ಶ್ರೀಶಾಕಮ್ಭರೀಪಂಚಕಮ್
ಶ್ರೀವಲ್ಲಭಸೋದರೀ ಶ್ರಿತಜನಶ್ಚಿದ್ದಾಯಿನೀ ಶ್ರೀಮತೀ
ಶ್ರೀಕಂಠಾರ್ಧಶರೀರಗಾ ಶ್ರುತಿಲಸನ್ಮಾಣಿಕ್ಯತಾಟಂಕಕಾ ।
ಶ್ರೀಚಕ್ರಾನ್ತರವಾಸಿನೀ ಶ್ರುತಿಶಿರಃ ಸಿದ್ಧಾನ್ತಮಾರ್ಗಪ್ರಿಯಾ
ಶ್ರೀವಾಣೀ ಗಿರಿಜಾತ್ಮಿಕಾ ಭಗವತೀ ಶಾಕಮ್ಭರೀ ಪಾತು ಮಾಮ್ ॥ 1॥
ಶಾನ್ತಾ ಶಾರದಚನ್ದ್ರಸುನ್ದರಮುಖೀ ಶಾಲ್ಯನ್ನಭೋಜ್ಯಪ್ರಿಯಾ
ಶಾಕೈಃ ಪಾಲಿತವಿಷ್ಟಪಾ ಶತದೃಶಾ ಶಾಕೋಲ್ಲಸದ್ವಿಗ್ರಹಾ ।
ಶ್ಯಾಮಾಂಗೀ ಶರಣಾಗತಾರ್ತಿಶಮನೀ ಶಕ್ರಾದಿಭಿಃ ಶಂಸಿತಾ
ಶಂಕರ್ಯಷ್ಟಫಲಪ್ರದಾ ಭಗವತೀ ಶಾಕಮ್ಭರೀ ಪಾತು ಮಾಮ್ ॥ 2॥
ಕಂಜಾಕ್ಷೀ ಕಲಶೀ ಭವಾದಿವಿನುತಾ ಕಾತ್ಯಾಯನೀ ಕಾಮದಾ
ಕಲ್ಯಾಣೀ ಕಮಲಾಲಯಾ ಕರಕೃತಾಂ ಭೋಜಾಸಿಖೇಟಾಭಯಾ ।
ಕಾದಂವಾಸವಮೋದಿನೀ ಕುಚಲಸತ್ಕಾಶ್ಮೀರಜಾಲೇಪನಾ
ಕಸ್ತೂರೀತಿಲಕಾಂಚಿತಾ ಭಗವತೀ ಶಾಕಮ್ಭರೀ ಪಾತು ಮಾಮ್ ॥ 3॥
ಭಕ್ತಾನನ್ದವಿಧಾಯಿನೀ ಭವಭಯಪ್ರಧ್ವಂಸಿನೀ ಭೈರವೀ
ಭರ್ಮಾಲಂಕೃತಿಭಾಸುರಾ ಭುವನಭೀಕೃದ್ ದುರ್ಗದರ್ಪಾಪಹಾ ।
ಭೂಭೃನ್ನಾಯಕನನ್ದಿನೀ ಭುವನಸೂರ್ಭಾಸ್ಯತ್ಪರಃ ಕೋಟಿಭಾ
ಭೌಮಾನನ್ದ ವಿಹಾರಿಣೀ ಭಗವತೀ ಶಾಕಮ್ಭರೀ ಪಾತು ಮಾಮ್ ॥ 4॥
ರೀತಾಮ್ನಾಯಶಿಖಾಸು ರಕ್ತದಶನಾ ರಾಜೀವಪತ್ರೇಕ್ಷಣಾ
ರಾಕಾರಾಜಕರಾವದಾತಹಸಿತಾ ರಾಕೇನ್ದುಬಿಮ್ಬಸ್ಥಿತಾ ।
ರುದ್ರಾಣೀ ರಜನೀಕರಾರ್ಭಕಲಸನ್ಮೌಲೀ ರಜೋರುಪಿಣೀ
ರಕ್ಷಃ ಶಿಕ್ಷಣದೀಕ್ಷಿತಾ ಭಗವತೀ ಶಾಕಮ್ಭರೀ ಪಾತು ಮಾಮ್ ॥ 5॥
ಶ್ಲೋಕಾನಾಮಿಹ ಪಂಚಕಂ ಪಠತಿ ಯಃ ಸ್ತೋತ್ರಾತ್ಮಕಂ ಶರ್ಮದಂ
ಸರ್ವಾಪತ್ತಿವಿನಾಶಕಂ ಪ್ರತಿದಿನಂ ಭಕ್ತ್ಯಾ ತ್ರಿಸನ್ಧ್ಯಂ ನರಃ ।
ಆಯುಃಪೂರ್ಣಮಪಾರಮರ್ಥಮಮಲಾಂ ಕೀರ್ತಿ ಪ್ರಜಾಮಕ್ಷಯಾಂ
ಶಾಕಮ್ಭರ್ಯನುಕಮ್ಪಯಾ ಸ ಲಭತೇ ವಿದ್ಯಾಂ ಚ ವಿಶ್ವಾರ್ಥಕಾಮ್ ॥ 6॥
॥ ಇತಿ ಶ್ರೀಮಚ್ಛಂಕರಾಚಾರ್ಯವಿರಚಿತಂ ಶಾಕಮ್ಭರೀಪಂಚಕಂ ಸಮ್ಪೂರ್ಣಮ್ ॥
