ನಕ್ಷತ್ರ ಮಾಲಿಕಾ नक्षत्र मालिका nakshatra maalikaa

ನಕ್ಷತ್ರ ಮಾಲಿಕಾ 

ಶ್ರೀಮದಭಿರಾಮವರಗುರುಭಿರನುಗೃಹೀತಾ
ಶ್ರೀರಸ್ತು ।
ಶ್ರೀಮತೇ ಹಯಗ್ರೀವಾಯನಮಃ ।
ಶ್ರೀಮತೇ ರಾಮಾನುಜಾಯ ನಮಃ ॥

ಅಸ್ಮಾಸು ವತ್ಸಲತಯಾ ಕೃಪಯಾ ಚ ಭೂಯಃ
     ಸ್ವೇಚ್ಛಾವತೀರ್ಣಮಿ(ವ) ಹ ಸೌಮ್ಯವರಂ ಮುನೀನ್ದ್ರಮ್ ।
ಆಚಾರ್ಯಪೌತ್ರಮಭಿರಾಮವರಾಭಿಧಾನಂ
     ಅಸ್ಮದ್ಗುರುಂ ಪರಮಕಾರುಣಿಕಂ ನಮಾಮಿ ॥

ಶ್ರೀಮಾನ್ ಪರಾಂಕುಶಮುನಿರ್ಜೀಯಾತ್ ಯಜ್ಜ್ಞಾನಮುದ್ರಯಾ ।
ನೇನ್ದ್ರಿಯಾಶ್ವಯುಜೋ ನೄಣಾಂ ನಿತ್ಯಂ ವಿಷಯವೀಥಯಃ ॥ 1॥

ಯದುರಸಿ ಭರಣೀಯಾ ಸ್ರಗ್ವಿಕಸಿತವಕುಲಾನದ್ಧಾ ।
ಸ ಜಯತಿ ಮಹಿಮಾ ನಾಥೋ ಮುರರಿಪುಪದಸಕ್ತೋ ನಃ ॥ 2॥

ನನ್ತಾಽನನ್ತಾಂಘ್ರಿನಲಿನಯುಗ್ಮೇ ಕರ್ತಾ ಲೋಕಾರ್ತಿಕಬಲನಾನಾಮ್ ।
ಭದ್ರಾಯ ದ್ರಾವಿಡನಿಗಮಾನಾಂ ದ್ರಷ್ಟಾ ಪುಷ್ಟಾಯ ವಕುಲಭೃತ್ಸ್ಯಾತ್ ॥ 3॥

ಸ್ಯಾದೇವ ಸಾ ಮೇ ಫಣಿತಿಶ್ಶಠಾರೇಃ ಯಯೋದಿತೋಚ್ಚೈಸ್ಸರಣಿರ್ಜನಾನಾಮ್ ।
ಆರೋಹಿಣೀ ನಾಪ್ಯವರೋಹಿಣೀ ಹಿ ವೇದೋದಿತಾ ತು ದ್ವಯಮಭ್ಯುಪೈತಿ ॥ 4॥

ತಿಲಕಮಾಹ ನ ಕಾಚಿದಪಿ ಶ್ರುತೌ ತ್ರಿಜತಾಮೃಗಶೀರ್ಷಸಮುತ್ಥಿತಾ ।
ಸ್ಫುಟತರಂ ವಕುಲಾಭರಣೀಯವಾಕ್ ಪುರುಷಮಾದಿಮಶೇಷಪದೈರಪಿ ॥ 5॥

ಪಿತ್ರಾದಿಸ್ಸಕಲವಿಧೋಽಪಿ ಬನ್ಧುವರ್ಗಃ ಯಸ್ಯಾಸೀತ್ಸರಸಿಜವಾಸಿನೀಸಹಾಯಃ ।
ಆವಿಸ್ಸ್ಯುರ್ಘನಕರುಣಾರಸಾವಸೇಕೈರಾರ್ದ್ರಾ ಮೇ ವಕುಲಭೃತಃ ಕಟಾಕ್ಷಪಾತಾಃ ॥ 6॥

ತಾಮಾಶ್ರಯಾಮಿ ಕರುಣಾಂ ವಕುಲಾಭಿರಾಮಾಂ
     ಯಾಽಸೌ ಪುನರ್ವಸುಮತೀವಲಯೇಽವತೀರ್ಣಾ ।
ಪ್ರಜ್ಞಾದೃಶೋನ್ಮಿಷಿತಯಾ ಪ್ರಥಿತಾನುಭಾವಾ
     ಜ್ಯೋತಿಃ ಪರಂ ಯದನಿದಂ ತದಿದಂ ಚಕಾರ ॥ 7॥

