಗಾತಿಮಂಗಲ-ತರಂಗಾಭಿಭೂತಭಜ-ಕಾಂಗಾಘ ವಾಮನ ನಮಃ॥೯॥
ಧ್ಯಾನಾರ್ಹವಾಮನತ-ನೋ ನಾಥ ಪಾಹಿಯಜ-ಮಾನಾಸುರೇಶವಸುಧಾ-
ದಾನಾಯ ಯಾಚನಿಕ, ಲೀನಾರ್ಥವಾಗ್ವಶಿತ-ನಾನಾಸದಸ್ಯದನುಜ ।
ಮೀನಾಂಕನಿರ್ಮಲ-ನಿಶಾನಾಥಕೋಟಿ-ಲಸಮಾನಾತ್ಮಮೌಂಜಿಗುಣಕೌ-
ಪೀನಾಚ್ಛಸೂತ್ರಪದ-ಯಾನಾತಪತ್ರಕರ-ಕಾನಮ್ಯದಂಡವರಭೃತ್॥೧೦॥
ಧೈರ್ಯಾಂಬುಧೇ ಪರಶು-ಚರ್ಯಾಧಿಕೃತ್ತಖಲ-ವರ್ಯಾವನೀಶ್ವರ ಮಹಾ-
ಶೌರ್ಯಾಭಿಭೂತ ಕೃತ-ವೀರ್ಯಾತ್ಮಜಾತಭುಜ-ವೀರ್ಯಾವಲೇಪನಿಕರ ।
ಭಾರ್ಯಾಪರಾಧಕುಪಿ-ತಾರ್ಯಾಜ್ಞಯಾ ಗಲಿತ-ನಾರ್ಯಾತ್ಮಸೂಗಲತರೋ
ಕಾರ್ಯಾಽಪರಾಧಮವಿ-ಚಾರ್ಯಾರ್ಯಮೌಘಜಯಿ-ವೀರ್ಯಾಮಿತಾ ಮಯಿ ದಯಾ॥೧೧॥
ಶ್ರೀರಾಮ ಲಕ್ಷ್ಮಣಶು-ಕಾರಾಮಭೂರವತು ಗೌರಾಮಲಾಮಿತಮಹೋ-
ಹಾರಾಮರಸ್ತುತ-ಯಶೋ ರಾಮಕಾಂತಿಸುತ-ನೋ ರಾಮಲಬ್ಧಕಲಹ ।
ಸ್ವಾರಾಮವರ್ಯರಿಪು-ವೀರಾಮಯರ್ದ್ಧಿಕರ, ಚೀರಾಮಲಾವೃತಕಟೇ
ಸ್ವಾರಾಮದರ್ಶನಜ-ಮಾರಾಮಯಾಗತಸು-ಘೋರಾಮನೋರಥಹರ॥೧೨॥
ಶ್ರೀಕೇಶವ ಪ್ರದಿಶ, ನಾಕೇಶಜಾತಕಪಿ-ಲೋಕೇಶಭಗ್ನರವಿಭೂ-
ಸ್ತೋಕೇತರಾರ್ತಿಹರ-ಣಾಕೇವಲಾರ್ಥಸುಖ-ಧೀಕೇಕಿಕಾಲಜಲದ ।
ಸಾಕೇತನಾಥ ವರ-ಪಾಕೇರಮುಖ್ಯಸುತ-ಕೋಕೇನ ಭಕ್ತಿಮತುಲಾಂ
ರಾಕೇಂದುಬಿಂಬಮುಖ, ಕಾಕೇಕ್ಷಣಾಪಹ ಹೃಷೀಕೇಶ ತೇಂಽಘ್ರಿಕಮಲೇ॥೧೩॥
ರಾಮೇ ನೃಣಾಂ ಹೃದಭಿರಾಮೇ, ನರಾಶಿಕುಲಭೀಮೇ, ಮನೋಽದ್ಯ ರಮತಾಂ
ಗೋಮೇದಿನೀಜಯಿತ-ಪೋಽಮೇಯಗಾಧಿಸುತ-ಕಾಮೇ ನಿವಿಷ್ಟಮನಸಿ ।
ಶ್ಯಾಮೇ ಸದಾ ತ್ವಯಿ, ಜಿತಾಮೇಯತಾಪಸಜ-ರಾಮೇ ಗತಾಧಿಕಸಮೇ
ಭೀಮೇಶಚಾಪದಲ-ನಾಮೇಯಶೌರ್ಯಜಿತ-ವಾಮೇಕ್ಷಣೇ ವಿಜಯಿನಿ॥೧೪॥
ಕಾಂತಾರಗೇಹಖಲ-ಕಾಂತಾರಟದ್ವದನ-ಕಾಂತಾಲಕಾಂತಕಶರಂ
ಕಾಂತಾಽಽರ ಯಾಂಬುಜನಿ-ಕಾಂತಾನ್ವವಾಯವಿಧು-ಕಾಂತಾಶ್ಮಭಾಧಿಪ ಹರೇ ।
ಕಾಂತಾಲಿಲೋಲದಲ-ಕಾಂತಾಭಿಶೋಭಿತಿಲ-ಕಾಂತಾ ಭವಂತಮನು ಸಾ
ಕಾಂತಾನುಯಾನಜಿತ-ಕಾಂತಾರದುರ್ಗಕಟ-ಕಾಂತಾ ರಮಾ ತ್ವವತು ಮಾಮ್॥೧೫॥
ದಾಂತಂ ದಶಾನನ-ಸುತಾಂತಂ ಧರಾಮಧಿ-ವಸಂತಂ ಪ್ರಚಂಡತಪಸಾ
ಕ್ಲಾಂತಂ ಸಮೇತ್ಯ ವಿಪಿ-ನಾಂತಂ ತ್ವವಾಪ ಯಮ-ನಂತಂ ತಪಸ್ವಿಪಟಲಮ್।
ಯಾಂತಂ ಭವಾರತಿಭ-ಯಾಂತಂ ಮಮಾಶು ಭಗ-ವಂತಂ ಭರೇಣ ಭಜತಾತ್
ಸ್ವಾಂತಂ ಸವಾರಿದನು-ಜಾಂತಂ ಧರಾಧರನಿಶಾಂತಂ, ಸತಾಪಸವರಮ್॥೧೬॥
ಶಂಪಾಭಚಾಪಲವ-ಕಂಪಾಸ್ತಶತ್ರುಬಲ-ಸಂಪಾದಿತಾಮಿತಯಶಾಃ
