ಶ್ರೀಮೃತ್ಯುಂಜಯಮಾನಸಿಕಪೂಜಾಸ್ತೋತ್ರಮ್
ಕೈಲಾಸೇ ಕಮನೀಯರತ್ನಖಚಿತೇ ಕಲ್ಪದ್ರುಮೂಲೇ ಸ್ಥಿತಂ
ಕರ್ಪೂರಸ್ಫಟಿಕೇನ್ದುಸುನ್ದರತನುಂ ಕಾತ್ಯಾಯನೀಸೇವಿತಮ್ ।
ಗಂಗಾತುಂಗತರಂಗರಂಜಿತಜಟಾಭಾರಂ ಕೃಪಾಸಾಗರಂ
ಕಂಠಾಲಂಕೃತಶೇಷಭೂಷಣಮಮುಂ ಮೃತ್ಯುಂಜಯಂ ಭಾವಯೇ ॥ 1॥
ಆಗತ್ಯ ಮೃತ್ಯುಂಜಯ ಚನ್ದ್ರಮೌಲೇ
ವ್ಯಾಘ್ರಾಜಿನಾಲಂಕೃತ ಶೂಲಪಾಣೇ ।
ಸ್ವಭಕ್ತಸಂರಕ್ಷಣಕಾಮಧೇನೋ
ಪ್ರಸೀದ ವಿಶ್ವೇಶ್ವರ ಪಾರ್ವತೀಶ ॥ 2॥
ಭಾಸ್ವನ್ಮೌಕ್ತಿಕತೋರಣೇ ಮರಕತಸ್ತಮ್ಭಾಯುಧಾಲಂಕೃತೇ
ಸೌಧೇ ಧೂಪಸುವಾಸಿತೇ ಮಣಿಮಯೇ ಮಾಣಿಕ್ಯದೀಪಾಂಚಿತೇ ।
ಬ್ರಹ್ಮೇನ್ದ್ರಾಮರಯೋಗಿಪುಂಗವಗಣೈರ್ಯುಕ್ತೇ ಚ ಕಲ್ಪದ್ರುಮೈಃ
ಶ್ರೀಮೃತ್ಯುಂಜಯ ಸುಸ್ಥಿರೋ ಭವ ವಿಭೋ ಮಾಣಿಕ್ಯಸಿಂಹಾಸನೇ ॥ 3॥
ಮನ್ದಾರಮಲ್ಲೀಕರವೀರಮಾಧವೀ-
ಪುನ್ನಾಗನೀಲೋತ್ಪಲಚಮ್ಪಕಾನ್ವಿತೈಃ ।
ಕರ್ಪೂರಪಾಟೀರಸುವಾಸಿತೈರ್ಜಲೈ-
ರಾಧತ್ಸ್ವ ಮೃತ್ಯುಂಜಯ ಪಾದ್ಯಮುತ್ತಮಮ್ ॥ 4॥
ಸುಗನ್ಧಪುಷ್ಪಪ್ರಕರೈಃ ಸುವಾಸಿತೈ-
ರ್ವಿಯನ್ನದೀಶೀತಲವಾರಿಭಿಃ ಶುಭೈಃ ।
ತ್ರಿಲೋಕನಾಥಾರ್ತಿಹರಾರ್ಘ್ಯಮಾದರಾ-
ದ್ಗೃಹಾಣ ಮೃತ್ಯುಂಜಯ ಸರ್ವವನ್ದಿತ ॥ 5॥
ಹಿಮಾಮ್ಬುವಾಸಿತೈಸ್ತೋಯೈಃ ಶೀತಲೈರತಿಪಾವನೈಃ ।
ಮೃತ್ಯುಂಜಯ ಮಹಾದೇವ ಶುದ್ಧಾಚಮನಮಾಚರ ॥ 6॥
ಗುಡದಧಿಸಹಿತಂ ಮಧುಪ್ರಕೀರ್ಣಂ
ಸುಘೃತಸಮನ್ವಿತಧೇನುದುಗ್ಧಯುಕ್ತಮ್ ।
ಶುಭಕರ ಮಧುಪರ್ಕಮಾಹರ ತ್ವಂ
ತ್ರಿನಯನ ಮೃತ್ಯುಹರ ತ್ರಿಲೋಕವನ್ದ್ಯ ॥ 7॥
ಪಂಚಾಸ್ರ ಶಾನ್ತ ಪಂಚಾಸ್ಯ ಪಂಚಪಾತಕಸಂಹರ ।
ಪಂಚಾಮೃತಸ್ನಾನಮಿದಂ ಕುರು ಮೃತ್ಯುಂಜಯ ಪ್ರಭೋ ॥ 8॥
ಜಗತ್ತ್ರಯೀಖ್ಯಾತ ಸಮಸ್ತತೀರ್ಥ-
ಸಮಾಹೃತೈಃ ಕಲ್ಮಷಹಾರಿಭಿಶ್ಚ ।
ಸ್ನಾನಂ ಸುತೋಯೈಃ ಸಮುದಾಚರ ತ್ವಂ
ಮೃತ್ಯುಂಜಯಾನನ್ತಗುಣಾಭಿರಾಮ ॥ 9॥
ಆನೀತೇನಾತಿಶುಭ್ರೇಣ ಕೌಶೇಯೇನಾಮರದ್ರುಮಾತ್ ।
ಮಾರ್ಜಯಾಮಿ ಜಟಾಭಾರಂ ಶಿವ ಮೃತ್ಯುಂಜಯ ಪ್ರಭೋ ॥ 10॥
ನಾನಾಹೇಮವಿಚಿತ್ರಾಣಿ ಚೀರಚೀನಾಮ್ಬರಾಣಿ ಚ ।
ವಿವಿಧಾನಿ ಚ ದಿವ್ಯಾನಿ ಮೃತ್ಯುಂಜಯ ಸುಧಾರಯ ॥ 11॥
ವಿಶುದ್ಧಮುಕ್ತಾಫಲಜಾಲರಮ್ಯಂ
ಮನೋಹರಂ ಕಾಂಚನಹೇಮಸೂತ್ರಮ್ ।
ಯಜ್ಞೋಪವೀತಂ ಪರಮಂ ಪವಿತ್ರ-
ಮಾಧತ್ಸ್ವ ಮೃತ್ಯುಂಜಯ ಭಕ್ತಿಗಮ್ಯ ॥ 12॥
