ಶ್ರೀಗುರುಭುಜಂಗಸ್ತೋತ್ರಮ್ ॥
ಶ್ರೀಗುರುಭ್ಯೋ ನಮಃ ।
ಸದೇಕಂ ಪರಂ ಕೇವಲಂ ನಿರ್ವಿಕಾರಂ ನಿರಾಕಾರಮಾನನ್ದಮಾತ್ರಂ ಪವಿತ್ರಮ್ ।
ಸ್ವಯಂಜ್ಯೋತಿರವ್ಯಕ್ತಮಾಕಾಶಕಲ್ಪಂ ಶ್ರುತಿರ್ಬ್ರಹ್ಮ ಯತ್ಪ್ರಾಹ ತಸ್ಮೈ ನಮಸ್ತೇ ॥ 1॥
ಯ ಏಕೋಽಪಿ ಮಾಯಾವಶಾತ್ಸರ್ವಹೇತುಃ ಸ್ವಸೃಷ್ಟೇಷು ವಿಶ್ವೇಷು ವಿಷ್ವಕ್ಪ್ರವೇಶಾತ್ ।
ಶ್ರುತೌ ಜೀವ ಇತ್ಯುಚ್ಯತೇ ಕೇವಲಾತ್ಮಾ ತುರೀಯಾಯ ಶುದ್ಧಾಯ ತಸ್ಮೈ ನಮಸ್ತೇ ॥ 2॥
ನ ಯಸ್ಮಾದಿಹ ದ್ರಷ್ಟೃ ವಿಜ್ಞಾತೃ ಚಾನ್ಯತ್ಕ್ವಚಿತ್ಸ್ಯಾತ್ಪರಂ ದ್ರಷ್ಟೃ ವಿಜ್ಞಾತೃ ವಾ ಯತ್ ।
ಸಮಸ್ತಾಸು ಬುದ್ಧಿಷ್ವನುಸ್ಯೂತಮೇಕಂ ನಮೋ ಬ್ರಹ್ಮಣೇ ಜೀವರೂಪಾಯ ತಸ್ಮೈ ॥ 3॥
ಮುಖಾದ್ದರ್ಪಣೇ ದೃಶ್ಯಮಾನೋ ನ ಭಿನ್ನೋ ಮುಖಾಭಾಸ ಏವಂ ಚಿದಾಭಾಸ ಈಶಃ ।
ಚಿತೋ ನೈವ ಭಿನ್ನೋಽಸ್ತಿ ಮಾಯಾಸ್ಥಿತೋ ಯಃ ಪರೇಶಾಯ ತಸ್ಮೈ ನಮಃ ಕೇವಲಾಯ ॥ 4॥
ಯಥಾ ಸೂರ್ಯ ಏಕಃ ಸ್ಥಿತಸ್ತೋಯಪಾತ್ರೇಷ್ವನೇಕೇಷು ಯೋ ನಿರ್ವಿಕಾರಸ್ತಥಾಽಽತ್ಮಾ ।
ಸ್ಥಿತಃ ಸ್ವೀಯಬುದ್ಧಿಷ್ವನೇಕಾಸು ನಿತ್ಯಶ್ಚಿದೇಕಸ್ವರೂಪಾಯ ತಸ್ಮೈ ನಮಸ್ತೇ ॥ 5॥
ಸ್ಥಿತೋಽನೇಕಬುದ್ಧಿಷ್ವಯಂ ಜೀವ ಏಕೋ ವಿಭುಃ ಕಾರಣೇಕತ್ವತೋ ನಾತ್ರ ನಾನಾ ।
ಇತಿ ತ್ಯಕ್ತಸರ್ವೈಷಣಾಪೀಹ ಯಸ್ಯ ಪ್ರಸಾದಾದ್ವಿಜಾನನ್ತಿ ತಸ್ಮೈ ನಮಸ್ತೇ ॥ 6॥
ಮುಖೈಃ ಪಂಚಭಿರ್ಭೋಗ್ಯವಸ್ತೂನಿ ಭುಂಕ್ತೇ ಹ್ಯಭೋಕ್ತಾಪಿ ಬುದ್ಧಿಸ್ಥಿತೋ ಬುದ್ಧಿತುಲ್ಯಃ ।
ಕರೋತೀವ ಕರ್ಮಾಣ್ಯಕರ್ಮಾಪಿ ಯೋ ವೈ ವಿಚಿತ್ರಾಯ ತಸ್ಮೈ ನಮಸ್ತೇಽಸ್ತು ನಿತ್ಯಮ್ ॥ 7॥
ಚಿದಾಭಾಸ ಏವಾತ್ರ ಕರ್ತೇವ ಭಾತಿ ಸ್ವರೂಪಾಪರಿಜ್ಞಾನತೋ ಯಸ್ಯ ನೂನಮ್ ।
ಸ್ವಬುದ್ಧೇರಿಯಂ ಕರ್ತೃಭೋಕ್ತೃತ್ವರೂಪಾ ಮೃಷಾ ಸಂಸೃತಿರ್ವೈ ನಮಸ್ತೇಽಸ್ತು ತಸ್ಮೈ ॥ 8॥
ಚಿದಾಭಾಸಚೈತನ್ಯಬುದ್ಧೀರ್ವಿವಿಚ್ಯಾತ್ರ ವಿಜ್ಞಾಯ ಸಂಸಾರಬನ್ಧಾದ್ವಿಮುಕ್ತಃ ।
ಯ ಏತದ್ವಿವೇಕಾವಧಿಂ ಸ್ವಸ್ಯ ಮೇನೇ ಸಮಸ್ತಂ ಚ ಸಂಸಾರಮಸ್ಮೈ ನಮಸ್ತೇ ॥ 9॥
ನ ಕಸ್ಯಾಪಿ ಸಂಸಾರಲೇಶೋಽಸ್ತಿ ಕಶ್ಚಿತ್ಸ ಕರ್ತೃತ್ವಭೋಕ್ತೃತ್ವರೂಪೋ ಹಿ ಮಿಥ್ಯಾ ।
ಸಮಸ್ತೋಽಪ್ಯಯಂ ಯತ್ಸ್ವರೂಪಾವಿವೇಕಾನ್ನಮಸ್ತೇ ಸದಾ ನಿತ್ಯಮುಕ್ತಾಯ ತಸ್ಮೈ ॥ 10॥
ಜಡಾ ಬುದ್ಧಿರಾತ್ಮಾ ಪರೋ ನಿರ್ವಿಕಾರಶ್ಚಿದಾಭಾಸ ಏಕೋಽಪಿ ಮಿಥ್ಯೈವ ಜೀವಃ ।
ಯ ಏತದ್ವಿವೇಕೀ ಸ್ವತೋ ನಿತ್ಯಮುಕ್ತಃ ಸದಾ ನಿರ್ವಿಕಾರಾಯ ತಸ್ಮೈ ನಮಸ್ತೇ ॥ 11॥
ಚಿದಾಭಾಸ ಏಕೋಽವ್ಯಯಃ ಕಾರಣಸ್ಥೋ ಯ ಈಶಃ ಸ ಏವೇಹ ಕಾರ್ಯಸ್ಥಿತಃ ಸನ್ ।
ಅಭೂಜ್ಜೀವಸಂಜ್ಞಃ ಸ ಏಕೋ ಹಿ ಜೀವಃ ಸ ಭಿನ್ನೋ ನ ಯಸ್ಮಾನ್ನಮಸ್ತೇಽಸ್ತು ತಸ್ಮೈ ॥ 12॥
ಯದಜ್ಞಾನತೋ ಜೀವನಾನಾತ್ವಮಾಹುರ್ಮಹಾಮಾಯಯಾ ಮೋಹಿತಾ ವಾದದಕ್ಷಾಃ ।
ವಿವೇಕೀ ವದತ್ಯೇಕಮೇವಾತ್ರ ಜೀವಂ ಪರಿತ್ಯಕ್ತವಾದೋ ನಮಸ್ತೇಽಸ್ತು ತಸ್ಮೈ ॥ 13॥
ಚಿದಾಭಾಸ ಏಕೋಽಥವಾ ನೇತಿ ಸರ್ವೇ ವಿಮುಹ್ಯನ್ತಿ ಬೇದಾನ್ತಿನೋಽಪ್ಯನ್ಯಭಕ್ತಾಃ ।
ತಥಾಪ್ಯೇಕ ಏವೇತಿ ಧೀದಾರ್ಢ್ಯದಾತಾ ಯ ಆತ್ಮಾ ಸ್ವಭಕ್ತಸ್ಯ ತಸ್ಮೈ ನಮಸ್ತೇ ॥ 14॥
ಮುಖಾದರ್ಶಯೋರೇಕ ಏಕೈಕತಾಯಾಂ ಮುಖಾಭಾಸ ಏವಂ ಚಿದಾಭಾಸ ಏಕಃ ।