ಶಂ ಪಾದತಾಮರಸ-ಸಂಪಾತಿನೋಽಲಮನು-ಕಂಪಾರಸೇನ ದಿಶ ಮೇ ।
ಸಂಪಾತಿಪಕ್ಷಿಸಹ-ಜಂ ಪಾಪರಾವಣಹ-ತಂ ಪಾವನಂ ಯದಕೃಥಾ-
ಸ್ತ್ವಂ ಪಾಪಕೂಪಪತಿ-ತಂ ಪಾಹಿ ಮಾಂ ತದಪಿ, ಪಂಪಾಸರಸ್ತಟಚರ॥೧೭॥
ಲೋಲಾಕ್ಷ್ಯಪೇಕ್ಷಿತ-ಸುಲೀಲಾಕುರಂಗವಧ-ಖೇಲಾಕುತೂಹಲಗತೇ
ಸ್ವಾಲಾಪಭೂಮಿಜನಿ-ಬಾಲಾಪಹಾರ್ಯನುಜ-ಪಾಲಾದ್ಯ ಭೋ ಜಯ ಜಯ ।
ಬಾಲಾಗ್ನಿದಗ್ಧಪುರ-ಶಾಲಾನಿಲಾತ್ಮಜನಿ-ಫಾಲಾತ್ತಪತ್ತಲರಜೋ
ನೀಲಾಂಗದಾದಿಕಪಿ-ಮಾಲಾಕೃತಾಲಿಪಥ-ಮೂಲಾಭ್ಯತೀತಜಲಧೇ॥೧೮॥
ತೂಣೀರಕಾರ್ಮುಕ-ಕೃಪಾಣೀಕಿಣಾಂಕಭುಜ-ಪಾಣೀ ರವಿಪ್ರತಿಮಭಾಃ
ಕ್ಷೋಣೀಧರಾಲಿನಿಭ-ಘೋಣೀಮುಖಾದಿಘನ-ವೇಣೀಸುರಕ್ಷಣಕರಃ ।
ಶೋಣೀಭವನ್ನಯನ-ಕೋಣೀಜಿತಾಂಬುನಿಧಿ-ಪಾಣೀರಿತಾರ್ಹಣಿಮಣಿ-
ಶ್ರೇಣೀವೃತಾಂಘ್ರಿರಿಹ, ವಾಣೀಶಸೂನುವರ-ವಾಣೀಸ್ತುತೋ ವಿಜಯತೇ॥೧೯॥
ಹುಂಕಾರಪೂರ್ವಮಥ-ಟಂಕಾರನಾದಮತಿ-ಪಂಕಾಽವಧಾರ್ಯಚಲಿತಾ
ಲಂಕಾ ಶಿಲೋಚ್ಚಯ-ವಿಶಂಕಾ ಪತದ್ಭಿದುರ-ಶಂಕಾಽಽಸ ಯಸ್ಯ ಧನುಷಃ ।
ಲಂಕಾಧಿಪೋಽಮನುತ, ಯಂ ಕಾಲರಾತ್ರಿಮಿವ, ಶಂಕಾಶತಾಕುಲಧಿಯಾ
ತಂ ಕಾಲದಂಡಶತ-ಸಂಕಾಶಕಾರ್ಮುಕ-ಶರಾಂಕಾನ್ವಿತಂ ಭಜ ಹರಿಮ್॥೨೦॥
ಧೀಮಾನಮೇಯತನು-ಧಾಮಾಽಽರ್ತಮಂಗಲದ-ನಾಮಾ ರಮಾಕಮಲಭೂ-
ಕಾಮಾರಿಪನ್ನಗಪ-ಕಾಮಾಹಿವೈರಿಗುರು-ಸೋಮಾದಿವಂದ್ಯಮಹಿಮಾ ।
ಸ್ಥೇಮಾದಿನಾಽಪಗತ-ಸೀಮಾಽವತಾತ್ ಸಖಲ-ಸಾಮಾಜರಾವಣರಿಪೂ
ರಾಮಾಭಿಧೋ ಹರಿರ-ಭೌಮಾಕೃತಿಃ ಪ್ರತನ-ಸಾಮಾದಿವೇದವಿಷಯಃ॥೨೧॥
ದೋಷಾಽಽತ್ಮಭೂವಶತು-ರಾಷಾಡತಿಕ್ರಮಜ-ರೋಷಾತ್ಮಭರ್ತೃವಚಸಾ
ಪಾಷಾಣಭೂತಮುನಿ-ಯೋಷಾವರಾತ್ಮತನು-ವೇಷಾದಿದಾಯಿಚರಣಃ ।
ನೈಷಾದಯೋಷಿದಶು-ಭೇಷಾಕೃದಂಡಜನಿ-ದೋಷಾಚರಾದಿಶುಭದೋ
ದೋಷಾಽಗ್ರಜನ್ಮಮೃತಿ-ಶೋಷಾಪಹೋಽವತು ಸು-ದೋಷಾಂಘ್ರಿಜಾತಹನನಾತ್॥೨೨॥
ವೃಂದಾವನಸ್ಥಪಶು-ವೃಂದಾವನಂ ವಿನುತ-ವೃಂದಾರಕೈಕಶರಣಂ
ನಂದಾತ್ಮಜಂ ನಿಹತ-ನಿಂದಾಕೃದಾಸುರಜ-ನಂ ದಾಮಬದ್ಧಜಠರಮ್ ।
ವಂದಾಮಹೇ ವಯಮ-ಮಂದಾವದಾತರುಚಿ-ಮಂದಾಕ್ಷಕಾರಿವದನಂ
ಕುಂದಾಲಿದಂತಮುತ, ಕಂದಾಸಿತಪ್ರಭತ-ನುಂ ದಾವರಾಕ್ಷಸಹರಮ್॥೨೩॥
ಗೋಪಾಲಕೋತ್ಸವಕೃ-ತಾಪಾರಭಕ್ಷ್ಯರಸ-ಸೂಪಾನ್ನಲೋಪಕುಪಿತಾ-
ಶಾಪಾಲಯಾಪಿತಲ-ಯಾಪಾಂಬುದಾಲಿಸಲಿ-ಲಾಪಾಯಧಾರಿತಗಿರೇ ।
ಸ್ವಾಪಾಂಗದರ್ಶನಜ-ತಾಪಾಂಗರಾಗಯುತ-ಗೋಪಾಂಗನಾಂಶುಕಹೃತಿ-
ವ್ಯಾಪಾರಶೌಂಡ ವಿವಿ-ಧಾಪಾಯತಸ್ತ್ವಮವ, ಗೋಪಾರಿಜಾತಹರಣ॥೨೪॥