ರಚಿತವತಿ ರಮಾಯಾ ನಾಯಕಸ್ಯಾಂಘ್ರಿಪುಷ್ಯತ್-
     ಪ್ರಣಯರಸಸುಧಾಬ್ಧಿಸ್ರೋತಸಿ ಸ್ವೈರಗಾಹಮ್ ।
ಪ್ರಭವತಿ ಕಲಿಘರ್ಮಪ್ರಾವೃಷೇಣ್ಯಾಮ್ಬುವಾಹೇ
     ವಕುಲಧರಮುನೀನ್ದ್ರೇ ತಾಪವಾರ್ತಾ ಕಥಂ ನಃ ॥ 8॥

ನಮಜ್ಜನಸ್ಯ ಚಿತ್ತಭಿತ್ತಿಭಕ್ತಿಚಿತ್ರತೂಲಿಕಾ
     ಭವಾಹಿವೀರ್ಯಭಂಜನೇ ನರೇನ್ದ್ರಮನ್ತ್ರಯನ್ತ್ರಣಾ ।
ಪ್ರಪನ್ನಲೋಕಕೈರವಪ್ರಸನ್ನಚಾರುಚನ್ದ್ರಿಕಾ
     ಶಠಾರಿಹಸ್ತಮುದ್ರಿಕಾ ಹಠಾದ್ಧುನೋತು ಮೇ ತಮಃ ॥ 9॥

ಮನಸ್ಸ್ಫಟಿಕದರ್ಪಣಪ್ರತಿಫಲತ್ಪರಬ್ರಹ್ಮಣಃ
     ಪ್ರದರ್ಶನಮಿವಾಚರನ್ ಪ್ರಥಿತಬೋಧಮುದ್ರಾಂಕಿತಃ ।
ಸತಾಮಭಯಶಂಸಿತಾ ಭವಭಯಾಭಿತಪ್ತಾತ್ಮನಾಮಘಾನಿ
     ಶಮಯೇತ ನಃ ಶಠರಿಪೋರವಾಮಃ ಕರಃ ॥ 10॥

ರಮಯತು ಶಠಶತ್ರುರತ್ಯುನ್ನತಾಚಾರಯುಕ್ತೈರ್ಜನೈಃ
     ಅವನತಪದಪದ್ಮಯುಗ್ಮೋಽನುಕಮ್ಪಾಮೃತಾಮ್ಭೋನಿಧಿಃ ।
ಬಹುವಿಧಕೃತಪೂರ್ವಫಲ್ಗುನ್ಯಗಾಚಾರಚಿನ್ತಾಕುಲಂ
     ಹೃದಯಮಸದೃಶಾತ್ಮಪಾದಾರವಿನ್ದಾನುಷಂಗಾನ್ಮಮ ॥ 11॥

ಮಗ್ನಂ ಮಾನಸ! ಮಾಸ್ಮ ಭೂಃ ಶಠರಿಪೋರವ್ಯಾಜಸಿದ್ಧಾ ಕೃಪಾ
     ನೌಕಾ ಕಾಚನ ನಾವಿಕೋಽಪಿ ಸ ಪುನಸ್ಸನ್ತಾರಕಗ್ರಾಮಣೀಃ ।
ಏತೇನೋತ್ತರ ಫಲ್ಗುನೀರಸಪರಿಕ್ಲಿಷ್ಟೋಪಭೋಗೋರ್ಮಿಕಂ
     ದುಃಖಾವರ್ತದುರನ್ತಪಾರಗಮನಂ ಸಂಸಾರವಾರಾಕರಮ್ ॥ 12॥

ರತ್ನದೀಪಿಕಾಯಮಾನಹಸ್ತಮುದ್ರಿಕಾಕೃತತ್ರಯೀಗಿರೀನ್ದ್ರ-
     ಕನ್ದರಾನ್ತರಾಲಗಾಢರೂಢರೂಢಿಮನ್ನಿಧಾನಸೂಚನೇನ ।
ದ್ರಾವಿಡಾಗಮೋಪಗೀತಿಮೂಲಸೇಕಶೀತವೀತನಿದ್ರಪತ್ರ-
     ದಿವ್ಯತಿನ್ತ್ರಿಣೀಸಮೀಪಗೇನ ನಾಥವಾನಹಂ ಪರಾಂಕುಶೇನ ॥ 13॥