ಸ್ವಚಿದ್ಬ್ರಹ್ಮಬಿಮ್ಬೈಕ್ಯಮಾಯೈಕ್ಯತೋಽಯಂ ಯದಂಶೋಽಖಿಲೇಶೋ ನಮಸ್ತೇಽಸ್ತು ತಸ್ಮೈ ॥ 15॥
ಶ್ರುತಿರ್ಹ್ಯೇಕತಾಂ ಬ್ರಹ್ಮಣೋ ವಕ್ತಿ ನೂನಂ ಸಜಾತೀಯಭೇದಾದಿಶೂನ್ಯಂ ತತೋಽತ್ರ ।
ಸ್ವಮಾಯೈಕತಾಪ್ಯಸ್ಯ ಯುಕ್ತ್ಯಾಪಿ ಸಿದ್ಧಾ ನಮಸ್ತೇ ಸದೈಕಸ್ವರೂಪಾಯ ತಸ್ಮೈ॥ 16॥
ನ ಮಾಯಾಬಹುತ್ವಂ ತದಾ ತತ್ಪ್ರತಿಷ್ಠಾ ಅನೇಕೇಶ್ವರಾಃ ಸಮ್ಭವೇಯುರ್ಹಿ ನೈತತ್ ।
ಕಚಿದ್ಯುಜ್ಯತೇ ಯಸ್ಯ ಮಾಯಾಪ್ಯನೇಕಾ ನಮಸ್ತೇ ಜಗದ್ಧೇತುಭೂತಾಯ ತಸ್ಮೈ ॥ 17॥
ನ ಮಾಯಾಂ ವಿನಾ ಯಸ್ಯ ಕರ್ತೃತ್ವಮಸ್ತಿ ಪ್ರವೇಶೋಽಪಿ ತಸ್ಮಾತ್ಸಮಸ್ತಂ ಮೃಷೈವ ।
ಮಹಾಮಾಯಿನೇ ನಿರ್ವಿಕಾರಾಯ ತಸ್ಮೈ ನಮೋ ಬ್ರಹ್ಮರೂಪಾಯ ಶುದ್ಧಾಯ ತುಭ್ಯಮ್ ॥ 18॥
ಯ ಆತ್ಮಾ ದೃಗೇವಾಽಽಸ ದೃಶ್ಯಂ ತ್ವನಾತ್ಮಾ ವಿವೇಕಾದ್ದ್ವಯೋರಾತ್ಮದೃಷ್ಟಿಃ ಸದೃಶ್ಯೇ ।
ವಿನಷ್ಟೋ ಭವೇತ್ಸಾ ದೃಶಿ ಸ್ವಸ್ವರೂಪೇ ನಮಸ್ತೇ ದೃಗಾತ್ಮಸ್ವರೂಪಾಯ ತಸ್ಮೈ ॥ 19॥
ಸ ದೃಗ್ನಿರ್ವಿಕಾರಃ ಸ್ವಮಾಯಾ ಜಡೇಯಂ ದೃಗಾಭಾಸ ಏಕೋ ಮೃಷೈವೇತಿ ಯಸ್ಯ ।
ಜಗತ್ಕರ್ತೃತಾ ತಾತ್ತ್ವಿಕೀ ನಾಸ್ತಿ ತಸ್ಮೈ ನಮಃ ಕೇವಲಾಕರ್ತೃರೂಪಾಯ ತುಭ್ಯಮ್ ॥ 20॥
ಅಮಾಯ್ಯೇವ ಮಾಯೀ ವಿಭುಃ ಶುದ್ಧ ಆತ್ಮಾ ಸೃಜತ್ಯತ್ತ್ಯವತ್ಯೇತದಾನನ್ದಪೂರಃ ।
ನ ಮಾಯಾಂ ವಿನಾ ಸ್ರಷ್ಟೃತಾ ಸಾಕ್ಷಿತಾ ವಾ ವಿಶುದ್ಧಾತ್ಮನೋ ಯಸ್ಯ ತಸ್ಮೈ ನಮಸ್ತೇ ॥ 21॥
ಚಿತಾಭಾಸ ಏವಾಖಿಲೋಪಾಧಿನಿಷ್ಠಃ ಸಮಸ್ತೈಕಸಾಕ್ಷೀ ಸ ಜೀವೇಶಸಂಜ್ಞಃ ।
ಚಿದಂಶೋಽಖಿಲಾತ್ಮಾ ನ ಭಿನ್ನೋಽಸ್ತಿ ಯಸ್ಮಾನ್ನಮಸ್ತೇ ವಿಶುದ್ಧಾತ್ಮರೂಪಾಯ ತಸ್ಮೈ ॥ 22॥
ಅಹಂ ಸಚ್ಚಿದಾನನ್ದ ಆತ್ಮೈವ ಶುದ್ಧೋ ವಿಮುಕ್ತೋಽಸ್ಮಿ ವೇದಾನ್ತವಾಕ್ಯಾರ್ಥಬೋಧಾತ್ ।
ಇತಿ ಸ್ವಸ್ವರೂಪಂ ವಿಜಾನಾತಿ ವಿದ್ವಾನ್ಪರಂ ಯತ್ಪರೇಭ್ಯೋಽಪಿ ತಸ್ಮೈ ನಮಸ್ತೇ ॥ 23॥
ಸ್ವಮಾಯಾಪರಿಭ್ರಾನ್ತಚಿತ್ತಾ ಅಜಸ್ರಂ ಪರಾಗ್ವಸ್ತು ಪಶ್ಯನ್ತಿ ನ ಪ್ರತ್ಯಗರ್ಥಮ್ ।
ಮುಮುಕ್ಷುಸ್ತು ಯಂ ಪಶ್ಯತಿ ಪ್ರತ್ಯಗರ್ಥೇ ಪರಬ್ರಹ್ಮರೂಪಾಯ ತಸ್ಮೈ ನಮಸ್ತೇ ॥ 24॥
ಉಪಾಸ್ಯೋಽನ್ಯ ಈಶೋಽಸ್ತ್ಯಹಂ ತ್ವನ್ಯ ಈಶಾತ್ಪಶುರ್ವೇದ ನೈನಂ ಭಜತ್ಯತ್ರ ಯೋಽಸ್ಮಾತ್ ।
ವಿವೇಕೀ ಸ ಏವಾಹಮಸ್ಮೀತ್ಯುಪಾಸ್ತೇ ಯಮಾತ್ಮಾನಮೀಶಂ ನಮಸ್ತೇಽಸ್ತು ತಸ್ಮೈ ॥ 25॥
ಭಯಂ ಭೇದದೃಷ್ಟೇರ್ಭವತ್ಯುಲ್ಬಣಂ ವೈ ಮಹಾನ್ತೋ ನ ಭೇದಂ ಪ್ರಪಶ್ಯನ್ತಿ ತಸ್ಮಾತ್ ।
ಯದಜ್ಞಾನತೋ ದೃಶ್ಯತೇ ಭೇದ ಏವಂ ಭಿದಾಮೋಹಹನ್ತ್ರೇ ನಮಸ್ತೇಽಸ್ತು ತಸ್ಮೈ ॥ 26॥
ವಿರಿಂಚೇನ್ದ್ರಸೂರ್ಯಾಗ್ನಿರುದ್ರೇನ್ದುವಿಷ್ಣೂನ್ಪ್ರಕಲ್ಪ್ಯೈಕ ಏವಾದ್ವಯಃ ಸರ್ವಸಾಕ್ಷೀ ।
ಜಗಚ್ಚಕ್ರವಿಭ್ರಾನ್ತಿಕರ್ತಾ ಯ ಆತ್ಮಾ ನ ದೃಶ್ಯೇತ ಕೇನಾಪಿ ತಸ್ಮೈ ನಮಸ್ತೇ ॥ 27॥
ಜಗಜ್ಜಾಗ್ರತಿ ಸ್ಥೂಲಮೇತತ್ಸಮಾನಂ ಮನೋವಾಸಿತಂ ಸ್ವಪ್ನ ಆನನ್ದನಿದ್ರಾಮ್ ।
ಸುಷುಪ್ತೌ ಸ್ವಮೇವಾಭಿಪಶ್ಯನ್ಮುದಾಽಽಸ್ತೇ ತುರೀಯೋ ಯ ಆತ್ಮಾ ನಮಸ್ತೇಽಸ್ತು ತಸ್ಮೈ ॥ 28॥
ಸಮಸ್ತಾದಪಿ ಸ್ಥೂಲಸೂಕ್ಷ್ಮಾಚ್ಛರೀರಾತ್ಪರಃ ಕಾರಣಾಚ್ಚಾನ್ಯ ಆತ್ಮಾ ಸಮೀಪೇ ।
ಯ ಏಕೋ ವಿದೂರೇಽಪಿ ತಿಷ್ಠನ್ ಜನಾನಾಂ ಮಹಿಮ್ನಿ ಸ್ವಕೀಯೇ ಚ ತಸ್ಮೈ ನಮಸ್ತೇ ॥ 29॥
