ಶ್ರೀಸುಬ್ರಹ್ಮಣ್ಯ ಭುಜಂಗಮ್ 1
ಸದಾ ಬಾಲರೂಪಾಽಪಿ ವಿಘ್ನಾದ್ರಿಹನ್ತ್ರೀ
ಮಹಾದನ್ತಿವಕ್ತ್ರಾಽಪಿ ಪಂಚಾಸ್ಯಮಾನ್ಯಾ ।
ವಿಧೀನ್ದ್ರಾದಿಮೃಗ್ಯಾ ಗಣೇಶಾಭಿಧಾ ಮೇ
ವಿಧತ್ತಾಂ ಶ್ರಿಯಂ ಕಾಽಪಿ ಕಲ್ಯಾಣಮೂರ್ತಿಃ ॥ 1॥
ನ ಜಾನಾಮಿ ಶಬ್ದಂ ನ ಜಾನಾಮಿ ಚಾರ್ಥಂ
ನ ಜಾನಾಮಿ ಪದ್ಯಂ ನ ಜಾನಾಮಿ ಗದ್ಯಮ್ ।
ಚಿದೇಕಾ ಷಡಾಸ್ಯ ಹೃದಿ ದ್ಯೋತತೇ ಮೇ
ಮುಖಾನ್ನಿಃಸರನ್ತೇ ಗಿರಶ್ಚಾಪಿ ಚಿತ್ರಮ್ ॥ 2॥
ಮಯೂರಾಧಿರೂಢಂ ಮಹಾವಾಕ್ಯಗೂಢಂ
ಮನೋಹಾರಿದೇಹಂ ಮಹಚ್ಚಿತ್ತಗೇಹಮ್ ।
ಮಹೀದೇವದೇವಂ ಮಹಾವೇದಭಾವಂ
ಮಹಾದೇವಬಾಲಂ ಭಜೇ ಲೋಕಪಾಲಮ್ ॥ 3॥
ಯದಾ ಸನ್ನಿಧಾನಂ ಗತಾ ಮಾನವಾ ಮೇ
ಭವಾಮ್ಭೋಧಿಪಾರಂ ಗತಾಸ್ತೇ ತದೈವ ।
ಇತಿ ವ್ಯಂಜಯನ್ಸಿನ್ಧುತೀರೇ ಯ ಆಸ್ತೇ
ತಮೀಡೇ ಪವಿತ್ರಂ ಪರಾಶಕ್ತಿಪುತ್ರಮ್ ॥ 4॥
ಯಥಾಬ್ಧೇಸ್ತರಂಗಾ ಲಯಂ ಯಾನ್ತಿ ತುಂಗಾ-
ಸ್ತಥೈವಾಪದಃ ಸನ್ನಿಧೌ ಸೇವತಾಂ ಮೇ ।
ಇತೀವೋರ್ಮಿಪಂಕ್ತೀರ್ನೃಣಾಂ ದರ್ಶಯನ್ತಂ
ಸದಾ ಭಾವಯೇ ಹೃತ್ಸರೋಜೇ ಗುಹಂ ತಮ್ ॥ 5॥
ಗಿರೌ ಮನ್ನಿವಾಸೇ ನರಾ ಯೇಽಧಿರೂಢಾ-
ಸ್ತದಾ ಪರ್ವತೇ ರಾಜತೇ ತೇಽಧಿರೂಢಾಃ ।
ಇತೀವ ಬ್ರುವನ್ಗನ್ಧಶೈಲಾಧಿರೂಢಃ
ಸ ದೇವೋ ಮುದೇ ಮೇ ಸದಾ ಷಣ್ಮುಖೋಽಸ್ತು ॥ 6॥
ಮಹಾಮ್ಭೋಧಿತೀರೇ ಮಹಾಪಾಪಚೋರೇ
ಮುನೀನ್ದ್ರಾನುಕೂಲೇ ಸುಗನ್ಧಾಖ್ಯಶೈಲೇ ।
ಗುಹಾಯಾಂ ವಸನ್ತಂ ಸ್ವಭಾಸಾ ಲಸನ್ತಂ
