ಇಭರಾಮಪುರ ಶ್ರೀಕೃಷ್ಣಾರ್ಯ ಮಹಿಮಾವರ್ಣನ ಸ್ತೋತ್ರ ಯೋಗಿನಾರಾಯಣಾಚಾರ್ಯ ವಿರಚಿತಮ್

 

ಶ್ರೀ ಯೋಗಿನಾರಾಯಣಾಚಾರ್ಯಕೃತ

ಶ್ರೀ ಇಭರಾಮಪುರ ಶ್ರೀಕೃಷ್ಣಾರ್ಯ ಮಹಿಮಾವರ್ಣನ ಸ್ತೋತ್ರ

ನತ್ವಾ ಶ್ರೀಮದುಪಧ್ಯಾಯೋಪಾಖ್ಯರಾಮಾರ್ಯ ಸದ್ಗುರುಮ್ |

ಶ್ರೀಇಭರಾಪುರಾಮಪುರಾಚಾರ್ಯಮಾಹಾತ್ಮ್ಯಂ ಕಿಂಚಿದುಚ್ಯತೇ || ೧ ||

ಶ್ರುತಿಸ್ಮೃತಿಪುರಾಣೋಕ್ತಿಸಮ್ಮತಂ ಸನ್ಮತಂ ಸದಾ |

ಸ್ವಪರಾನುಭವಸ್ಪಷ್ಟಫಲಪ್ರತ್ಯಕ್ಷಲಕ್ಷಣೈಃ || ೨ ||

ಸಂಯುಕ್ತಯುಕ್ತಿಭಿರಪಿ ಪ್ರತಿಪಾದ್ಯಂ ಪ್ರತಿಕ್ಷಣಮ್ |

ನಿರಂಕುಶಾನ್ವಯೋಸ್ತಸ್ಮಾದೇತೇಷ್ಯೇವೋಕ್ತವತ್ಸ್ಫುಟಮ್ ||  ೩  ||

ಅಥಶ್ರುತಿನಾಮಾನಿ ಕಥಯಾಮ್ಯಹಮ್ |

ಯೈಃಗುರೋರಸ್ಯ ಮಾಹಾತ್ಮ್ಯಂ ಪ್ರಕಾಶಿತಮಹರ್ನಿಶಮ್ || ೪  ||

ಶ್ರೀವಾಯುಕೂರ್ಮಪೌರಾಣಸ್ಕಂದಪಾದ್ಮಾದಿತಸ್ತಥಾ|

ಶ್ರೀ ಮದ್ಗೀತಾಭಾಗವತಛಾಂದೋಗಾಖ್ಯಾ ವರಾಹತಃ || ೫ ||

ಛಾಂದೋಗ್ಯ ಋಕ್ ಬ್ರಹ್ಮಸೂತ್ರತೈತ್ತಿರೀಯಾಖ್ಯಭಾಷ್ಯತಃ |

ತಾತ್ಪರ್ಯಾಖ್ಯಚತುರ್ಥಾದೇರನುವ್ಯಾಖ್ಯಾನತಸ್ತಥಾ || ೬ ||

ಭಾರತಸ್ಯಸಭಾಪರ್ವಮಧ್ಯಾದ್ಹಾರಿತಸತ್ಸ್ಮೃತೇಃ |

ತೈತ್ತಿರೀಯ ಉಪನಿಷದಾತ್ ಸುಮಧ್ವವಿಜಯಾದಪಿ || ೭ ||

ತಾತ್ಪರ್ಯನಿರ್ಣಯಾತ್

 ಶ್ರೀಮದ್ಭಾರತಸ್ಯ ಚ ಕಾರ್ತೀಕಾತ್ |

ಪಂಚರಾತ್ರಸ್ಯ ಮಾಹಾತ್ಮ್ಯಾತ್ ಕೃಷ್ಣಾಮೃತಮಹಾರ್ಣವಾತ್ || ೮ ||

ಟೀಕಾಯಾ ವಿಜಯಧ್ವಜ್ಯಾ ವಿಷ್ಣುಧರ್ಮೋತ್ತರಾದಪಿ |