ಯಮಾಶ್ರಿತ್ಯ ನಾಸ್ತೀತಿ ಚಾಸ್ತೀತಿ ವೇದೇ ಪ್ರವೃತ್ತೋ ವಿರುದ್ಧೋಽಪಿ ವಾದೋಽಖಿಲಾತ್ಮಾ ।
ನಮಸ್ತೇಽಂಘ್ರಿಪಾಣ್ಯಾದಿಹೀನಾಯ ನಿತ್ಯಂ ಸಮಸ್ತಾಂಘ್ರಿಪಾಣ್ಯಾದಿಯುಕ್ತಾಯ ತಸ್ಮೈ ॥ 30॥
ಯೋಽಣೋರಣೀಯಾಂಸಮಾತ್ಮಾನಮೇಕಂ ಮಹನ್ತಂ ಮಹದ್ವಸ್ತುನಶ್ಚೇತನೇಭ್ಯಃ ।
ಪರಂ ಚೇತನಂ ನಿತ್ಯತೋ ವೇದ ನಿತ್ಯಂ ಯಮೇವೇಹ ವಿದ್ವಾನ್ನಮಸ್ತೇಽಸ್ತು ತಸ್ಮೈ ॥ 31॥
ಯದಾನನ್ದಲೇಶೋಪಭೋಗೇನ ಸರ್ವೇ ಸದಾನನ್ದಿನಃ ಸಮ್ಭವನ್ತ್ಯತ್ರ ತಸ್ಮೈ ।
ಸದಾನನ್ದಸನ್ದೋಹಪೂರ್ಣಾರ್ಣವಾಯ ಪ್ರಸನ್ನಾಯ ತುಭ್ಯಂ ನಮಃ ಕೇವಲಾಯ ॥ 32॥
ಯಮುತ್ಸೃಜ್ಯ ಮರ್ತ್ಯಾ ಭಜತ್ಯನ್ಯದೇವಾನ್ನ ತೇಷಾಂ ವಿಮುಕ್ತಿಃ ಫಲಂ ಕಿನ್ತು ತುಚ್ಛಮ್ ।
ಶ್ವಪುಚ್ಛಂ ಗೃಹೀತ್ವಾ ತರಿಷ್ಯನ್ತಿ ಕೇ ವಾ ಸಮುದ್ರಂ ಹ್ಯಪಾರಂ ನಮಸ್ತೇಽಸ್ತು ತಸ್ಮೈ ॥ 33॥
ಯಥಾ ವಿಧ್ಯುಪಾಸ್ತೌ ಫಲಂ ದಾಸ್ಯತೀಶಸ್ತಥಾ ವಿಷ್ಣುರುದ್ರೇನ್ದ್ರವಹ್ನ್ಯಾದ್ಯುಪಾಸ್ತೌ ।
ಫಲಂ ದಾಸ್ಯತಿ ಬ್ರಹ್ಮ ಯದ್ಧೀಶಸಂಜ್ಞಃ ಸ್ವಕರ್ಮಾನುಸಾರಂ ನಮಸ್ತೇಽಸ್ತು ತಸ್ಮೈ ॥ 34॥
ನ ಯದ್ಬ್ರಹ್ಮ ಮೋಕ್ಷಪ್ರದಂ ಸ್ಯಾತ್ಕದಾಚಿದ್ವಿನೇಹೈವ ಮುಕ್ತಿಪ್ರದಂ ಜ್ಞಾನಮೇಕಮ್ ।
ನ ಮೋಕ್ಷಂ ಕೃತಃ ಕರ್ಮಣಾತಃ ಕೃತೇನ ಪ್ರಪನ್ನಾರ್ತಿಹನ್ತ್ರೇ ನಮಸ್ತೇಽಸ್ತು ತಸ್ಮೈ ॥ 35॥
ಇದಂ ನೇತಿನೇತೀತ್ಯಮೂರ್ತಂ ಚ ಮೂರ್ತಂ ನಿರಸ್ಯೈವ ಸರ್ವಂ ಜಗದ್ದೃಶ್ಯಮೇತತ್ ।
ನಿಷೇಧಾವಧಿ ಬ್ರಹ್ಮ ಯಚ್ಛಿಷ್ಯತೇ ವೈ ಮನೋವಾಗತೀತಾಯ ತಸ್ಮೈ ನಮಸ್ತೇ ॥ 36॥
ಪರಿತ್ಯಜ್ಯ ಯತ್ತತ್ತ್ವಸಮ್ಯಗ್ವಿಚಾರಂ ಪ್ರವರ್ತೇತ ಯಸ್ತೀರ್ಥಯಾತ್ರಾಜಪಾದೌ ।
ಕರಸ್ಥಾನ್ನಮುತ್ಸೃಜ್ಯ ಲೇಢೀತಿ ಹಸ್ತಂ ನ ಯಸ್ಯೋದಯಸ್ತಸ್ಯ ತಸ್ಮೈ ನಮಸ್ತೇ ॥ 37॥
ನ ಚೇತ್ಪ್ರಾಣವರ್ಗೇಷ್ವಯಂ ಸ್ಯಾಜ್ಜಡತ್ವಾತ್ಕಥಂ ಪ್ರಾಣನಾಡೀ ಕ್ರಿಯಾಕಾರಿತೈಷಾಮ್ ।
ಅತೋ ಯಸ್ಯ ಸಿದ್ಧಾ ಸ್ಥಿತಾ ಯುಕ್ತಿತೋಽಪಿ ಪ್ರಪಂಚಪ್ರಕಾಶಾಚ್ಚ ತಸ್ಮೈ ನಮಸ್ತೇ ॥ 38॥
ಭಯಂ ಯದ್ವಿದಾಂ ನಾಸ್ತಿ ಮೃತ್ಯುಶ್ಚ ನೂನಂ ಬಿಭೇತ್ಯೇವ ವಾಯ್ವಾದಿ ಸರ್ವೇ ಚ ಯಸ್ಮಾತ್ ।
ಶರೀರೇಽಹಮಿತ್ಯತ್ರ ಬುದ್ಧೇರ್ಭಯಂ ಸ್ಯಾನ್ನಮಸ್ತೇಽಭಯಾಯಾಶರೀರಾಯ ತಸ್ಮೈ ॥ 39॥
ಗುರೌ ಭಕ್ತಿಯುಕ್ತೈರಿಹೈವೇಶ್ವರೋ ಯಃ ಸುವಿಜ್ಞೇಯ ಆತ್ಮಾಽನ್ಯಥಾ ತ್ವಬ್ದಕೋಟ್ಯಾ ।
ಅವಿಜ್ಞೇಯ ಏಕಃ ಸ್ವಬುದ್ಧಿಸ್ಥಿತೋಽಪಿ ಪ್ರಿಯಾಯಾಖಿಲೇಭ್ಯೋಽಪಿ ತಸ್ಮೈ ನಮಸ್ತೇ ॥ 40॥
ಸಮಸ್ತಾತ್ಪ್ರಿಯೋ ದೇಹ ಏವಾಕ್ಷಮಸ್ಮಾತ್ಪ್ರಿಯಂ ಪ್ರಾಣ ಏವಾಕ್ಷತೋಽಪಿ ಪ್ರಿಯೋಽತಃ ।
ಪ್ರಿಯಃ ಪ್ರತ್ಯಗಾತ್ಮೈವ ಭೋಕ್ತಾ ಪರೋ ಯಃ ಸ್ವತೋಽತಿಪ್ರಿಯಾಯೇಹ ತಸ್ಮೈ ನಮಸ್ತೇ ॥ 41॥
ಪ್ರಿಯಾದಾತ್ಮನೋಽನ್ಯನ್ನ ವಿದ್ಯೇತ ಕಿಂಚಿತ್ಕ್ವಚಿತ್ಕಾರಣಾನ್ನೈವ ಭಿದ್ಯೇತ ಕಾರ್ಯಮ್ ।
ಯ ಆತ್ಮಾ ಸಮಸ್ತಸ್ಯ ಹೇತುರ್ನಮಸ್ತೇ ನಿದಾನಾಯ ಸರ್ವಸ್ಯ ದೃಶ್ಯಸ್ಯ ತಸ್ಮೈ ॥ 42॥
ಸಮಸ್ತಂ ಜಗತ್ಕಾರಣಾನ್ನೈವ ಭಿನ್ನಂ ಸಮಸ್ತಾತ್ಮನಃ ಕೇವಲಾದದ್ವಿತೀಯಾತ್ ।
ಪರಬ್ರಹ್ಮಣೋಽವ್ಯಾಕೃತೇಶಾಚ್ಚ ಯಸ್ಮಾನ್ನಮಸ್ತೇ ಕ್ಷರಾಯಾಕ್ಷರಾಯಾಪಿ ತಸ್ಮೈ ॥ 43॥