ಕಂಸಾದಿಕಾಸದವ-ತಂಸಾವನೀಪತಿವಿ-ಹಿಂಸಾಕೃತಾತ್ಮಜನುಷಂ
ಸಂಸಾರಭೂತಮಿಹ-ಸಂಸಾರಬದ್ಧಮನ-ಸಂ ಸಾರಚಿತ್ಸುಖತನುಮ್ ।
ಸಂಸಾಧಯಂತಮನಿ-ಶಂ ಸಾತ್ವಿಕವ್ರಜಮ-ಹಂ ಸಾದರಂ ಬತ ಭಜೇ
ಹಂಸಾದಿತಾಪಸರಿ-ರಂಸಾಸ್ಪದಂ ಪರಮ-ಹಂಸಾದಿವಂದ್ಯಚರಣಮ್॥೨೫॥
ರಾಜೀವನೇತ್ರ ವಿದು-ರಾಜೀವ ಮಾಮವತು, ರಾಜೀವಕೇತನವಶಂ
ವಾಜೀಭಪತ್ತಿನೃಪ-ರಾಜೀರಥಾನ್ವಿತಜ-ರಾಜೀವಗರ್ವಶಮನ ।
ವಾಜೀಶವಾಹಸಿತ-ವಾಜೀಶದೈತ್ಯತನು-ವಾಜೀಶಭೇದಕರದೋ-
ರ್ಜಾಜೀಕದಂಬನವ-ರಾಜೀವಮುಖ್ಯಸುಮ-ರಾಜೀಸುವಾಸಿತಶಿರಃ॥೨೬॥
ಕಾಲೀಹೃದಾವಸಥ-ಕಾಲೀಯಕುಂಡಲಿಪ-ಕಾಲೀಸ್ಥಪಾದನಖರಾ
ವ್ಯಾಲೀನವಾಂಶುಕರ-ವಾಲೀಗಣಾರುಣಿತ-ಕಾಲೀರುಚೇ ಜಯ ಜಯ ।
ಕೇಲೀಲವಾಪಹೃತ-ಕಾಲೀಶದತ್ತವರ-ನಾಲೀಕದೃಪ್ತದಿತಿಭೂ-
ಚೂಲೀಕಗೋಪಮಹಿ-ಲಾಲೀತನೂಘುಸೃಣ-ಧೂಲೀಕಣಾಂಕಹೃದಯ॥೨೭॥
ಕೃಷ್ಣಾದಿಪಾಂಡುಸುತ-ಕೃಷ್ಣಾಮನಃಪ್ರಚುರ-ತೃಷ್ಣಾಸುತೃಪ್ತಿಕರವಾಕ್
ಕೃಷ್ಣಾಂಕಪಾಲಿರತ, ಕೃಷ್ಣಾಭಿಧಾಘಹರ, ಕೃಷ್ಣಾದಿಷಣ್ಮಹಿಲ ಭೋಃ ।
ಪುಷ್ಣಾತು ಮಾಮಜಿತ, ನಿಷ್ಣಾತವಾರ್ಧಿಮುದ-ನುಷ್ಣಾಂಶುಮಂಡಲ ಹರೇ
ಜಿಷ್ಣೋ ಗಿರೀಂದ್ರಧರ-ವಿಷ್ಣೋ ವೃಷಾವರಜ, ಧೃಷ್ಣೋ ಭವಾನ್ ಕರುಣಯಾ॥
ರಾಮಾಶಿರೋಮಣಿಧ-ರಾಮಾಸಮೇತಬಲ-ರಾಮಾನುಜಾಭಿಧ ರತಿಂ
ವ್ಯೋಮಾಸುರಾಂತಕರ- ತೇ ಮಾರತಾತ ದಿಶ- ಮೇ ಮಾಧವಾಂಘ್ರಿಕಮಲೇ ।
ಕಾಮಾರ್ತಭೌಮಪುರ-ರಾಮಾವಲಿಪ್ರಣಯ-ವಾಮಾಕ್ಷಿಪೀತತನುಭಾ
ಭೀಮಾಹಿನಾಥಮುಖ-ವೈಮಾನಿಕಾಭಿನುತ, ಭೀಮಾಭಿವಂದ್ಯಚರಣ॥೨೯॥
ಸಕ್ಷ್ವೇಲಭಕ್ಷ್ಯಭಯ-ದಾಕ್ಷಿಶ್ರವೋಗಣಜ-ಲಾಕ್ಷೇಪಪಾಶಯಮನಂ
ಲಾಕ್ಷಾಗೃಹಜ್ವಲನ-ರಕ್ಷೋಹಿಡಿಂಬಬಕ-ಭೈಕ್ಷಾನ್ನಪೂರ್ವವಿಪದಃ ।
ಅಕ್ಷಾನುಬಂಧಭವ-ರುಕ್ಷಾಕ್ಷರಶ್ರವಣ-ಸಾಕ್ಷಾನ್ಮಹಿಷ್ಯವಮತೀ
ಕಕ್ಷಾನುಯಾನಮಧ-ಮಕ್ಷ್ಮಾಪಸೇವನಮ-ಭೀಕ್ಷ್ಣಾಪಹಾಸಮಸತಾಮ್॥೩೦॥
ಚಕ್ಷಾಣ ಏವ ನಿಜ-ಪಕ್ಷಾಗ್ರಭೂದಶಶ-ತಾಕ್ಷಾತ್ಮಜಾದಿಸುಹೃದಾಮ್
ಆಕ್ಷೇಪಕಾರಿಕುನೃ-ಪಾಕ್ಷೌಹಿಣೀಶತಬ-ಲಾಕ್ಷೋಭದೀಕ್ಷಿತಮನಾಃ ।
ತಾರ್ಕ್ಷ್ಯಾಸಿಚಾಪಶರ-ತೀಕ್ಷ್ಣಾರಿಪೂರ್ವನಿಜ-ಲಕ್ಷ್ಮಾಣಿ ಚಾಪ್ಯಗಣಯನ್
ವೃಕ್ಷಾಲಯಧ್ವಜ-ರಿರಕ್ಷಾಕರೋ ಜಯತಿ, ಲಕ್ಷ್ಮೀಪತಿರ್ಯದುಪತಿಃ॥೩೧॥
ಬುದ್ಧಾವತಾರ ಕವಿ-ಬದ್ಧಾನುಕಂಪ ಕುರು, ಬದ್ಧಾಂಜಲೌ ಮಯಿ ದಯಾಂ
ಶೌದ್ಧೋದನಿಪ್ರಮುಖ-ಸೈಧ್ದಾಂತಿಕಾಸುಗಮ-ಬೌದ್ಧಾಗಮಪ್ರಣಯನ ।