ಶ್ರೀಗನ್ಧಂ ಘನಸಾರಕುಂಕುಮಯುತಂ ಕಸ್ತೂರಿಕಾಪೂರಿತಂ
ಕಾಲೇಯೇನ ಹಿಮಾಮ್ಬುನಾ ವಿರಚಿತಂ ಮನ್ದಾರಸಂವಾಸಿತಮ್ ।
ದಿವ್ಯಂ ದೇವಮನೋಹರಂ ಮಣಿಮಯೇ ಪಾತ್ರೇ ಸಮಾರೋಪಿತಂ
ಸರ್ವಾಂಗೇಷು ವಿಲೇಪಯಾಮಿ ಸತತಂ ಮೃತ್ಯುಂಜಯ ಶ್ರೀವಿಭೋ ॥ 13॥
ಅಕ್ಷತೈರ್ಧವಲೈರ್ದಿವ್ಯೈಃ ಸಮ್ಯಕ್ತಿಲಸಮನ್ವಿತೈಃ ।
ಮೃತ್ಯುಂಜಯ ಮಹಾದೇವ ಪೂಜಯಾಮಿ ವೃಷಧ್ವಜ ॥ 14॥
ಚಮ್ಪಕಪಂಕಜಕುರವಕಕುನ್ದೈಃ ಕರವೀರಮಲ್ಲಿಕಾಕುಸುಮೈಃ ।
ವಿಸ್ತಾರಯ ನಿಜಮಕುಟಂ ಮೃತ್ಯುಂಜಯ ಪುಂಡರೀಕನಯನಾಪ್ತ ॥ 15॥
ಮಾಣಿಕ್ಯಪಾದುಕಾದ್ವನ್ದ್ವೇ ಮೌನಿಹೃತ್ಪದ್ಮಮನ್ದಿರೇ ।
ಪಾದೌ ಸತ್ಪದ್ಮಸದೃಶೌ ಮೃತ್ಯುಂಜಯ ನಿವೇಶಯ ॥ 16॥
ಮಾಣಿಕ್ಯಕೇಯೂರಕಿರೀಟಹಾರೈಃ
ಕಾಂಚೀಮಣಿಸ್ಥಾಪಿತಕುಂಡಲೈಶ್ಚ ।
ಮಂಜೀರಮುಖ್ಯಾಭರಣೈರ್ಮನೋಜ್ಞೈ-
ರಂಗಾನಿ ಮೃತ್ಯುಂಜಯ ಭೂಷಯಾಮಿ ॥ 17॥
ಗಜವದನಸ್ಕನ್ದಧೃತೇ-
ನಾತಿಸ್ವಚ್ಛೇನ ಚಾಮರಯುಗೇನ ।
ಗಲದಲಕಾನನಪದ್ಮಂ
ಮೃತ್ಯುಂಜಯ ಭಾವಯಾಮಿ ಹೃತ್ಪದ್ಮೇ ॥ 18॥
ಮುಕ್ತಾತಪತ್ರಂ ಶಶಿಕೋಟಿಶುಭ್ರಂ
ಶುಭಪ್ರದಂ ಕಾಂಚನದಂಡಯುಕ್ತಮ್ ।
ಮಾಣಿಕ್ಯಸಂಸ್ಥಾಪಿತಹೇಮಕುಮ್ಭಂ
ಸುರೇಶ ಮೃತ್ಯುಂಜಯ ತೇಽರ್ಪಯಾಮಿ ॥ 19॥
ಮಣಿಮುಕುರೇ ನಿಷ್ಪಟಲೇ ತ್ರಿಜಗದ್ಗಾಢಾನ್ಧಕಾರಸಪ್ತಾಶ್ವೇ ।
ಕನ್ದರ್ಪಕೋಟಿಸದೃಶಂ ಮೃತ್ಯುಂಜಯ ಪಶ್ಯ ವದನಮಾತ್ಮೀಯಮ್ ॥ 20॥
ಕರ್ಪೂರಚೂರ್ಣಂ ಕಪಿಲಾಜ್ಯಪೂತಂ
ದಾಸ್ಯಾಮಿ ಕಾಲೇಯಸಮಾನ್ವಿತೈಶ್ಚ ।
ಸಮುದ್ಭವಂ ಪಾವನಗನ್ಧಧೂಪಿತಂ
ಮೃತ್ಯುಂಜಯಾಂಗಂ ಪರಿಕಲ್ಪಯಾಮಿ ॥ 21॥
ವರ್ತಿತ್ರಯೋಪೇತಮಖಂಡದೀಪ್ತ್ಯಾ
ತಮೋಹರಂ ಬಾಹ್ಯಮಥಾನ್ತರಂ ಚ ।
ಸಾಜ್ಯಂ ಸಮಸ್ತಾಮರವರ್ಗಹೃದ್ಯಂ
ಸುರೇಶ ಮೃತ್ಯುಂಜಯ ವಂಶದೀಪಮ್ ॥ 22॥
ರಾಜಾನ್ನಂ ಮಧುರಾನ್ವಿತಂ ಚ ಮೃದುಲಂ ಮಾಣಿಕ್ಯಪಾತ್ರೇ ಸ್ಥಿತಂ
ಹಿಂಗೂಜೀರಕಸನ್ಮರೀಚಿಮಿಲಿತೈಃ ಶಾಕೈರನೇಕೈಃ ಶುಭೈಃ ।
ಶಾಕಂ ಸಮ್ಯಗಪೂಪಸೂಪಸಹಿತಂ ಸದ್ಯೋಘೃತೇನಾಪ್ಲುತಂ
ಶ್ರೀಮೃತ್ಯುಂಜಯ ಪಾರ್ವತೀಪ್ರಿಯ ವಿಭೋ ಸಾಪೋಶನಂ ಭುಜ್ಯತಾಮ್ ॥ 23॥
ಕೂಷ್ಮಾಂಡವಾರ್ತಾಕಪಟೋಲಿಕಾನಾಂ
ಫಲಾನಿ ರಮ್ಯಾಣಿ ಚ ಕಾರವಲ್ಲ್ಯಾ ।
ಸುಪಾಕಯುಕ್ತಾನಿ ಸಸೌರಭಾಣಿ
ಶ್ರೀಕಂಠ ಮೃತ್ಯುಂಜಯ ಭಕ್ಷಯೇಶ ॥ 24॥
ಶೀತಲಂ ಮಧುರಂ ಸ್ವಚ್ಛಂ ಪಾವನಂ ವಾಸಿತಂ ಲಘು ।
