ಶ್ರೀಶಂಕರಾಚಾರ್ಯಾಷ್ಟಕಮ್
ಶ್ರೀಗಣೇಶಾಯ ನಮಃ ।
ಅಥ ಶ್ರೀಶಂಕರಾಚಾರ್ಯಾಷ್ಟಕಮ್ ।
ಧರ್ಮೋ ಬ್ರಹ್ಮೇತ್ಯುಭಯವಿಷಯಂ ಜ್ಞಾಪಯತ್ಯೇವ ವೇದೋ
ನಾಯಂ ಲೋಕೇ ಪುರುಷಮತಿಜಃ ಕಾವ್ಯಕಲ್ಪಾನುಕಲ್ಪಃ ।
ಪ್ರಾಮಾಣ್ಯಂ ಚ ಸ್ವಯಮಿಹ ಭವೇದಿತ್ಯನೂದ್ದಿಷ್ಟವನ್ತಂ
ಭಾಷ್ಯಾಚಾರ್ಯಂ ಪ್ರಣಮತ ಸದಾ ಶಂಕರಂ ನ್ಯಾಸಿವರ್ಯಮ್ ॥ 1॥
ಧರ್ಮೋ ನಿತ್ಯಂ ವಿಧಿವಿಷಯತೋ ಜ್ಞಾಪಯತ್ಯೇಷ ವೇದ-
ಸ್ತಸ್ಮಿನ್ನಿಷ್ಠಾ ದ್ವಿವಿಧಮುದಿತಾ ಕಾಮಜಾಕಾಮಜಾಭ್ಯಾಮ್ ।
ಕಾಮ್ಯಂ ಕರ್ಮ ತ್ರಿದಿವಭುವನಾಯೇತ್ಯನೂದ್ದಿಷ್ಟವನ್ತಂ
ಭಾಷ್ಯಾಚಾರ್ಯಂ ಪ್ರಣಮತ ಸದಾ ಶಂಕರಂ ನ್ಯಾಸಿವರ್ಯಮ್ ॥ 2॥
ಕಾಮಾಪೇತಂ ಭವತಿ ಮನಸಃ ಶೋಧನಾಯಾತ್ರ ಲೋಕೇ
ತಸ್ಮಾನ್ನೂನಂ ವಿವಿದಿಷತಿ ನಾ ಸಾಧನೈಃ ಸಂಯುತಃ ಸನ್ ।
ತಸ್ಮಾದ್ಧರ್ಮಂ ಚರತ ಮನುಜಾ ಇತ್ಯನೂದ್ದಿಷ್ಟವನತಂ
ಭಾಷ್ಯಾಚಾರ್ಯಂ ಪ್ರಣಮತ ಸದಾ ಶಂಕರಂ ನ್ಯಾಸಿವರ್ಯಮ್ ॥ 3॥
ವೇದೋ ಯಸ್ಮಿನ್ ವಿಧಿಮುಖಭಿದಾ ಷಡ್ವಿಧಃ ಶಾಸ್ತ್ರಸಿದ್ಧೋ
ವೈಧೋ ಭೇದೋ ದಶಹತಶತಂ ಪೂರ್ವತನ್ತ್ರೇ ಪ್ರಸಿದ್ಧಃ ।
ಧರ್ಮಾದ್ಯರ್ಥಃ ಪ್ರಮಿತಿಪುರತಶ್ಚೇತ್ಯನೂದ್ದಿಷ್ಟವನ್ತಂ
ಭಾಷ್ಯಾಚಾರ್ಯಂ ಪ್ರಣಮತ ಸದಾ ಶಂಕರಂ ನ್ಯಾಸಿವರ್ಯಮ್ ॥ 4॥
ಅದ್ವೈತಾರ್ಥಗ್ರಹಣಪಟುತಾಂ ಪೂರ್ವತನ್ತ್ರಾನುಕೂಲಂ
ಶಾಸ್ತ್ರಾಜ್ಜ್ಞಾತ್ವಾ ಕುರುತ ಸುಧಿಯೋ ಧರ್ಮಚರ್ಯಾಂ ಯಥಾರ್ಥಮ್ ।
ನೋಚೇತ್ಕಷ್ಟಂ ನರಕಗಮನಂ ಚೇತ್ಯನೂದ್ದಿಷ್ಟವನ್ತಂ
ಭಾಷ್ಯಾಚಾರ್ಯಂ ಪ್ರಣಮತ ಸದಾ ಶಂಕರಂ ನ್ಯಾಸಿವರ್ಯಮ್ ॥ 5॥
ದ್ವೈತಂ ಮಿಥ್ಯಾ ಯದಿ ಭವತಿ ಚೇತ್ಪ್ರಾಪ್ಯತೇಽದ್ವೈತಸಿದ್ಧಿ-
ಸ್ತಸ್ಯಾಃ ಪ್ರಾಪ್ತ್ಯೈ ಪ್ರಥಮಮಧುನಾ ಸಾಧ್ಯತೇ ದ್ವೈತನಿಷ್ಠಮ್ ।
ಮಿಥ್ಯಾತ್ವಂ ಯಚ್ಛ್ರುತಿಶತಗತಂ ಚೇತ್ಯನೂದ್ದಿಷ್ಟವನ್ತಂ
ಭಾಷ್ಯಾಚಾರ್ಯಂ ಪ್ರಣಮತ ಸದಾ ಶಂಕರಂ ನ್ಯಾಸಿವರ್ಯಮ್ ॥ 6॥