ಸಂಧ್ಯಾವಂದನಮಂಜರ್ಯಾ ಗಾರುಡಾಖ್ಯಪುರಾಣತಃ |

ಏತೈರುದಾಹೃತೈರ್ವಾಕ್ಯೈಃ ಅನ್ವಯೋsತ್ರ ಸುಸಮ್ಮತಃ || ೯ ||

ಪೂರ್ವೋಕ್ತಕಾರಣೈರ್ಭೂಯಃ ಚರಿತಂ ವಚ್ಮಿ ವಿಸ್ತರಾತ್ |

ಯೇನ ಸಂಶಯಸಂತಾನಮೂಲಚ್ಛೇದೋ ಭವೇದಲಮ್ || ೧೦ ||

ಜಾಯತೇ ನಾತ್ರ ಸಂದೇಹಃ ಪ್ರಕಟೋಕ್ತಿ ಸಮರ್ಥತಃ |

ಯೇನಾತ್ರ ನಿಜಯೋಗೇನ ಪ್ರಯತ್ನೇನ ವಿನಾಪಿ ತು |

ಅತ್ಯಂತಾಚಾರಹೀನಾಶ್ಚ ಮೂಢಾಃ ಬಾಲಾ ಶಠಾ ಅಪಿ || ೧೧ ||

ದರಿದ್ರಾಃ ಉತ್ಪಥಧಿಯೋಪ್ಯಲ್ಪವಂಶೋದ್ಭವಾಃ ನರಾಃ |

ಸದಾಚಾರಾಶ್ಚಸಜ್ಞಾನಾಃ ಪ್ರೌಢಪ್ರಜ್ಞಾಶ್ಚಸಾಧವಃ || ೧೨ ||

ಭಾಗ್ಯವಂತೋತ್ಯಂತಮಾನ್ಯಾಃ ಕುಲೀನಜನವಂದಿತಾಃ |

ಕ್ರಮಾದೇತತ್ಕೃತಾ ಲೋಕೈಃ ದೃಷ್ಟಾಸ್ಪಷ್ಟಮನೇಕಶಃ|| ೧೩ ||

ತಥಾ ಶ್ರೀ ಗುರುಣಾನೇನ ಭಾರತೀಶಾಖ್ಯಯಾsನಿಶಂ

ನಾನಾಪಾಯೈರಪ್ಯಸಾಧ್ಯಾಃ ಚಿಕಿತ್ಸೋತ್ಸಾರಿತಾಸ್ತಥಾ |

ಕುಷ್ಠಾದಿಶ್ರೇಷ್ಠರೋಗಾ ಯೇ ಗಂಧಕಾಷ್ಠಾಶ್ಚಭಸ್ಮನಾ

ಮೃತ್ತಿಕಾ ಧೂಪಧೂಮಾದಿಸಾಧನೈರ್ನಾಶಿತಾಃಸತಾಮ್ || ೧೪ ||

ಹಸ್ತಪಾದ್ಯಾದ್ಯವಯವೈರೂನಾಃ ಪೂರ್ಣಾತ್ ಕ್ವಚಿತ್ ಕೃತಾಃ |

ದಿವ್ಯನೇತ್ರಾ ಕೃತಾ ಯೇನ ಕೇನಚಿನ್ನಷ್ಟದೃಷ್ಟಯಃ || ೧೫ ||

ಜನ್ಮಾಂಧೋsಪ್ಯೇಕದಾ ಕಶ್ಚಿತ್ ಪರಹಸ್ತೇನ ದೃಷ್ಟಿಮಾನ್|

ಕಿಂಚಿತ್ ಕಾಲಂ ವಿಧಾಯಾಥ ಯಥಾ ಪೂರ್ವಮಕಲ್ಪಯತ್ || ೧೬ ||

ಯೇನೈಕಾಂತೇSಲ್ಪವಚನೈಃ ಪಂಡಿತಾಃ ಖಂಡಿತಾಃ ಕೃತಾಃ |