ಮಧ್ಯೇ ಸ್ವೀಕುರು ಪಾನೀಯಂ ಶಿವ ಮೃತ್ಯುಂಜಯ ಪ್ರಭೋ ॥ 25॥
ಶರ್ಕರಾಮಿಲಿತಂ ಸ್ನಿಗ್ಧಂ ದುಗ್ಧಾನ್ನಂ ಗೋಘೃತಾನ್ವಿತಮ್ ।
ಕದಲೀಫಲಸಂಮಿಶ್ರಂ ಭುಜ್ಯತಾಂ ಮೃತ್ಯುಸಂಹರ ॥ 26॥
ಕೇವಲಮತಿಮಾಧುರ್ಯಂ ದುಗ್ಧೈಃ ಸ್ನಿಗ್ಧೈಶ್ಚ ಶರ್ಕರಾಮಿಲಿತೈಃ ।
ಏಲಾಮರೀಚಮಿಲಿತಂ ಮೃತ್ಯುಂಜಯ ದೇವ ಭುಂಕ್ಷ್ವ ಪರಮಾನ್ನಮ್ ॥ 27॥
ರಮ್ಭಾಚೂತಕಪಿತ್ಥಕಂಠಕಫಲೈರ್ದ್ರಾಕ್ಷಾರಸಾಸ್ವಾದುಮ-
ತ್ಖರ್ಜೂರೈರ್ಮಧುರೇಕ್ಷುಖಂಡಶಕಲೈಃ ಸನ್ನಾರಿಕೇಲಾಮ್ಬುಭಿಃ ।
ಕರ್ಪೂರೇಣ ಸುವಾಸಿತೈರ್ಗುಡಜಲೈರ್ಮಾಧುರ್ಯಯುಕ್ತೈರ್ವಿಭೋ
ಶ್ರೀಮೃತ್ಯುಂಜಯ ಪೂರಯ ತ್ರಿಭುವನಾಧಾರಂ ವಿಶಾಲೋದರಮ್ ॥ 28॥
ಮನೋಜ್ಞರಮ್ಭಾವನಖಂಡಖಂಡಿತಾ-
ನ್ರುಚಿಪ್ರದಾನ್ಸರ್ಷಪಜೀರಕಾಂಶ್ಚ ।
ಸಸೌರಭಾನ್ಸೈನ್ಧವಸೇವಿತಾಂಶ್ಚ
ಗೃಹಾಣ ಮೃತ್ಯುಂಜಯ ಲೋಕವನ್ದ್ಯ ॥ 29॥
ಹಿಂಗೂಜೀರಕಸಹಿತಂ ವಿಮಲಾಮಲಕಂ ಕಪಿತ್ಥಮತಿಮಧುರಮ್ ।
ಬಿಸಖಂಡಾँಲ್ಲಾವಣಯುತಾನ್ಮೃತ್ಯುಂಜಯ ತೇಽರ್ಪಯಾಮಿ ಜಗದೀಶ ॥ 30॥
ಏಲಾಶುಂಠೀಸಹೀತಂ ದಧ್ಯನ್ನಂ ಚಾರುಹೇಮಪಾತ್ರಸ್ಥಮ್ ।
ಅಮೃತಪ್ರತಿನಿಧಿಮಾಢ್ಯಂ ಮೃತ್ಯುಂಜಯ ಭುಜ್ಯತಾಂ ತ್ರಿಲೋಕೇಶ ॥ 31॥
ಜಮ್ಬೀರನೀರಾಂಚಿತಶೃಂಗಬೇರಂ
ಮನೋಹರಾನಮ್ಲಶಲಾಟುಖಂಡಾನ್ ।
ಮೃದೂಪದಂಶಾನ್ಸಹಸೋಪಭುಂಕ್ಷ್ವ
ಮೃತ್ಯುಞಯ ಶ್ರೀಕರುಣಾಸಮುದ್ರ ॥ 32॥
ನಾಗರರಾಮಠಯುಕ್ತಂ ಸುಲಲಿತಜಮ್ಬೀರನೀರಸಮ್ಪೂರ್ಣಮ್ ।
ಮಥಿತಂ ಸೈನ್ಧವಸಹಿತಂ ಪಿಬ ಹರ ಮೃತ್ಯುಂಜಯ ಕ್ರತುಧ್ವಂಸಿನ್ ॥ 33॥
ಮನ್ದಾರಹೇಮಾಮ್ಬುಜಗನ್ಧಯುಕ್ತೈ-
ರ್ಮನ್ದಾಕಿನೀನಿರ್ಮಲಪುಣ್ಯತೋಯೈಃ ।
ಗೃಹಾಣ ಮೃತ್ಯುಂಜಯ ಪೂರ್ಣಕಾಮ
ಶ್ರೀಮತ್ಪರಾಪೋಶನಮಭ್ರಕೇಶ ॥ 34॥
ಗಗನಧುನೀವಿಮಲಜಲೈರ್ಮೃತ್ಯುಂಜಯ ಪದ್ಮರಾಗಪಾತ್ರಗತೈಃ ।
ಮೃಗಮದಚನ್ದನಪೂರ್ಣಂ ಪ್ರಕ್ಷಾಲಯ ಚಾರು ಹಸ್ತಪದಯುಗ್ಮಮ್ ॥ 35॥
ಪುಂನಾಗಮಲ್ಲಿಕಾಕುನ್ದವಾಸಿತೈರ್ಜಾಹ್ನವೀಜಲೈಃ ।
ಮೃತ್ಯುಂಜಯ ಮಹಾದೇವ ಪುನರಾಚಮನಂ ಕುರು ॥ 36॥
ಮೌಕ್ತಿಕಚೂರ್ಣಸಮೇತೈರ್ಮೃಗಮದಘನಸಾರವಾಸಿತೈಃ ಪೂಗೈಃ ।
ಪರ್ಣೈಃ ಸ್ವರ್ಣಸಮಾನೈರ್ಮೃತ್ಯುಂಜಯ ತೇಽರ್ಪಯಾಮಿ ತಾಮ್ಬೂಲಮ್ ॥ 37॥
ನೀರಾಜನಂ ನಿರ್ಮಲದೀಪ್ತಿಮದ್ಭಿ-
ರ್ದೀಪಾಂಕುರೈರುಜ್ಜ್ವಲಮುಚ್ಛ್ರಿತೈಶ್ಚ ।