ಯತಃ ಕಾರಣಾನ್ನೇಹ ಕಾರ್ಯಂ ವಿಭಿನ್ನಂ ತತೋ ಬ್ರಹ್ಮಣೋ ನೈವ ಭಿನ್ನಂ ಜಗತ್ಸ್ಯಾತ್ ।
ಸಮಸ್ತಂ ಜಗದ್ಬ್ರಹ್ಮ ತಚ್ಚಾಸ್ಮಿ ವಿದ್ವಾನುಪಾಸ್ತೇ ಯಮೇಕಂ ನಮಸ್ತೇಽಸ್ತು ತಸ್ಮೈ ॥ 44॥
ಯಥಾ ಮೃದ್ವಿಕಾರೋ ಮೃತೋ ನೈವ ಭಿನ್ನಸ್ತಥಾ ಚಿದ್ವಿಕಾರಶ್ಚಿತೋ ನೈವ ಭಿನ್ನಃ ।
ಅತಃ ಸರ್ವಮೇತಚ್ಚಿದೇವೇತಿ ವಿದ್ವಾನ್ವಿಜಾನಾತಿ ಯದ್ಬ್ರಹ್ಮ ತಸ್ಮೈ ನಮಸ್ತೇ ॥ 45॥
ಜಗದ್ಯಸ್ಯ ಸರ್ವಂ ಶರೀರಂ ಜಗನ್ನ ಪ್ರಮಾತೃಪ್ರಮಾಣಪ್ರಮೇಯಾತ್ಮಕೋ ಯಃ ।
ಸಮಸ್ತಾನ್ತರಾಯಾಖಿಲೇಶಾಯ ತಸ್ಮೈ ನಮಃ ಸಚ್ಚಿದಾನನ್ದರೂಪಾಯ ತುಭ್ಯಮ್ ॥ 46॥
ವಿದುರ್ಯಂ ನ ಸರ್ವೇಽಪಿ ಯೋ ವೇತ್ತಿ ಸರ್ವಂ ಸಮಸ್ತೇಷು ಭೂತೇಷು ತಿಷ್ಠನ್ತ್ವಯಂ ಯಃ ।
ಸಮಸ್ತಾನ್ತರಃ ಪ್ರೇರಯತ್ಯೇವ ಸರ್ವಾನ್ನಮಸ್ತೇ ಸಮಸ್ತಾನ್ತರೇಶಾಯ ತಸ್ಮೈ ॥ 47॥
ನ ದೇಹೇನ್ದ್ರಿಯಪ್ರಾಣಧೀಭೂತವೃನ್ದಂ ನ ಸಂಸಾರ್ಯಹಂ ಕಿನ್ತು ಚಿನ್ಮಾತ್ರಮೇಕಮ್ ।
ಪರಂ ಚಾಪರಂ ಬ್ರಹ್ಮವಿದ್ವಾನ್ವಿಶುದ್ಧಸ್ತದಸ್ತೀತಿ ಯದ್ವೇದ ತಸ್ಮೈ ನಮಸ್ತೇ ॥ 48॥
ಯಥಾ ಸ್ವಪ್ನದೃಷ್ಟಾ ಚ ಹಸ್ತ್ಯಾದಿ ಮಿಥ್ಯಾ ತಥಾ ಸರ್ವಮೇತಜ್ಜಗದ್ಭಾತಿ ಮಿಥ್ಯಾ ।
ಅಧಿಷ್ಠಾನಮಾತ್ರಂ ಜಗದ್ದ್ರಷ್ಟೃ ಸತ್ಯಂ ವಿಶುದ್ಧಂ ಚ ಯದ್ಬ್ರಹ್ಮ ತಸ್ಮೈ ನಮಸ್ತೇ ॥ 49॥
ಪರಾ ಚಾಪರಾ ಯಸ್ಯ ಮಾಯಾ ದ್ವಿಧೇಯಂ ಜಗತ್ಕರ್ತೃತಾಮಕ್ರಿಯಸ್ಯಾತನೋತಿ ।
ಸ್ವತೋ ದ್ರಷ್ಟೃದೃಶ್ಯಾತಿರಿಕ್ತಾಯ ತಸ್ಮೈ ನಮಃ ಕೇವಲಾಯಾವ್ಯಯಾಯಾತ್ಮನೇಽಸ್ತು ॥ 50॥
ವಿಶುದ್ಧಾತ್ಮತತ್ತ್ವಾಪರಿಜ್ಞಾನಮೂಲಂ ವಿಶೇಷಾವಭಾಸಂ ಸುಖಿತ್ವಾದಿರೂಪಮ್ ।
ವಿಶುದ್ಧಾತ್ಮತತ್ತ್ವೇ ಪರಿಜ್ಞಾತ ಏತತ್ಕ್ವಚಿನ್ನಾಸ್ತಿ ಯಸ್ಮಿನ್ನಮಸ್ತೇಽನ್ತು ತಸ್ಮೈ ॥ 51॥
ನ ಹಿ ತ್ವಕ್ಪರಿಜ್ಞಾನತಃ ಸರ್ಪಭಾನಂ ಕ್ವಚಿದ್ವಿದ್ಯತೇ ಸರ್ಪತಾ ಕಲ್ಪಿತಾ ಸ್ಯಾತ್ ।
ತಥಾ ಕಲ್ಪಿತಂ ಸರ್ವಮೇತಚ್ಚ ಯಸ್ಮಿನ್ನಮಸ್ತೇ ಸಮಸ್ತಾವಭಾಸಾಯ ತಸ್ಮೈ ॥ 52॥
ಸುಷುಪ್ತೌ ನ ಸಂಸಾರಲೇಶೋಽಸ್ತಿ ಕಶ್ಚಿತ್ಪ್ರಬೋಧೇಽಖಿಲಾಹಂಕೃತೌ ದೃಶ್ಯತೇಽಯಮ್ ।
ಅತೋಽಹಂಕೃತೇರೇವ ಸಂಸಾರ ಇತ್ಥಂ ನ ವೈ ಸಂಸೃತಿರ್ಯಸ್ಯ ತಸ್ಮೈ ನಮಸ್ತೇ ॥ 53॥
ನ ಶಾಸ್ತಾ ನ ಶಿಷ್ಯೋ ನ ಶಾಸ್ತ್ರಂ ನ ವಿಶ್ವಂ ನಂ ಶಾಕ್ತಂ ಚ ಶೈವಂ ಮತಂ ವೈಷ್ಣವಂ ವಾ ।
ಸುಷುಪ್ತೌ ತದಾನೀಂ ಯದಸ್ತ್ಯಾತ್ಮಮಾತ್ರಂ ಸ್ವತೋ ನಿಷ್ಪ್ರಪಂಚಾಯ ತಸ್ಮೈ ನಮಸ್ತೇ ॥ 54॥
ಜಡಾನಾಂ ಪ್ರವೃತ್ತಿಃ ಸ್ವತೋ ನಾಸ್ತಿ ಯಸ್ಮಾದ್ವಿಭೋಶ್ಚೇತನಾತ್ಸಾ ಪ್ರವೃತ್ತಿಃ ಪ್ರವೃತ್ತಾ ।
ಮನಃಪ್ರಾಣದೇಹೇನ್ದ್ರಿಯವ್ಯಾಕೃತಾನಾಂ ನಮಸ್ತೇ ಚಿದಾತ್ಮಸ್ವರೂಪಾಯ ತಸ್ಮೈ ॥ 55॥
ಮನಃಪ್ರಾಣದೇಹೇನ್ದ್ರಿಯವ್ಯಾಕೃತಾನಿ ಸ್ವತಃ ಕಾಷ್ಠತುಲ್ಯಾನಿ ಯತ್ಸನ್ನಿಧಾನಾತ್ ।
ಸ್ವಯಂ ಚೇತನಾನೀವ ಭಾನ್ತ್ಯೇವ ಮೋಹಾಜ್ಜಡೇಭ್ಯಃ ಪರಸ್ಮೈ ನಮಸ್ತೇಽಸ್ತು ತಸ್ಮೈ ॥ 56॥
ಬಹಿರ್ಬುಧ್ಯತೇ ಪ್ರಾಣಿಬುದ್ಧಿಃ ಪದಾರ್ಥಾನ್ನ ಯಂ ಬುಧ್ಯತೇ ಪ್ರಾಣನಾಥಂ ಸ್ವಸಂಸ್ಥಮ್ ।
ಸಮಸ್ತಾನ್ತರಾತ್ಮಾನಮೇಕಂ ಚ ತಸ್ಮೈ ನಮಸ್ತೇ ವಿರಿಂಚಾದಿಧೀಬೋಧಯಿತ್ರೇ ॥ 57॥
ಪರಂ ಯತ್ಸ್ವರೂಪಂ ವಿದುರ್ನಾಪಿ ದೇವಾಃ ಕುತೋಽನ್ಯೇ ಮನುಷ್ಯಾದಯೋ ಬಾಹ್ಯಚಿತ್ತಾಃ ।
