ಪಿತೃಸ್ತುತಿಃ ಪಿತೃಸ್ತೋತ್ರಂ ಗರುಡೇ ಮಹಾಪುರಾಣೇ pitru stotra pitru stutih garuda purana

ಶ್ರೀಗರುಡೇ ಮಹಾಪುರಾಣೇ ಪಿತೃಸ್ತೋತ್ರೇ ರುಚಿಸ್ತೋತ್ರಂ ನಾಮ

ಊನನವತಿತಮೋಽಧ್ಯಾಯಾನ್ತರ್ಗತಮ್ ।

ರುಚಿರುವಾಚ ।

ನಮಸ್ಯೇಽಹಂ ಪಿತೄನ್ಭಕ್ತ್ಯಾ ಯೇ ವಸನ್ತ್ಯಧಿದೇವತಮ್ । var ದೇವತಾಃ

ದೇವೈರಪಿ ಹಿ ತರ್ಪ್ಯನ್ತೇ ಯೇ ಶ್ರಾದ್ಧೇಷು ಸ್ವಧೋತ್ತರೈಃ ॥ 1॥ 

ನಮಸ್ಯೇಽಹಂ ಪಿತೄನ್ಸ್ವರ್ಗೇ ಯೇ ತರ್ಪ್ಯನ್ತೇ ಮಹರ್ಷಿಭಿಃ ।

ಶ್ರಾದ್ಧೈರ್ಮನೋಮಯೈರ್ಭಕ್ತ್ಯಾ ಭುಕ್ತಿಮುಕ್ತಿಮಭೀಪ್ಸುಭಿಃ ॥ 2॥ 

ನಮಸ್ಯೇಽಹಂ ಪಿತೄನ್ಸ್ವರ್ಗೇ ಸಿದ್ಧಾಃ ಸನ್ತರ್ಪಯನ್ತಿ ಯಾನ್ ।

ಶ್ರಾದ್ಧೇಷು ದಿವ್ಯೈಃ ಸಕಲೈರುಪಹಾರೈರನುತ್ತಮೈಃ ॥ 3॥ 

ನಮಸ್ಯೇಽಹಂ ಪಿತೄನ್ಭಕ್ತ್ಯಾ ಯೇಽರ್ಚ್ಯನ್ತೇ ಗುಹ್ಯಕೈರ್ದಿವಿ ।

ತನ್ಮಯತ್ವೇನ ವಾಂಛದ್ಭಿರೃದ್ಧಿಮಾತ್ಯನ್ತಿಕೀಂ ಪರಾಮ್ ॥ 4॥

ನಮಸ್ಯೇಽಹಂ ಪಿತೄನ್ಮರ್ತ್ಯೈರರ್ಚ್ಯನ್ತೇ ಭುವಿ ಯೇ ಸದಾ ।

ಶ್ರಾದ್ಧೇಷು ಶ್ರದ್ಧಯಾಭೀಷ್ಟಲೋಕಪುಷ್ಟಿಪ್ರದಾಯಿನಃ ॥ 5॥ 

ನಮಸ್ಯೇಽಹಂ ಪಿತೄನ್ವಿಪ್ರೈರರ್ಚ್ಯನ್ತೇ ಭುವಿ ಯೇ ಸದಾ ।

ವಾಂಛಿತಾಭೀಷ್ಟಲಾಭಾಯ ಪ್ರಾಜಾಪತ್ಯಪ್ರದಾಯಿನಃ ॥ 6॥

ನಮಸ್ಯೇಽಹಂ ಪಿತೄನ್ಯೇ ವೈ ತರ್ಪ್ಯನ್ತೇಽರಣ್ಯವಾಸಿಭಿಃ ।

ವನ್ಯೈಃ ಶ್ರಾದ್ಧೈರ್ಯತಾಹಾರೈಸ್ತಪೋನಿರ್ಧೂತಕಲ್ಮಷೈಃ ॥ 7॥ 