ಘಂಟಾನಿನಾದೇನ ಸಮರ್ಪಯಾಮಿ
ಮೃತ್ಯುಂಜಯಾಯ ತ್ರಿಪುರಾನ್ತಕಾಯ ॥ 38॥
ವಿರಿಂಚಿಮುಖ್ಯಾಮರಬೃನ್ದವನ್ದಿತೇ
ಸರೋಜಮತ್ಸ್ಯಾಂಕಿತಚಕ್ರಚಿಹ್ನಿತೇ ।
ದದಾಮಿ ಮೃತ್ಯುಂಜಯ ಪಾದಪಂಕಜೇ
ಫಣೀನ್ದ್ರಭೂಷೇ ಪುನರರ್ಘ್ಯಮೀಶ್ವರ ॥ 39॥
ಪುಂನಾಗನೀಲೋತ್ಪಲಕುನ್ದಜಾಜೀ-
ಮನ್ದಾರಮಲ್ಲೀಕರವೀರಪಂಕಜೈಃ ।
ಪುಷ್ಪಾಂಜಲಿಂ ಬಿಲ್ವದಲೈಸ್ತುಲಸ್ಯಾ
ಮೃತ್ಯುಂಜಯಾಂಘ್ರೌ ವಿನಿವೇಶಯಾಮಿ ॥ 40॥
ಪದೇ ಪದೇ ಸರ್ವತಮೋನಿಕೃನ್ತನಂ
ಪದೇ ಪದೇ ಸರ್ವಶುಭಪ್ರದಾಯಕಮ್ ।
ಪ್ರದಕ್ಷಿಣಂ ಭಕ್ತಿಯುತೇನ ಚೇತಸಾ
ಕರೋಮಿ ಮೃತ್ಯುಂಜಯ ರಕ್ಷ ರಕ್ಷ ಮಾಮ್ ॥ 41॥
ನಮೋ ಗೌರೀಶಾಯ ಸ್ಫಟಿಕಧವಲಾಂಗಾಯ ಚ ನಮೋ
ನಮೋ ಲೋಕೇಶಾಯ ಸ್ತುತವಿಬುಧಲೋಕಾಯ ಚ ನಮಃ ।
ನಮಃ ಶ್ರೀಕಂಠಾಯ ಕ್ಷಪಿತಪುರದೈತ್ಯಾಯ ಚ ನಮೋ
ನಮಃ ಫಾಲಾಕ್ಷಾಯ ಸ್ಮರಮದವಿನಾಶಾಯ ಚ ನಮಃ ॥ 42॥
ಸಂಸಾರೇ ಜನಿತಾಪರೋಗಸಹಿತೇ ತಾಪತ್ರಯಾಕ್ರನ್ದಿತೇ
ನಿತ್ಯಂ ಪುತ್ರಕಲತ್ರವಿತ್ತವಿಲಸತ್ಪಾಶೈರ್ನಿಬದ್ಧಂ ದೃಢಮ್ ।
ಗರ್ವಾನ್ಧಂ ಬಹುಪಾಪವರ್ಗಸಹಿತಂ ಕಾರುಣ್ಯದೃಷ್ಟ್ಯಾ ವಿಭೋ
ಶ್ರೀಮೃತ್ಯುಂಜಯ ಪಾರ್ವತೀಪ್ರಿಯ ಸದಾ ಮಾಂ ಪಾಹಿ ಸರ್ವೇಶ್ವರ ॥ 43॥
ಸೌಧೇ ರತ್ನಮಯೇ ನವೋತ್ಪಲದಲಾಕೀರ್ಣೇ ಚ ತಲ್ಪಾನ್ತರೇ
ಕೌಶೇಯೇನ ಮನೋಹರೇಣ ಧವಲೇನಾಚ್ಛಾದಿತೇ ಸರ್ವಶಃ ।
ಕರ್ಪೂರಾಂಚಿತದೀಪದೀಪ್ತಿಮಿಲಿತೇ ರಮ್ಯೋಪಧಾನದ್ವಯೇ
ಪಾರ್ವತ್ಯಾಃ ಕರಪದ್ಮಲಾಲಿತಪದಂ ಮೃತ್ಯುಂಜಯಂ ಭಾವಯೇ ॥ 44॥
ಚತುಶ್ಚತ್ವಾರಿಂಶದ್ವಿಲಸದುಪಚಾರೈರಭಿಮತೈ-
ರ್ಮನಃ ಪದ್ಮೇ ಭಕ್ತ್ಯಾ ಬಹಿರಪಿ ಚ ಪೂಜಾಂ ಶುಭಕರೀಮ್ ।
ಕರೋತಿ ಪ್ರತ್ಯೂಷೇ ನಿಶಿ ದಿವಸಮಧ್ಯೇಽಪಿ ಚ ಪುಮಾ-
ನ್ಪ್ರಯಾತಿ ಶ್ರೀಮೃತ್ಯುಂಜಯಪದಮನೇಕಾದ್ಭುತಪದಮ್ ॥ 45॥
ಪ್ರಾತರ್ಲಿಂಗಮುಮಾಪತೇರಹರಹಃ ಸಂದರ್ಶನಾತ್ಸ್ವರ್ಗದಂ
ಮಧ್ಯಾಹ್ನೇ ಹಯಮೇಧತುಲ್ಯಫಲದಂ ಸಾಯಂತನೇ ಮೋಕ್ಷದಮ್ ।
ಭಾನೋರಸ್ತಮಯೇ ಪ್ರದೋಷಸಮಯೇ ಪಂಚಾಕ್ಷರಾರಾಧನಂ
ತತ್ಕಾಲತ್ರಯತುಲ್ಯಮಿಷ್ಟಫಲದಂ ಸದ್ಯೋಽನವದ್ಯಂ ದೃಢಮ್ ॥ 46॥
॥ ಇತಿ ಶ್ರೀಮಚ್ಛಂಕರಭಗವತಃ ಕೃತೌ
ಮೃತ್ಯುಂಜಯಮಾನಸಿಕಪೂಜಾಸ್ತೋತ್ರಂ ಸಮ್ಪೂರ್ಣಮ್ ॥
**********
श्री मृत्युञ्जय मानसिकपूजास्तोत्रम्
कैलासे कमनीयरत्नखचिते कल्पद्रुमूले स्थितं
