ರಾಮಾಯಣ ಕವಚಮ್ ವಾಲ್ಮೀಕಿ ಋಷಿಃ ವಿರಚಿತಮ್ ramayana kavacham by valmiki rishi

ವಿನಿಯೋಗ

ಓಮ್ ಅಸ್ಯ ಶ್ರೀವಾಲ್ಮೀಕಿರಾಮಾಯಣಮಹಾಮನ್ತ್ರಸ್ಯ, 
ಭಗವಾನ್-ವಾಲ್ಮೀಕಿ-ಋಷಿಃ | 
ಅನುಷ್ಟುಪ್ ಛನ್ದಃ | 
ಶ್ರೀರಾಮಃ ಪರಮಾತ್ಮಾ ದೇವತಾ | 
ಅಭಯಂ ಸರ್ವಭೂತೇಭ್ಯ ಇತಿ ಬೀಜಮ್ | 
ಅಙ್ಗುಲ್ಯಗ್ರೇಣ ತಾನ್ ಹನ್ಯಾಮ್ ಇತಿ ಶಕ್ತಿಃ | 
ಏತದಸ್ತ್ರಬಲಂ ದಿವ್ಯಮ್ ಇತಿ ಕೀಲಕಮ್ | 
ಭಗವನ್ನಾರಾಯಣೋ ದೇವ ಇತಿ ತತ್ತ್ವಮ್ | 
ಧರ್ಮಾತ್ಮಾ ಸತ್ಯಸನ್ಧಶ್ಚ ಇತಿ ಅಸ್ತ್ರಮ್ | 
ಪುರುಷಾರ್ಥ-ಚತುಷ್ಟಯ-ಸಿದ್ಧ್ಯರ್ಥಂ ಪಾಠೇ ವಿನಿಯೋಗಃ || 

ಬ್ರಹ್ಮಾ ಸ್ವಯಂಭೂರ್ಭಗವಾನ್ ದೇವಾಶ್ಚೈವ ತಪಸ್ವಿನಃ |

ಸಿದ್ಧಿಂ ದಿಶನ್ತು ಮೇ ಸರ್ವೇ ದೇವಾಃ ಸರ್ಷಿಗಣಾಸ್ತ್ವಿಹ ||

ಶ್ರೀರಾಮಧ್ಯಾನಮ್

ವೈದೇಹೀಸಹಿತಂ ಸುರದ್ರುಮತಲೇ ಹೈಮೇ ಮಹಾಮಣ್ಡಪೇ

ಮಧ್ಯೇ ಪುಷ್ಪಕಮಾಸನೇ ಮಣಿಮಯೇ ವೀರಾಸನೇ ಸಂಸ್ಥಿತಮ್ |

ಅಗ್ರೇವಾಚಯತಿ ಪ್ರಭಞ್ಜನಸುತೇ ತತ್ತ್ವಂ ಮುನಿಭ್ಯಃ ಪರಂ

ವ್ಯಾಖ್ಯಾನ್ತಂ ಭರತಾದಿಭಿಃ ಪರಿವೃತಂ ರಾಮಂ ಭಜೇ ಶ್ಯಾಮಲಮ್ ||

ವಾಮೇ ಭೂಮಿಸುತಾ ಪುರಸ್ತು ಹನುಮಾನ್ ಪಶ್ಚಾತ್ ಸುಮಿತ್ರಾಸುತಃ

ಶತ್ರುಘ್ನೋ ಭರತಶ್ಚ ಪಾರ್ಶ್ವದಲಯೋರ್ವಾಯ್ವಾದಿಕೋಣೇಷು ಚ |

ಸುಗ್ರೀವಶ್ಚ ವಿಭೀಷಣಶ್ಚ ಯುವರಾಟ್ ತಾರಾಸುತೋ ಜಾಂಬವಾನ್

ಮಧ್ಯೇ ನೀಲಸರೋಜಕೋಮಲರುಚಿಂ ರಾಮಂ ಭಜೇ ಶ್ಯಾಮಲಮ್ ||

ಶ್ರೀರಾಮಾಯಣಸಂಪುಟಮನ್ತ್ರಃ

“ಆಪದಾಮಪಹರ್ತಾರಂ ದಾತಾರಂ ಸರ್ವಸಂಪದಾಮ್ |

ಲೋಕಾಭಿರಾಮಂ ಶ್ರೀರಾಮಂ ಭೂಯೋ ಭೂಯೋ ನಮಾಮ್ಯಹಮ್ ||”