ನತ್ಯಾ ನತ್ಯಾಗಕಾರೀ ಕ್ಷಣಮಪಿ ಚಿದಚಿತ್ತ್ರಯಕಾಮೇಯಕಾಮೇ
     ಛನ್ದಶ್ಛನ್ದಸ್ವರೂಪೇ ಮಹಸಿ ಕಮಲಯಾ ಭಾಸಮಾನೇಽಸಮಾನೇ ।
ಶ್ರೇಯಃ ಶ್ರೇಯಸ್ವಿಸಂಘೈಃ ಪರಿಚಯಸುರಭಿಃ ಕೈಸರಾಣಾಂ ಸರಾಣಾಂ
     ಪಾತಾತ್ಪಾತಾದ್ಭವಾಬ್ಧೌ ಶಠರಿಪುರಿಹ ನೋ ವೀಕ್ಷಣೇನ ಕ್ಷಣೇನ ॥ 14॥

ನಪ್ರಪತ್ತಿವರ್ತ್ಮನಃಪ್ರವರ್ತನಾಪದಾನವಾಸನಾನುಸಾರಿ
     ನವ್ಯಪೇತಸರ್ವದಾಜಲಾಶಯಾನ್ವಯಂ ಕಥಂ ಸಮಂ ಸರೋಜಮ್ ।
ಸ್ವಾತಿಕಾಮಿಯೋಗಿವೃನ್ದಚಿತ್ತಪದ್ಮಬದ್ಧಸೌಹೃದಾನುರಕ್ತ-
     ರೂಪಯೋಶ್ಶಠಾರಿಪಾದಯೋರ್ಯುಗೇನ ಸನ್ನತಾರ್ತಿಭಂಜನೇನ ॥ 15॥

ನತ್ವಾ ಯಾಂ ಕುಸುಮಾಯುಧೇಷುಧಿರುಚಿವ್ಯಾಘಾತಮಾತನ್ವತೀಂ
     ಶೇಮುಷ್ಯಾ ಮಹತಾಮಹಾಯಿ ತರುಣೀಜಂಘಾಸು ಜಂಘಾಲತಾ ।
ವಿಸ್ತೀರ್ಣಚ್ಛವಿಶಾಖಯಾ ಶಠರಿಪೋರ್ವೃತ್ತಾನುಪೂರ್ವೀಜುಷಾ
     ಜಂಘಾಕಲ್ಪತರುಶ್ರಿಯಾ ಸುರಭಿತಂಚಿನ್ತಾವನಂ ಮಾಮಕಮ್ ॥ 16॥

ಕನದವಯವಲೋಲಶೋಭಾಭಿಧಾನಾಪಗಾಸ್ರೋತಸಃ
     ಸಮುದಿತಗುರುಬುದ್ಬುದಾಕಾರಸನ್ದೇಹಸನ್ದಾಯಿನೋಃ ।
ಕಕುದಧಿಗತಮಿತ್ರಭಾವಂ ಸ್ವಭಾವಾದ್ಯುಗಂ ಜಾನುನೋಃ
     ಮಮ ಹೃದಿ ಶಠವೈರಿನಾಮ್ನೋ ಮುನೀಶಸ್ಯ ಸನ್ದೀವ್ಯತು ॥ 17॥

ತುಲಾಸರಣಿಸೀಮನಿ ಪ್ರಥಿತರೂಪಯಾ ಹಸ್ತಿನಾಂ
     ಕರಣ ಕರಭೇಣ ವಾ ಕದಲಿಕಾಪ್ರಕಾಂಡೇನ ವಾ ।
ತಥೋಪರಿ ಚ ಪಶ್ಯತಾಂ ನಯನಬನ್ಧನಜ್ಯೇಷ್ಠಯಾ
     ಚಮತ್ಕೃತಿಮತೀ ಮತಿಶ್ಶಠರಿಪೂರುಲಕ್ಷ್ಮ್ಯಾ ಮಮ ॥ 18॥

ಮಹಃಪ್ರರೋಹಮಂಜರೀಮನೋಜ್ಞರತ್ನಮೇಖಲಾ-
     ಕಲಾಪಪುಷ್ಪಿತಾ ಕಟೀತಟೀಪಟೀ ಶಠದ್ವಿಷಃ ।
ಉರಸ್ಸ್ರವತ್ಪ್ರಭಾಝರೀನಿಪಾತನಿಮ್ನನಾಭಿಕಾ-
     ಽವಟೋತ್ಥಫೇನಮಂಡಲೀವಿತರ್ಕಮೂಲಮೇವ ನಃ ॥ 19॥