कर्पूरस्फटिकेन्दुसुन्दरतनुं कात्यायनीसेवितम् ।
गङ्गातुङ्गतरङ्गरञ्जितजटाभारं कृपासागरं
कण्ठालंकृतशेषभूषणममुं मृत्युञ्जयं भावये ॥ १॥
आगत्य मृत्युञ्जय चन्द्रमौले
व्याघ्राजिनालंकृत शूलपाणे ।
स्वभक्तसंरक्षणकामधेनो
प्रसीद विश्वेश्वर पार्वतीश ॥ २॥
भास्वन्मौक्तिकतोरणे मरकतस्तम्भायुधालंकृते
सौधे धूपसुवासिते मणिमये माणिक्यदीपाञ्चिते ।
ब्रह्मेन्द्रामरयोगिपुङ्गवगणैर्युक्ते च कल्पद्रुमैः
श्रीमृत्युञ्जय सुस्थिरो भव विभो माणिक्यसिंहासने ॥ ३॥
मन्दारमल्लीकरवीरमाधवी-
पुन्नागनीलोत्पलचम्पकान्वितैः ।
कर्पूरपाटीरसुवासितैर्जलै-
राधत्स्व मृत्युञ्जय पाद्यमुत्तमम् ॥ ४॥
सुगन्धपुष्पप्रकरैः सुवासितै-
र्वियन्नदीशीतलवारिभिः शुभैः ।
त्रिलोकनाथार्तिहरार्घ्यमादरा-
द्गृहाण मृत्युञ्जय सर्ववन्दित ॥ ५॥
हिमाम्बुवासितैस्तोयैः शीतलैरतिपावनैः ।
मृत्युञ्जय महादेव शुद्धाचमनमाचर ॥ ६॥
गुडदधिसहितं मधुप्रकीर्णं
सुघृतसमन्वितधेनुदुग्धयुक्तम् ।
शुभकर मधुपर्कमाहर त्वं
त्रिनयन मृत्युहर त्रिलोकवन्द्य ॥ ७॥
पञ्चास्र शान्त पञ्चास्य पञ्चपातकसंहर ।
पञ्चामृतस्नानमिदं कुरु मृत्युञ्जय प्रभो ॥ ८॥
जगत्त्रयीख्यात समस्ततीर्थ-
समाहृतैः कल्मषहारिभिश्च ।
स्नानं सुतोयैः समुदाचर त्वं
मृत्युञ्जयानन्तगुणाभिराम ॥ ९॥
आनीतेनातिशुभ्रेण कौशेयेनामरद्रुमात् ।
मार्जयामि जटाभारं शिव मृत्युञ्जय प्रभो ॥ १०॥
नानाहेमविचित्राणि चीरचीनाम्बराणि च ।
विविधानि च दिव्यानि मृत्युञ्जय सुधारय ॥ ११॥
विशुद्धमुक्ताफलजालरम्यं
मनोहरं काञ्चनहेमसूत्रम् ।
यज्ञोपवीतं परमं पवित्र-
माधत्स्व मृत्युञ्जय भक्तिगम्य ॥ १२॥
श्रीगन्धं घनसारकुङ्कुमयुतं कस्तूरिकापूरितं