ಕ್ರುದ್ಧಾಹಿತಾಸುಹೃತಿ-ಸಿದ್ಧಾಸಿಖೇಟಧರ, ಶುದ್ಧಾಶ್ವಯಾನ ಕಮಲಾ-
ಶುದ್ಧಾಂತ ಮಾಂ ರುಚಿಪಿ-ನದ್ಧಾಖಿಲಾಂಗನಿಜ-ಮದ್ಧಾಽವ ಕಲ್ಕ್ಯಭಿಧ ಭೋಃ॥೩೨॥
ಸಾರಂಗಕೃತ್ತಿಧರ-ಸಾರಂಗವಾರಿಧರ, ಸಾರಂಗರಾಜವರದಾ-
ಸಾರಂ ಗದಾರಿತರ-ಸಾರಂ ಗತಾತ್ಮಮದ-ಸಾರಂ ಗತೌಷಧಬಲಮ್ ।
ಸಾರಂಗವತ್ಕುಸುಮ-ಸಾರಂ ಗತಂ ಚ ತವ, ಸಾರಂಗಮಾಂಘ್ರಿಯುಗಲಂ
ಸಾರಂಗವಣಮಪ-ಸಾರಂಗತಾಬ್ಜಮದ-ಸಾರಂ ಗದಿಂಸ್ತ್ವಮವ ಮಾಮ್॥೩೩॥
ಗ್ರೀವಾಸ್ಯವಾಹತನು-ದೇವಾಂಡಜಾದಿದಶ-ಭಾವಾಭಿರಾಮಚರಿತಂ
ಭಾವಾತಿಭವ್ಯಶುಭ-ಧೀವಾದಿರಾಜಯತಿ-ಭೂವಾಗ್ವಿಲಾಸನಿಲಯಮ್ ।
ಶ್ರೀವಾಗಧೀಶಮುಖ-ದೇವಾಭಿನಮ್ಯಹರಿ-ಸೇವಾರ್ಚನೇಷು ಪಠತಾಂ
ಆವಾಸ ಏವ ಭವಿ-ತಾಽವಾಗ್ಭವೇತರಸು-ರಾವಾಸಲೋಕನಿಕರೇ॥೩೪॥
॥ ಇತಿ ಶ್ರೀವಾದಿರಾಜತೀರ್ಥವಿರಚಿತಾ ದಶಾವತಾರಸ್ತುತಿಃ ॥
*********
।। अथ दशावतार स्तुतिः ।।
प्रोष्ठीशविग्रह, सु-निष्ठीवनोद्धतवि-शिष्टांबुचारिजलधे
कोष्ठांतराहितवि-चेष्टागमौघ पर-मेष्ठीडित त्वमव माम् ।
प्रेष्ठाकसूनुमनु-चेष्टार्थमात्मविद-तीष्टो युगांतसमये
स्थेष्ठात्मशृंगधृत-काष्ठांबुवाहन, व-राष्टापदप्रभतनो॥१॥
खंडीभवद्बहुल-डिंडीरजृंभणसु-चंडीकृतोदधिमहा-
कांडातिचित्रगति-शौंडाद्य हैमरद-भांडाप्रमेयचरित ।
चंडाश्वकंठमद-शुंडालदुर्हृदय-गंडाभिखंडकरदो-
श्चंडामरेश हय-तुंडाकृते दृशम-खंडामलं प्रदिश मे॥२॥
कूर्माकृते त्ववतु, नर्मात्मपृष्ठधृत-भर्मात्ममंदरगिरे
धर्मावलंबन सु-धर्मासदा कलित-शर्मा सुधावितरणात् ।
दुर्मानराहुमुख-दुर्मायिदानवसु-मर्माभिभेदनपटो
घर्मार्ककांतिवर-वर्मा भवान् भुवन-निर्माणधूतविकृतिः॥३॥
धन्वंतरेंऽगरुचि-धन्वंतरेऽरितरु-धन्वंस्तरीभव सुधा-
भान्वंतरावसथ, मन्वंतराधिकृत-तन्वंतरौषधनिधे ।
दन्वंतरंगशुगु-दन्वंतमाजिषु वि-तन्वन् ममाब्धितनया
सून्वंतकात्महृद-तन्वंतरावयव-तन्वंतरार्तिजलधौ॥४॥
या क्षीरवार्धिमथ-नाक्षीणदर्पदिति-जाक्षोभितामरगणा