ನಾನಾ ನೇಹೇತ್ಯುಪದಿಶತಿ ವಾಗ್ದ್ವೈತಮಿಥ್ಯಾತ್ವಸಿದ್ಧ್ಯೈ
ದ್ವೈತಂ ಮಿಥ್ಯಾ ಪರಿಮಿತಿಗತೇರ್ದೃಶ್ಯತಃ ಸ್ವಪ್ನವತ್ಸ್ಯಾತ್ ।
ಏವಂರೂಪಾ ಹ್ಯನುಮಿತಿಮಿತಿಶೇತ್ಯನೂದ್ದಿಷ್ಟವನ್ತಂ
ಭಾಷ್ಯಾಚಾರ್ಯಂ ಪ್ರಣಮತ ಸದಾ ಶಂಕರಂ ನ್ಯಾಸಿವರ್ಯಮ್ ॥ 7॥
ಏವಂ ಮಿಥ್ಯಾ ಜಗದಿದಮಿತಿ ಜ್ಞಾಯತಾಂ ನಿಶ್ಚಯೇನ
ಬ್ರಹ್ಮಾಹಂ ಚೇತ್ಯಲಮನುಭವಃ ಪ್ರಾಪ್ಯತಾಂ ವೇದವಾಕ್ಯಾತ್ ।
ಶಾನ್ತೋ ಭೂಯಾತ್ ತದನು ಚ ಸುಖಂ ಚೇತ್ಯನೂದ್ದಿಷ್ಟವನ್ತಂ
ಶಾನ್ತ್ಯಾನನ್ದಃ ಪ್ರಣಮತಿ ಯತಿಃ ಶಂಕರಾಚಾರ್ಯಮೂರ್ತಿಮ್ ॥ 8॥
ಶಾನ್ತ್ಯಾನನ್ದಸರಸ್ವತ್ಯಾ ಕೃತಂ ಶಾಂಕರಮಷ್ಟಕಮ್ ।
ಯಃ ಪಠೇದ್ಭಕ್ತಿಸಂಯುಕ್ತಃ ಸ ಸರ್ವಾಂ ಸಿದ್ಧಿಮಾಪ್ನುಯಾತ್ ॥ 9॥
ಇತಿ ಶ್ರೀಪರಮಹಂಸಪರಿವ್ರಾಜಕಾಚಾರ್ಯಶ್ರೀಶಾನ್ತ್ಯಾನನ್ದಸರಸ್ವತಿವಿರಚಿತಂ
ಶ್ರೀಶಂಕರಾಚಾರ್ಯಾಷ್ಟಕಂ ಸಮಾಪ್ತಮ್ ॥
**********
श्री शङ्कराचार्याष्टकम्
श्रीगणेशाय नमः ।
अथ श्रीशङ्कराचार्याष्टकम् ।
धर्मो ब्रह्मेत्युभयविषयं ज्ञापयत्येव वेदो
नायं लोके पुरुषमतिजः काव्यकल्पानुकल्पः ।
प्रामाण्यं च स्वयमिह भवेदित्यनूद्दिष्टवन्तं
भाष्याचार्यं प्रणमत सदा शङ्करं न्यासिवर्यम् ॥ १॥
धर्मो नित्यं विधिविषयतो ज्ञापयत्येष वेद-
स्तस्मिन्निष्ठा द्विविधमुदिता कामजाकामजाभ्याम् ।
काम्यं कर्म त्रिदिवभुवनायेत्यनूद्दिष्टवन्तं
भाष्याचार्यं प्रणमत सदा शङ्करं न्यासिवर्यम् ॥ २॥
कामापेतं भवति मनसः शोधनायात्र लोके
तस्मान्नूनं विविदिषति ना साधनैः संयुतः सन् ।
तस्माद्धर्मं चरत मनुजा इत्यनूद्दिष्टवनतं
भाष्याचार्यं प्रणमत सदा शङ्करं न्यासिवर्यम् ॥ ३॥