(ಇದನ್ನು ರಾಮಾಯಣಪಾರಾಯಣದ ಮೊದಲು ಹಾಗೂ ಕೊನೆಯಲ್ಲಿ ಪಠಿಸಿ ಸಂಪುಟಿತ ಪಾರಾಯಣ ಮಾಡಿದರೆ ಸಮಸ್ತ ಮನಃಕಾಮನಾಸಿದ್ಧಿಯಾಗುವುದು.)

ಶ್ರೀರಾಮಾಯಣಕವಚಮ್

ಓಂ ನಮೋ ಅಷ್ಟಾದಶತತ್ತ್ವರೂಪಾಯ ರಾಮಾಯಣಮಹಾಮನ್ತ್ರಸ್ವರೂಪಾಯ | 

ಮಾನಿಷಾದೇತಿ ಮೂಲಂ ಶಿರೋ ಅವತು | 

ಅನುಕ್ರಮಣಿಕಾಬೀಜಂ ಮುಖಮ್ ಅವತು |

ಋಷ್ಯಶೃಙ್ಗೋಪಾಖ್ಯಾನಮ್ ಋಷಿಃ ಜಿಹ್ವಾಮ್ ಅವತು |

ಜಾನಕೀಲಾಭೋ ಅನುಷ್ಟುಪ್-ಛನ್ದೋ ಅವತು ಗಲಮ್ |

ಕೇಕಯ್ಯಾಜ್ಞಾದೇವತಾ ಹೃದಯಮ್ ಅವತು |

ಸೀತಾಲಕ್ಷ್ಮಣಾನುಗಮನಶ್ರೀರಾಮಹರ್ಷಾಃ ಪ್ರಮಾಣಂ ಜಠರಮ್ ಅವತು |

ಭಗವದ್ಭಕ್ತಿಃ ಶಕ್ತಿಃ ಅವತು ಮೇ ಮಧ್ಯಮ್ |

ಶಕ್ತಿಮಾನ್ ಧರ್ಮೋ ಮುನೀನಾಂ ಪಾಲನಂ ಮಮ ಊರೂ ರಕ್ಷತು |

ಮಾರೀಚವಚನಂ ಪ್ರತಿಪಾಲನಮ್ ಅವತು ಪಾದೌ |

ಸುಗ್ರೀವಮೈತ್ರಮ್ ಅರ್ಥೋ ಅವತು ಸ್ತನೌ |

ನಿರ್ಣಯೋ ಹನುಮಚ್ಚೇಷ್ಟಾ ಅವತು ಬಾಹೂ |

ಕರ್ತಾ ಸಂಪಾತಿಪಕ್ಷೋದ್ಗಮೋ ಅವತು ಸ್ಕನ್ಧೌ |

ಪ್ರಯೋಜನಂ ವಿಭೀಷಣರಾಜ್ಯಂ ಗ್ರೀವಾಂ ಮಮಾವತು |

ರಾವಣವಧಃ ಸ್ವರೂಪಮ್ ಅವತು ಕರ್ಣೌ |

ಸೀತೋದ್ಧಾರೋ ಲಕ್ಷ್ಮಣಮ್ ಅವತು ನಾಸಿಕೇ |

ಅಮೋಘಸ್ತವ ಸಂಸ್ತವೋ ಅವತು ಜೀವಾತ್ಮಾನಾಮ್ |

ನಯಃ ಕಾಲಲಕ್ಷ್ಮಣಸಂವಾದೋ ಅವತು ನಾಭಿಮ್ |

ಆಚರಣೀಯಂ ಶ್ರೀರಾಮಾದಿಧರ್ಮಂ ಸರ್ವಾಙ್ಗಂ ಮಮ ಅವತು | ಇತಿ ರಾಮಾಯಣಕವಚಮ್ ||

(ಬೃಹದ್ಧರ್ಮಪುರಾಣಮ್, ಪೂರ್ವಖಣ್ಡ ೨೫ನೆಯ ಅಧ್ಯಾಯ. ಈ ಪುರಾಣದ ಪ್ರಕಾರ, ಮಂಗಲಾಚರಣೆಯ ಮೊದಲು ರಾಮಾಯಣಕವಚವನ್ನು ಪಠಿಸಬೇಕು.)