ತದೇಹವಾಮಸ್ಮೀತಿ ಭಕ್ತಾಸ್ತ್ವಜಸ್ರಂ ಭಜನ್ತ್ಯದ್ವಿತೀಯಂ ನಮಸ್ತೇಽಸ್ತು ತಸ್ಮೈ ॥ 58॥
ಸಮಸ್ತೇಷು ದೇಹೇಷು ಸೂರ್ಯೇಽಪಿ ತಿಷ್ಠನ್ಯ ಏಕೋಽಖಿಲಾತ್ಮಾ ಸಮಸ್ತೈಕಸಾಕ್ಷೀ ।
ಸ ಏವಾಹಮಸ್ಮೀತಿ ವೇದಾನ್ತವಿದ್ಭಿಃ ಸದೋಪಾಸ್ಯತತ್ತ್ವಾಯ ತಸ್ಮೈ ನಮಸ್ತೇ ॥ 59॥
ಅಹಂ ವಿಶ್ವಕಸ್ತೈಜಸಃ ಪ್ರಾಜ್ಞರೂಪೋ ವಿರಾಟ್ಸೂತ್ರಮಾಯೇಶರೂಪಾನ್ನ ಭಿನ್ನಃ ।
ಉಪಾಧೌ ವಿಭಿನ್ನೇಽಪಿ ಕಿನ್ತ್ವಸ್ಮಿ ಸೋಽಹಂ ಯಮೇವಂ ಭಜನ್ವೇದ ತಸ್ಮೈ ನಮಸ್ತೇ ॥ 60॥
ಸಮಸ್ತಾನಿ ಕರ್ಮಾಣಿ ಸನ್ತ್ಯಜ್ಯ ವಿದ್ವಾಂಸ್ತದೇವಾಹಮಸ್ಮೀತ್ಯುಪಾಸ್ತೇ ಹ್ಯಜಸ್ರಮ್ ।
ಯದೇವಾಹ ಸರ್ವಾಗಮಾನ್ತೈಕವೇದ್ಯಂ ನಮಸ್ತೇಽನಿಶಂ ಚಿನ್ತನೀಯಾಯ ತಸ್ಮೈ ॥ 61॥
ನ ಕೃತ್ಯಾಕೃತೇಃ ಪ್ರತ್ಯವಾಯಃ ಕ್ವಚಿತ್ಸ್ಯಾದಭಾವಾತ್ಕಥಂ ಭಾವ ಉತ್ಪತ್ಸ್ಯತೇಽತಃ ।
ಅಹಂ ಪ್ರತ್ಯವಾಯೀತಿ ಕೃತ್ಯಾಕೃತೇ ಸ್ಯಾಮಯಂ ಯಸ್ಯ ಮೋಹಾನ್ನಮಸ್ತೇಽಸ್ತು ತಸ್ಮೈ ॥ 62॥
ಅಧರ್ಮೋಽಯಮೇವಾಯಮೇವಾತ್ರ ಧರ್ಮೋ ಭವೇದಿತ್ಯಯಂ ಮೋಹ ಏವಾಖಿಲಾನಾಮ್ ।
ಯದಜ್ಞಾನಿನಾಂ ಪ್ರತ್ಯವಾಯಪ್ರದಂ ಸ್ಯಾತ್ಕ್ವಚಿನ್ನ ಹ್ಯಭಾವೋ ನಮಸ್ತೇಽಸ್ತು ತಸ್ಮೈ ॥ 63॥
ಅಧರ್ಮಂ ಚ ಹೃತ್ಸ್ಥಂ ವಿಹಾಯ ಪ್ರಶಾನ್ತಾ ಭಜನ್ತ್ಯತ್ರ ನೂನಂ ಸ್ವರೂಪಂ ಯದೀಯಮ್ ।
ಸ್ವರೂಪಂ ವಿಚಾರ್ಯಾ ಮೃತೇರಾ ಸುಷುಪ್ತೇರ್ನಮಸ್ತೇಽಸ್ತು ತಸ್ಮೈ ವಿಮುಕ್ತಿಪ್ರದಾಯ ॥ 64॥
ನ ವೈ ಬದ್ಧತಾ ಮುಕ್ತತಾ ವಾ ಕದಾಚಿತ್ಕ್ವಚಿನ್ನಿತ್ಯಮುಕ್ತಸ್ಯ ಕಿಂ ಚಾತ್ಮನೋಽತಃ ।
ಬಹಿಶ್ಚೇತಸೋಽನ್ತಶ್ಚ ಗತ್ಯಾಗತೀ ತೇ ನಮಶ್ಚಿತ್ತವಿಕ್ಷೇಪಹರ್ತ್ರೇಽಸ್ತು ತಸ್ಮೈ ॥ 65॥
ಯಥಾ ಕ್ಷೀಣಚಿತ್ತಸ್ತಥೈವಾತ್ಮನಿಷ್ಠಃ ಪುಮಾನ್ನಿತ್ಯಮುಕ್ತೋ ಭವೇದದ್ವಿತೀಯಃ ।
ಯಥಾ ಚೇತಸೋಽಕ್ಷೀಣತಾ ಯತ್ಪ್ರಸಾದಾತ್ತಥಾ ತ್ವತ್ಪ್ರಸಾದಾಯ ತಸ್ಮೈ ನಮಸ್ತೇ ॥ 66॥
ಪ್ರಸನ್ನೇ ತ್ವಯಿ ಪ್ರಾಣಿನಾಂ ಕಿನ್ನ ಲಭ್ಯಂ ಪರಸ್ತ್ವತ್ಪ್ರಸಾದಾನ್ನ ಲಾಭೋಽಸ್ತಿ ಕಶ್ಚಿತ್ ।
ಬುಧೋಽತೋಽನಿಶಂ ಯತ್ಪ್ರಸಾದಾಭಿಕಾಂಕ್ಷೀ ನಮಸ್ತೇ ಪ್ರಪನ್ನಪ್ರಸನ್ನಾಯ ತಸ್ಮೈ ॥ 67॥
ಪೃಥಿವ್ಯಾದಿಯುಕ್ತಾಽಪರಬ್ರಹ್ಮನಿಷ್ಠಾ ನ ಮುಖ್ಯಾ ಭವನ್ತ್ಯತ್ರ ಜನ್ಮಾಸ್ತಿ ತೇಷಾಮ್ ।
ನಿರಸ್ತಾಖಿಲೋಪಾಧಿನಿಷ್ಠೋ ಹಿ ಮುಖ್ಯೋ ನ ಯಸ್ಯೇಹ ಜನ್ಮಾಸ್ತಿ ತಸ್ಮೈ ನಮಸ್ತೇ ॥ 68॥
ನ ಮುಖ್ಯಂ ಸುಷುಪ್ತೇರಧಿಷ್ಠಾನತೋಽನ್ಯತ್ಸುಷುಪ್ತೇರಧಿಷ್ಠಾನಮಾತ್ರಂ ಹಿ ಮುಖ್ಯಮ್ ।
ಯದಜ್ಞಾನತೋ ದೃಪ್ತಬಾಲಾಕಿರೇತನ್ನೃಪಾದ್ವೇದ ಚೈವಂ ನಮಸ್ತೇಽಸ್ತು ತಸ್ಮೈ ॥ 69॥
ವಿರಿಂಚಾದಿಲೋಕಾದಿಹಾವೃತ್ತಿರಸ್ತಿ ಕ್ವಚಿಚ್ಚಾತ್ಮಲೋಕಾದನಾವೃತ್ತಿರಸ್ಮಾತ್ ।
ಧ್ರುವೋ ಹ್ಯಾತ್ಮಲೋಕೋಽಧ್ರುವಾನಾತ್ಮಲೋಕಾತ್ಪರೋ ಯೋಽಸ್ತಿ ಚೈಕೋ ನಮಸ್ತೇಽಸ್ತು ತಸ್ಮೈ ॥ 70॥
ಪರಂ ವೇದ ಸನ್ಮಾತ್ತ್ರಮುದ್ದಾಲಕೇನ ಸ್ವಪಿತ್ರೋಪದಿಷ್ಟೋ ಯದಾ ಶ್ವೇತಕೇತುಃ ।
ಯಮಾತ್ಮಾನಮಾತ್ಮಸ್ಥಮವ್ಯಕ್ತಮೇಕಂ ನಮಸ್ತೇಽನಿಶಂ ಸತ್ಸ್ವರೂಪಾಯ ತಸ್ಮೈ ॥ 71॥
ಭೃಗುರ್ವೇದ ಪಿತ್ರೋಪದಿಷ್ಟೋಽನ್ತರೇವ ಪ್ರಕೃಷ್ಟಃ ಪರಬ್ರಹ್ಮರೂಪಾತ್ಮಲೋಕಮ್ ।
ಅನನ್ತಾಽದ್ವಯಾನನ್ದವಿಜ್ಞಾನಸತ್ಯಂ ಯಮೇಕಂ ವಿಶುದ್ಧಾಯ ತಸ್ಮೈ ನಮಸ್ತೇ ॥ 72॥