प्रेक्षाप्तयेऽजनि, व-लक्षांशुबिंबजिद-तीक्ष्णालकावृतमुखी ।
सूक्ष्मावलग्नवस-नाऽऽक्षेपकृत्कुचक-टाक्षाक्षमीकृतमनो-
दीक्षासुराहृत-सुधाऽक्षाणि नोऽवतु, सुरूक्षेक्षणाद्धरितनुः॥५॥
शीक्षादियुंनिगम-दीक्षासुलक्षण-परीक्षाक्षमा विधिसती
दाक्षायणी क्षमति, साक्षाद्रमाऽपि न य-दाक्षेपवीक्षणविधौ ।
प्रेक्षाक्षिलोभकर-लाक्षारसोक्षित-पदाक्षेपलक्षितधरा
साऽक्षारितात्मतनु-भूक्षारकारिनिटि-लाक्षाऽक्षमानवतु नः॥६॥
नीलांबुदाभ शुभ-शीलाद्रिदेहधर, खेलाहृतोदधिधुनी-
शैलादियुक्तनिखि-लेलाकटाद्यसुर-तूलाटवीदहन ते ।
कोलकृते जलधि-कालाचलावयव-नीलाब्जदंष्ट्रधरणी-
लीलास्पदोरुतल-मूलाशियोगिवर-जालाभिवंदित नमः॥७॥
दंभोलितीक्ष्णनख-संभेदितेंद्ररिपु-कुंभींद्र पाहि कृपया
स्तंभार्भकासहन, डिंभाय दत्तवर गंभीरनादनृहरे ।
अंभोधिजानुसर-णांभोजभूपवन-कुंभीनसेशखगराट्-
कुंभींद्रकृत्तिधर-जंभारिषण्मुख-मुखांभोरुहाभिनुत माम्॥८॥
पिंगाक्षविक्रम-तुरंगादिसैन्यचतु-रंगावलिप्तदनुजा
सांगाध्वरस्थबलि-सांगावपातहृषि-तांगामरालिनुत ते ।
शृंगारपादनख-तुंगाग्रभिन्नकन-कांगांडपातितटिनी
तुंगातिमंगल-तरंगाभिभूतभज-कांगाघ वामन नमः॥९॥
ध्यानार्हवामनत-नो नाथ पाहियज-मानासुरेशवसुधा-
दानाय याचनिक, लीनार्थवाग्वशित-नानासदस्यदनुज ।
मीनांकनिर्मल-निशानाथकोटि-लसमानात्ममौंजिगुणकौ-
पीनाच्छसूत्रपद-यानातपत्रकर-कानम्यदंडवरभृत्॥१०॥
धैर्यांबुधे परशु-चर्याधिकृत्तखल-वर्यावनीश्वर महा-
शौर्याभिभूत कृत-वीर्यात्मजातभुज-वीर्यावलेपनिकर ।
भार्यापराधकुपि-तार्याज्ञया गलित-नार्यात्मसूगलतरो
कार्याऽपराधमवि-चार्यार्यमौघजयि-वीर्यामिता मयि दया॥११॥
श्रीराम लक्ष्मणशु-कारामभूरवतु गौरामलामितमहो-
हारामरस्तुत-यशो रामकांतिसुत-नो रामलब्धकलह ।