ಅಶಕ್ತಾಃ ಶ್ಲೋಕಕರಣೇ ಸುಶಕ್ತಾಃ ಯೇನ ವೈ ಕೃತಾಃ || ೧೭ ||

ಕಶ್ಚಿದೇಕೋ ಮಹಾಯಾತ್ರಾಪ್ರಸ್ಥಿತಃ ಸನ್ ಸಮಾಗತಃ |

ಸ್ವಶೀರ್ಷನಿಕಟೇ ರಾತ್ರೌ ಸ್ವಾಪಯಿತ್ವಾ ತಮೇವ ಯಃ || ೧೮ ||

ಪ್ರಾತಃಪರ್ಯಂತಮಖಿಲಂ ಯಾತ್ರಾಗಮನಾದಿತಃ |

ಕ್ರಮಾದ್ ಗ್ರಾಮಾದಿಕಂ ಯಾವತ್ ತೀರ್ಥಸ್ತೋಮಮನೇಕಶಃ || ೧೯ ||

ಯಥಾ ಸಾಂಖ್ಯಂ ಯಥಾಖ್ಯಾನಂ ಯತ್ರಯತ್ರ ಯಥಾವಿಧಿ |

ತತ್ರ ತತ್ರ ತಥಾ ಕಾರ್ಯಂ ವಿಧಾಯ ಪುನರಾಗಮನಮ್ || ೨೦ ||

ಇತ್ಯಾದಿಕಂ ಸ್ವಪ್ನಮಧ್ಯೇ ದರ್ಶಯಿತ್ವಾSಖಿಲಂ ಸ್ವಯಮ್ |

ಉತ್ಥಾಪ್ಯ ತಂ ತತಸ್ತಸ್ಯ ಮುಖಾತ್ ಉಚ್ಚಾರಯನ್ ಕ್ರಮಾತ್ || ೨೧ ||

ತತ್ರ ಯಲ್ಲಜ್ಜಯಾ ನೋಕ್ತಂ ತದಪ್ಯುದ್ಘಾಟಯಂಸ್ತತಃ |

ಲೇಖಯಾಮಾಸ ತತ್ಸರ್ವೇ ದೃಷ್ಟಾಲೋಕಾ ಸುವಿಸ್ಮಿತಾಃ || ೨೨ ||

ದೇವತಾದರ್ಶನಾದೀನಿ ತಥಾನ್ಯೇಷಾಂ ಚ ಕೇನಚಿತ್ |

ಅದೃಷ್ಟಾSಶ್ರುತಶಾಸ್ತ್ರಾರ್ಥಕಥನಂ ಕುತ್ರಚಿತ್ಸತಾಮ್ || ೨೩ ||

ಅಕರೋತ್ ಸ್ವಪ್ನಮಧ್ಯೇ ವಾ ಜಾಗ್ರದಾವಪಿ ಯಃ ಸ್ಫುಟಮ್ |

ಮೋಟನಂ ದುಷ್ಟಬುದ್ಧೀನಾಂ ದರ್ಶನಾಲಾಪತೋSಕರೋತ್ || ೨೪ ||

ಅನೇಕಕಾರಕಾಯೈಃ ಯಃ ಸ್ವಾತ್ಮಾನಂ ಬಹುಧಾ ನೃಣಾಮ್ |

ದರ್ಶಯಿತ್ವಾ ಇಷ್ಟಕರ್ತಾSಭೂತ್ ಯತ್ರ ಕುತ್ರಾಪಿ ವರ್ತಿನಾಮ್ || ೨೫ ||

ಮಂತ್ರಾಕ್ಷತಸಮಾಯುಕ್ತೇ ಸಂಪುಟೇ ಯತ್ಕರೇSರ್ಪಿತೇ |

ಪ್ರತಿಮಾSಭೂತ್ ಅರ್ಚಕಾನಾಂ ಕ್ವಚಿತ್ ಕಾಲಾಂತರೇಣ ವೈ || ೨೬ ||

