ದಶಾವತಾರ ಸ್ತೋತ್ರಮ್ दशावतार स्तोत्रम् dashavatara stotram

॥ ದಶಾವತಾರ ಸ್ತೋತ್ರಮ್ ॥

ಶ್ರೀಮಾನ್ ವೇಂಕಟ ನಾಥಾರ್ಯಃ ಕವಿತಾರ್ಕಿಕ ಕೇಸರೀ ।
ವೇದಾನ್ತಾ ಚಾರ್ಯ ವರ್ಯೋಮೇ ಸನ್ನಿಧತ್ತಾಂ ಸದಾಹೃದಿ ॥

ದೇವೋ ನಃ ಶುಭಮಾತನೋತು ದಶಧಾ ನಿರ್ವರ್ತಯನ್ ಭೂಮಿಕಾಂ
ರಂಗೇ ಧಾಮನಿ ಲಬ್ಧ ನಿರ್ಭರ ರಸೈರಧ್ಯಕ್ಷಿತೋ ಭಾವುಕೈಃ ।
ಯದ್ಭಾವೇಷು ಪೃಥಗ್ವಿಧೇಷ್ವನುಗುಣಾನ್ ಭಾವಾನ್ ಸ್ವಯಂ ಬಿಭ್ರತೀ
ಯದ್ಧರ್ಮೈರಿಹ ಧರ್ಮಿಣೀ ವಿಹರತೇ ನಾನಾಕೃತಿರ್ನಾಯಿಕಾ ॥ 1 ॥

ದೇವೋ ನಃ ಶುಭಮಾತನೋತು

ನಿರ್ಮಗ್ನ ಶ್ರುತಿ ಜಾಲ ಮಾರ್ಗಣ ದಶಾ ದತ್ತ ಕ್ಷಣೈರ್ವೀಕ್ಷಣೈಃ
ಅನ್ತಸ್ತನ್ವದಿವಾರವಿನ್ದ ಗಹನಾನ್ಯೌದನ್ವತೀನಾಮಪಾಮ್ ।
ನಿಷ್ಪ್ರತ್ಯೂಹ ತರಂಗ ರಿಂಗಣ ಮಿಥಃ ಪ್ರತ್ಯೂಢ ಪಾಥಶ್ಛಟಾ -
ಡೋಲಾರೋಹ ಸದೋಹಲಂ ಭಗವತೋ ಮಾತ್ಸ್ಯಂ ವಪುಃ ಪಾತು ನಃ ॥ 2 ॥

ಅವ್ಯಾಸುರ್ಭುವನ ತ್ರಯೀಮನಿಭೃತಂ ಕಂಡೂಯನೈರದ್ರಿಣಾ
ನಿದ್ರಾಣಸ್ಯ ಪರಸ್ಯ ಕೂರ್ಮ ವಪುಷೋ ನಿಶ್ವಾಸ ವಾತೋರ್ಮಯಃ ।
ಯದ್ವಿಕ್ಷೇಪಣ ಸಂಸ್ಕೃತೋ ದಧಿಪಯಃ ಪ್ರೇಂಖೋಲಪರ್ಯಂಕಿಕಾ -
ನಿತ್ಯಾರೋಹಣ ನಿರ್ವೃತೋ ವಿಹರತೇ ದೇವಃ ಸಹೈವ ಶ್ರಿಯಾ ॥ 3 ॥

ಗೋಪಾಯೇದನಿಶಂ ಜಗನ್ತಿ ಕುಹನಾ ಪೋತ್ರೀ ಪವಿತ್ರೀ ಕೃತ -
ಬ್ರಹ್ಮಾಂಡಃ ಪ್ರಲಯೋರ್ಮಿ ಘೋಷ ಗುರುಭಿರ್ಘೋಣಾ ರವೈರ್ಘುರ್ಘುರೈಃ ।
ಯದ್ದಂಷ್ಟ್ರಾಂಕುರ ಕೋಟಿ ಗಾಢ ಘಟನಾ ನಿಷ್ಕಮ್ಪ ನಿತ್ಯ ಸ್ಥಿತಿಃ
ಬ್ರಹ್ಮ ಸ್ತಮ್ಬಮಸೌದಸೌ ಭಗವತೀ ಮುಸ್ತೇವ ವಿಶ್ವಮ್ಭರಾ ॥ 4 ॥