स्वारामवर्यरिपु-वीरामयर्द्धिकर, चीरामलावृतकटे
स्वारामदर्शनज-मारामयागतसु-घोरामनोरथहर॥१२॥
श्रीकेशव प्रदिश, नाकेशजातकपि-लोकेशभग्नरविभू-
स्तोकेतरार्तिहर-णाकेवलार्थसुख-धीकेकिकालजलद ।
साकेतनाथ वर-पाकेरमुख्यसुत-कोकेन भक्तिमतुलां
राकेंदुबिंबमुख, काकेक्षणापह हृषीकेश तेंऽघ्रिकमले॥१३॥
रामे नृणां हृदभिरामे, नराशिकुलभीमे, मनोऽद्य रमतां
गोमेदिनीजयित-पोऽमेयगाधिसुत-कामे निविष्टमनसि ।
श्यामे सदा त्वयि, जितामेयतापसज-रामे गताधिकसमे
भीमेशचापदल-नामेयशौर्यजित-वामेक्षणे विजयिनि॥१४॥
कांतारगेहखल-कांतारटद्वदन-कांतालकांतकशरं
कांताऽऽर यांबुजनि-कांतान्ववायविधु-कांताश्मभाधिप हरे ।
कांतालिलोलदल-कांताभिशोभितिल-कांता भवंतमनु सा
कांतानुयानजित-कांतारदुर्गकट-कांता रमा त्ववतु माम्॥१५॥
दांतं दशानन-सुतांतं धरामधि-वसंतं प्रचंडतपसा
क्लांतं समेत्य विपि-नांतं त्ववाप यम-नंतं तपस्विपटलम्।
यांतं भवारतिभ-यांतं ममाशु भग-वंतं भरेण भजतात्
स्वांतं सवारिदनु-जांतं धराधरनिशांतं, सतापसवरम्॥१६॥
शंपाभचापलव-कंपास्तशत्रुबल-संपादितामितयशाः
शं पादतामरस-संपातिनोऽलमनु-कंपारसेन दिश मे ।
संपातिपक्षिसह-जं पापरावणह-तं पावनं यदकृथा-
स्त्वं पापकूपपति-तं पाहि मां तदपि, पंपासरस्तटचर॥१७॥
लोलाक्ष्यपेक्षित-सुलीलाकुरंगवध-खेलाकुतूहलगते
स्वालापभूमिजनि-बालापहार्यनुज-पालाद्य भो जय जय ।
बालाग्निदग्धपुर-शालानिलात्मजनि-फालात्तपत्तलरजो
नीलांगदादिकपि-मालाकृतालिपथ-मूलाभ्यतीतजलधे॥१८॥
तूणीरकार्मुक-कृपाणीकिणांकभुज-पाणी रविप्रतिमभाः
क्षोणीधरालिनिभ-घोणीमुखादिघन-वेणीसुरक्षणकरः ।
शोणीभवन्नयन-कोणीजितांबुनिधि-पाणीरितार्हणिमणि-
श्रेणीवृतांघ्रिरिह, वाणीशसूनुवर-वाणीस्तुतो विजयते॥१९॥
हुंकारपूर्वमथ-टंकारनादमति-पंकाऽवधार्यचलिता