कालेयेन हिमाम्बुना विरचितं मन्दारसंवासितम् ।
दिव्यं देवमनोहरं मणिमये पात्रे समारोपितं
सर्वाङ्गेषु विलेपयामि सततं मृत्युञ्जय श्रीविभो ॥ १३॥
अक्षतैर्धवलैर्दिव्यैः सम्यक्तिलसमन्वितैः ।
मृत्युञ्जय महादेव पूजयामि वृषध्वज ॥ १४॥
चम्पकपङ्कजकुरवककुन्दैः करवीरमल्लिकाकुसुमैः ।
विस्तारय निजमकुटं मृत्युञ्जय पुण्डरीकनयनाप्त ॥ १५॥
माणिक्यपादुकाद्वन्द्वे मौनिहृत्पद्ममन्दिरे ।
पादौ सत्पद्मसदृशौ मृत्युञ्जय निवेशय ॥ १६॥
माणिक्यकेयूरकिरीटहारैः
काञ्चीमणिस्थापितकुण्डलैश्च ।
मञ्जीरमुख्याभरणैर्मनोज्ञै-
रङ्गानि मृत्युञ्जय भूषयामि ॥ १७॥
गजवदनस्कन्दधृते-
नातिस्वच्छेन चामरयुगेन ।
गलदलकाननपद्मं
मृत्युञ्जय भावयामि हृत्पद्मे ॥ १८॥
मुक्तातपत्रं शशिकोटिशुभ्रं
शुभप्रदं काञ्चनदण्डयुक्तम् ।
माणिक्यसंस्थापितहेमकुम्भं
सुरेश मृत्युञ्जय तेऽर्पयामि ॥ १९॥
मणिमुकुरे निष्पटले त्रिजगद्गाढान्धकारसप्ताश्वे ।
कन्दर्पकोटिसदृशं मृत्युञ्जय पश्य वदनमात्मीयम् ॥ २०॥
कर्पूरचूर्णं कपिलाज्यपूतं
दास्यामि कालेयसमान्वितैश्च ।
समुद्भवं पावनगन्धधूपितं
मृत्युञ्जयाङ्गं परिकल्पयामि ॥ २१॥
वर्तित्रयोपेतमखण्डदीप्त्या
तमोहरं बाह्यमथान्तरं च ।
साज्यं समस्तामरवर्गहृद्यं
सुरेश मृत्युञ्जय वंशदीपम् ॥ २२॥
राजान्नं मधुरान्वितं च मृदुलं माणिक्यपात्रे स्थितं
हिङ्गूजीरकसन्मरीचिमिलितैः शाकैरनेकैः शुभैः ।
शाकं सम्यगपूपसूपसहितं सद्योघृतेनाप्लुतं
श्रीमृत्युञ्जय पार्वतीप्रिय विभो सापोशनं भुज्यताम् ॥ २३॥
कूष्माण्डवार्ताकपटोलिकानां
फलानि रम्याणि च कारवल्ल्या ।
सुपाकयुक्तानि ससौरभाणि
श्रीकण्ठ मृत्युञ्जय भक्षयेश ॥ २४॥
शीतलं मधुरं स्वच्छं पावनं वासितं लघु ।