ಜನಾರ್ತಿಂ ಹರನ್ತಂ ಶ್ರಯಾಮೋ ಗುಹಂ ತಮ್ ॥ 7॥
ಲಸತ್ಸ್ವರ್ಣಗೇಹೇ ನೃಣಾಂ ಕಾಮದೋಹೇ
ಸುಮಸ್ತೋಮಸಂಛನ್ನಮಾಣಿಕ್ಯಮಂಚೇ ।
ಸಮುದ್ಯತ್ಸಹಸ್ರಾರ್ಕತುಲ್ಯಪ್ರಕಾಶಂ
ಸದಾ ಭಾವಯೇ ಕಾರ್ತಿಕೇಯಂ ಸುರೇಶಮ್ ॥ 8॥
ರಣದ್ಧಂಸಕೇ ಮಂಜುಲೇಽತ್ಯನ್ತಶೋಣೇ
ಮನೋಹಾರಿಲಾವಣ್ಯಪೀಯೂಷಪೂರ್ಣೇ ।
ಮನಃಷಟ್ಪದೋ ಮೇ ಭವಕ್ಲೇಶತಪ್ತಃ
ಸದಾ ಮೋದತಾಂ ಸ್ಕನ್ದ ತೇ ಪಾದಪದ್ಮೇ ॥ 9॥
ಸುವರ್ಣಾಭದಿವ್ಯಾಮ್ಬರೈರ್ಭಾಸಮಾನಾಂ
ಕ್ವಣತ್ಕಿಂಕಿಣೀಮೇಖಲಾಶೋಭಮಾನಾಮ್ ।
ಲಸದ್ಧೇಮಪಟ್ಟೇನ ವಿದ್ಯೋತಮಾನಾಂ
ಕಟಿಂ ಭಾವಯೇ ಸ್ಕನ್ದ ತೇ ದೀಪ್ಯಮಾನಾಮ್ ॥ 10 ॥
ಪುಲಿನ್ದೇಶಕನ್ಯಾಘನಾಭೋಗತುಂಗ-
ಸ್ತನಾಲಿಂಗನಾಸಕ್ತಕಾಶ್ಮೀರರಾಗಮ್ ।
ನಮಸ್ಯಾಮಹಂ ತಾರಕಾರೇ ತವೋರಃ
ಸ್ವಭಕ್ತಾವನೇ ಸರ್ವದಾ ಸಾನುರಾಗಮ್ ॥ 11॥
ವಿಧೌ ಕೢಪ್ತದಂಡಾನ್ ಸ್ವಲೀಲಾಧೃತಾಂಡಾ-
ನ್ನಿರಸ್ತೇಭಶುಂಡಾನ್ ದ್ವಿಷತ್ಕಾಲದಂಡಾನ್ ।
ಹತೇನ್ದ್ರಾರಿಷಂಡಾಂಜಗತ್ರಾಣಶೌಂಡಾನ್
ಸದಾ ತೇ ಪ್ರಚಂಡಾನ್ ಶ್ರಯೇ ಬಾಹುದಂಡಾನ್ ॥ 12॥
ಸದಾ ಶಾರದಾಃ ಷಣ್ಮೃಗಾಂಕಾ ಯದಿ ಸ್ಯುಃ
ಸಮುದ್ಯನ್ತ ಏವ ಸ್ಥಿತಾಶ್ಚೇತ್ಸಮನ್ತಾತ್ ।
ಸದಾ ಪೂರ್ಣಬಿಮ್ಬಾಃ ಕಲಂಕೈಶ್ಚ ಹೀನಾ-
ಸ್ತದಾ ತ್ವನ್ಮುಖಾನಾಂ ಬ್ರುವೇ ಸ್ಕನ್ದ ಸಾಮ್ಯಮ್ ॥ 13॥
ಸ್ಫುರನ್ಮನ್ದಹಾಸೈಃ ಸಹಂಸಾನಿ ಚಂಚ-
ತ್ಕಟಾಕ್ಷಾವಲೀಭೃಂಗಸಂಘೋಜ್ಜ್ವಲಾನಿ ।
ಸುಧಾಸ್ಯನ್ದಿಬಿಮ್ಬಾಧರಾಣೀಶಸೂನೋ