ಆದಿಕವಿಶ್ರೀವಾಲ್ಮೀಕಿಮುನಿವನ್ದನಮ್

ಕೂಜನ್ತಂ ರಾಮ ರಾಮೇತಿ ಮಧುರಂ ಮಧುರಾಕ್ಷರಮ್ |

ಆರುಹ್ಯ ಕವಿತಾಶಾಖಾಂ ವನ್ದೇ ವಾಲ್ಮೀಕಿಕೋಕಿಲಮ್ ||

ಯಃ ಪಿಬನ್ ಸತತಂ ರಾಮಚರಿತಾಮೃತಸಾಗರಮ್ |

ಅತೃಪ್ತಸ್ತಂ ಮುನಿಂ ವನ್ದೇ ಪ್ರಾಚೇತಸಮಕಲ್ಮಷಮ್ ||

ವೇದವೇದ್ಯೇ ಪರೇ ಪುಂಸಿ ಜಾತೇ ದಶರಥಾತ್ಮಜೇ |

ವೇದಃ ಪ್ರಾಚೇತಸಾದಾಸೀತ್ ಸಾಕ್ಷಾದ್ ರಾಮಾಯಣಾತ್ಮನಾ ||

ಆಞ್ಜನೇಯವನ್ದನಮ್ 

ಗೋಷ್ಪದೀಕೃತವಾರೀಶಂ ಮಶಕೀಕೃತರಾಕ್ಷಸಮ್ |

ರಾಮಾಯಣಮಹಾಮಾಲಾರತ್ನಂ ವನ್ದೇऽನಿಲಾತ್ಮಜಮ್ ||

ಅಞ್ಜನಾನನ್ದನಂ ವೀರಂ ಜಾನಕೀಶೋಕನಾಶನಮ್ |

ಕಪೀಶಮಕ್ಷಹನ್ತಾರಂ ವನ್ದೇ ಲಙ್ಕಾಭಯಙ್ಕರಮ್ ||

ಉಲ್ಲಂಙ್ಘ್ಯ ಸಿನ್ಧೋಸ್ಸಲಿಲಂ ಸಲೀಲಂ

ಯಶ್ಶೋಕವಹ್ನಿಂ ಜನಕಾತ್ಮಜಾಯಾಃ |

ಆದಾಯ ತೇನೈವ ದದಾಹ ಲಙ್ಕಾಂ

ನಮಾಮಿ ತಂ ಪ್ರಾಞ್ಜಲಿರಾಞ್ಜನೇಯಮ್ ||

ಆಞ್ಜನೇಯಮತಿಪಾಟಲಾನನಂ

ಕಾಞ್ಚನಾದ್ರಿ-ಕಮನೀಯ-ವಿಗ್ರಹಮ್ |

ಪಾರಿಜಾತತರುಮೂಲವಾಸಿನಂ

ಭಾವಯಾಮಿ ಪವಮಾನನನ್ದನಮ್ ||

ಯತ್ರ ಯತ್ರ ರಘುನಾಥಕೀರ್ತನಂ

ತತ್ರ ತತ್ರ ಕೃತ-ಮಸ್ತಕಾಞ್ಜಲಿಮ್ |

ಬಾಷ್ಪವಾರಿ-ಪರಿಪೂರ್ಣ-ಲೋಚನಂ

ಮಾರುತಿಂ ನಮತ ರಾಕ್ಷಸಾನ್ತಕಮ್ ||

ಮನೋಜವಂ ಮಾರುತತುಲ್ಯವೇಗಂ

ಜಿತೇನ್ದ್ರಿಯಂ ಬುದ್ಧಿಮತಾಂ ವರಿಷ್ಠಮ್ |

ವಾತಾತ್ಮಜಂ ವಾನರಯೂಥಮುಖ್ಯಂ

ಶ್ರೀರಾಮದೂತಂ ಶಿರಸಾ ನಮಾಮಿ ||

ಆಞ್ಜನೇಯಂ ಮಹಾವೀರಂ ಕೋವಿದಂ ರಿಪುಭೈರವಮ್ |