ನಮಸ್ಯೇಽಹಂ ಪಿತೄನ್ವಿಪ್ರೈರ್ನೈಷ್ಠಿಕೈರ್ಧರ್ಮಚಾರಿಭಿಃ ।

ಯೇ ಸಂಯತಾತ್ಮಭಿರ್ನಿತ್ಯಂ ಸನ್ತರ್ಪ್ಯನ್ತೇ ಸಮಾಧಿಭಿಃ ॥ 8॥

ನಮಸ್ಯೇಽಹಂ ಪಿತೄಂಛ್ರಾದ್ಧೈ ರಾಜನ್ಯಾಸ್ತರ್ಪಯನ್ತಿ ಯಾನ್ ।

ಕವ್ಯೈರಶೇಷೈರ್ವಿಧಿವಲ್ಲೋಕದ್ವಯಫಲಪ್ರದಾನ್ ॥ 9॥

ನಮಸ್ಯೇಽಹಂ ಪಿತೄನ್ವೈಶ್ಯೈರರ್ಚ್ಯನ್ತೇ ಭುವಿ ಯೇ ಸದಾ ।

ಸ್ವಕರ್ಮಾಭಿರತೈರ್ನ್ನಿತ್ಯಂ ಪುಷ್ಪಧೂಪಾನ್ನವಾರಿಭಿಃ ॥ 10॥

ನಮಸ್ಯೇಽಹಂ ಪಿತೄಂಛ್ರಾದ್ಧೇ ಶೂದ್ರೈರಪಿ ಚ ಭಕ್ತಿತಃ ।

ಸನ್ತರ್ಪ್ಯತೇ ಜಗತ್ಕೃತ್ಸ್ನಂ ನಾಮ್ನಾ ಖ್ಯಾತಾಃ ಸುಕಾಲಿನಃ ॥11||

ನಮಸ್ಯೇಽಹಂ ಪಿತೄಂಛ್ರಾದ್ಧೇ ಪಾತಾಲೇ ಯೇ ಮಹಾಸುರೈಃ ।

ಸನ್ತರ್ಪ್ಯನ್ತೇ ಸುಧಾಹಾರಾಸ್ತ್ಯಕ್ತದಮ್ಭಮದೈಃ ಸದಾ ॥ 12॥ 

ನಮಸ್ಯೇಽಹಂ ಪಿತೄಂಛ್ರಾದ್ಧೈರರ್ಚ್ಯನ್ತೇ ಯೇ ರಸಾತಲೇ ।

ಭೋಗೈರಶೇಷೈರ್ವಿಧಿವನ್ನಾಗೈಃ ಕಾಮಾನಭೀಪ್ಸುಭಿಃ ॥ 13॥

ನಮಸ್ಯೇಽಹಂ ಪಿತೄಂಛ್ರಾದ್ಧೈಃ ಸರ್ಪೈಃ ಸನ್ತರ್ಪಿತಾನ್ಸದಾ ।

ತತ್ರೈವ ವಿಧಿವನ್ಮನ್ತ್ರಭೋಗಸಮ್ಪತ್ಸಮನ್ವಿತೈಃ ॥ 14॥ 

ಪಿತೄನ್ನಮಸ್ಯೇ ನಿವಸನ್ತಿ ಸಾಕ್ಷಾದ್ಯೇ ದೇವಲೋಕೇಽಥ ಮಹೀತಲೇ ವಾ ।

ತಥಾಽನ್ತರಿಕ್ಷೇ ಚ ಸುರಾರಿಪೂಜ್ಯಾಸ್ತೇ ವೈ ಪ್ರತೀಚ್ಛನ್ತು ಮಯೋಪನೀತಮ್ ॥ 15॥ 

ಪಿತೄನ್ನಮಸ್ಯೇ ಪರಮಾರ್ಥಭೂತಾ ಯೇ ವೈ ವಿಮಾನೇ ನಿವಸನ್ತ್ಯಮೂರ್ತಾಃ ।

