ದೇವೀ ಮಂಗಲಾಷ್ಟಕಮ್ देवी मङ्गलाष्टकम् devi mangalashtakam

Shri devi Mangalashtakam  ಶ್ರೀ ದೇವೀ ಮಂಗಲಾಷ್ಟಕಮ್ 

ಶ್ರೀವಿದ್ಯಾ ಶಿವನಾಮಭಾಗನಿಲಯಾ ಕಾಮೇಶ್ವರೀ ಸುನ್ದರೀ
     ಸೂಕ್ಷ್ಮಸ್ಥೂಲದಶಾವಿಶೇಷಿತಜಗದ್ರೂಪೇಣ ವಿದ್ಯೋತಿನೀ ।
ಸ್ವಾಂಶೀಭೂತಸಮಸ್ತಭೂತಹೃದಯಾಕಾಶಸ್ವರೂಪಾ ಶಿವಾ
     ಲೋಕಾತೀತ ಮದಾಶ್ರಯಾ ಶಿವಸತೀ ಕುರ್ಯಾತ್ಸದಾ ಮಂಗಲಮ್ ॥ 1॥

ದುರ್ಗಾ ಭರ್ಗಮನೋಹರಾ ಸುರನರೈಃ ಸಂಸೇವ್ಯಮಾನಾ ಸದಾ
     ದೈತ್ಯಾನಾಂ ಸುವಿನಾಶಿನೀ ಚ ಮಹತಾಂ ಸಾಕ್ಷಾತ್ ಫಲಾದಾಯಿನೀ ।
ಸ್ವಪ್ನೇ ದರ್ಶನದಾಯಿನೀ ಪರಮುದಂ ಸನ್ಧಾಯಿನೀ ಶಾಂಕರೀ
     ಪಾಪಘ್ನೀ ಶುಭಕಾರಿಣೀ ಸುಮುದಿತಾ ಕುರ್ಯಾತ್ಸದಾ ಮಂಗಲಮ್ ॥ 2॥

ಬಾಲಾ ಬಾಲಾರ್ಕವರ್ಣಾಢ್ಯಾ ಸೌವರ್ಣಾಮ್ಬರಧಾರಿಣೀ ।
ಚಂಡಿಕಾ ಲೋಕಕಲ್ಯಾಣೀ ಕುರ್ಯಾನ್ಮೇ ಮಂಗಲಂ ಸದಾ ॥ 3॥

ಕಾಲಿಕಾ ಭೀಕರಾಕಾರಾ ಕಲಿದೋಷನಿವಾರಿಣೀ ।
ಕಾಮ್ಯಪ್ರದಾಯಿನೀ ಶೈವೀ ಕುರ್ಯಾನ್ಮೇ ಮಂಗಲಂ ಸದಾ ॥ 4॥

ಹಿಮವತ್ಪುತ್ರಿಕಾ ಗೌರೀ ಕೈಲಾಸಾದ್ರಿವಿಹಾರಿಣೀ ।
ಪಾರ್ವತೀ ಶಿವವಾಮಾಂಗೀ ಕುರ್ಯಾನ್ಮೇ ಮಂಗಲಂ ಸದಾ ॥ 5॥

ವಾಣೀ ವೀಣಾಗಾನಲೋಲಾ ವಿಧಿಪತ್ನೀ ಸ್ಮಿತಾನನಾ ।
ಜ್ಞಾನಮುದ್ರಾಂಕಿತಕರಾ ಕುರ್ಯಾನ್ಮೇ ಮಂಗಲಂ ಸದಾ ॥ 6॥

ಮಹಾಲಕ್ಷ್ಮೀ ಪ್ರಸನ್ನಾಸ್ಯಾ ಧನಧಾನ್ಯವಿವರ್ಧಿನೀ ।
ವೈಷ್ಣವೀ ಪದ್ಮಜಾ ದೇವೀ ಕುರ್ಯಾನ್ಮೇ ಮಂಗಲಂ ಸದಾ ॥ 7॥

ಶಮ್ಭುಪ್ರಿಯಾ ಚನ್ದ್ರರೇಖಾ ಸಂಶೋಭಿತಲಲಾಟಕಾ ।
ನಾನಾರೂಪಧರಾ ಚೈಕಾ ಕುರ್ಯಾನ್ಮೇ ಮಂಗಲಂ ಸದಾ ॥ 8॥

ಮಂಗಲಾಷ್ಟಕಮೇತದ್ಧಿ ಪಠತಾಂ ಶ‍ೃಣ್ವತಾಂ ಸದಾ ।
ದದ್ಯಾದ್ದೇವೀ ಶುಭಂ ಶೀಘ್ರಮಾಯುರಾರೋಗ್ಯಭಾಗ್ಯಕಮ್ ॥ 9॥

ಇತಿ ಶ್ರೀದೇವೀ ಮಂಗಲಾಷ್ಟಕಂ ಸಮ್ಪೂರ್ಣಮ್ ।
*********

श्री देवी मङ्गलाष्टकम् 
श्रीविद्या शिवनामभागनिलया कामेश्वरी सुन्दरी
     सूक्ष्मस्थूलदशाविशेषितजगद्रूपेण विद्योतिनी ।
स्वांशीभूतसमस्तभूतहृदयाकाशस्वरूपा शिवा
     लोकातीत मदाश्रया शिवसती कुर्यात्सदा मङ्गलम् ॥ १॥

दुर्गा भर्गमनोहरा सुरनरैः संसेव्यमाना सदा
     दैत्यानां सुविनाशिनी च महतां साक्षात् फलादायिनी ।
स्वप्ने दर्शनदायिनी परमुदं सन्धायिनी शाङ्करी
     पापघ्नी शुभकारिणी सुमुदिता कुर्यात्सदा मङ्गलम् ॥ २॥

बाला बालार्कवर्णाढ्या सौवर्णाम्बरधारिणी ।
चण्डिका लोककल्याणी कुर्यान्मे मङ्गलं सदा ॥ ३॥

कालिका भीकराकारा कलिदोषनिवारिणी ।
काम्यप्रदायिनी शैवी कुर्यान्मे मङ्गलं सदा ॥ ४॥

हिमवत्पुत्रिका गौरी कैलासाद्रिविहारिणी ।
पार्वती शिववामाङ्गी कुर्यान्मे मङ्गलं सदा ॥ ५॥

वाणी वीणागानलोला विधिपत्नी स्मितानना ।
ज्ञानमुद्राङ्कितकरा कुर्यान्मे मङ्गलं सदा ॥ ६॥

महालक्ष्मी प्रसन्नास्या धनधान्यविवर्धिनी ।
वैष्णवी पद्मजा देवी कुर्यान्मे मङ्गलं सदा ॥ ७॥

शम्भुप्रिया चन्द्ररेखा संशोभितललाटका ।
नानारूपधरा चैका कुर्यान्मे मङ्गलं सदा ॥ ८॥

मङ्गलाष्टकमेतद्धि पठतां श‍ृण्वतां सदा ।
दद्याद्देवी शुभं शीघ्रमायुरारोग्यभाग्यकम् ॥ ९॥

इति श्रीदेवी मङ्गलाष्टकं सम्पूर्णम् ।
**********