ವಿಹಾಯೈವ ಕೋಶಾತ್ಪರಂ ಪಂಚ ವೇದ ಸ್ವರೂಪಂ ಯದಾನನ್ದಕೋಶಸ್ಯ ಪುಚ್ಛಮ್ ।
ಮುಮುಕ್ಷುಃ ಸುಷುಪ್ತೇರಧಿಷ್ಠಾನಮೇಕಂ ಸದಾತ್ಮಸ್ವರೂಪಾಯ ತಸ್ಮೈ ನಮಸ್ತೇ ॥ 73॥
ಅನನ್ತಾನಿ ಶಾಸ್ತ್ರಾಣ್ಯಧೀತ್ಯಾಪಿ ವಿದ್ವಾನ್ನ ದುಃಖೇತರೋ ನಾರದೋಽನಾತ್ಮವಿತ್ತ್ವಾತ್ ।
ಋಷಿರ್ಮಾನಸಾದ್ವೇದ ಯಂ ಶೋಕಹತ್ಯೈ ನಮಸ್ತೇ ಸುಖೌಘಾಯ ತಸ್ಮೈ ವಿಭೂಮ್ನೇ ॥ 74॥
ಋಷೇರ್ಯಾಜ್ಞವಲ್ಕ್ಯಾದ್ವಿದೇಹೋ ಮಹಾತ್ಮಾ ಯದೇವಾಭಯಂ ಬ್ರಹ್ಮ ಸಮ್ಯಗ್ವಿದಿತ್ವಾ ।
ಸ್ವಮೇವಾಭಯಂ ತದ್ಧ್ಯಭೂದ್ವೇದವೇದ್ಯಂ ಸಮಸ್ತಾಭಯಾಪ್ಯಾಯ ತಸ್ಮೈ ನಮಸ್ತೇ ॥ 75॥
ವಿದಿತ್ವಾತ್ರ ಭೂಮಾನಮೇನಶ್ಛಿದೇಽಸ್ತಿ ಪ್ರವಾಚ್ಯಂ ಕಿಮು ಪ್ರಾಣವಿತ್ಪಾಪನಾಶೇ ।
ಅತಃ ಪ್ರಾಣವಿದ್ಯಾಮನಾದೃತ್ಯ ವಿದ್ವಾನುಪಾಸ್ತೇ ಯಮೀಶಂ ನಮಸ್ತೇಽಸ್ತು ತಸ್ಮೈ ॥ 76॥
ಅಜಸ್ರಾನ್ನದಾನಂ ಪರಿತ್ಯಜ್ಯ ಜಾನಶ್ರುತಿರ್ಹ್ಯೈಕ್ಯಮಭ್ಯಾಗಮದ್ಧಂಸವಾಕ್ಯಾತ್ ।
ಸ ವೈ ಪ್ರಾಣವಿತ್ಪ್ರಾಣ ಉತ್ಕರ್ಷವಾಂಸ್ತತ್ಪರೋಽಸ್ಮಾದ್ಯ ಆತ್ಮಾ ನಮಸ್ತೇಽಸ್ತು ತಸ್ಮೈ ॥ 77॥
ರವೀನ್ದ್ವಗ್ನಿತೇಜೋ ಜಗದ್ಭಾಸಕಶ್ಚೇನ್ನ ತಸ್ಯಾಪಿ ಚಿತ್ಸನ್ನಿಧಾನೇನ ತತ್ಸ್ಯಾತ್ ।
ನ ಯತ್ಸನ್ನಿಧಾನಂ ವಿನಾ ಕಿಂಚಿದಸ್ತಿ ಕ್ವಚಿದ್ವಸ್ತು ತಸ್ಮೈ ನಮೋ ಜ್ಯಾತಿಷೇ ಚ ॥ 78॥
ಪರಂ ಜ್ಯೋತಿಷಾಂ ಜ್ಯೋತಿರಾತ್ಮಾಽಽಖ್ಯಮೇತದ್ರವೀನ್ದ್ವಾದಿಬುದ್ಧ್ಯಾದಿವಿದ್ಯೋತಕಂ ಯತ್ ।
ವಿದಿತ್ವೈವ ನೂನಂ ನರೋ ಬ್ರಾಹ್ಮಣಃ ಸ್ಯಾದಮರ್ತ್ಯಶ್ಚ ತಸ್ಮೈ ನಮಃ ಸ್ವಾತ್ಮನೇ ತೇ ॥ 79॥
ಯಥಾಶ್ವತ್ಥವೃಕ್ಷೇ ಸ್ವದೇಹೇ ಚ ತುಲ್ಯಂ ಸ್ವಮೇವಾಬ್ರವೀದ್ವಾಸುದೇವೋಽರ್ಜುನಾಯ ॥
ತಥಾ ಯಸ್ಯ ಸಾಮ್ಯಂ ವಿಜಾನಾತಿ ವಿದ್ವಾನ್ನಮಸ್ತೇ ಸಮಸ್ತಾತ್ಮರೂಪಾಯ ತಸ್ಮೈ ॥ 80॥
ದ್ವಿಜೇ ಪುಲ್ಕಸೇ ಹಸ್ತಿನಿ ಸ್ವೇ ಶರೀರೇ ಸಮಃ ಸಾತ್ತ್ವಿಕೇ ರಾಜಸೇ ತಾಮಸೇ ಚ ।
ಯ ಆತ್ಮಾ ಗುಣೈಸ್ತೈರಸಂಸ್ಪೃಷ್ಟ ಈಶೋ ನಮಸ್ತೇ ಸದಾ ನಿಷ್ಕಳಂಕಾಯ ತಸ್ಮೈ ॥ 81॥
ಯಮಾಶ್ಚರ್ಯವದ್ವಕ್ತಿ ಕಶ್ಚಿಚ್ಛೃಣೋತಿ ಪ್ರಶಾನ್ತಸ್ತು ಜಾನಾತಿ ನ ಹ್ಯಪ್ರಶಾನ್ತಃ ।
ವಿದಿತ್ವಾಽಪಿ ಸಾಕ್ಷಾತ್ಕರೋತ್ಯತ್ರ ನಾನ್ಯಶ್ಚಿದಸ್ಮೀತಿ ದೀಕ್ಷ್ಯಾಯ ತಸ್ಮೇ ನಮಸ್ತೇ ॥ 82॥
ಪತೀ ದೇವದೈತ್ಯೌಘಯೋಃ ಪದ್ಮಜಾದ್ಯಂ ಚತುರ್ವಾರಮಾಕರ್ಣಯನ್ತೌ ತಥಾಽಪಿ ।
ನ ಜಾನಾತಿ ಕಶ್ಚಿತ್ತಯೋರ್ವೇದ ಚಾನ್ಯೋ ಹ್ಯತೋ ದುರ್ವಿತರ್ಕ್ಯಾಯ ತಸ್ಮೇ ನಮಸ್ತೇ ॥ 83॥
ಶರೀರೇನ್ದ್ರಿಯಪ್ರಾಣವಿಜ್ಞಾನಶೂನ್ಯೇಷ್ವಿಹೈಕೈಕಮಾತ್ಮೇತಿ ದೃಪ್ತಾ ವದನ್ತಿ ।
ತಥಾ ಬುದ್ಧಿಸಮ್ಯಗ್ವಿಚಾರಾಸಮರ್ಥಾ ಯದಜ್ಞಾನಮೋಹಾ ಹಿ ತಸ್ಮೈ ನಮಸ್ತೇ ॥ 84॥
ಅನೇಕತ್ವಕರ್ತೃತ್ವಭೋಕ್ತೃತ್ವಧರ್ಮಃ ಸ ಆತ್ಮಾ ವಿಭುಶ್ಚಿದ್ಗುಣಶ್ಚೇತಿ ಕೇಚಿತ್ ।
ನ ಕರ್ತೈವ ಭೋಕ್ತಾ ಕ್ವಚಿಚ್ಚೇತಿ ಚಾನ್ಯೇ ಯದಜ್ಞಾ ವದನ್ತೀಹ ತಸ್ಮೈ ನಮಸ್ತೇ ॥ 85॥
ಅನೇಕಾತ್ಮನಾ ಪ್ರೇರಕೋಽನ್ಯೋ ನ ಹೀಶೋಽಸ್ತ್ವಿತಿ ಪ್ರಾಹುರೇಕೇ ನ ಚಾಸ್ತೀತಿ ಚಾನ್ಯೇ ।
ವಿವಾದಾಸ್ಪದಂ ನೈವ ಮಾಯಾ ವಿನಾ ಯನ್ನಮಸ್ತೇಽಸ್ತು ತಸ್ಮೈ ವಿವಾದಾತ್ಪರಾಯ ॥ 86॥