ಸ್ವಪ್ನೇಪಿ ದತ್ತವಸ್ತೂನಿ ಕೇಷಾಂಚಿತ್ ಯತ್ರ ಕುತ್ರಚಿತ್ |

ಪ್ರತ್ಯಕ್ಷಾಣಿ ಪ್ರಬೋಧೇSತ್ರ ಜಾತಾನಿ ಜಗತೀತಲೇ || ೨೭ ||

ಯಃಸಪ್ತಜನ್ಮತಃ ಕರ್ಮವಿಪಾಕಮಖಿಲಂ ಕಿಲ |

ಸ್ಪಷ್ಟದೃಷ್ಟಮಿವ ಪ್ರಾಹ ಮಹತಾಮಿಹ ಶೃಣ್ವತಾಮ್ || ೨೮ ||

ಯಃ ಪಿಶಾಚಾನ್ ಮಹಾಮಂತ್ರವಿದಾಮಪಿ ಭಯಪ್ರಧಾನ್ |

ಸಹಜೋಕ್ತ್ಯಾಪ್ರಶಮಯನ್ ಯಾಪಯಾಮಾಸ ಕಾಂಶ್ಚನ || ೨೯ ||

ಬ್ರಹ್ಮಹತ್ಯಾದಿದೋಷೇಭ್ಯೋ ನೋತ್ಸಾರ್ಯಾನಿತಿ ಕ್ವಚಿತ್ |

ಕಾಂಶ್ಚಿತ್ ಖಲಾನ್ ಕ್ರೂರಕರ್ಮವಿವಶಾನಪಿ ಪೀಡಕಾನ್ || ೩೦ ||

ವಶೀಕೃತ್ಯ ಸ್ವವಚಸಾ ನಿಯಮ್ಯಾSಸ್ಥಾಪಯತ್ ಪ್ರಭುಃ |

ಯಸ್ತತ್ಪ್ರಾಕ್ಕರ್ಮ ಯದ್ಯಚ್ಚ ಪ್ರಕಟೀಕೃತ್ಯ ತನ್ಮುಖಾತ್ |

ಕರ್ತುಶ್ಚವಚನಾಲ್ಲೋಕೇ ವಿವೇಕೇನ ನಿದೇಶಕೃತ್ || ೩೧ ||

ಚಿತ್ರಂ ನೈತದಿದಂ ಲೋಕೇ ಕಸ್ಯಚಿತ್ ಸ್ಯಾದಪಿ ಕ್ವಚಿತ್ |

ಯಸ್ತ್ವನಾದಿಪ್ರತಿಚ್ಛನ್ನರೂಪಂ ಲೀಲಯಾದಿಶತ್ |

ಪರೋಕ್ಷವರ್ತಿನಿಂ ಸಮ್ಯಕ್ ಮುಕ್ತ್ಯಯೋಗ್ಯಮಿತಿ ಸ್ಫುಟಮ್ || ೩೨ ||

ವಿವಿಧಾಮೋದಸದನತನುಃ ಯಸ್ಯ ಯಥೇಚ್ಛಯಾ |

ವಿನಾಯಾಸೇನ ಕೇನಾಪಿ ನೈವಮಾಲೋಕಿತಂ ಶ್ರುತಮ್ || ೩೩ ||

ನದೀಪ್ರದೇಶಃ ಪರಿತೋಯತಾನೇನ ಸುಗಂಧಿಮಾನ್ |

ಸ್ಮೃತಿಮಾತ್ರಾಚ್ಚಕೇಷಾಂಚಿತ್ ಯತ್ರ ಕುತ್ರಾಪಿ ನಿವಾಸಿನಾಮ್ || ೩೪ ||

ಅಭೂತ್ ಪ್ರಭೂತಗಂಧಾಢ್ಯೋ ಯತ್ಪತ್ರಾದ್ಯಾಗಮೇ ನೃಣಾಮ್ |

ಅಸತ್ಯಲೋಕಪಾತಾಳಾದಪಿ ಜ್ಞಾನಮನಾಕುಲಮ್ |