लंका शिलोच्चय-विशंका पतद्भिदुर-शंकाऽऽस यस्य धनुषः ।
लंकाधिपोऽमनुत, यं कालरात्रिमिव, शंकाशताकुलधिया
तं कालदंडशत-संकाशकार्मुक-शरांकान्वितं भज हरिम्॥२०॥
धीमानमेयतनु-धामाऽऽर्तमंगलद-नामा रमाकमलभू-
कामारिपन्नगप-कामाहिवैरिगुरु-सोमादिवंद्यमहिमा ।
स्थेमादिनाऽपगत-सीमाऽवतात् सखल-सामाजरावणरिपू
रामाभिधो हरिर-भौमाकृतिः प्रतन-सामादिवेदविषयः॥२१॥
दोषाऽऽत्मभूवशतु-राषाडतिक्रमज-रोषात्मभर्तृवचसा
पाषाणभूतमुनि-योषावरात्मतनु-वेषादिदायिचरणः ।
नैषादयोषिदशु-भेषाकृदंडजनि-दोषाचरादिशुभदो
दोषाऽग्रजन्ममृति-शोषापहोऽवतु सु-दोषांघ्रिजातहननात्॥२२॥
वृंदावनस्थपशु-वृंदावनं विनुत-वृंदारकैकशरणं
नंदात्मजं निहत-निंदाकृदासुरज-नं दामबद्धजठरम् ।
वंदामहे वयम-मंदावदातरुचि-मंदाक्षकारिवदनं
कुंदालिदंतमुत, कंदासितप्रभत-नुं दावराक्षसहरम्॥२३॥
गोपालकोत्सवकृ-तापारभक्ष्यरस-सूपान्नलोपकुपिता-
शापालयापितल-यापांबुदालिसलि-लापायधारितगिरे ।
स्वापांगदर्शनज-तापांगरागयुत-गोपांगनांशुकहृति-
व्यापारशौंड विवि-धापायतस्त्वमव, गोपारिजातहरण॥२४॥
कंसादिकासदव-तंसावनीपतिवि-हिंसाकृतात्मजनुषं
संसारभूतमिह-संसारबद्धमन-सं सारचित्सुखतनुम् ।
संसाधयंतमनि-शं सात्विकव्रजम-हं सादरं बत भजे
हंसादितापसरि-रंसास्पदं परम-हंसादिवंद्यचरणम्॥२५॥
राजीवनेत्र विदु-राजीव मामवतु, राजीवकेतनवशं
वाजीभपत्तिनृप-राजीरथान्वितज-राजीवगर्वशमन ।
वाजीशवाहसित-वाजीशदैत्यतनु-वाजीशभेदकरदो-
र्जाजीकदंबनव-राजीवमुख्यसुम-राजीसुवासितशिरः॥२६॥
कालीहृदावसथ-कालीयकुंडलिप-कालीस्थपादनखरा
व्यालीनवांशुकर-वालीगणारुणित-कालीरुचे जय जय ।
केलीलवापहृत-कालीशदत्तवर-नालीकदृप्तदितिभू-
चूलीकगोपमहि-लालीतनूघुसृण-धूलीकणांकहृदय॥२७॥