ಯಜನ್ತಿ ಯಾನಸ್ತಮಲೈರ್ಮನೋಭಿರ್ಯೋಗೀಶ್ವರಾಃ ಕ್ಲೇಶವಿಮುಕ್ತಿಹೇತೂನ್ ॥ 16॥ 

ಪಿತೄನ್ನಮಸ್ಯೇ ದಿವಿ ಯೇ ಚ ಮೂರ್ತಾಃ ಸ್ವಧಾಭುಜಃ ಕಾಮ್ಯಫಲಾಭಿಸನ್ಧೌ ।

ಪ್ರದಾನಶಕ್ತಾಃ ಸಕಲೇಪ್ಸಿತಾನಾಂ ವಿಮುಕ್ತಿದಾ ಯೇಽನಭಿಸಂಹಿತೇಷು ॥ 17॥ 

ತೃಪ್ಯನ್ತು ತೇಽಸ್ಮಿನ್ಪಿತರಃ ಸಮಸ್ತಾ ಇಚ್ಛಾವತಾಂ ಯೇ ಪ್ರದಿಶನ್ತಿ ಕಾಮಾನ್ ।

ಸುರತ್ವಮಿನ್ದ್ರತ್ವಮಿತೋಽಧಿಕಂ ವಾ ಗಜಾಶ್ವರತ್ನಾನಿ ಮಹಾಗೃಹಾಣಿ ॥ 18॥ 

ಸೋಮಸ್ಯ ಯೇ ರಶ್ಮಿಷು ಯೇಽರ್ಕಬಿಮ್ಬೇ ಶುಕ್ಲೇ ವಿಮಾನೇ ಚ ಸದಾ ವಸನ್ತಿ ।

ತೃಪ್ಯನ್ತು ತೇಽಸ್ಮಿನ್ಪಿತರೋಽನ್ನತೋಯೈರ್ಗನ್ಧಾದಿನಾ ಪುಷ್ಟಿಮಿತೋ ವ್ರಜನ್ತು ॥ 19॥ 

ಯೇಷಾಂ ಹುತೇಽಗ್ನೌ ಹವಿಷಾ ಚ ತೃಪ್ತಿರ್ಯೇ ಭುಂಜತೇ ವಿಪ್ರಶರೀರಸಂಸ್ಥಾಃ ।

ಯೇ ಪಿಂಡದಾನೇನ ಮುದಂ ಪ್ರಯಾನ್ತಿ ತೃಪ್ಯನ್ತು ತೇಽಸ್ಮಿನ್ಪಿತರೋಽನ್ನತೋಯೈಃ ॥ 20॥

ಯೇ ಖಡ್ಗಮಾಂಸೇನ ಸುರೈರಭೀಷ್ಟೈಃ ಕೃಷ್ಣೈಸ್ತಿಲೈರ್ದಿವ್ಯ ಮನೋಹರೈಶ್ಚ ।

ಕಾಲೇನ ಶಾಕೇನ ಮಹರ್ಷಿವರ್ಯೈಃ ಸಮ್ಪ್ರೀಣಿತಾಸ್ತೇ ಮುದಮತ್ರ ಯಾನ್ತು ॥ 21॥ 

ಕವ್ಯಾನ್ಯಶೇಷಾಣಿ ಚ ಯಾನ್ಯಭೀಷ್ಟಾನ್ಯತೀವ ತೇಷಾಂ ಮಮ ಪೂಜಿತಾನಾಮ್ ।

ತೇಷಾಂಚ ಸಾನ್ನಿಧ್ಯಮಿಹಾಸ್ತು ಪುಷ್ಪಗನ್ಧಾಮ್ಬುಭೋಜ್ಯೇಷು ಮಯಾ ಕೃತೇಷು ॥ 22॥ 

ದಿನೇದಿನೇ ಯೇ ಪ್ರತಿಗೃಹ್ಣತೇಽರ್ಚಾಂ ಮಾಸಾನ್ತಪೂಜ್ಯಾ ಭುವಿ ಯೇಽಷ್ಟಕಾಸು ।