ವಿವಾದೋ ನಿವರ್ತೇತ ಯಸ್ಯ ಪ್ರಸಾದಾತ್ಸ್ವರೂಪಪ್ರಕಾಶೇ ಜಗದ್ಭಾವನಸ್ಯ ।
ನಿವೃತ್ತೇ ವಿವಾದೇ ಪುನರ್ನೈವ ಲೋಕೇ ಭ್ರಮನ್ತ್ಯದ್ವಿತೀಯಾಯ ತಸ್ಮೈ ನಮಸ್ತೇ ॥ 87॥
ವಿಭುಂ ಚಿತ್ತನಿಷ್ಠಂ ಯದಂಗುಷ್ಟಮಾತ್ರಂ ಪುರಾಣಂ ಪುಮಾಂಸಂ ವದನ್ತ್ಯತ್ರ ವೇದಾಃ ।
ಜನಾನಾಂ ಹೃದಂಗುಷ್ಠಮಾತ್ರಂ ಯತೋಽಸ್ಮಾದನಂಗುಷ್ಠಮಾತ್ರಾಯ ತಸ್ಮೇ ನಮಸ್ತೇ ॥ 88॥
ಭ್ರುವೋರ್ಮಧ್ಯಮೇವಾವಿಮುಕ್ತಂ ಮುನೀನಾಂ ಮಹಾಕ್ಷೇತ್ರಮಿತ್ಯತ್ರ ಬುದ್ಧೇಃ ಶ್ರುತಂಚ ।
ನ ವಾ ವಾರಣಾಸೀಪುರಂ ಗನ್ತುಮಿಚ್ಛೇತ್ಸ್ವರೂಪೇ ಸ್ಥಿತೋ ಯಸ್ಯ ತಸ್ಮೈ ನಮಸ್ತೇ ॥ 89॥
ಶರೀರೇ ಯಥಾಽಹಂಮತಿಃ ಸರ್ವಜನ್ತೋಸ್ತಥಾ ಮುಕ್ತಿಬುದ್ಧಿಶ್ಚ ಕಾಶೀಮೃತೇರ್ವಾ ।
ಸ್ವರೂಪಪ್ರಕಾಶಂ ವಿನಾ ಯಸ್ಯ ಮುಕ್ತಿರ್ನ ವೈ ಸಮ್ಭವೇತ್ಕಾಪಿ ತಸ್ಮೈ ನಮಸ್ತೇ ॥ 90॥
ಸ್ವರೂಪಪ್ರಕಾಶೈಕಹೇತುರ್ಹಿ ಯಸ್ಯ ಪ್ರಕೃಷ್ಟಾಗಮಾನ್ತಾರ್ಥಸಮ್ಯಗ್ವಿಚಾರಃ ॥
ಅತೋ ಯತ್ಪ್ರಕಾಶಾಯ ವೇದಾನ್ತನಿಷ್ಠೋಽನಿಶಂ ಸ್ಯಾದ್ವಿವೇಕೀ ನಮಸ್ತೇಽಸ್ತು ತಸ್ಮೈ ॥ 91॥
ವದನ್ತಶ್ಚ ರುದ್ರಾದಯೋಽಪ್ಯಾತ್ಮತತ್ತ್ವಂ ನ ಜಾನನ್ತ್ಯತಃ ಕೇಽಪಿ ವೇದಾನ್ತನಿಷ್ಠಾಃ ।
ತತಸ್ತಾನಿಹೋತ್ಸೃಜ್ಯ ವೇದಾನ್ತನಿಷ್ಠೋ ಭವೇದ್ಯತ್ಪ್ರಬೋಧಾಯ ತಸ್ಮೈ ನಮಸ್ತೇ ॥ 92॥
ಸುರೇನ್ದ್ರೋ ವಿದಿತ್ವೈವ ಯಸ್ಯ ಸ್ವರೂಪಂ ಸಮಸ್ತಾದಘಾದ್ವೃತ್ರಹತ್ಯಾದಿರೂಪಾತ್ ।
ವಿಮುಕ್ತೋ ಹಿ ವೇದಾನ್ತನಿಷ್ಠೋ ಮುದಾಽಽಸ್ತೇ ನಿರಸ್ಯಾಭಿಮಾನಂ ನಮಸ್ತೇಽಸ್ತು ತಸ್ಮೈ ॥ 93॥
ಯದೀಯಂ ಸ್ವರೂಪಂ ವಿಚಾರ್ಯೈವ ತಿಷ್ಠನ್ಸದಾ ವನ್ದನೀಯೋಽಮರೈರಿನ್ದ್ರಮುಖ್ಯೈಃ ।
ವಿಶುದ್ಧೋ ಹ್ಯಯಂ ದೇವವನ್ದ್ಯತ್ವತೋ ವೈ ನಮಸ್ತೇಽಸ್ತು ತಸ್ಮೈ ವಿಶುದ್ಧಿಪ್ರದಾಯ ॥ 94॥
ಸ್ವಯಂ ಶುದ್ಧ ಏವಾನ್ಯಶುದ್ಧಿಂ ದದಾತಿ ಕ್ವಚಿನ್ನ ಹ್ಯಶುದ್ಧೋಽನ್ಯಶುದ್ಧಿಪ್ರದಃ ಸ್ಯಾತ್ ।
ಸ್ಮೃತಃ ಶುದ್ಧಿದಃ ಸರ್ವಜನ್ತೋರ್ಯ ಆತ್ಮಾ ವಿಶುದ್ಧಃ ಪವಿತ್ರಾಯ ತಸ್ಮೈ ನಮಸ್ತೇ ॥ 95॥
ಸಕೃತ್ಸಂಸ್ಮೃತಶ್ಚೇತ್ಸಮಸ್ತಂ ಚ ಪಾಪಂ ದಹತ್ಯಗ್ನಿವದ್ಯಸ್ತ್ವಿಹಾತ್ಯನ್ತದೀಪ್ತಃ ।
ಚಿದೇವಾಹಮಿತ್ಯೇವ ಬುದ್ಧೌ ಪ್ರವೇಶಸ್ವದೀಪ್ತಿರ್ನಮಸ್ತೇಽಸ್ತು ತಸ್ಮೈ ಮಹಿಮ್ನೇ ॥ 96॥
ನ ಹಿ ಸ್ನಾನದಾನಾದಿನಾ ಪಾಪನಾಶೇ ತು ತತ್ಸಂಸ್ಕೃತಿಃ ಕ್ವಾಪಿ ನಶ್ಯೇತ್ಕದಾಪಿ ।
ವಿನಾ ಯತ್ಸ್ಮೃತಿಂ ಸ್ಮೃತ್ಯುಪಾಯಂ ಚ ಮುಕ್ತ್ವಾ ಸ್ಮರತ್ಪಾಪಹನ್ತ್ರೇ ನಮಸ್ತೇಽಸ್ತು ತಸ್ಮೈ ॥ 97॥
ಅನಾತ್ಮನ್ಯಹನ್ತಾಭಿಮಾನಂ ನಿರಸ್ಯ ಸ್ವರೂಪಪ್ರಕಾಶಸ್ತತಃ ಸರ್ವಪಾಪಮ್ ।
ನ ಸಂಸ್ಕೃತ್ಯನಾತ್ಮಾಶ್ರಯಂ ಸ್ಯಾದ್ವಿನಷ್ಟಂ ಸ್ಮೃತೇರ್ಯತ್ಪ್ರಕಾಶೇ ತು ತಸ್ಮೈ ನಮಸ್ತೇ ॥ 98॥
ಅನಾಕರ್ಣ್ಯ ವೇದಾನ್ತಭಾಷ್ಯಂ ಸಮಗ್ರಂ ನ ಕಸ್ಯಪಿ ಯತ್ಸ್ಮೃತ್ಯುಪಾಯೋಽಸ್ತಿ ಕಶ್ಚಿತ್ ।
ಅತಸ್ತಚ್ಚಿಕೀರ್ಷಾ ಸ್ವತೋ ಯಸ್ಯ ಜಾತಾ ನಮಸ್ತೇ ದಯಾಳುಸ್ವರೂಪಾಯ ತಸ್ಮೈ ॥ 99॥
ಸಮಸ್ತಾಗಮಾನ್ತಾನಿಹ ವ್ಯಾಚಿಕೀರ್ಷುಃ ಸ್ವಯಂ ಶಂಕರಾಚಾರ್ಯರೂಪಾವತೀರ್ಣಃ ।
ಕೃತವ್ಯಾಸಸೂತ್ರಾದಿಭಾಷ್ಯೋ ಯ ಆತ್ಮಸ್ವರೂಪೈಕ್ಯಧೀದಾಯ ತಸ್ಮೈ ನಮಸ್ತೇ ॥ 100॥
ಚತುರ್ಭಿಃ ಪ್ರಶಾನ್ತೈಃ ಸ್ವಶಿಷ್ಯೈರ್ಯುತಃ ಸನ್ ಭುವಂ ಪರ್ಯಟನ್ನಾತ್ಮನಿಷ್ಠಾಽಖಿಲಾತ್ಮಾ ।