कृष्णादिपांडुसुत-कृष्णामनःप्रचुर-तृष्णासुतृप्तिकरवाक्
कृष्णांकपालिरत, कृष्णाभिधाघहर, कृष्णादिषण्महिल भोः ।
पुष्णातु मामजित, निष्णातवार्धिमुद-नुष्णांशुमंडल हरे
जिष्णो गिरींद्रधर-विष्णो वृषावरज, धृष्णो भवान् करुणया॥
रामाशिरोमणिध-रामासमेतबल-रामानुजाभिध रतिं
व्योमासुरांतकर- ते मारतात दिश- मे माधवांघ्रिकमले ।
कामार्तभौमपुर-रामावलिप्रणय-वामाक्षिपीततनुभा
भीमाहिनाथमुख-वैमानिकाभिनुत, भीमाभिवंद्यचरण॥२९॥
सक्ष्वेलभक्ष्यभय-दाक्षिश्रवोगणज-लाक्षेपपाशयमनं
लाक्षागृहज्वलन-रक्षोहिडिंबबक-भैक्षान्नपूर्वविपदः ।
अक्षानुबंधभव-रुक्षाक्षरश्रवण-साक्षान्महिष्यवमती
कक्षानुयानमध-मक्ष्मापसेवनम-भीक्ष्णापहासमसताम्॥३०॥
चक्षाण एव निज-पक्षाग्रभूदशश-ताक्षात्मजादिसुहृदाम्
आक्षेपकारिकुनृ-पाक्षौहिणीशतब-लाक्षोभदीक्षितमनाः ।
तार्क्ष्यासिचापशर-तीक्ष्णारिपूर्वनिज-लक्ष्माणि चाप्यगणयन्
वृक्षालयध्वज-रिरक्षाकरो जयति, लक्ष्मीपतिर्यदुपतिः॥३१॥
बुद्धावतार कवि-बद्धानुकंप कुरु, बद्धांजलौ मयि दयां
शौद्धोदनिप्रमुख-सैध्दांतिकासुगम-बौद्धागमप्रणयन ।
क्रुद्धाहितासुहृति-सिद्धासिखेटधर, शुद्धाश्वयान कमला-
शुद्धांत मां रुचिपि-नद्धाखिलांगनिज-मद्धाऽव कल्क्यभिध भोः॥३२॥
सारंगकृत्तिधर-सारंगवारिधर, सारंगराजवरदा-
सारं गदारितर-सारं गतात्ममद-सारं गतौषधबलम् ।
सारंगवत्कुसुम-सारं गतं च तव, सारंगमांघ्रियुगलं
सारंगवणमप-सारंगताब्जमद-सारं गदिंस्त्वमव माम्॥३३॥
ग्रीवास्यवाहतनु-देवांडजादिदश-भावाभिरामचरितं
भावातिभव्यशुभ-धीवादिराजयति-भूवाग्विलासनिलयम् ।
श्रीवागधीशमुख-देवाभिनम्यहरि-सेवार्चनेषु पठतां
आवास एव भवि-ताऽवाग्भवेतरसु-रावासलोकनिकरे॥३४॥
॥ इति श्रीवादिराजतीर्थविरचिता दशावतारस्तुतिः ॥
*********
