|| ಕಾ ತ್ಯಾ ಯ ನೀ ಸ್ತು ತಿಃ ||
ಶ್ರೀರಾಮ ಉವಾಚ —
⬪ ನಮಸ್ತೇ ತ್ರಿಜಗದ್ವಂದ್ಯೇ ಸಂಗ್ರಾಮೇ ಜಯದಾಯಿನಿ |
ಪ್ರಸೀದ ವಿಜಯಂ ದೇಹಿ ಕಾತ್ಯಾಯನಿ ನಮೋಽಸ್ತು ತೇ ||
⬪ ಸರ್ವಶಕ್ತಿಮಯೇ ದುಷ್ಟರಿಪುನಿಗ್ರಹಕಾರಿಣಿ |
ದುಷ್ಟಜೃಂಭಿಣಿ ಸಂಗ್ರಾಮೇ ಜಯಂ ದೇಹಿ ನಮೋಽಸ್ತು ತೇ ||
⬪ ತ್ವಮೇಕಾ ಪರಮಾಶಕ್ತಿಃ ಸರ್ವಭೂತೇಷ್ವವಸ್ಥಿತಾ |
ದುಷ್ಟಾನ್ಸಂಹರ ಸಂಗ್ರಾಮೇ ಜಯಂ ದೇಹಿ ನಮೋಽಸ್ತು ತೇ ||
⬪ ರಣಪ್ರಿಯೇ ರಕ್ತಭಕ್ಷೇ ಮಾಂಸಭಕ್ಷಣಕಾರಿಣಿ |
ಪ್ರಪನ್ನಾರ್ತಿಹರೇ ಯುದ್ಧೇ ಜಯಂ ದೇಹಿ ನಮೋಽಸ್ತು ತೇ ||
⬪ ಖಟ್ವಾಂಗಾಸಿಕರೇ ಮುಂಡಮಾಲಾದ್ಯೋತಿತವಿಗ್ರಹೇ |
ಯೇ ತ್ವಾಂ ಸ್ಮರಂತಿ ದುರ್ಗೇಷು ತೇಷಾಂ ದುಃಖಹರಾ ಭವ ||
⬪ ತ್ವತ್ಪಾದಪಂಕಜಾದ್ದೈನ್ಯಂ ನಮಸ್ತೇ ಶರಣಪ್ರಿಯೇ |
ವಿನಾಶಾಯ ರಣೇ ಶತ್ರೂನ್ ಜಯಂ ದೇಹಿ ನಮೋಽಸ್ತು ತೇ ||
⬪ ಅಚಿಂತ್ಯವಿಕ್ರಮೇಽಚಿಂತ್ಯರೂಪಸೌಂದರ್ಯಶಾಲಿನಿ |
ಅಚಿಂತ್ಯಚರಿತೇಽಚಿಂತ್ಯೇ ಜಯಂ ದೇಹಿ ನಮೋಽಸ್ತು ತೇ ||
⬪ ಯೇ ತ್ವಾಂ ಸ್ಮರಂತಿ ದುರ್ಗೇಷು ದೇವೀಂ ದುರ್ಗವಿನಾಶಿನೀಂ |
ನಾವಸೀದಂತಿ ದುರ್ಗೇಷು ಜಯಂ ದೇಹಿ ನಮೋಽಸ್ತು ತೇ ||
⬪ ಮಹಿಷಾಸೃಕ್ಪ್ರಿಯೇ ಸಂಖ್ಯೇ ಮಹಿಷಾಸುರಮರ್ದಿನಿ |
ಶರಣ್ಯೇ ಗಿರಿಕನ್ಯೇ ಮೇ ಜಯಂ ದೇಹಿ ನಮೋಽಸ್ತು ತೇ ||
⬪ ಪ್ರಸನ್ನವದನೇ ಚಂಡಿ ಚಂಡಾಸುರವಿಮರ್ದಿನಿ |
ಸಂಗ್ರಾಮೇ ವಿಜಯಂ ದೇಹಿ ಶತ್ರೂನ್ ಜಹಿ ನಮೋಽಸ್ತು ತೇ ||
⬪ ರಕ್ತಾಕ್ಷಿ ರಕ್ತದಶನೇ ರಕ್ತಚರ್ಚಿತಗಾತ್ರಕೇ |
ರಕ್ತಬೀಜನಿಹಂತ್ರೀ ತ್ವಂ ಜಯಂ ದೇಹಿ ನಮೋಽಸ್ತು ತೇ ||
⬪ ನಿಶುಂಭಶುಂಭಸಂಹಂತ್ರಿ ವಿಶ್ವಕರ್ತ್ರಿ ಸುರೇಶ್ವರಿ |
ಜಹಿ ಶತ್ರೂನ್ ರಣೇ ನಿತ್ಯಂ ಜಯಂ ದೇಹಿ ನಮೋಽಸ್ತು ತೇ ||
⬪ ಭವಾನ್ಯೇತತ್ಸರ್ವಮೇವ ತ್ವಂ ಪಾಲಯಸಿ ಸರ್ವದಾ |
ರಕ್ಷ ವಿಶ್ವಮಿದಂ ಮಾತರ್ಹತ್ವೈತಾನ್ ದುಷ್ಟರಾಕ್ಷಸಾನ್ ||
⬪ ತ್ವಂ ಹಿ ಸರ್ವಗತಾ ಶಕ್ತಿರ್ದುಷ್ಟಮರ್ದನಕಾರಿಣಿ |
ಪ್ರಸೀದ ಜಗತಾಂ ಮಾತರ್ಜಯಂ ದೇಹಿ ನಮೋಽಸ್ತು ತೇ ||
⬪ ದುರ್ವೃತ್ತವೃಂದದಮಿನಿ ಸದ್ವೃತ್ತಪರಿಪಾಲಿನಿ |\
ನಿಪಾತಯ ರಣೇ ಶತ್ರೂಂಜಯಂ ದೇಹಿ ನಮೋಽಸ್ತು ತೇ ||
⬪ ಕಾತ್ಯಾಯನಿ ಜಗನ್ಮಾತಃ ಪ್ರಪನ್ನಾರ್ತಿಹರೇ ಶಿವೇ |
ಸಂಗ್ರಾಮೇ ವಿಜಯಂ ದೇಹಿ ಭಯೇಭ್ಯಃ ಪಾಹಿ ಸರ್ವದಾ ||
ಇತಿ ಶ್ರೀಮಹಾಭಾಗವತೇಮಹಾಪುರಾಣೇ
ಶ್ರೀರಾಮ ಕೃತಾ ಕಾತ್ಯಾಯನೀಸ್ತುತಿಃ ಸಮಾಪ್ತಾ
No comments:
Post a Comment