वेदो यस्मिन् विधिमुखभिदा षड्विधः शास्त्रसिद्धो
वैधो भेदो दशहतशतं पूर्वतन्त्रे प्रसिद्धः ।
धर्माद्यर्थः प्रमितिपुरतश्चेत्यनूद्दिष्टवन्तं
भाष्याचार्यं प्रणमत सदा शङ्करं न्यासिवर्यम् ॥ ४॥
अद्वैतार्थग्रहणपटुतां पूर्वतन्त्रानुकूलं
शास्त्राज्ज्ञात्वा कुरुत सुधियो धर्मचर्यां यथार्थम् ।
नोचेत्कष्टं नरकगमनं चेत्यनूद्दिष्टवन्तं
भाष्याचार्यं प्रणमत सदा शङ्करं न्यासिवर्यम् ॥ ५॥
द्वैतं मिथ्या यदि भवति चेत्प्राप्यतेऽद्वैतसिद्धि-
स्तस्याः प्राप्त्यै प्रथममधुना साध्यते द्वैतनिष्ठम् ।
मिथ्यात्वं यच्छ्रुतिशतगतं चेत्यनूद्दिष्टवन्तं
भाष्याचार्यं प्रणमत सदा शङ्करं न्यासिवर्यम् ॥ ६॥
नाना नेहेत्युपदिशति वाग्द्वैतमिथ्यात्वसिद्ध्यै
द्वैतं मिथ्या परिमितिगतेर्दृश्यतः स्वप्नवत्स्यात् ।
एवंरूपा ह्यनुमितिमितिशेत्यनूद्दिष्टवन्तं
भाष्याचार्यं प्रणमत सदा शङ्करं न्यासिवर्यम् ॥ ७॥
एवं मिथ्या जगदिदमिति ज्ञायतां निश्चयेन
ब्रह्माहं चेत्यलमनुभवः प्राप्यतां वेदवाक्यात् ।
शान्तो भूयात् तदनु च सुखं चेत्यनूद्दिष्टवन्तं
शान्त्यानन्दः प्रणमति यतिः शङ्कराचार्यमूर्तिम् ॥ ८॥
शान्त्यानन्दसरस्वत्या कृतं शाङ्करमष्टकम् ।
यः पठेद्भक्तिसंयुक्तः स सर्वां सिद्धिमाप्नुयात् ॥ ९॥
इति श्रीपरमहंसपरिव्राजकाचार्यश्रीशान्त्यानन्दसरस्वतिविरचितं
श्रीशङ्कराचार्याष्टकं समाप्तम् ॥
*********