ವಾನರಾಧ್ಯಕ್ಷಸಂಸೇವ್ಯಂ ರಾಮದೂತಂ ಸ್ಮರಾಮ್ಯಹಮ್ ||

ರಾಮಾಯಣ-ಪಞ್ಚೋಪಚಾರ-ಸ್ತುತಿಃ

ಸದಾ ಶ್ರವಣಮಾತ್ರೇಣ ಪಾಪಿನಾಂ ಸದ್ಗತಿಪ್ರದೇ |

ಶುಭೇ ರಾಮಕಥೇ ತುಭ್ಯಂ ಗನ್ಧಮಾದೌ ಸಮರ್ಪಯೇ ||

ಬಾಲಾದಿಸಪ್ತಕಾಣ್ಡೈಸ್ತು ಸರ್ವಲೋಕಸುಖಪ್ರದಮ್ |

ರಾಮಾಯಣ! ಮಹೋದಾರ! ಪುಷ್ಪಂ ತೇऽದ್ಯ ಸಮರ್ಪಯೇ ||

ಯಸ್ಯೈಕಶ್ಲೋಕಪಾಠಸ್ಯ ಫಲಂ ಸರ್ವಫಲಾಧಿಕಮ್ |

ತಸ್ಮೈ ರಾಮಾಯಣಾಯಾದ್ಯ ದಶಾಙ್ಗಂ ಧೂಪಮರ್ಪಯೇ ||

ಯಸ್ಯ ಲೋಕೇ ಪ್ರಣೀತಾರೋ ವಾಲ್ಮೀಕ್ಯಾದಿ-ಮಹರ್ಷಯಃ |

ತಸ್ಮೈ ರಾಮಚರಿತ್ರಾಯ ಘೃತದೀಪಂ ಸಮರ್ಪಯೇ ||

ಶ್ರೂಯತೇ ಬ್ರಹ್ಮಣೋ ಲೋಕೇ ಶತಕೋಟಿಪ್ರವಿಸ್ತರಮ್ |

ರೂಪಂ ರಾಮಾಯಣಸ್ಯಾಸ್ಯ ತಸ್ಮೈ ನೈವೇದ್ಯಮರ್ಪಯೇ ||

ರಾಮಾಯಣನಮಸ್ಕಾರಃ

ಚರಿತಂ ರಘುನಾಥಸ್ಯ ಶತಕೋಟಿಪ್ರವಿಸ್ತರಮ್ |

ಏಕೈಕಮಕ್ಷರಂ ಪುಂಸಾಂ ಮಹಾಪಾತಕನಾಶನಮ್ ||

ವಾಲ್ಮೀಕಿಗಿರಿಸಮ್ಭೂತಾ ರಾಮಾಮ್ಭೋನಿಧಿಸಙ್ಗತಾ |

ಶ್ರೀಮದ್ರಾಮಾಯಣೀಗಙ್ಗಾ ಪುನಾತಿ ಭುವನತ್ರಯಮ್ ||

ವಾಲ್ಮೀಕಿಗಿರಿಸಮ್ಭೂತಾ ರಾಮಸಾಗರಗಾಮಿನೀ |

ಪುನಾತಿ ಭುವನಂ ಪುಣ್ಯಾ ರಾಮಾಯಣಮಹಾನದೀ ||

ಶ್ಲೋಕಸಾರಸಮಾಕೀರ್ಣಂ ಸರ್ವಕಲ್ಲೋಲಸಙ್ಕುಲಮ್ |

ಕಾಣ್ಡಗ್ರಾಹಮಹಾಮೀನಂ ವನ್ದೇ ರಾಮಾಯಣಾರ್ಣವಮ್ ||

ವಾಲ್ಮೀಕೇರ್ಮುನಿಸಿಂಹಸ್ಯ ಕವಿತಾವನಚಾರಿಣಃ |

ಶೃಣ್ವನ್ ರಾಮಕಥಾನಾದಂ ಕೋ ನ ಯಾತಿ ಪರಾಂ ಗತಿಮ್ ||
*********