ನಯನಸುಭಗನಾಭೀಮುದ್ದಿಶನ್ತೀ ಶಠಾರೇಃ
     ಸರ ಇತಿ ಪರಿಭಾಷಾ ಢೌಕತೇ ಸಾರ್ಥಕತ್ವಮ್ ।
ಸತತಮಿತರಥಾ ನಃ ಸಂಹತಾ ನೇತ್ರಮೀನಾಃ
     ಕಥಮಿಹ ವಿಹರೇಯುಃ ಕೌತುಕೋದ್ರೇಕಯುಕ್ತಾಃ ॥ 20॥

ತಾಂ ಮಧ್ಯದೇಶಸುಷಮಾಮವಲೋಕಯಾಮಿ
     ರೋಮಾವಲಿತ್ರಿವಲಿಕಾರುಚಿರಾಂ ಶಠಾರೇಃ ।
ರೇಖೋತ್ತರಾ ಯದುಪಮಾಮಧಿಕಾಭಿಲಾಷಾ
     ಢೌಕೇತ ವಾ ಯದಿ ನ ವಾ ವಟಪತ್ರಶೋಭಾ ॥ 21॥

ಭಾಸಾ ನ ವ್ಯತಿಭಿದುರೀಭವನ್ತಿ ಭೃಂಗಾ
     ಹಾರಸ್ಥಾದುರಸಿ ಹರಿನ್ಮಣೇಶ್ಶಠಾರೇಃ ।
ಆರೂಢಾ ವಕುಲಮಯೀಂ ಸ್ರಜಂ ಸುಗನ್ಧಿಂ
     ಶಬ್ದೇನ ಶ್ರವಣಸುಖೇನ ಯಾನ್ತಿ ಭೇದಮ್ ॥ 22॥

ದಮವತಃ ಕುರುತೇ ಮದನೋದ್ಧತಾನ್ ಸುಘಟಯತ್ಯಬುಧಾನ್ ಬುಧನಿಷ್ಠಯಾ ।
ಪ್ರಥಿತಮುದ್ರಮನಿದ್ರಸರೋರುಹಪ್ರಣಯಿ ಪಾಣಿತಲಂ ಶಠಜಿನ್ಮುನೇಃ ॥ 23॥

ನೇಹ ಸಂಸರಣರೋಗಸಂಹೃತಿಃ ಜಾಯತೇ ಶತಭಿಷಕ್ಚಿಕಿತ್ಸಯಾ ।
ಅನ್ತರೇಣ ಶಠವೈರಿಕನ್ಧರಾಲಮ್ಬಮಾನವಕುಲಸ್ರಜಾಂ ರಜಃ ॥ 24॥

ಜನ್ಮಧ್ವಂಸಂ ದಿಶತಿ ಜನಾನಾಂ ವಕ್ತ್ರಂ ದೀಪ್ರೋಷ್ಠಪದಮನೋಜ್ಞಮ್ ।
ಮನ್ದಸ್ಮೇರಂ ಮಧುರಕಟಾಕ್ಷಂ ಸುಭ್ರೂಲೇಖಂ ಸುಭಗಕಪೋಲಮ್ ॥ 25॥

ಲಸತಿ ಹಿ ಭಜತಾಂ ಭದ್ರೋತ್ತರಪದಕರಣಾರೂಢಮ್ ।
ಶಠರಿಪುಮಕುಟಂ ಭಾಸಾ ಪರಿಹೃತದುರಿತಧ್ವಾನ್ತಮ್ ॥ 26॥

ಅನ್ತರೇಣ ಶಠಾರಾತಿಂ ಕಸ್ಸಂಸಾರೇಽವತೀಹ ನಃ ।
ತದಹಂ ಹೃದಯೇ ನಿತ್ಯಂ ನಿದಧೇ ತದ್ವಪುಃಶ್ರಿಯಮ್ ॥ 27॥

ವಾಚಿಕೀ ವರಿವಸ್ಯಾ ಮೇ ತಾರಕಾಮಾಲಿಕಾತ್ಮಿಕಾ ।
ಪರಾಂಕುಶಪದಾಬ್ಜೇನ ಪರಿಷ್ಕಾರವತೀ ಭವೇತ್ ॥ 28॥

ಇತಿ ನಕ್ಷತ್ರಮಾಲಿಕಾ ಸಮಾಪ್ತಾ ।
***********

नक्षत्र मालिका 

श्रीमदभिरामवरगुरुभिरनुगृहीता
श्रीरस्तु ।
श्रीमते हयग्रीवायनमः ।
श्रीमते रामानुजाय नमः ॥

