ವಿಷ್ಣೋರ್ದೇಶೇ ವರ್ತಮಾನೇ ವೇಧಸಶ್ಚರಮಾರ್ಧಕೇ |
ಆಯುಷಃ ಕಲ್ಪಕೇ ಚೈವ ಸಿತಾಂಗಸ್ಯ ಕಿಟೇಸ್ತಥಾ || ೧ ||
ಮನೋಶ್ಚ ಸೂರ್ಯಪುತ್ರಸ್ಯ ಸಂಧೌ ಪಾದೇ ಕಲೇಸ್ತಥಾ |
ಆದ್ಯೇ ವರ್ಷೇ ಮಹಾಪುಣ್ಯೇ ಭರತಸ್ಯ ಮಹೀಪತೇಃ || ೨ ||
ಜಂಬೂದ್ವಿಪೇ ವತ್ಸರೇ ಚ ವರ್ತಮಾನೇ ತಥಾಽಯನೇ |
ಋತೌ ಮಾಸೇ ಚ ಪಕ್ಷೇ ಚ ತಿಥೌ ವಾರೇ ಚ ಭೇ ತಥಾ || ೩ ||
ಕರಣಾದಿಯುತೇ ಪುಣ್ಯೇ ಕಾಲೇಽಸ್ಮಿನ್ ಪ್ರೀತಯೇ ಹರೇಃ |
ದೇವರ್ಷಿಪಿತೃತೃಪ್ತ್ಯರ್ಥಂ ಪಾಪಾನಾಂ ಚ ನಿವೃತ್ತಯೇ || ೪ ||
ಅಸ್ಮಿನ್ ಜಲಾಶಯೇ ವಿಷ್ಣೋಃ ಪಾದಪದ್ಮಂ ವಿಚಿಂತಯನ್ |
ಗಂಗಾಂ ಸ್ಮರನ್ನಹಂ ಸ್ನಾನಂ ಕರಿಷ್ಯೇ ಸ್ಮೃತಿಚೋದಿತಮ್ || ೫ ||
ಅಘೌಘವಿದ್ವಂಸಕರಸ್ಯ ವಿಷ್ಣೋಸ್ತೋಷಾಯ ತೇನ ಪ್ರಹಿತೋಽಹಮಸ್ಮಿನ್ |
ಜಲೇ ಸ್ಮರನ್ ದೇವನದೀಂ ಕರೋಮಿ ಸ್ನಾನಂ ಸ ಗೋವಿಂದಪದಾಭಿಧಾನಮ್ || ೬ ||
|| ಇತಿ ಶ್ರೀವಾದಿರಾಜಯತಿಕೃತಾ ಸ್ನಾನಸಂಕಲ್ಪಪದ್ಧತಿಃ ||
*********