मध्ये स्वीकुरु पानीयं शिव मृत्युञ्जय प्रभो ॥ २५॥
शर्करामिलितं स्निग्धं दुग्धान्नं गोघृतान्वितम् ।
कदलीफलसंमिश्रं भुज्यतां मृत्युसंहर ॥ २६॥
केवलमतिमाधुर्यं दुग्धैः स्निग्धैश्च शर्करामिलितैः ।
एलामरीचमिलितं मृत्युञ्जय देव भुङ्क्ष्व परमान्नम् ॥ २७॥
रम्भाचूतकपित्थकण्ठकफलैर्द्राक्षारसास्वादुम-
त्खर्जूरैर्मधुरेक्षुखण्डशकलैः सन्नारिकेलाम्बुभिः ।
कर्पूरेण सुवासितैर्गुडजलैर्माधुर्ययुक्तैर्विभो
श्रीमृत्युञ्जय पूरय त्रिभुवनाधारं विशालोदरम् ॥ २८॥
मनोज्ञरम्भावनखण्डखण्डिता-
न्रुचिप्रदान्सर्षपजीरकांश्च ।
ससौरभान्सैन्धवसेवितांश्च
गृहाण मृत्युञ्जय लोकवन्द्य ॥ २९॥
हिङ्गूजीरकसहितं विमलामलकं कपित्थमतिमधुरम् ।
बिसखण्डाँल्लावणयुतान्मृत्युञ्जय तेऽर्पयामि जगदीश ॥ ३०॥
एलाशुण्ठीसहीतं दध्यन्नं चारुहेमपात्रस्थम् ।
अमृतप्रतिनिधिमाढ्यं मृत्युञ्जय भुज्यतां त्रिलोकेश ॥ ३१॥
जम्बीरनीराञ्चितशृङ्गबेरं
मनोहरानम्लशलाटुखण्डान् ।
मृदूपदंशान्सहसोपभुङ्क्ष्व
मृत्युञय श्रीकरुणासमुद्र ॥ ३२॥
नागररामठयुक्तं सुललितजम्बीरनीरसम्पूर्णम् ।
मथितं सैन्धवसहितं पिब हर मृत्युञ्जय क्रतुध्वंसिन् ॥ ३३॥
मन्दारहेमाम्बुजगन्धयुक्तै-
र्मन्दाकिनीनिर्मलपुण्यतोयैः ।
गृहाण मृत्युञ्जय पूर्णकाम
श्रीमत्परापोशनमभ्रकेश ॥ ३४॥
गगनधुनीविमलजलैर्मृत्युञ्जय पद्मरागपात्रगतैः ।
मृगमदचन्दनपूर्णं प्रक्षालय चारु हस्तपदयुग्मम् ॥ ३५॥
पुंनागमल्लिकाकुन्दवासितैर्जाह्नवीजलैः ।
मृत्युञ्जय महादेव पुनराचमनं कुरु ॥ ३६॥
मौक्तिकचूर्णसमेतैर्मृगमदघनसारवासितैः पूगैः ।
पर्णैः स्वर्णसमानैर्मृत्युञ्जय तेऽर्पयामि ताम्बूलम् ॥ ३७॥
नीराजनं निर्मलदीप्तिमद्भि-
र्दीपाङ्कुरैरुज्ज्वलमुच्छ्रितैश्च ।