ಸ್ವಭಾಷ್ಯಪ್ರಚಾರಂ ಸದಾ ಕಾರಮನ್ಯೋ ವಿಭಾತ್ಯದ್ವಿತೀಯಾಯ ತಸ್ಮೈ ನಮಸ್ತೇ ॥ 101॥
ವಿರಾಟ್ಸೂತ್ರಮಾಯೇಶತುರ್ಯಸ್ವರೂಪೈಃ ಕ್ರಮಾತ್ತೋಟಕಾಚಾರ್ಯನಾಮಾದಿಸಂಜ್ಞೈಃ ।
ಚತುರ್ವ್ಯೂಹವೇಷೈಃ ಸ್ವಶಿಷ್ಯೈರ್ಯುತಾಯಾದ್ವಯಾಯಾತ್ಮನೇ ತೇ ನಮೋ ನಿರ್ಗುಣಾಯ ॥ 102॥
ಅಜಂ ಕರ್ಮಠಂ ವಿಶ್ವರೂಪಂ ವಿದಿತ್ವಾ ತುರೀಯಾಶ್ರಮಂ ಚಾಥ ತಸ್ಮೈ ಪ್ರದಾಯ ।
ವ್ಯಧಾದೃಶ್ಯಶೃಂಗಾಶ್ರಮೇ ಶಾರದಾರ್ಚಾಪರಂ ತತ್ತ್ವರಕ್ಷಾಯ ತಸ್ಮೈ ನಮಸ್ತೇ ॥ 103॥
ಯ ಆಚಾರ್ಯಭಾಷ್ಯಾಣ್ಯಧೀತ್ಯೈವ ಭಕ್ತ್ಯಾ ಲಭನ್ತೇ ನಿಜಾನನ್ದಮಾತ್ಮಸ್ವರೂಪಮ್ ॥
ಗುರುಸ್ತೈರಯಂ ವನ್ದ್ಯ ಆತ್ಮಾಽಽತ್ಮವಿದ್ಭಿಸ್ತತಃ ಸರ್ವವನ್ದ್ಯಾಯ ತಸ್ಮೈ ನಮಸ್ತೇ ॥ 104॥
ನಮಃ ಶಂಕರಾಚಾರ್ಯ ತುಭ್ಯಂ ಪುರಸ್ತಾನ್ನಮಃ ಪೃಷ್ಠತಃ ಪಾರ್ಶ್ವತಶ್ಚಾಧ ಊರ್ಧ್ವಮ್ ।
ನಮಃ ಸರ್ವತಃ ಸರ್ವರೂಪಾಯ ತಸ್ಮೈ ವಿಶುದ್ಧಾತ್ಮನೇ ಬ್ರಹ್ಮಣೇ ತೇ ನಮಸ್ತೇ ॥ 105॥
ಅಹಂ ದೇಹಬುದ್ಧ್ಯಾ ತವೈವಾಸ್ಮಿ ದಾಸೋ ಹ್ಯಹಂ ಜೀವಬುದ್ಧ್ಯಾಽಸ್ಮಿ ತೇಂಽಶೈಕದೇಶಃ ।
ತ್ವಮೇವಾಸ್ಮ್ಯಹಂ ತ್ವಾತ್ಮಬುದ್ಧ್ಯಾ ತಥಾಪಿ ಪ್ರಸೀದಾನ್ವಹಂ ದೇಹಬುದ್ಧ್ಯಾ ನಮಸ್ತೇ ॥ 106॥
ಸ ಭಾಷ್ಯಾರ್ಥ ಆಶು ಸ್ಫುರತ್ವನ್ತಕಾಲೇ ಚಿದಾಭಾಸಚೈತನ್ಯದೃಕ್ತ್ವತ್ಪ್ರಸಾದಾತ್ ।
ಗತಿರ್ನಾನ್ಯಥಾ ಮೇ ಸಮಸ್ತಾಪರಾಧಂ ಕ್ಷಮಸ್ವಾಖಿಲಾತ್ಮನ್ನಮಸ್ತೇಽಸ್ತು ನಿತ್ಯಮ್ ॥ 107॥
ನಮೋ ಭಾಷ್ಯವೃನ್ದಾಯ ಭಾಷ್ಯೋಪದೇಷ್ಟ್ರೇ ನಮೋ ಭಾಷ್ಯಕೃದ್ಭ್ಯೋ ನಮೋ ಭಾಷ್ಯವಿದ್ಭ್ಯಃ ।
ನಮೋ ಭಾಷ್ಯವೃನ್ದಾರ್ಥಭೂತಾಯ ಭೂಮ್ನೇ ವಿಶುದ್ಧಾತ್ಮನೇ ಬ್ರಹ್ಮಣೇಽಸ್ಮೈ ಪರಸ್ಮೈ ॥ 108॥
ಶತೋರ್ಧ್ವಾಷ್ಟಕಶ್ಲೋಕಮೇತದ್ಭುಜಂಗಪ್ರಯಾತಂ ಪಠೇದ್ಯೋಽತ್ರ ಭಕ್ತ್ಯಾ ತ್ವದೀಯಮ್ ।
ಚಿದಾಭಾಸಚಿದ್ರೂಪಮೇಕಂ ಪದಾಬ್ಜಂ ಸ್ಮರನ್ಸ್ವಸ್ವರೂಪೇಣ ನೂನಂ ರಮೇತ ॥ 109॥
ಭುಜಂಗಪ್ರಯಾತಾರ್ಥಮತ್ಯನ್ತಭಕ್ತ್ಯಾ ಸಕೃದ್ವಾ ಸ್ಮರೇತ್ಪ್ರತ್ಯಹಂ ಶ್ರೀಗುರೋರ್ಯಃ ।
ನಿರಸ್ತಾನ್ಧಕಾರಃ ಸ ಆನನ್ದರೂಪಂ ವ್ರಜತ್ಯಚ್ಯುತಂ ತ್ವಾಂ ತ್ವದೀಯಪ್ರಸಾದಾತ್ ॥ 110॥
ಅಹಂ ಬ್ರಹ್ಮ ಭೂತ್ವಾಪಿ ನೇತಿ ಭ್ರಮೋಽಭೂತ್ತದೀಯಸ್ವರೂಪಾವಬೋಧಾಪ್ತುರಾ ಮೇ ।
ಗುರೋ ತ್ವತ್ಪ್ರಸಾದಾದ್ವಿಮುಕ್ತೋಽಹಮಸ್ಮಿ ಚಿತಾಭಾಸಚಿದ್ರೂಪ ಆತ್ಮಾ ವಿಶುದ್ಧಃ ॥ 111॥
ಅತೋ ಬುದ್ಧಿಮಾಂಸ್ತ್ವತ್ಪ್ರಸಾದಾಯ ನಿತ್ಯಂ ಭುಜಂಗಪ್ರಯಾತಂ ಪಠೇದ್ವಾ ತದರ್ಥಮ್ ।
ಸ್ಮರೇದ್ವಾ ಗುರೋ ತೇ ಪ್ರಣಮ್ಯೈವ ಭೂಯಶ್ಚಿದಾಭಾಸಚಿದ್ರೂಪಮೇಕಂ ಪರಂ ತತ್ ॥ 112॥
ಮುನೀನ್ದ್ರೈಃ ಪುರಾಣೈರನುಧ್ಯೇಯಮೀಶಂ ವಿರಿಂಚಾದಿಭಿಃ ಸರ್ವದೇವೈಶ್ಚ ವನ್ದ್ಯಮ್ ।
ಕಥಂ ತ್ವಾಮಹಂ ಸ್ತೋತುಮಿಚ್ಛನ್ಭವನ್ತಂ ಕ್ವ ವಾ ಸಾಧಯೇ ನೇಹ ಕಿಂ ಕಿಂ ಮಹೇಶೇ ॥ 113॥
ಕೃಪಾ ತೇ ಕೃಪಾಳೋ ವಿಮುಗ್ಧಂ ವಿಶುದ್ಧಂ ಕರೋತೀಹ ಮೂಕಂ ಚ ವಾಚಾಲಮೀಶಮ್ ।
ಅತಸ್ತ್ವತ್ಕೃಪಾವೈಭವೇನೈವಮೇತತ್ಕೃತಂ ಮೇ ಚಿಕೀರ್ಷಾಖಿಲಾತ್ಮನ್ನಮಸ್ತೇ ॥ 114॥
ಇತಿ
ಶ್ರೀಗುರುಭುಜಂಗಸ್ತೋತ್ರಂ ಸಮ್ಪೂರ್ಣಮ್ ।
********
No comments:
Post a Comment