अस्मासु वत्सलतया कृपया च भूयः
     स्वेच्छावतीर्णमि(व) ह सौम्यवरं मुनीन्द्रम् ।
आचार्यपौत्रमभिरामवराभिधानं
     अस्मद्गुरुं परमकारुणिकं नमामि ॥

श्रीमान् पराङ्कुशमुनिर्जीयात् यज्ज्ञानमुद्रया ।
नेन्द्रियाश्वयुजो नॄणां नित्यं विषयवीथयः ॥ १॥

यदुरसि भरणीया स्रग्विकसितवकुलानद्धा ।
स जयति महिमा नाथो मुररिपुपदसक्तो नः ॥ २॥

नन्ताऽनन्ताङ्घ्रिनलिनयुग्मे कर्ता लोकार्तिकबलनानाम् ।
भद्राय द्राविडनिगमानां द्रष्टा पुष्टाय वकुलभृत्स्यात् ॥ ३॥

स्यादेव सा मे फणितिश्शठारेः ययोदितोच्चैस्सरणिर्जनानाम् ।
आरोहिणी नाप्यवरोहिणी हि वेदोदिता तु द्वयमभ्युपैति ॥ ४॥

तिलकमाह न काचिदपि श्रुतौ त्रिजतामृगशीर्षसमुत्थिता ।
स्फुटतरं वकुलाभरणीयवाक् पुरुषमादिमशेषपदैरपि ॥ ५॥

पित्रादिस्सकलविधोऽपि बन्धुवर्गः यस्यासीत्सरसिजवासिनीसहायः ।
आविस्स्युर्घनकरुणारसावसेकैरार्द्रा मे वकुलभृतः कटाक्षपाताः ॥ ६॥

तामाश्रयामि करुणां वकुलाभिरामां
     याऽसौ पुनर्वसुमतीवलयेऽवतीर्णा ।
प्रज्ञादृशोन्मिषितया प्रथितानुभावा
     ज्योतिः परं यदनिदं तदिदं चकार ॥ ७॥

रचितवति रमाया नायकस्याङ्घ्रिपुष्यत्-
     प्रणयरससुधाब्धिस्रोतसि स्वैरगाहम् ।
प्रभवति कलिघर्मप्रावृषेण्याम्बुवाहे
     वकुलधरमुनीन्द्रे तापवार्ता कथं नः ॥ ८॥

नमज्जनस्य चित्तभित्तिभक्तिचित्रतूलिका
     भवाहिवीर्यभञ्जने नरेन्द्रमन्त्रयन्त्रणा ।
प्रपन्नलोककैरवप्रसन्नचारुचन्द्रिका
     शठारिहस्तमुद्रिका हठाद्धुनोतु मे तमः ॥ ९॥

मनस्स्फटिकदर्पणप्रतिफलत्परब्रह्मणः
     प्रदर्शनमिवाचरन् प्रथितबोधमुद्राङ्कितः ।
सतामभयशंसिता भवभयाभितप्तात्मनामघानि
     शमयेत नः शठरिपोरवामः करः ॥ १०॥

रमयतु शठशत्रुरत्युन्नताचारयुक्तैर्जनैः
     अवनतपदपद्मयुग्मोऽनुकम्पामृताम्भोनिधिः ।
बहुविधकृतपूर्वफल्गुन्यगाचारचिन्ताकुलं
     हृदयमसदृशात्मपादारविन्दानुषङ्गान्मम ॥ ११॥

मग्नं मानस! मास्म भूः शठरिपोरव्याजसिद्धा कृपा
     नौका काचन नाविकोऽपि स पुनस्सन्तारकग्रामणीः ।
एतेनोत्तर फल्गुनीरसपरिक्लिष्टोपभोगोर्मिकं
     दुःखावर्तदुरन्तपारगमनं संसारवाराकरम् ॥ १२॥

रत्नदीपिकायमानहस्तमुद्रिकाकृतत्रयीगिरीन्द्र-
     कन्दरान्तरालगाढरूढरूढिमन्निधानसूचनेन ।
द्राविडागमोपगीतिमूलसेकशीतवीतनिद्रपत्र-
     दिव्यतिन्त्रिणीसमीपगेन नाथवानहं पराङ्कुशेन ॥ १३॥