घण्टानिनादेन समर्पयामि
मृत्युञ्जयाय त्रिपुरान्तकाय ॥ ३८॥
विरिञ्चिमुख्यामरबृन्दवन्दिते
सरोजमत्स्याङ्कितचक्रचिह्निते ।
ददामि मृत्युञ्जय पादपङ्कजे
फणीन्द्रभूषे पुनरर्घ्यमीश्वर ॥ ३९॥
पुंनागनीलोत्पलकुन्दजाजी-
मन्दारमल्लीकरवीरपङ्कजैः ।
पुष्पाञ्जलिं बिल्वदलैस्तुलस्या
मृत्युञ्जयाङ्घ्रौ विनिवेशयामि ॥ ४०॥
पदे पदे सर्वतमोनिकृन्तनं
पदे पदे सर्वशुभप्रदायकम् ।
प्रदक्षिणं भक्तियुतेन चेतसा
करोमि मृत्युञ्जय रक्ष रक्ष माम् ॥ ४१॥
नमो गौरीशाय स्फटिकधवलाङ्गाय च नमो
नमो लोकेशाय स्तुतविबुधलोकाय च नमः ।
नमः श्रीकण्ठाय क्षपितपुरदैत्याय च नमो
नमः फालाक्षाय स्मरमदविनाशाय च नमः ॥ ४२॥
संसारे जनितापरोगसहिते तापत्रयाक्रन्दिते
नित्यं पुत्रकलत्रवित्तविलसत्पाशैर्निबद्धं दृढम् ।
गर्वान्धं बहुपापवर्गसहितं कारुण्यदृष्ट्या विभो
श्रीमृत्युञ्जय पार्वतीप्रिय सदा मां पाहि सर्वेश्वर ॥ ४३॥
सौधे रत्नमये नवोत्पलदलाकीर्णे च तल्पान्तरे
कौशेयेन मनोहरेण धवलेनाच्छादिते सर्वशः ।
कर्पूराञ्चितदीपदीप्तिमिलिते रम्योपधानद्वये
पार्वत्याः करपद्मलालितपदं मृत्युञ्जयं भावये ॥ ४४॥
चतुश्चत्वारिंशद्विलसदुपचारैरभिमतै-
र्मनः पद्मे भक्त्या बहिरपि च पूजां शुभकरीम् ।
करोति प्रत्यूषे निशि दिवसमध्येऽपि च पुमा-
न्प्रयाति श्रीमृत्युञ्जयपदमनेकाद्भुतपदम् ॥ ४५॥
प्रातर्लिङ्गमुमापतेरहरहः संदर्शनात्स्वर्गदं
मध्याह्ने हयमेधतुल्यफलदं सायंतने मोक्षदम् ।
भानोरस्तमये प्रदोषसमये पञ्चाक्षराराधनं
तत्कालत्रयतुल्यमिष्टफलदं सद्योऽनवद्यं दृढम् ॥ ४६॥
॥ इति श्रीमच्छङ्करभगवतः कृतौ
मृत्युञ्जयमानसिकपूजास्तोत्रं सम्पूर्णम् ॥
**********
No comments:
Post a Comment