ತವಾಲೋಕಯೇ ಷಣ್ಮುಖಾಮ್ಭೋರುಹಾಣಿ ॥ 14॥
ವಿಶಾಲೇಷು ಕರ್ಣಾನ್ತದೀರ್ಘೇಷ್ವಜಸ್ರಂ
ದಯಾಸ್ಯನ್ದಿಷು ದ್ವಾದಶಸ್ವೀಕ್ಷಣೇಷು ।
ಮಯೀಷತ್ಕಟಾಕ್ಷಃ ಸಕೃತ್ಪಾತಿತಶ್ಚೇ-
ದ್ಭವೇತ್ತೇ ದಯಾಶೀಲ ಕಾ ನಾಮ ಹಾನಿಃ ॥ 15॥
ಸುತಾಂಗೋದ್ಭವೋ ಮೇಽಸಿ ಜೀವೇತಿ ಷಡ್ಧಾ
ಜಪನ್ಮನ್ತ್ರಮೀಶೋ ಮುದಾ ಜಿಘ್ರತೇ ಯಾನ್ ।
ಜಗದ್ಭಾರಭೃದ್ಭ್ಯೋ ಜಗನ್ನಾಥ ತೇಭ್ಯಃ
ಕಿರೀಟೋಜ್ಜ್ವಲೇಭ್ಯೋ ನಮೋ ಮಸ್ತಕೇಭ್ಯಃ ॥ 16॥
ಸ್ಫುರದ್ರತ್ನಕೇಯೂರಹಾರಾಭಿರಾಮ-
ಶ್ಚಲತ್ಕುಂಡಲಶ್ರೀಲಸದ್ಗಂಡಭಾಗಃ ।
ಕಟೌ ಪೀತವಾಸಾಃ ಕರೇ ಚಾರುಶಕ್ತಿಃ
ಪುರಸ್ತಾನ್ಮಮಾಸ್ತಾಂ ಪುರಾರೇಸ್ತನೂಜಃ ॥ 17॥
ಇಹಾಯಾಹಿ ವತ್ಸೇತಿ ಹಸ್ತಾನ್ಪ್ರಸಾರ್ಯಾ-
ಹ್ವಯತ್ಯಾದರಾಚ್ಛಂಕರೇ ಮಾತುರಂಕಾತ್ ।
ಸಮುತ್ಪತ್ಯ ತಾತಂ ಶ್ರಯನ್ತಂ ಕುಮಾರಂ
ಹರಾಶ್ಲಿಷ್ಟಗಾತ್ರಂ ಭಜೇ ಬಾಲಮೂರ್ತಿಮ್ ॥ 18॥
ಕುಮಾರೇಶಸೂನೋ ಗುಹ ಸ್ಕನ್ದ ಸೇನಾ-
ಪತೇ ಶಕ್ತಿಪಾಣೇ ಮಯೂರಾಧಿರೂಢ ।
ಪುಲಿನ್ದಾತ್ಮಜಾಕಾನ್ತ ಭಕ್ತಾರ್ತಿಹಾರಿನ್
ಪ್ರಭೋ ತಾರಕಾರೇ ಸದಾ ರಕ್ಷ ಮಾಂ ತ್ವಮ್ ॥ 19 ॥
ಪ್ರಶಾನ್ತೇನ್ದ್ರಿಯೇ ನಷ್ಟಸಂಜ್ಞೇ ವಿಚೇಷ್ಟೇ
ಕಫೋದ್ಗಾರಿವಕ್ತ್ರೇ ಭಯೋತ್ಕಮ್ಪಿಗಾತ್ರೇ ।
ಪ್ರಯಾಣೋನ್ಮುಖೇ ಮಯ್ಯನಾಥೇ ತದಾನೀಂ
ದ್ರುತಂ ಮೇ ದಯಾಲೋ ಭವಾಗ್ರೇ ಗುಹ ತ್ವಮ್ ॥ 20॥
ಕೃತಾನ್ತಸ್ಯ ದೂತೇಷು ಚಂಡೇಷು ಕೋಪಾ-