ಯಸ್ಯಾಸ್ತಿ ಇತ್ಯಪಿ ವಿಜ್ಞಾತಂ ಜ್ಞಾನಿಭಿಃ ತತ್ಪ್ರಸಂಗತಃ || ೩೫ ||

ಭಾರತೀಶಾರ್ಚನದ್ವಾರೈಃ ವಾ ಅಚ್ಯುತಾರ್ಚೋಪದೇಶತಃ|

ಮೋಕ್ಷಮಾರ್ಗೈಕಹೇತುತ್ವಂ ದ್ಯೋತಿತಂ ಸ್ವನಿಯೋಗತಃ || ೩೬ ||

ಯೇನೇತಿ ಪ್ರಥಿತೋ ಲೋಕೇ ನಾಕೇಶವಿಭವಾತ್ಮನಾ |

ತದೇತದಖಿಲಂ ವಕ್ತುಂ ಕ್ಷಮೇನಾಪಿ ವಿಚಕ್ಷಣಃ ||  ೩೭ ||

ಯಸ್ಯೇದಂ ವಿವಿಧಂ ವೃತ್ತಂ ಅಚಿಂತ್ಯಾದ್ಭುತಮಪ್ಯಲಮ್ |

ಸಚ್ಛಾಸ್ತ್ರಸಮ್ಮತಂ ಸದ್ಭಿಃ ಶ್ಲಾಘ್ಯಂ ಮೃಗ್ಯಂ ಜನೈರ್ಮುಹುಃ || ೩೮ ||

ಅನುಭೂತಂ ಶ್ರುತಂ ದೃಷ್ಟಂ ಸ್ಪಷ್ಟಂ ಶಿಷ್ಟೈರನುಷ್ಠಿತಮ್ |

ತಸ್ಮಾದತ್ಯಂತನಿರ್ಬಾಧತಯಾ ಪ್ರೋಕ್ತೋಕ್ತಯುಕ್ತಿಭಿಃ || ೩೯ ||

ವಿದ್ಭಿಃಸಮನ್ವಯೋ ಜ್ಞೇಯಂ ಕೃಷ್ಣಾಖ್ಯೇSಸ್ಮಿನ್ ಗುರಾವಲಮ್ |

ಇಹ ಮಾಹಾತ್ಮ್ಯಮಸ್ಯೈವ ಸ್ತುವಂತ್ಯಾಕರ್ಣಯೇತ್ ಜನಾಃ |

ತೇ ತು ಉತ್ತಮಸ್ಥಾನಮಾಶು ಪ್ರಾಪ್ನುವಂತಿ ನ ಸಂಶಯಃ || ೪೦ ||

ಭಾನೂದಯೇ ದೃಷ್ಟಿಮಂತೋ ಹೃಷ್ಟಾಃ ಸ್ಯುಃ ಪ್ರಾಣಿನಃ ಪರೇ |

ದೃಷ್ಟಿಹೀನಾಸ್ತಥಾ ಖಿನ್ನಾಃ ಕಾಂಕ್ಷಂತಿ ಭಾಸ್ಕರದ್ಯತೇಃ || ೪೧ ||

ಹೃಷ್ಯಂತ್ಯಪಿ ಚ ಖಿದ್ಯಂತು ಸಂತೋSಸಂತೋ ಯಥಾಮತಿ |

ನಾಯೋSಪಾಯೋಸ್ಯ ಯಶಸಃ ತತ್ಫಲಂ ತತ್ತದನ್ವಿತಮ್ || ೪೨ ||

ಏತದ್ವಿದುತ್ತಮ ಶ್ರೀ ಮದುಪಾಧ್ಯಾಂಘ್ರಿಸೇವಿನಾಮ್ |

ಶಿಷ್ಯಕೋಟಿಪ್ರವಿಷ್ಟೇನ ಕೇವಲಾಲ್ಪೀಯಸಾತ್ಮನಾ || ೪೪ ||

ಯಥಾಮತಿ ಸತಾಂ ಭಕ್ತಿಮತಾಂ ತೇಷಾಂ ಪದಾಬ್ಜಯೋಃ |