ಪ್ರತ್ಯಾದಿಷ್ಟ ಪುರಾತನ ಪ್ರಹರಣ ಗ್ರಾಮಃ ಕ್ಷಣಂ ಪಾಣಿಜೈಃ
ಅವ್ಯಾತ್ ತ್ರೀಣಿ ಜಗನ್ತ್ಯಕುಂಠ ಮಹಿಮಾ ವೈಕುಂಠ ಕಂಠೀರವಃ ।
ಯತ್ಪ್ರಾದುರ್ಭವನಾದವನ್ಧ್ಯ ಜಠರಾ ಯಾದೃಚ್ಛಿಕಾದ್ ವೇಧಸಾಂ
ಯಾ ಕಾಚಿತ್ ಸಹಸಾ ಮಹಾಸುರ ಗೃಹ ಸ್ಥೂಣಾ ಪಿತಾಮಹ್ಯಭೂತ್ ॥ 5 ॥

ವ್ರೀಡಾ ವಿದ್ಧ ವದಾನ್ಯ ದಾನವ ಯಶೋ ನಾಸೀರ ಧಾಟೀ ಭಟಃ
ತ್ರೈಯಕ್ಷಂ ಮಕುಟಂ ಪುನನ್ನವತು ನಸ್ತ್ರೈವಿಕ್ರಮೋ ವಿಕ್ರಮಃ ।
ಯತ್ಪ್ರಸ್ತಾವ ಸಮುಚ್ಛ್ರಿತ ಧ್ವಜ ಪಟೀ ವೃತ್ತಾನ್ತ ಸಿದ್ಧಾನ್ತಿಭಿಃ
ಸ್ರೋತೋಭಿಃ ಸುರಸಿನ್ಧುರಷ್ಟಸು ದಿಶಾ ಸೌಧೇಷು ದೋಧೂಯತೇ ॥ 6 ॥

ಕ್ರೋಧಾಗ್ನಿಂ ಜಮದಗ್ನಿ ಪೀಡನ ಭವಂ ಸನ್ತರ್ಪಯಿಷ್ಯನ್ ಕ್ರಮಾತ್
ಅಕ್ಷತ್ರಾಮಪಿ ಸನ್ತತಕ್ಷ ಯ ಇಮಾಂ ತ್ರಿಃಸಪ್ತ ಕೃತ್ವಃ ಕ್ಷಿತಿಮ್ ।
ದತ್ವಾ ಕರ್ಮಣಿ ದಕ್ಷಿಣಾಂ ಕ್ವಚನ ತಾಮಾಸ್ಕನ್ದ್ಯ ಸಿನ್ಧುಂ ವಸನ್
ಅಬ್ರಹ್ಮಣ್ಯಮಪಾಕರೋತು ಭಗವಾನಾಬ್ರಹ್ಮ ಕೀಟಂ ಮುನಿಃ ॥ 7 ॥

ಪಾರಾವಾರ ಪಯೋ ವಿಶೋಷಣ ಕಲಾ ಪಾರೀಣ ಕಾಲಾನಲ -
ಜ್ವಾಲಾ ಜಾಲ ವಿಹಾರ ಹಾರಿ ವಿಶಿಖ ವ್ಯಾಪಾರ ಘೋರ ಕ್ರಮಃ ।
ಸರ್ವಾವಸ್ಥ ಸಕೃತ್ಪ್ರಪನ್ನ ಜನತಾ ಸಂರಕ್ಷಣೈಕ ವ್ರತೀ
ಧರ್ಮೋ ವಿಗ್ರಹವಾನಧರ್ಮ ವಿರತಿಂ ಧನ್ವೀ ಸ ತನ್ವೀತ ನಃ ॥ 8 ॥

ಫಕ್ಕತ್ಕೌರವ ಪಟ್ಟಣ ಪ್ರಭೃತಯಃ ಪ್ರಾಸ್ತ ಪ್ರಲಮ್ಬಾದಯಃ
ತಾಲಾಂಕಸ್ಯ ತಥಾವಿಧಾ ವಿಹೃತಯಸ್ತನ್ವನ್ತು ಭದ್ರಾಣಿ ನಃ ।
ಕ್ಷೀರಂ ಶರ್ಕರಯೇವ ಯಾಭಿರಪೃಥಗ್ಭೂತಾಃ ಪ್ರಭೂತೈರ್ಗುಣೈಃ
ಆಕೌಮಾರಕಮಸ್ವದನ್ತ ಜಗತೇ ಕೃಷ್ಣಸ್ಯ ತಾಃ ಕೇಲಯಃ ॥ 9 ॥

ನಾಥಾಯೈವ ನಮಃಪದಂ ಭವತು ನಶ್ಚಿತ್ರೈಶ್ಚರಿತ್ರ ಕ್ರಮೈಃ
ಭೂಯೋಭಿರ್ಭುವನಾನ್ಯಮೂನಿ ಕುಹನಾ ಗೋಪಾಯ ಗೋಪಾಯತೇ ।
ಕಾಲಿನ್ದೀ ರಸಿಕಾಯ ಕಾಲಿಯ ಫಣಿ ಸ್ಫಾರ ಸ್ಫಟಾ ವಾಟಿಕಾ -
ರಂಗೋತ್ಸಂಗ ವಿಶಂಕ ಚಂಕ್ರಮಧುರಾ ಪರ್ಯಾಯಚರ್ಯಾ ಯತೇ ॥ 10 ॥

