ಶ್ರೀ ಪರಶುರಾಮಾಷ್ಟೋತ್ತರಶತನಾಮ ಸ್ತೋತ್ರಮ್
ರಾಮೋ ರಾಜಾಟವೀವಹ್ನಿ ರಾಮಚನ್ದ್ರಪ್ರಸಾದಕಃ ।
ರಾಜರಕ್ತಾರುಣಸ್ನಾತೋ ರಾಜೀವಾಯತಲೋಚನಃ ॥ 1॥
ರೈಣುಕೇಯೋ ರುದ್ರಶಿಷ್ಯೋ ರೇಣುಕಾಚ್ಛೇದನೋ ರಯೀ ।
ರಣಧೂತಮಹಾಸೇನೋ ರುದ್ರಾಣೀಧರ್ಮಪುತ್ರಕಃ ॥ 2॥
ರಾಜತ್ಪರಶುವಿಚ್ಛಿನ್ನಕಾರ್ತವೀರ್ಯಾರ್ಜುನದ್ರುಮಃ ।
ರಾತಾಖಿಲರಸೋ ರಕ್ತಕೃತಪೈತೃಕತರ್ಪಣಃ ॥ 3॥
ರತ್ನಾಕರಕೃತಾವಾಸೋ ರತೀಶಕೃತವಿಸ್ಮಯಃ ।
ರಾಗಹೀನೋ ರಾಗದೂರೋ ರಕ್ಷಿತಬ್ರಹ್ಮಚರ್ಯಕಃ ॥ 4॥
ರಾಜ್ಯಮತ್ತಕ್ಷತ್ತ್ರಬೀಜ ಭರ್ಜನಾಗ್ನಿಪ್ರತಾಪವಾನ್ ।
ರಾಜದ್ಭೃಗುಕುಲಾಮ್ಬೋಧಿಚನ್ದ್ರಮಾ ರಂಜಿತದ್ವಿಜಃ ॥ 5॥
ರಕ್ತೋಪವೀತೋ ರಕ್ತಾಕ್ಷೋ ರಕ್ತಲಿಪ್ತೋ ರಣೋದ್ಧತಃ ।
ರಣತ್ಕುಠಾರೋ ರವಿಭೂದಂಡಾಯಿತ ಮಹಾಭುಜಃ ॥ 6॥
ರಮಾನಾಧಧನುರ್ಧಾರೀ ರಮಾಪತಿಕಲಾಮಯಃ ।
ರಮಾಲಯಮಹಾವಕ್ಷಾ ರಮಾನುಜಲಸನ್ಮುಖಃ ॥ 7॥
ರಸೈಕಮಲ್ಲೋ ರಸನಾಽವಿಷಯೋದ್ದಂಡ ಪೌರುಷಃ ।
ರಾಮನಾಮಶ್ರುತಿಸ್ರಸ್ತಕ್ಷತ್ರಿಯಾಗರ್ಭಸಂಚಯಃ ॥ 8॥
ರೋಷಾನಲಮಯಾಕಾರೋ ರೇಣುಕಾಪುನರಾನನಃ ।
ರಾಧೇಯಚಾತಕಾಮ್ಭೋದೋ ರುದ್ಧಚಾಪಕಲಾಪಗಃ ॥ 9॥
ರಾಜೀವಚರಣದ್ವನ್ದ್ವಚಿಹ್ನಪೂತಮಹೇನ್ದ್ರಕಃ ।
ರಾಮಚನ್ದ್ರನ್ಯಸ್ತತೇಜಾ ರಾಜಶಬ್ದಾರ್ಧನಾಶನಃ ॥ 10॥
ರಾದ್ಧದೇವದ್ವಿಜವ್ರಾತೋ ರೋಹಿತಾಶ್ವಾನನಾರ್ಚಿತಃ ।
ರೋಹಿತಾಶ್ವದುರಾಧರ್ಷೋ ರೋಹಿತಾಶ್ವಪ್ರಪಾವನಃ ॥ 11
ರಾಮನಾಮಪ್ರಧಾನಾರ್ಧೋ ರತ್ನಾಕರಗಭೀರಧೀಃ ।
ರಾಜನ್ಮೌಂಜೀಸಮಾಬದ್ಧ ಸಿಂಹಮಧ್ಯೋ ರವಿದ್ಯುತಿಃ ॥ 12॥
ರಜತಾದ್ರಿಗುರುಸ್ಥಾನೋ ರುದ್ರಾಣೀಪ್ರೇಮಭಾಜನಮ್ ।
ರುದ್ರಭಕ್ತೋ ರೌದ್ರಮೂರ್ತೀ ರುದ್ರಾಧಿಕಪರಾಕ್ರಮಃ ॥ 13॥
ರವಿತಾರಾಚಿರಸ್ಥಾಯೀ ರಕ್ತದೇವರ್ಷಿಭಾವನಃ ।
ರಮ್ಯೋ ರಮ್ಯಗುಣೋ ರಕ್ತೋ ರಾತಭಕ್ತಾಖಿಲೇಪ್ಸಿತಃ ॥ 14॥
ರಚಿತಸ್ವರ್ಣಸೋಪಾನೋ ರನ್ಧಿತಾಶಯವಾಸನಃ ।
