ಗುರು ಸುವರ್ಣಮಾಲಾ ಸ್ತೋತ್ರಮ್ 2 ಚಂದ್ರಶೇಖರ ಭಾರತಿ ವಿರಚಿತಮ್ गुरु सुवर्णमाला स्तोत्रम् २ guru suvarnamala stotram 2 by chandrashekara bharati

ಚಂದ್ರಶೇಖರ ಭಾರತಿ ವಿರಚಿತಮ್ 
by chandrashekara bharati

Shri Guru suvarnamala stotram 2
 ಶ್ರೀ ಗುರು ಸುವರ್ಣಮಾಲಾ ಸ್ತೋತ್ರಮ್ 2 
ಶ್ರೀಸತ್ಸಂವಿತ್ಸುಖಶಿವನೂತನನರಸಿಂಹನಾಮಗುರುವರ್ಯಮ್ ।
ಸಂಸಾರಸಿನ್ಧುತಾರಣನಾವಂ ಭಕ್ತಿಪ್ರದಂ ಸದಾ ವನ್ದೇ ॥ 1॥

ಶ್ರೀಕಂಠಪೂಜಕಂ ತಂ ಶ್ರೀವಿದ್ಯಾಕೀರ್ತಿದಾನಕಲ್ಪತರುಮ್ ।
ಶ್ರೀನಿರ್ಭರ್ತ್ಸಿತಭಾನುಂ ಶ್ರೀಶ‍ೃಂಗಗಿರೌ ವಸನ್ತಮಹಮೀಡೇ ॥ 2॥

ಸತ್ಯಂ ಜ್ಞಾನಮಿತೀಮೇ ಸರ್ವೇ ಘುಷ್ಯನ್ತಿ ಯಂ ಹಿ ವೇದಾನ್ತಾಃ ।
ಸದ್ಗುರುಮುಖಲಭ್ಯಂ ತಂ ಸತತಂ ಪ್ರಣಮಾಮಿ ಗುರುವರಂ ಭಕ್ತ್ಯಾ ॥ 3॥

ಚಿದಚಿದ್ದುಗ್ಧಜಲೇ ಯಃ ಚಿತ್ತತ್ರೋಟ್ಯಾ ವಿಭಜ್ಯ ಪರಹಂಸಃ ।
ಚಿತಮೇವಾಂಗೀಕುರುತೇ ಚಿತ್ತವಿಶುದ್ಧ್ಯೈ ದ್ವಿಜಾಗ್ರ್ಯಮೀಡೇ ತಮ್ ॥ 4॥

ಆಸೇಚನಕಮುಖಾಮ್ಬುಜಮಾನನ್ದದಮಾಶು ಭಕ್ತಜನತಾಯಾಃ ।
ಆಕಂಠಪೂರ್ಣನತದಯಮಾತ್ಮಾರಾಮಂ ನಮಾಮಿ ಲೋಕಗುರುಮ್ ॥ 5॥

ನನ್ದನಶಾಖೀ ನಮತಾಂ ನಶ್ಯತಿ ಯದ್ದರ್ಶನಾದ್ಧಿ ಪಾಪೌಘಃ ।
ನನ್ದಿತವಿಶ್ವಜನಂ ತಂ ನನ್ದಂ ವನ್ದೇ ಸಮಾಪ್ತುಮಾಪೂರ್ವಮ್ ॥ 6॥

ದರಹಾಸದೀಪ್ತವಕ್ತ್ರಂ ದನ್ತಿವರೇಣ್ಯೇ ನಿವಿಷ್ಟಚಿತ್ತಂ ತಮ್ ।
ದಮಶಮಮುಖಗುಣದಾನೇ ದಕ್ಷಂ ಪ್ರಣಮಾಮಿ ಶೋಕವಿಚ್ಛಿತ್ತ್ಯೈ ॥ 7॥

ಶಿವದೋ ಭಕ್ತಜನಾನಾಂ ಶಿವರೂಪೋ ಹಸ್ತನಿರ್ಜಿತಪಲಾಶಃ ।
ಶಿಥಿಲಯತು ಭವಪಾಶಂ ಶಿರಸಾ ವೇದಸ್ಯ ಗೀತನಿಜರೂಪಃ ॥ 8॥

ವಾರಣಗಮನಂ ಭವಭಯವಾರಣಮಾನನ್ದಬೋಧಘನಮ್ ।
ವಾತಾದಿಭೂತರೂಪಂ ವಾಜಿಗಜೈರ್ಬಿರುದವನ್ತಮಹಮೀಡೇ ॥ 9॥

ಭಿಕ್ಷುಕವರಸಮ್ಪೂಜ್ಯಂ ಭಿಷಜಂ ಸಂಸಾರದುಃಖರೋಗಸ್ಯ ।
ಭೀನಯಯುತೋಽಹಮೀಡ್ಯಂ ಭಿಕ್ಷಾಂ ಯಾಚೇ ವಿಶುದ್ಧವಿದ್ಯಾಯಾಃ ॥ 10॥