*************
श्री शाकम्भरी पञ्चकम्
श्रीवल्लभसोदरी श्रितजनश्चिद्दायिनी श्रीमती
श्रीकण्ठार्धशरीरगा श्रुतिलसन्माणिक्यताटङ्कका ।
श्रीचक्रान्तरवासिनी श्रुतिशिरः सिद्धान्तमार्गप्रिया
श्रीवाणी गिरिजात्मिका भगवती शाकम्भरी पातु माम् ॥ १॥
शान्ता शारदचन्द्रसुन्दरमुखी शाल्यन्नभोज्यप्रिया
शाकैः पालितविष्टपा शतदृशा शाकोल्लसद्विग्रहा ।
श्यामाङ्गी शरणागतार्तिशमनी शक्रादिभिः शंसिता
शङ्कर्यष्टफलप्रदा भगवती शाकम्भरी पातु माम् ॥ २॥
कञ्जाक्षी कलशी भवादिविनुता कात्यायनी कामदा
कल्याणी कमलालया करकृतां भोजासिखेटाभया ।
कादंवासवमोदिनी कुचलसत्काश्मीरजालेपना
कस्तूरीतिलकाञ्चिता भगवती शाकम्भरी पातु माम् ॥ ३॥
भक्तानन्दविधायिनी भवभयप्रध्वंसिनी भैरवी
भर्मालङ्कृतिभासुरा भुवनभीकृद् दुर्गदर्पापहा ।
भूभृन्नायकनन्दिनी भुवनसूर्भास्यत्परः कोटिभा
भौमानन्द विहारिणी भगवती शाकम्भरी पातु माम् ॥ ४॥
रीताम्नायशिखासु रक्तदशना राजीवपत्रेक्षणा
राकाराजकरावदातहसिता राकेन्दुबिम्बस्थिता ।
रुद्राणी रजनीकरार्भकलसन्मौली रजोरुपिणी
रक्षः शिक्षणदीक्षिता भगवती शाकम्भरी पातु माम् ॥ ५॥
श्लोकानामिह पञ्चकं पठति यः स्तोत्रात्मकं शर्मदं
सर्वापत्तिविनाशकं प्रतिदिनं भक्त्या त्रिसन्ध्यं नरः ।
आयुःपूर्णमपारमर्थममलां कीर्ति प्रजामक्षयां
शाकम्भर्यनुकम्पया स लभते विद्यां च विश्वार्थकाम् ॥ ६॥
॥ इति श्रीमच्छङ्कराचार्यविरचितं शाकम्भरीपञ्चकं सम्पूर्णम् ॥
********