ರುದ್ಧಪ್ರಾಣಾದಿಸಂಚಾರೋ ರಾಜದ್ಬ್ರಹ್ಮಪದಸ್ಥಿತಃ ॥ 15॥
ರತ್ನಸೂನುಮಹಾಧೀರೋ ರಸಾಸುರಶಿಖಾಮಣಿಃ ।
ರಕ್ತಸಿದ್ಧೀ ರಮ್ಯತಪಾ ರಾತತೀರ್ಥಾಟನೋ ರಸೀ ॥ 16॥
ರಚಿತಭ್ರಾತೃಹನನೋ ರಕ್ಷಿತಭಾತೃಕೋ ರಣೀ ।
ರಾಜಾಪಹೃತತಾತೇಷ್ಟಿಧೇನ್ವಾಹರ್ತಾ ರಸಾಪ್ರಭುಃ ॥ 17॥
ರಕ್ಷಿತಬ್ರಾಹ್ಮ್ಯಸಾಮ್ರಾಜ್ಯೋ ರೌದ್ರಾಣೇಯಜಯಧ್ವಜಃ ।
ರಾಜಕೀರ್ತಿಮಯಚ್ಛತ್ರೋ ರೋಮಹರ್ಷಣವಿಕ್ರಮಃ ॥ 18॥
ರಾಜಶೌರ್ಯರಸಾಮ್ಭೋಧಿಕುಮ್ಭಸಮ್ಭೂತಿಸಾಯಕಃ ।
ರಾತ್ರಿನ್ದಿವಸಮಾಜಾಗ್ರ ತ್ಪ್ರತಾಪಗ್ರೀಷ್ಮಭಾಸ್ಕರಃ ॥ 19॥
ರಾಜಬೀಜೋದರಕ್ಷೋಣೀಪರಿತ್ಯಾಗೀ ರಸಾತ್ಪತಿಃ ।
ರಸಾಭಾರಹರೋ ರಸ್ಯೋ ರಾಜೀವಜಕೃತಕ್ಷಮಃ ॥ 20॥
ರುದ್ರಮೇರುಧನುರ್ಭಂಗ ಕೃದ್ಧಾತ್ಮಾ ರೌದ್ರಭೂಷಣಃ ।
ರಾಮಚನ್ದ್ರಮುಖಜ್ಯೋತ್ಸ್ನಾಮೃತಕ್ಷಾಲಿತಹೃನ್ಮಲಃ ॥ 21॥
ರಾಮಾಭಿನ್ನೋ ರುದ್ರಮಯೋ ರಾಮರುದ್ರೋ ಭಯಾತ್ಮಕಃ ।
ರಾಮಪೂಜಿತಪಾದಾಬ್ಜೋ ರಾಮವಿದ್ವೇಷಿಕೈತವಃ ॥ 22॥
ರಾಮಾನನ್ದೋ ರಾಮನಾಮೋ ರಾಮೋ ರಾಮಾತ್ಮನಿರ್ಭಿದಃ ।
ರಾಮಪ್ರಿಯೋ ರಾಮತೃಪ್ತೋ ರಾಮಗೋ ರಾಮವಿಶ್ರಮಃ ॥ 23॥
ರಾಮಜ್ಞಾನಕುಠಾರಾತ್ತ ರಾಜಲೋಕಮಹಾತಮಾಃ ।
ರಾಮಾತ್ಮಮುಕ್ತಿದೋ ರಾಮೋ ರಾಮದೋ ರಾಮಮಂಗಲಃ ॥ 24॥
ಮಂಗಲಂ ಜಾಮದಗ್ನ್ಯಾಯ ಕಾರ್ತವೀರ್ಯಾರ್ಜುನಚ್ಛಿದೇ ।
ಮಂಗಲಂ ಪರಮೋದಾರ ಸದಾ ಪರಶುರಾಮ ತೇ ॥ 25॥
ಮಂಗಲಂ ರಾಜಕಾಲಾಯ ದುರಾಧರ್ಷಾಯ ಮಂಗಲಂ ।
ಮಂಗಲಂ ಮಹನೀಯಾಯ ಜಾಮದಗ್ನ್ಯಾಯ ಮಂಗಲಮ್ ॥ 26॥
ಜಮದಗ್ನಿ ತನೂಜಾಯ ಜಿತಾಖಿಲಮಹೀಭೃತೇ ।
ಜಾಜ್ವಲ್ಯಮಾನಾಯುಧಾಯ ಜಾಮದಗ್ನ್ಯಾಯ ಮಂಗಲಮ್ ॥ 27॥ ॥
ಇತಿ ರಾಮೇಣಕೃತಂ ಪರಾಭವಾಬ್ದೇ ವೈಶಾಖಶುದ್ಧ ತ್ರಿತೀಯಾಯಾಂ ಪರಶುರಾಮ ಜಯನ್ತ್ಯಾಂ ರಕಾರಾದಿ ಶ್ರೀ ಪರಶುರಾಮಾಷ್ಟೋತ್ತರಶತಮ್ ಶ್ರೀ ಹಯಗ್ರೀವಾಯ ಸಮರ್ಪಿತಮ್ ॥
*******