ನಖಕಾನ್ತಿರಕ್ತಮಾಲಂ ನಗಸ್ಥಿರಂ ಮನ್ಮಥಸ್ಯ ಜೇತಾರಮ್ ।
ನವನೀತಹೃದಯಮನಿಶಂ ನಮಾಮಿ ಗುರುರಾಜಮಾಶು ಮೋಕ್ಷಾಯ ॥ 11॥

ವಶ್ಯೀಕೃತಸರ್ವಾಕ್ಷಂ ವಾಚಸ್ಪತಿಗರ್ವಹಾರಿವಾಚಾಲಿಮ್ ।
ವಶ್ಯಂ ಭಕ್ತಜನಾನಾಂ ವಟತರುಹಿತರೂಪಸದ್ಗುರುಂ ವನ್ದೇ ॥ 12॥

ನೃಹರಿಗುರುಸಕ್ತಚಿತ್ತೋ ನೃವರಪಶುಪ್ರಭೃತಿಸರ್ವವಸ್ತುಸಮಃ ।
ನೃಪವನ್ದಿತಪಾದಾಬ್ಜೋ ನೃತ್ಯತು ಗುರುರಾಣ್ಮದೀಯಚಿತ್ತಾಬ್ಜೇ ॥ 13॥

ಸಿಂಹಂ ದ್ವೈತಿಮದೇಭೇ ಸಿತಮಾತನ್ವಾನಮನ್ತರಂ ನಮತಾಮ್ ।
ಸಿನ್ದೂರಾರುಣಚೇಲಂ ಸಿತಚಾಮರವೀಜಿತಂ ಗುರುಂ ವನ್ದೇ ॥ 14॥

ಹರಿದಷ್ಟಭರಿತಕೀರ್ತಿಂ ಹನ್ತಾರಂ ಸರ್ವಲೋಕಹೃತ್ತಮಸಃ ।
ಹಂಸಂ ಪರಪದಪೂರ್ವಂ ಹರನ್ತಮೀಡೇ ಸಮಸ್ತಚಕ್ರಾರ್ತಿಮ್ ॥ 15॥

ಭಾರತಿನರಸಿಂಹಗುರೋ ಭಾಜನಮೇನಂ ಭವತ್ಕಟಾಕ್ಷಸ್ಯ ।
ಭಾವಿನಮಪಿ ಕುರುಷೇ ನಹಿ ಭಾರತಿ ಲೋಕಸ್ಯ ಖಲು ದಯಾದೃಷ್ಟೇ ॥ 16॥

ರದನವಿನಿರ್ಜಿತಕುನ್ದಂ ರಮ್ಯಾ ವಾಚಃ ಪ್ರಸಾರಯನ್ತಮಹಮ್ ।
ರಕ್ಷಕಮೀಡೇ ಜಗತಾಂ ರಜಸ್ತಮೋಹೀನಮಾಶು ಮಾಂ ತನುತಾಮ್ ॥ 17॥

ತೀವ್ರತಪಾ ಗುರುಚರಣಸ್ತೀರಂ ಯೋ ನಯತಿ ಸಂಸೃತೌ ಮಗ್ನಾನ್ ।
ತೀವ್ರಾಜ್ಞಾನಮಯಂ ಮಾಂ ತೀರ್ಥೇಶೋ ಜ್ಞಾನವನ್ತಮಾತನುತಾಮ್ ॥ 18॥

ಪಾತಕವಹ್ನಿಜಲಂ ಯಃ ಪಾಮರವಿದ್ವತ್ಸಮಾನದೃಷ್ಟಿಶ್ಚ ।
ಪಾವಯಿತಾ ಲೋಕಾನಾಂ ಪಾತು ಗುರುಃ ಸರ್ವದಾ ಸಮಸ್ತಾನ್ನಃ ॥ 19॥

ತುಹಿನಾಂಶುಸದೃಶಕಾನ್ತಿಃ ತುಚ್ಛಂ ವಿಶ್ವಂ ವಿಲೋಕಯನ್ ಯೋಗೀ ।
ತುಲನಾರಹಿತಃ ಶೀಘ್ರಂ ತುಷ್ಟಿಂ ಮಹ್ಯಂ ದದಾತು ಗುರುವರ್ಯಃ ॥ 20॥

ಶ್ರೀಗುರುಶಿಷ್ಯಾನ್ಯತಮಃ ಕಶ್ಚನ ಭಕ್ತಃ ಸುಭಕ್ತಿಸಂಯುಕ್ತಃ ।
ಶ್ಲೋಕಾಲೀನ್ ಶ್ರೀದೇಶಿಕಪದಾಬ್ಜಯುಗ್ಮೇ ಸಮಾರ್ಪಯತ್ ॥ 21॥

ಇತಿ ಶ್ರೀಜಗದ್ರುರು ಶ್ರೀಶ‍ೃಂಗೇರೀಪೀಠಾಧಿಪ ಶ್ರೀಚನ್ದ್ರಶೇಖರಭಾರತೀ
ಶ್ರೀಪಾದೈಃ ವಿರಚಿತಾ ಶ್ರೀಗುರುಸುವರ್ಣಮಾಲಾಸ್ತೋತ್ರಂ ಸಮ್ಪೂರ್ಣಮ್ ।
***********