ದ್ದಹ ಚ್ಛಿನ್ದ್ಧಿ ಭಿನ್ದ್ಧೀತಿ ಮಾಂ ತರ್ಜಯತ್ಸು ।
ಮಯೂರಂ ಸಮಾರುಹ್ಯ ಮಾ ಭೈರಿತಿ ತ್ವಂ
ಪುರಃ ಶಕ್ತಿಪಾಣಿರ್ಮಮಾಯಾಹಿ ಶೀಘ್ರಮ್ ॥ 21॥
ಪ್ರಣಮ್ಯಾಸಕೃತ್ಪಾದಯೋಸ್ತೇ ಪತಿತ್ವಾ
ಪ್ರಸಾದ್ಯ ಪ್ರಭೋ ಪ್ರಾರ್ಥಯೇಽನೇಕವಾರಮ್ ।
ನ ವಕ್ತುಂ ಕ್ಷಮೋಽಹಂ ತದಾನೀಂ ಕೃಪಾಬ್ಧೇ
ನ ಕಾರ್ಯಾನ್ತಕಾಲೇ ಮನಾಗಪ್ಯುಪೇಕ್ಷಾ ॥ 22॥
ಸಹಸ್ರಾಂಡಭೋಕ್ತಾ ತ್ವಯಾ ಶೂರನಾಮಾ
ಹತಸ್ತಾರಕಃ ಸಿಂಹವಕ್ತ್ರಶ್ಚ ದೈತ್ಯಃ ।
ಮಮಾನ್ತರ್ಹೃದಿಸ್ಥಂ ಮನಃಕ್ಲೇಶಮೇಕಂ
ನ ಹಂಸಿ ಪ್ರಭೋ ಕಿಂ ಕರೋಮಿ ಕ್ವ ಯಾಮಿ ॥ 23 ॥
ಅಹಂ ಸರ್ವದಾ ದುಃಖಭಾರಾವಸನ್ನೋ
ಭವಾನ್ದೀನಬನ್ಧುಸ್ತ್ವದನ್ಯಂ ನ ಯಾಚೇ ।
ಭವದ್ಭಕ್ತಿರೋಧಂ ಸದಾ ಕೢಪ್ತಬಾಧಂ
ಮಮಾಧಿಂ ದ್ರುತಂ ನಾಶಯೋಮಾಸುತ ತ್ವಮ್ ॥ 24 ॥
ಅಪಸ್ಮಾರಕುಷ್ಠಕ್ಷಯಾರ್ಶಃ ಪ್ರಮೇಹ-
ಜ್ವರೋನ್ಮಾದಗುಲ್ಮಾದಿರೋಗಾ ಮಹಾನ್ತಃ ।
ಪಿಶಾಚಾಶ್ಚ ಸರ್ವೇ ಭವತ್ಪತ್ರಭೂತಿಂ
ವಿಲೋಕ್ಯ ಕ್ಷಣಾತ್ತಾರಕಾರೇ ದ್ರವನ್ತೇ ॥ 25॥
ದೃಶಿ ಸ್ಕನ್ದಮೂರ್ತಿಃ ಶ್ರುತೌ ಸ್ಕನ್ದಕೀರ್ತಿ-
ರ್ಮುಖೇ ಮೇ ಪವಿತ್ರಂ ಸದಾ ತಚ್ಚರಿತ್ರಮ್ ।
ಕರೇ ತಸ್ಯ ಕೃತ್ಯಂ ವಪುಸ್ತಸ್ಯ ಭೃತ್ಯಂ
ಗುಹೇ ಸನ್ತು ಲೀನಾ ಮಮಾಶೇಷಭಾವಾಃ ॥ 26॥
ಮುನೀನಾಮುತಾಹೋ ನೃಣಾಂ ಭಕ್ತಿಭಾಜಾ-
ಮಭೀಷ್ಟಪ್ರದಾಃ ಸನ್ತಿ ಸರ್ವತ್ರ ದೇವಾಃ ।
ನೃಣಾಮನ್ತ್ಯಜಾನಾಮಪಿ ಸ್ವಾರ್ಥದಾನೇ
ಗುಹಾದ್ದೇವಮನ್ಯಂ ನ ಜಾನೇ ನ ಜಾನೇ ॥ 27॥