ಯೇ ವತ್ಸರಾನ್ತೇಽಭ್ಯುದಯೇ ಚ ಪೂಜ್ಯಾಃ ಪ್ರಯಾನ್ತು ತೇ ಮೇ ಪಿತರೋಽತ್ರ ತುಷ್ಟಿಮ್ ॥ 23॥ 

ಪೂಜ್ಯಾ ದ್ವಿಜಾನಾಂ ಕುಮುದೇನ್ದುಭಾಸೋ ಯೇ ಕ್ಷತ್ರಿಯಾಣಾಂ ಜ್ವಲನಾರ್ಕವರ್ಣಾಃ ।

ತಥಾ ವಿಶಾಂ ಯೇ ಕನಕಾವದಾತಾ ನೀಲೀಪ್ರಭಾಃ ಶೂದ್ರಜನಸ್ಯ ಯೇ ಚ ॥ 24॥

ತೇಽಸ್ಮಿನ್ಸಮಸ್ತಾ ಮಮ ಪುಷ್ಪಗನ್ಧಧೂಪಾಮ್ಬುಭೋಜ್ಯಾದಿನಿವೇದನೇನ ।

ತಥಾಽಗ್ನಿಹೋಮೇನ ಚ ಯಾನ್ತಿ ತೃಪ್ತಿಂ ಸದಾ ಪಿತೃಭ್ಯಃ ಪ್ರಣತೋಽಸ್ಮಿ ತೇಭ್ಯಃ ॥ 25॥ 

ಯೇ ದೇವಪೂರ್ವಾಣ್ಯಭಿತೃಪ್ತಿಹೇತೋರ ಶ್ರನ್ತಿ ಕವ್ಯಾನಿ ಶುಭಾಹೃತಾನಿ ।

ತೃಪ್ತಾಶ್ಚ ಯೇ ಭೂತಿಸೃಜೋ ಭವನ್ತಿ ತೃಪ್ಯನ್ತು ತೇಽಸ್ಮಿನ್ಪ್ರಣತೋಽಸ್ಮಿ ತೇಭ್ಯಃ ॥ 26॥

ರಕ್ಷಾಂಸಿ ಭೂತಾನ್ಯಸುರಾಂಸ್ತಥೋಗ್ರಾತ್ರಿರ್ಣಾಶಯನ್ತು ತ್ವಶಿವಂ ಪ್ರಜಾನಾಮ್ ।

ಆದ್ಯಾಃ ಸುರಾಣಾಮಮರೇಶಪೂಜ್ಯಾಸ್ತೃಪ್ಯನ್ತು ತೇಽಸ್ಮಿನ್ಪ್ರಣತೋಽಸ್ಮಿತೇಭ್ಯಃ ॥ 27॥ 

ಅಗ್ನಿಷ್ವಾತ್ತಾ ಬರ್ಹಿಷದ ಆಜ್ಯಪಾಃ ಸೋಮಪಾಸ್ತಥಾ ।

ವ್ರಜನ್ತು ತೃಪ್ತಿಂ ಶ್ರಾದ್ಧೇಽಸ್ಮಿನ್ಪಿತರಸ್ತರ್ಪಿತಾ ಮಯಾ ॥ 28॥ 

ಅಗ್ನಿಷ್ವಾತ್ತಾಃ ಪಿತೃಗಣಾಃ ಪ್ರಾಚೀಂ ರಕ್ಷನ್ತು ಮೇ ದಿಶಮ್ ।

ತಥಾ ಬರ್ಹಿಷದಃ ಪಾನ್ತು ಯಾಮ್ಯಾಂ ಮೇ ಪಿತರಃ ಸದಾ ।

ಪ್ರತೀಚೀಮಾಜ್ಯಪಾಸ್ತದ್ವದುದೀಚೀಮಪಿ ಸೋಮಪಾಃ ॥ 29॥ 

ರಕ್ಷೋಭೂತಪಿಶಾಚೇಭ್ಯಸ್ತಥೈವಾಸುರದೋಷತಃ ।

ಸರ್ವತಃ ಪಿತರೋ ರಕ್ಷಾಂ ಕುರ್ವನ್ತು ಮಮ ನಿತ್ಯಶಃ ॥ 30॥ 