श्री गुरु सुवर्णमाला स्तोत्रम् २ 
श्रीसत्संवित्सुखशिवनूतननरसिंहनामगुरुवर्यम् ।
संसारसिन्धुतारणनावं भक्तिप्रदं सदा वन्दे ॥ १॥

श्रीकण्ठपूजकं तं श्रीविद्याकीर्तिदानकल्पतरुम् ।
श्रीनिर्भर्त्सितभानुं श्रीश‍ृङ्गगिरौ वसन्तमहमीडे ॥ २॥

सत्यं ज्ञानमितीमे सर्वे घुष्यन्ति यं हि वेदान्ताः ।
सद्गुरुमुखलभ्यं तं सततं प्रणमामि गुरुवरं भक्त्या ॥ ३॥

चिदचिद्दुग्धजले यः चित्तत्रोट्या विभज्य परहंसः ।
चितमेवाङ्गीकुरुते चित्तविशुद्ध्यै द्विजाग्र्यमीडे तम् ॥ ४॥

आसेचनकमुखाम्बुजमानन्ददमाशु भक्तजनतायाः ।
आकण्ठपूर्णनतदयमात्मारामं नमामि लोकगुरुम् ॥ ५॥

नन्दनशाखी नमतां नश्यति यद्दर्शनाद्धि पापौघः ।
नन्दितविश्वजनं तं नन्दं वन्दे समाप्तुमापूर्वम् ॥ ६॥

दरहासदीप्तवक्त्रं दन्तिवरेण्ये निविष्टचित्तं तम् ।
दमशममुखगुणदाने दक्षं प्रणमामि शोकविच्छित्त्यै ॥ ७॥

शिवदो भक्तजनानां शिवरूपो हस्तनिर्जितपलाशः ।
शिथिलयतु भवपाशं शिरसा वेदस्य गीतनिजरूपः ॥ ८॥

वारणगमनं भवभयवारणमानन्दबोधघनम् ।
वातादिभूतरूपं वाजिगजैर्बिरुदवन्तमहमीडे ॥ ९॥

भिक्षुकवरसम्पूज्यं भिषजं संसारदुःखरोगस्य ।
भीनययुतोऽहमीड्यं भिक्षां याचे विशुद्धविद्यायाः ॥ १०॥

नखकान्तिरक्तमालं नगस्थिरं मन्मथस्य जेतारम् ।
नवनीतहृदयमनिशं नमामि गुरुराजमाशु मोक्षाय ॥ ११॥

वश्यीकृतसर्वाक्षं वाचस्पतिगर्वहारिवाचालिम् ।
वश्यं भक्तजनानां वटतरुहितरूपसद्गुरुं वन्दे ॥ १२॥

नृहरिगुरुसक्तचित्तो नृवरपशुप्रभृतिसर्ववस्तुसमः ।
नृपवन्दितपादाब्जो नृत्यतु गुरुराण्मदीयचित्ताब्जे ॥ १३॥

सिंहं द्वैतिमदेभे सितमातन्वानमन्तरं नमताम् ।
सिन्दूरारुणचेलं सितचामरवीजितं गुरुं वन्दे ॥ १४॥

हरिदष्टभरितकीर्तिं हन्तारं सर्वलोकहृत्तमसः ।
हंसं परपदपूर्वं हरन्तमीडे समस्तचक्रार्तिम् ॥ १५॥

भारतिनरसिंहगुरो भाजनमेनं भवत्कटाक्षस्य ।
भाविनमपि कुरुषे नहि भारति लोकस्य खलु दयादृष्टे ॥ १६॥

रदनविनिर्जितकुन्दं रम्या वाचः प्रसारयन्तमहम् ।
रक्षकमीडे जगतां रजस्तमोहीनमाशु मां तनुताम् ॥ १७॥

तीव्रतपा गुरुचरणस्तीरं यो नयति संसृतौ मग्नान् ।
तीव्राज्ञानमयं मां तीर्थेशो ज्ञानवन्तमातनुताम् ॥ १८॥

पातकवह्निजलं यः पामरविद्वत्समानदृष्टिश्च ।
पावयिता लोकानां पातु गुरुः सर्वदा समस्तान्नः ॥ १९॥

तुहिनांशुसदृशकान्तिः तुच्छं विश्वं विलोकयन् योगी ।
तुलनारहितः शीघ्रं तुष्टिं मह्यं ददातु गुरुवर्यः ॥ २०॥

श्रीगुरुशिष्यान्यतमः कश्चन भक्तः सुभक्तिसंयुक्तः ।
श्लोकालीन् श्रीदेशिकपदाब्जयुग्मे समार्पयत् ॥ २१॥

इति श्रीजगद्रुरु श्रीश‍ृङ्गेरीपीठाधिप श्रीचन्द्रशेखरभारती
श्रीपादैः विरचिता श्रीगुरुसुवर्णमालास्तोत्रं सम्पूर्णम् ।
********