ಭಾವಿನ್ಯಾ ದಶಯಾ ಭವನ್ನಿಹ ಭವ ಧ್ವಂಸಾಯ ನಃ ಕಲ್ಪತಾಂ
ಕಲ್ಕೀ ವಿಷ್ಣುಯಶಸ್ಸುತಃ ಕಲಿ ಕಥಾ ಕಾಲುಷ್ಯ ಕೂಲಂಕಷಃ ।
ನಿಃಶೇಷ ಕ್ಷತ ಕಂಟಕೇ ಕ್ಷಿತಿತಲೇ ಧಾರಾ ಜಲೌಘೈರ್ಧ್ರುವಂ
ಧರ್ಮಂ ಕಾರ್ತಯುಗಂ ಪ್ರರೋಹಯತಿ ಯನ್ನಿಸ್ತ್ರಿಂಶ ಧಾರಾಧರಃ ॥ 11 ॥

ಇಚ್ಛಾ ಮೀನ ವಿಹಾರ ಕಚ್ಛಪ ಮಹಾ ಪೋತ್ರಿನ್ ಯದೃಚ್ಛಾ ಹರೇ
ರಕ್ಷಾ ವಾಮನ ರೋಷ ರಾಮ ಕರುಣಾ ಕಾಕುತ್ಸ್ಥ ಹೇಲಾ ಹಲಿನ್ ।
ಕ್ರೀಡಾ ವಲ್ಲವ ಕಲ್ಕ ವಾಹನ ದಶಾ ಕಲ್ಕಿನ್ನಿತಿ ಪ್ರತ್ಯಹಂ
ಜಲ್ಪನ್ತಃ ಪುರುಷಾಃ ಪುನನ್ತಿ ಭುವನಂ ಪುಣ್ಯೌಘ ಪಣ್ಯಾಪಣಾಃ ॥

ವಿದ್ಯೋದನ್ವತಿ ವೇಂಕಟೇಶ್ವರಕವೌ ಜಾತಂ ಜಗನ್ಮಂಗಲಂ
ದೇವೇಶಸ್ಯ ದಶಾವತಾರ ವಿಷಯಂ ಸ್ತೋತ್ರಂ ವಿವಕ್ಷೇತ ಯಃ ।
ವಕ್ತ್ರೇ ತಸ್ಯ ಸರಸ್ವತೀ ಬಹು ಮುಖೀ ಭಕ್ತಿಃ ಪರಾ ಮಾನಸೇ
ಶುದ್ಧಿಃ ಕಾಪಿ ತನೌ ದಿಶಾಸು ದಶಸು ಖ್ಯಾತಿಃ ಶುಭಾ ಜೃಮ್ಭತೇ  ॥

ಕವಿತಾರ್ಕಿಕಸಿಂಹಾಯ ಕಲ್ಯಾಣಗುಣಶಾಲಿನೇ ।
ಶ್ರೀಮತೇ ವೇಂಕಟೇಶಾಯ ವೇದಾನ್ತಗುರವೇ ನಮಃ ॥
**************

॥ दशावतार स्तोत्रम् ॥

श्रीमान् वेङ्कट नाथार्यः कवितार्किक केसरी ।
वेदान्ता चार्य वर्योमे सन्निधत्तां सदाहृदि ॥

देवो नः शुभमातनोतु दशधा निर्वर्तयन् भूमिकां
रङ्गे धामनि लब्ध निर्भर रसैरध्यक्षितो भावुकैः ।
यद्भावेषु पृथग्विधेष्वनुगुणान् भावान् स्वयं बिभ्रती
यद्धर्मैरिह धर्मिणी विहरते नानाकृतिर्नायिका ॥ १ ॥

देवो नः शुभमातनोतु

निर्मग्न श्रुति जाल मार्गण दशा दत्त क्षणैर्वीक्षणैः
अन्तस्तन्वदिवारविन्द गहनान्यौदन्वतीनामपाम् ।
निष्प्रत्यूह तरङ्ग रिङ्गण मिथः प्रत्यूढ पाथश्छटा -
डोलारोह सदोहलं भगवतो मात्स्यं वपुः पातु नः ॥ २ ॥

