ಶಂಕರಾಚಾರ್ಯ ಪದಾವಲಮ್ಬನ ಸ್ತುತೀ ಚನ್ದ್ರಶೇಖರಭಾರತೀ ಮಹಾಸ್ವಮಿ ವಿರಚಿತಮ್

ಶ್ರೀಮಜ್ಜಗದ್ಗುರುಶಂಕರಾಚಾರ್ಯಪದಾವಲಮ್ಬನಸ್ತುತೀ

ಓಮಿತ್ಯಶೇಷವಿಬುಧಾಃ ಶಿರಸಾ ಯದಾಜ್ಞಾಂ

ಸಮ್ಬಿಭ್ರತೇ ಸುಮಮಯೀಮಿವ ನವ್ಯಮಾಲಾಮ್ ।

ಓಂಕಾರಜಾಪರತಲಭ್ಯಪದಾಬ್ಜ ಸ ತ್ವಂ

ಶ್ರೀಶಂಕರಾರ್ಯ ಮಮ ದೇಹಿ ಪದಾವಲಮ್ಬಮ್ ॥ 1॥

ನಮ್ರಾಲಿಹೃತ್ತಿಮಿರಚಂಡಮಯೂಖಮಾಲಿನ್

ಕಮ್ರಸ್ಮಿತಾಪಹೃತಕುನ್ದಸುಧಾಂಶುದರ್ಪ ।

ಸಮ್ರಾಡ್ಯದೀಯದಯಯಾ ಪ್ರಭವೇದ್ದರಿದ್ರಃ

ಶ್ರೀಶಂಕರಾರ್ಯ ಮಮ ದೇಹಿ ಪದಾವಲಮ್ಬಮ್ ॥ 2॥

ಮಸ್ತೇ ದುರಕ್ಷರತತಿರ್ಲಿಖಿತಾ ವಿಧಾತ್ರಾ

ಜಾಗರ್ತು ಸಾಧ್ವಸಲವೋಽಪಿ ನ ಮೇಽಸ್ತಿ ತಸ್ಯಾಃ ।

ಲುಮ್ಪಾಮಿ ತೇ ಕರುಣಯಾ ಕರುಣಾಮ್ಬುಧೇ ತಾಂ

ಶ್ರೀಶಂಕರಾರ್ಯ ಮಮ ದೇಹಿ ಪದಾವಲಮ್ಬಮ್ ॥ 3॥

ಶಮ್ಪಾಲತಾಸದೃಶಭಾಸ್ವರದೇಹಯುಕ್ತ

ಸಮ್ಪಾದಯಾಮ್ಯಖಿಲಶಾಸ್ತ್ರಧಿಯಂ ಕದಾ ವಾ ।

ಶಂಕಾನಿವಾರಣಪಟೋ ನಮತಾಂ ನರಾಣಾಂ

ಶ್ರೀಶಂಕರಾರ್ಯ ಮಮ ದೇಹಿ ಪದಾವಲಮ್ಬಮ್ ॥ 4॥

ಕನ್ದರ್ಪದರ್ಪದಲನಂ ಕಿತವೈರಗಮ್ಯಂ

ಕಾರುಣ್ಯಜನ್ಮಭವನಂ ಕೃತಸರ್ವರಕ್ಷಮ್ ।

ಕೀನಾಶಭೀತಿಹರಣಂ ಶ್ರಿತವಾನಹಂ ತ್ವಾಂ

ಶ್ರೀಶಂಕರಾರ್ಯ ಮಮ ದೇಹಿ ಪದಾವಲಮ್ಬಮ್ ॥ 5॥

ರಾಕಾಸುಧಾಕರಸಮಾನಮುಖಪ್ರಸರ್ಪ-

ದ್ವೇದಾಂತವಾಕ್ಯಸುಧಯಾ ಭವತಾಪತಪ್ತಮ್ ।

ಸಂಸಿಚ್ಯ ಮಾಂ ಕರುಣಯಾ ಗುರುರಾಜ ಶೀಘ್ರಂ

ಶ್ರೀಶಂಕರಾರ್ಯ ಮಮ ದೇಹಿ ಪದಾವಲಮ್ಬಮ್ ॥ 6॥

ಯತ್ನಂ ವಿನಾ ಮಧುಸುಧಾಸುರದೀರ್ಘಕಾವ-

ಧೀರಿಣ್ಯ ಆಶು ವೃಣ(ಣು)ತೇ ಸ್ವಯಮೇವ ವಾಚಃ ।

ತಂ ತ್ವತ್ಪದಾಬ್ಜಯುಗಲಂ ಬಿಭೃತೇ ಹೃದಾ ಯಃ

ಶ್ರೀಶಂಕರಾರ್ಯ ಮಮ ದೇಹಿ ಪದಾವಲಮ್ಬಮ್ ॥ 7॥

ಶ್ರೀಶಂಕರಾರ್ಯಕರುಣಾವಶತಃ ಪ್ರಣೀತಂ

ಸ್ತೋತ್ರಂ ತದೀಯಮನುವರ್ಣಯುತಂ ತದಂಘ್ರ್ಯೋಃ ।

ಭಕ್ತ್ಯಾ ಸಮರ್ಪಿತಮಿದಂ ಪಠತಾಂ ನರಾಣಾಂ

ವಿದ್ಯಾವಿರಕ್ತಿಮತುಲಾಂ ಗುರುರಾಟ್ ತನೋತು ॥ 8॥

ಇತಿ ಶ್ರೀಚನ್ದ್ರಶೇಖರಭಾರತೀಮಹಾಸ್ವಮಿಭಿಃ ವಿರಚಿತಮ್

ಆಚಾರ್ಯಪದಾವಲಮ್ಬನಸ್ತುತಿಃ ಸಮ್ಪೂರ್ಣಂ ।

****************