ಪ್ರೀತಯೇSನೇನ ತುಷ್ಟಃ ಸ್ಯಾತ್ ಭಾರತೀಶಪ್ರಸಾದತಃ |

ಶ್ರೀ ಹರಿಃ ದಯಯಾ ದೀನವತ್ಸಲಃ ಪ್ರತ್ಯಹಂ ಮಮ || ೪೫ ||

ಯಃ ಪುಮಾನ್ ಅನುಸಂಧಾಯ ಭಾವಮಸ್ಯ ಗುರೋರ್ಹೃದಿ |

ನಿಧಾಯ ಮಹಿಮೋಪೇತಂ ಇದಂ ಭಕ್ತ್ಯಾಪಠೇತ್ ಸುಧೀಃ || ೪೬ ||

ಶ್ರೀಮಾನ್ ಸುಧೀಮಾನ್ ಸ ಭವೇತ್ ಪುತ್ರವಾನ್ ರೋಗವರ್ಜಿತಃ |

ಶ್ರುತಿಸ್ಮೃತಿಪುರಾಣೇತಿಹಾಸಪಾಠಫಲಂ ಲಭೇತ್ || ೪೭ ||

ಸರ್ವಕಾರ್ಯಜಯೀ ಶ್ಲಾಘ್ಯಃ ಸರ್ವಮಾನ್ಯೋ ಭವೇತ್ ಭುವಿ |

ಭುಂಕ್ತೇ ಹಿ ಸಕಲಾನ್ ಕಾಮಾನ್ ಬಹುಕಾಲಮನಾಕುಲಃ || ೪೮ ||

ಸರ್ವಪಾಪವಿನಿರ್ಮುಕ್ತೋ ಯಾತಿ ವಿಷ್ಣೋಃಪರಂ ಪದಮ್ |

ತಸ್ಮಾತ್ ಸರ್ವಪ್ರಯತ್ನೇನ ಪಠೇದೇತತ್ ಸಮಾಹಿತಃ || ೪೯ ||

ಸರ್ವಸಿದ್ಧಮವಾಪ್ನೋತಿ ನಾತ್ರ ಕಾರ್ಯಾ ವಿಚಾರಣಾ

ಅಸ್ಮದ್ ಶ್ರೀಮದುಪಾಧ್ಯಾಯೋಪಾಸ್ಯ ಕೃಷ್ಣಾರ್ಯ ಹೃದ್ಗತಃ |

ಶ್ರೀಮದ್ ವೇಂಕಟರಾಟ್ ಪ್ರೀತಃ ಸ್ಯಾತ್ ಮೇ ಬ್ರಹ್ಮಾದಿಸಂಸ್ತುತಃ || ೫೦ ||

ಸ್ತೋತ್ರೇSಸ್ಮಿನ್ ವಿವಿಧಪ್ರಬಂಧಕಥನಂ ನಾಪ್ರಸಕ್ತಾರ್ಥಂ

ಕ್ವಚಿತ್ ವೇದ್ಯಂ ವಿದ್ಭಿಃ ಅನನ್ವಿತಂ ನ ಕಥಮಪ್ಯನತ್ರ ವಿಸ್ತಾರತಃ ಪ್ರೋಕ್ತಮ್ |

ಯತ್ಸುಧಿಯಾ ವಿಚಾರ್ಯ ಸಕಲಂ ನಿರ್ಧಾರಯೇದಂಜಸಾ ಸಾರಗ್ರಾಹಿಭಿಃ |

ಅತ್ರ ವಿಸ್ತರಭಿಯಾ ನೋಕ್ತಂ ತದನ್ವಿಷ್ಟತಾಂ ||

|| ಇತಿ ಶ್ರೀ ಯೋಗಿ ನಾರಾಯಣಾಚಾರ್ಯ ಕೃತ

 ಶ್ರೀ ಕೃಷ್ಣಾರ್ಯಮಹಿಮಾವರ್ಣನಂ ಸಂಪೂರ್ಣಂ ||

||ಶ್ರೀ ಮಧ್ವೇಶಕೃಷ್ಣಾರ್ಪಣಮಸ್ತು||

****