अव्यासुर्भुवन त्रयीमनिभृतं कण्डूयनैरद्रिणा
निद्राणस्य परस्य कूर्म वपुषो निश्वास वातोर्मयः ।
यद्विक्षेपण संस्कृतो दधिपयः प्रेङ्खोलपर्यङ्किका -
नित्यारोहण निर्वृतो विहरते देवः सहैव श्रिया ॥ ३ ॥

गोपायेदनिशं जगन्ति कुहना पोत्री पवित्री कृत -
ब्रह्माण्डः प्रलयोर्मि घोष गुरुभिर्घोणा रवैर्घुर्घुरैः ।
यद्दंष्ट्राङ्कुर कोटि गाढ घटना निष्कम्प नित्य स्थितिः
ब्रह्म स्तम्बमसौदसौ भगवती मुस्तेव विश्वम्भरा ॥ ४ ॥

प्रत्यादिष्ट पुरातन प्रहरण ग्रामः क्षणं पाणिजैः
अव्यात् त्रीणि जगन्त्यकुण्ठ महिमा वैकुण्ठ कण्ठीरवः ।
यत्प्रादुर्भवनादवन्ध्य जठरा यादृच्छिकाद् वेधसां
या काचित् सहसा महासुर गृह स्थूणा पितामह्यभूत् ॥ ५ ॥

व्रीडा विद्ध वदान्य दानव यशो नासीर धाटी भटः
त्रैयक्षं मकुटं पुनन्नवतु नस्त्रैविक्रमो विक्रमः ।
यत्प्रस्ताव समुच्छ्रित ध्वज पटी वृत्तान्त सिद्धान्तिभिः
स्रोतोभिः सुरसिन्धुरष्टसु दिशा सौधेषु दोधूयते ॥ ६ ॥

क्रोधाग्निं जमदग्नि पीडन भवं सन्तर्पयिष्यन् क्रमात्
अक्षत्रामपि सन्ततक्ष य इमां त्रिःसप्त कृत्वः क्षितिम् ।
दत्वा कर्मणि दक्षिणां क्वचन तामास्कन्द्य सिन्धुं वसन्
अब्रह्मण्यमपाकरोतु भगवानाब्रह्म कीटं मुनिः ॥ ७ ॥

पारावार पयो विशोषण कला पारीण कालानल -
ज्वाला जाल विहार हारि विशिख व्यापार घोर क्रमः ।
सर्वावस्थ सकृत्प्रपन्न जनता संरक्षणैक व्रती
धर्मो विग्रहवानधर्म विरतिं धन्वी स तन्वीत नः ॥ ८ ॥

फक्कत्कौरव पट्टण प्रभृतयः प्रास्त प्रलम्बादयः
तालाङ्कस्य तथाविधा विहृतयस्तन्वन्तु भद्राणि नः ।
क्षीरं शर्करयेव याभिरपृथग्भूताः प्रभूतैर्गुणैः
आकौमारकमस्वदन्त जगते कृष्णस्य ताः केलयः ॥ ९ ॥

नाथायैव नमःपदं भवतु नश्चित्रैश्चरित्र क्रमैः
भूयोभिर्भुवनान्यमूनि कुहना गोपाय गोपायते ।
कालिन्दी रसिकाय कालिय फणि स्फार स्फटा वाटिका -
रङ्गोत्सङ्ग विशङ्क चंक्रमधुरा पर्यायचर्या यते ॥ १० ॥

भाविन्या दशया भवन्निह भव ध्वंसाय नः कल्पतां
कल्की विष्णुयशस्सुतः कलि कथा कालुष्य कूलङ्कषः ।
निःशेष क्षत कण्टके क्षितितले धारा जलौघैर्ध्रुवं
धर्मं कार्तयुगं प्ररोहयति यन्निस्त्रिंश धाराधरः ॥ ११ ॥

इच्छा मीन विहार कच्छप महा पोत्रिन् यदृच्छा हरे
रक्षा वामन रोष राम करुणा काकुत्स्थ हेला हलिन् ।
क्रीडा वल्लव कल्क वाहन दशा कल्किन्निति प्रत्यहं
जल्पन्तः पुरुषाः पुनन्ति भुवनं पुण्यौघ पण्यापणाः ॥

विद्योदन्वति वेङ्कटेश्वरकवौ जातं जगन्मङ्गलं
देवेशस्य दशावतार विषयं स्तोत्रं विवक्षेत यः ।
वक्त्रे तस्य सरस्वती बहु मुखी भक्तिः परा मानसे
शुद्धिः कापि तनौ दिशासु दशसु ख्यातिः शुभा जृम्भते  ॥

कवितार्किकसिंहाय कल्याणगुणशालिने ।

श्रीमते वेङ्कटेशाय वेदान्तगुरवे नमः ॥
*************



**********