ಹನುಮಾನ್ ಘಟಿಕಾಚಲ ಸ್ತೋತ್ರಂ ಹನುಮಂತ hanuman ghatikachala stotra hanumanta hanuman

ಶಂಖಚಕ್ರಧರಂ ದೇವಂ
ಘಟಿಕಾಚಲವಾಸಿನಮ್ ।
ಯೋಗಾರೂಢಂ ಆಂಜನೇಯಂ
 ವಾಯುಪುತ್ರಂ ನಮಾಮ್ಯಹಮ್ ॥ 1॥

ಭಕ್ತಾಭೀಷ್ಟಪ್ರದಾತಾರಂ
 ಚತುರ್ಬಾಹುವಿರಾಜಿತಮ್ ।
ದಿವಾಕರದ್ಯುತಿನಿಭಂ ವಂದೇಹಂ
 ಪವನಾತ್ಮಜಮ್ ॥ 2॥

ಕೌಪೀನಮೇಖಲಾಸೂತ್ರಂ ಸ್ವರ್ಣಕುಂಡಲಮಂಡಿತಮ್ ।
ಲಂಘಿತಾಬ್ಧಿಂ ರಾಮದೂತಂ
ನಮಾಮಿ ಸತತಂ ಹರಿಮ್ ॥ 3॥

ದೈತ್ಯಾನಾಂ ನಾಶನಾರ್ಥಾಯ
 ಮಹಾಕಾಯಧರಂ ವಿಭುಮ್ ।
ಗದಾಧರಕರೋ ಯಸ್ತಂ
ವಂದೇಹಂ ಮಾರುತಾತ್ಮಜಮ್ ॥ 4॥

ನೃಸಿಂಹಾಭಿಮುಖೋ ಭೂತ್ವಾ
 ಪರ್ವತಾಗ್ರೇ ಚ ಸಂಸ್ಥಿತಮ್ ।
ವಾಂಛನ್ತಂ ಬ್ರಹ್ಮಪದವೀಂ
ನಮಾಮಿ ಕಪಿನಾಯಕಮ್ ॥ 5॥

ಬಾಲಾದಿತ್ಯವಪುಷ್ಕಂ ಚ
 ಸಾಗರೋತ್ತಾರಕಾರಕಮ್ ।
ಸಮೀರವೇಗಂ ದೇವೇಶಂ
 ವಂದೇಹಂ ಅಮಿತವಿಕ್ರಮಮ್ ॥ 6॥

ಪದ್ಮರಾಗಾರುಣಮಣಿಶೋಭಿತಂ
 ಕಾಮರೂಪಿಣಮ್ ।
ಪಾರಿಜಾತತರುಸ್ಥಂ ಚ
ವಂದೇಹಂ ವನಚಾರಿಣಮ್ ॥ 7॥

ರಾಮದೂತ ನಮಸ್ತುಭ್ಯಂ
 ಪಾದಪದ್ಮಾರ್ಚನಂ ಸದಾ ।
ದೇಹಿ ಮೇ ವಾಂಛಿತಫಲಂ ಪುತ್ರಪೌತ್ರಪ್ರವರ್ಧನಮ್ ॥ 8॥

ಇದಂ ಸ್ತೋತ್ರಂ ಪಠೇನ್ನಿತ್ಯಂ
ಪ್ರಾತಃಕಾಲೇ ದ್ವಿಜೋತ್ತಮಃ ।
ತಸ್ಯಾಭೀಷ್ಟಂ ದದಾತ್ಯಾಶು
ರಾಮಭಕ್ತೋ ಮಹಾಬಲಃ ॥ 9॥

***************