ವಿಶ್ವೋ ವಿಶ್ವಭುಗಾರಾಧ್ಯೋ ಧರ್ಮೋ ಧನ್ಯಃ ಶುಭಾನನಃ ।

ಭೂತಿದೋ ಭೂತಿಕೃದ್ಭೂತಿಃ ಪಿತೄಣಾಂ ಯೇ ಗಣಾ ನವ ॥ 31॥ 

ಕಲ್ಯಾಣಃ ಕಲ್ಯದಃ ಕರ್ತಾ ಕಲ್ಯಃ ಕಲ್ಯತರಾಶ್ರಯಃ ।

ಕಲ್ಯತಾಹೇತುರನ್ಘಃ ಷಡಿಮೇ ತೇ ಗಣಾಃ ಸ್ಮೃತಾಃ ॥ 32॥

ವರೋ ವರೇಣ್ಯೋ ವರದಸ್ತುಷ್ಟಿದಃ ಪುಷ್ಟಿದಸ್ತಥಾ ।

ವಿಶ್ವಪಾತಾ ತಥಾ ಧಾತಾ ಸಪ್ತೈತೇ ಚ ಗಣಾಃ ಸ್ಮೃತಾಃ ॥ 33॥

ಮಹಾನ್ಮಹಾತ್ಮಾ ಮಹಿತೋ ಮಹಿಮಾವಾನ್ಮಹಾಬಲಃ ।

ಗಣಾಃ ಪಂಚ ತಥೈವೈತೇ ಪಿತೄಣಾಂ ಪಾಪನಾಶನಾಃ ॥ 34॥ 

ಸುಖದೋ ಧನದಶ್ಚಾನ್ಯೋ ಧರ್ಮದೋಽನ್ಯಶ್ಚ ಭೂತಿದಃ ।

ಪಿತೄಣಾಂ ಕಥ್ಯತೇ ಚೈವ ತಥಾ ಗಣಚತುಷ್ಟಯಮ್ ॥ 35॥ 

ಏಕತ್ರಿಂಶತ್ಪಿತೃಗಣಾ ಯೈರ್ವ್ಯಾಪ್ತಮಖಿಲಂ ಜಗತ್ ।

ತ ಏವಾತ್ರ ಪಿತೃಗಣಾಸ್ತುಷ್ಯನ್ತು ಚ ಮದಾಹಿತಾತ್ ॥ 36॥ 

ಮಾಕ್ರಂಡೇಯ ಉವಾಚ ।

ಏವಂ ತು ಸ್ತುವತಸ್ತಸ್ಯ ತೇಜಸೋರಾಶಿರುಚ್ಛ್ರಿತಃ ।

ಪ್ರಾದುರ್ಬಭೂವ ಸಹಸಾ ಗಗನವ್ಯಾಪ್ತಿಕಾರಕಃ ॥ 37॥

ತದ್ದೃಷ್ಟ್ವಾ ಸುಮಹತ್ತೇಜಃ ಸಮಾಚ್ಛಾದ್ಯ ಸ್ಥಿತಂ ಜಗತ್ ।

ಜಾನುಭ್ಯಾಮವನೀಂ ಗತ್ವಾ ರುಚಿಃ ಸ್ತೋತ್ರಮಿದಂಜಗೌ ॥ 38॥ 

ರುಚಿರುವಾಚ ।

ಅರ್ಚಿತಾನಾಮಮೂರ್ತಾನಾಂ ಪಿತೄಣಾಂ ದೀಪ್ತತೇಜಸಾಮ್ ।

ನಮಸ್ಯಾಮಿ ಸದಾ ತೇಷಾಂ ಧ್ಯಾನಿನಾಂ ದಿವ್ಯಚಕ್ಷುಷಾಮ್ ॥ 39॥

ಇನ್ದ್ರಾದೀನಾಂ ಚ ನೇತಾರೋ ದಕ್ಷಮಾರೀಚಯೋಸ್ತಥಾ ।