ಕಲತ್ರಂ ಸುತಾ ಬನ್ಧುವರ್ಗಃ ಪಶುರ್ವಾ
ನರೋ ವಾಥ ನಾರಿ ಗೃಹೇ ಯೇ ಮದೀಯಾಃ ।
ಯಜನ್ತೋ ನಮನ್ತಃ ಸ್ತುವನ್ತೋ ಭವನ್ತಂ
ಸ್ಮರನ್ತಶ್ಚ ತೇ ಸನ್ತು ಸರ್ವೇ ಕುಮಾರ ॥ 28॥
ಮೃಗಾಃ ಪಕ್ಷಿಣೋ ದಂಶಕಾ ಯೇ ಚ ದುಷ್ಟಾ-
ಸ್ತಥಾ ವ್ಯಾಧಯೋ ಬಾಧಕಾ ಯೇ ಮದಂಗೇ ।
ಭವಚ್ಛಕ್ತಿತೀಕ್ಷ್ಣಾಗ್ರಭಿನ್ನಾಃ ಸುದೂರೇ
ವಿನಶ್ಯನ್ತು ತೇ ಚೂರ್ಣಿತಕ್ರೌಂಜಶೈಲ ॥ 29॥
ಜನಿತ್ರೀ ಪಿತಾ ಚ ಸ್ವಪುತ್ರಾಪರಾಧಂ
ಸಹೇತೇ ನ ಕಿಂ ದೇವಸೇನಾಧಿನಾಥ ।
ಅಹಂ ಚಾತಿಬಾಲೋ ಭವಾನ್ ಲೋಕತಾತಃ
ಕ್ಷಮಸ್ವಾಪರಾಧಂ ಸಮಸ್ತಂ ಮಹೇಶ ॥ 30॥
ನಮಃ ಕೇಕಿನೇ ಶಕ್ತಯೇ ಚಾಪಿ ತುಭ್ಯಂ
ನಮಶ್ಛಾಗ ತುಭ್ಯಂ ನಮಃ ಕುಕ್ಕುಟಾಯ ।
ನಮಃ ಸಿನ್ಧವೇ ಸಿನ್ಧುದೇಶಾಯ ತುಭ್ಯಂ
ಪುನಃ ಸ್ಕನ್ದಮೂರ್ತೇ ನಮಸ್ತೇ ನಮೋಽಸ್ತು ॥ 31॥
ಜಯಾನನ್ದಭೂಮಂಜಯಾಪಾರಧಾಮ-
ಂಜಯಾಮೋಘಕೀರ್ತೇ ಜಯಾನನ್ದಮೂರ್ತೇ ।
ಜಯಾನನ್ದಸಿನ್ಧೋ ಜಯಾಶೇಷಬನ್ಧೋ
ಜಯ ತ್ವಂ ಸದಾ ಮುಕ್ತಿದಾನೇಶಸೂನೋ ॥ 32॥
ಭುಜಂಗಾಖ್ಯವೃತ್ತೇನ ಕೢಪ್ತಂ ಸ್ತವಂ ಯಃ
ಪಠೇದ್ಭಕ್ತಿಯುಕ್ತೋ ಗುಹಂ ಸಮ್ಪ್ರಣಮ್ಯ ।
ಸುಪುತ್ರಾನ್ಕಲತ್ರಂ ಧನಂ ದೀರ್ಘಮಾಯು-
ರ್ಲಭೇತ್ಸ್ಕನ್ದಸಾಯುಜ್ಯಮನ್ತೇ ನರಃ ಸಃ ॥ 33॥
॥ ಇತಿ ಶ್ರೀಮಚ್ಛಂಕರಭಗವತಃ ಕೃತೌ
ಶ್ರೀಸುಬ್ರಹ್ಮಣ್ಯಭುಜಂಗಂ ಸಮ್ಪೂರ್ಣಮ್ ॥
**********
**********
No comments:
Post a Comment