नत्या नत्यागकारी क्षणमपि चिदचित्त्रयकामेयकामे
     छन्दश्छन्दस्वरूपे महसि कमलया भासमानेऽसमाने ।
श्रेयः श्रेयस्विसङ्घैः परिचयसुरभिः कैसराणां सराणां
     पातात्पाताद्भवाब्धौ शठरिपुरिह नो वीक्षणेन क्षणेन ॥ १४॥

नप्रपत्तिवर्त्मनःप्रवर्तनापदानवासनानुसारि
     नव्यपेतसर्वदाजलाशयान्वयं कथं समं सरोजम् ।
स्वातिकामियोगिवृन्दचित्तपद्मबद्धसौहृदानुरक्त-
     रूपयोश्शठारिपादयोर्युगेन सन्नतार्तिभञ्जनेन ॥ १५॥

नत्वा यां कुसुमायुधेषुधिरुचिव्याघातमातन्वतीं
     शेमुष्या महतामहायि तरुणीजङ्घासु जङ्घालता ।
विस्तीर्णच्छविशाखया शठरिपोर्वृत्तानुपूर्वीजुषा
     जङ्घाकल्पतरुश्रिया सुरभितञ्चिन्तावनं मामकम् ॥ १६॥

कनदवयवलोलशोभाभिधानापगास्रोतसः
     समुदितगुरुबुद्बुदाकारसन्देहसन्दायिनोः ।
ककुदधिगतमित्रभावं स्वभावाद्युगं जानुनोः
     मम हृदि शठवैरिनाम्नो मुनीशस्य सन्दीव्यतु ॥ १७॥

तुलासरणिसीमनि प्रथितरूपया हस्तिनां
     करण करभेण वा कदलिकाप्रकाण्डेन वा ।
तथोपरि च पश्यतां नयनबन्धनज्येष्ठया
     चमत्कृतिमती मतिश्शठरिपूरुलक्ष्म्या मम ॥ १८॥

महःप्ररोहमञ्जरीमनोज्ञरत्नमेखला-
     कलापपुष्पिता कटीतटीपटी शठद्विषः ।
उरस्स्रवत्प्रभाझरीनिपातनिम्ननाभिका-
     ऽवटोत्थफेनमण्डलीवितर्कमूलमेव नः ॥ १९॥

नयनसुभगनाभीमुद्दिशन्ती शठारेः
     सर इति परिभाषा ढौकते सार्थकत्वम् ।
सततमितरथा नः संहता नेत्रमीनाः
     कथमिह विहरेयुः कौतुकोद्रेकयुक्ताः ॥ २०॥

तां मध्यदेशसुषमामवलोकयामि
     रोमावलित्रिवलिकारुचिरां शठारेः ।
रेखोत्तरा यदुपमामधिकाभिलाषा
     ढौकेत वा यदि न वा वटपत्रशोभा ॥ २१॥

भासा न व्यतिभिदुरीभवन्ति भृङ्गा
     हारस्थादुरसि हरिन्मणेश्शठारेः ।
आरूढा वकुलमयीं स्रजं सुगन्धिं
     शब्देन श्रवणसुखेन यान्ति भेदम् ॥ २२॥

दमवतः कुरुते मदनोद्धतान् सुघटयत्यबुधान् बुधनिष्ठया ।
प्रथितमुद्रमनिद्रसरोरुहप्रणयि पाणितलं शठजिन्मुनेः ॥ २३॥

नेह संसरणरोगसंहृतिः जायते शतभिषक्चिकित्सया ।
अन्तरेण शठवैरिकन्धरालम्बमानवकुलस्रजां रजः ॥ २४॥

जन्मध्वंसं दिशति जनानां वक्त्रं दीप्रोष्ठपदमनोज्ञम् ।
मन्दस्मेरं मधुरकटाक्षं सुभ्रूलेखं सुभगकपोलम् ॥ २५॥

लसति हि भजतां भद्रोत्तरपदकरणारूढम् ।
शठरिपुमकुटं भासा परिहृतदुरितध्वान्तम् ॥ २६॥

अन्तरेण शठारातिं कस्संसारेऽवतीह नः ।
तदहं हृदये नित्यं निदधे तद्वपुःश्रियम् ॥ २७॥

वाचिकी वरिवस्या मे तारकामालिकात्मिका ।
पराङ्कुशपदाब्जेन परिष्कारवती भवेत् ॥ २८॥


इति नक्षत्रमालिका समाप्ता ।
*********