ಸಪ್ತರ್ಷೋಣಾಂ ತಥಾಽನ್ಯೇಷಾಂ ತಾನ್ನಮಸ್ಯಾಮಿ ಕಾಮದಾನ್ ॥ 40॥ 

ಮನ್ವಾದೀನಾಂ ಚ ನೇತಾರಃ ಸೂರ್ಯಾಚನ್ದ್ರಮಸೋಸ್ತಥಾ ।

ತಾನ್ನಮಸ್ಯಾಮ್ಯಹಂ ಸರ್ವಾನ್ಪಿತೄನಪ್ಯುದಧಾವಪಿ ॥ 41॥ 

ನಕ್ಷತ್ರಾಣಾಂ ಗ್ರಹಾಣಾಂ ಚ ವಾಯ್ವಗ್ನ್ಯೋರ್ನಭಸಸ್ತಥಾ ।

ದ್ಯಾವಾಪೃಥಿವ್ಯೋಶ್ಚ ತಥಾ ನಮಸ್ಯಾಮಿ ಕೃತಾಂಜಲಿಃ ॥ 42॥

ಪ್ರಜಾಪತೇಃ ಕಶ್ಯಪಾಯ ಸೋಮಾಯ ವರುಣಾಯ ಚ ।

ಯೋಗೇಶ್ವರೇಭ್ಯಶ್ಚ ಸದಾ ನಮಸ್ಯಾಮಿ ಕೃತಾಂಜಲಿಃ ॥ 43॥ 

ನಮೋ ಗಣೇಭ್ಯಃ ಸಪ್ತಭ್ಯಸ್ತಥಾ ಲೋಕೇಷು ಸಪ್ತಸು ।

ಸ್ವಾಯಮ್ಭುವೇ ನಮಸ್ಯಾಮಿ ಬ್ರಹ್ಮಣೇ ಯೋಗಚಕ್ಷುಷೇ ॥ 44॥

ಸೋಮಾಧಾರಾನ್ಪಿತೃಗಣಾನ್ಯೋಗಮೂರ್ತಿಧರಾಂಸ್ತಥಾ ।

ನಮಸ್ಯಾಮಿ ತಥಾ ಸೋಮಂ ಪಿತರಂ ಜಗತಾಮಹಮ್ ॥ 45॥

ಅಗ್ನಿರೂಪಾಂಸ್ತಥೈವಾನ್ಯಾನ್ನಮಸ್ಯಾಮಿ ಪಿತೄನಹಮ್ ।

ಅಗ್ನಿಸೋಮಮಯಂ ವಿಶ್ವಂ ಯತ ಏತದಶೇಷತಃ ॥ 46॥ 

ಯೇ ಚ ತೇಜಸಿ ಯೇ ಚೈತೇ ಸೋಮಸೂರ್ಯಾಗ್ನಿಮೂರ್ತಯಃ ।

ಜಗತ್ಸ್ವರೂಪಿಣಶ್ಚೈವ ತಥಾ ಬ್ರಹ್ಮಸ್ವರೂಪಿಣಃ ॥ 47॥ 

ತೇಭ್ಯೋಽಖಿಲೇಭ್ಯೋ ಯೋಗಿಭ್ಯಃ ಪಿತೃಭ್ಯೋ ಯತಮಾನಸಃ ।

ನಮೋನಮೋ ನಮಸ್ತೇಽಸ್ತು ಪ್ರಸೀದನ್ತು ಸ್ವಧಾಭುಜಃ ॥ 48॥

ಇತಿ ಶ್ರೀಗಾರುಡೇ ಮಹಾಪುರಾಣೇ ಪೂರ್ವಖಂಡೇ ಪ್ರಥಮಾಂಶಾಖ್ಯೇ ಆಚಾರಕಾಂಡೇ

ರುಚಿಕೃತಪಿತೃಸ್ತೋತ್ರಂ ನಾಮೈಕೋನನವತಿತಮೋಽಧ್ಯಾಯಾನ್ತರ್ಗತಮ್ ।
********