ಯಮುನಾಷ್ಟಕಮ್ 1
ಮುರಾರಿಕಾಯಕಾಲಿಮಾಲಲಾಮವಾರಿಧಾರಿಣೀ
ತೃಣೀಕೃತತ್ರಿವಿಷ್ಟಪಾ ತ್ರಿಲೋಕಶೋಕಹಾರಿಣೀ ।
ಮನೋಽನುಕೂಲಕೂಲಕುಂಜಪುಂಜಧೂತದುರ್ಮದಾ
ಧುನೋತು ನೋ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 1॥
ಮಲಾಪಹಾರಿವಾರಿಪೂರಿಭೂರಿಮಂಡಿತಾಮೃತಾ
ಭೃಶಂ ಪ್ರವಾತಕಪ್ರಪಂಚನಾತಿಪಂಡಿತಾನಿಶಾ ।
ಸುನನ್ದನನ್ದಿನಾಂಗಸಂಗರಾಗರಂಜಿತಾ ಹಿತಾ
ಧುನೋತು ನೋ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 2॥
ಲಸತ್ತರಂಗಸಂಗಧೂತಭೂತಜಾತಪಾತಕಾ
ನವೀನಮಾಧುರೀಧುರೀಣಭಕ್ತಿಜಾತಚಾತಕಾ ।
ತಟಾನ್ತವಾಸದಾಸಹಂಸಸಂಸೃತಾಹ್ನಿಕಾಮದಾ
var1 ಸಂಸೃತಾ ಹಿ ಕಾಮದಾ var2 ಸಂವೃತಾಹ್ನಿಕಾಮದಾ
ಧುನೋತು ನೋ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 3॥
ವಿಹಾರರಾಸಸ್ವೇದಭೇದಧೀರತೀರಮಾರುತಾ
ಗತಾ ಗಿರಾಮಗೋಚರೇ ಯದೀಯನೀರಚಾರುತಾ ।
ಪ್ರವಾಹಸಾಹಚರ್ಯಪೂತಮೇದಿನೀನದೀನದಾ
ಧುನೋತು ನೋ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 4॥
ತರಂಗಸಂಗಸೈಕತಾನ್ತರಾತಿತಂ ಸದಾಸಿತಾ
ಶರನ್ನಿಶಾಕರಾಂಶುಮಂಜುಮಂಜರೀ ಸಭಾಜಿತಾ ।
ಭವಾರ್ಚನಾಪ್ರಚಾರುಣಾಮ್ಬುನಾಧುನಾ ವಿಶಾರದಾ
ಧುನೋತು ನೋ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 5॥
ಜಲಾನ್ತಕೇಲಿಕಾರಿಚಾರುರಾಧಿಕಾಂಗರಾಗಿಣೀ
ಸ್ವಭರ್ತುರನ್ಯದುರ್ಲಭಾಂಗತಾಂಗತಾಂಶಭಾಗಿನೀ ।
ಸ್ವದತ್ತಸುಪ್ತಸಪ್ತಸಿನ್ಧುಭೇದಿನಾತಿಕೋವಿದಾ
ಧುನೋತು ನೋ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 6॥
ಜಲಚ್ಯುತಾಚ್ಯುತಾಂಗರಾಗಲಮ್ಪಟಾಲಿಶಾಲಿನೀ
ವಿಲೋಲರಾಧಿಕಾಕಚಾನ್ತಚಮ್ಪಕಾಲಿಮಾಲಿನೀ ।
ಸದಾವಗಾಹನಾವತೀರ್ಣಭರ್ತೃಭೃತ್ಯನಾರದಾ
ಧುನೋತು ನೋ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 7॥
ಸದೈವ ನನ್ದಿನನ್ದಕೇಲಿಶಾಲಿಕುಂಜಮಂಜುಲಾ
ತಟೋತ್ಥಫುಲ್ಲಮಲ್ಲಿಕಾಕದಮ್ಬರೇಣುಸೂಜ್ಜ್ವಲಾ ।
ಜಲಾವಗಾಹಿನಾಂ ನೃಣಾಂ ಭವಾಬ್ಧಿಸಿನ್ಧುಪಾರದಾ
ಧುನೋತು ನೋ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 8॥
ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ
ಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ
ಶ್ರೀಮಚ್ಛಂಕರಭಗವತಃ ಕೃತೌ
ಯಮುನಾಷ್ಟಕಮ್ ಸಮ್ಪೂರ್ಣಮ್ ॥
ಯಮುನಾಷ್ಟಕಮ್ 2
ಕೃಪಾಪಾರಾವಾರಾಂ ತಪನತನಯಾಂ ತಾಪಶಮನೀಂ
ಮುರಾರಿಪ್ರೇಯಸ್ಯಾಂ ಭವಭಯದವಾಂ ಭಕ್ತಿವರದಾಮ್ ।
ವಿಯಜ್ಜ್ವಾಲೋನ್ಮುಕ್ತಾಂ ಶ್ರಿಯಮಪಿ ಸುಖಾಪ್ತೇಃ ಪರಿದಿನಂ
ಸದಾ ಧೀರೋ ನೂನಂ ಭಜತಿ ಯಮುನಾಂ ನಿತ್ಯಫಲದಾಮ್ ॥ 1॥
ಮಧುವನಚಾರಿಣಿ ಭಾಸ್ಕರವಾಹಿನಿ ಜಾಹ್ನವಿಸಂಗಿನಿ ಸಿನ್ಧುಸುತೇ
ಮಧುರಿಪುಭೂಷಣಿ ಮಾಧವತೋಷಿಣಿ ಗೋಕುಲಭೀತಿವಿನಾಶಕೃತೇ ।
ಜಗದಘಮೋಚಿನಿ ಮಾನಸದಾಯಿನಿ ಕೇಶವಕೇಲಿನಿದಾನಗತೇ
ಜಯ ಯಮುನೇ ಜಯ ಭೀತಿನಿವಾರಿಣಿ ಸಂಕಟನಾಶಿನಿ ಪಾವಯ ಮಾಮ್ ॥ 2॥
ಅಯಿ ಮಧುರೇ ಮಧುಮೋದವಿಲಾಸಿನಿ ಶೈಲವಿದಾರಿಣಿ ವೇಗಪರೇ
ಪರಿಜನಪಾಲಿನಿ ದುಷ್ಟನಿಷೂದಿನಿ ವಾಂಛಿತಕಾಮವಿಲಾಸಧರೇ ।
ವ್ರಜಪುರವಾಸಿಜನಾರ್ಜಿತಪಾತಕಹಾರಿಣಿ ವಿಶ್ವಜನೋದ್ಧರಿಕೇ
ಜಯ ಯಮುನೇ ಜಯ ಭೀತಿನಿವಾರಿಣಿ ಸಂಕಟನಾಶಿನಿ ಪಾವಯ ಮಾಮ್ ॥ 3॥
ಅತಿವಿಪದಮ್ಬುಧಿಮಗ್ನಜನಂ ಭವತಾಪಶತಾಕುಲಮಾನಸಕಂ
ಗತಿಮತಿಹೀನಮಶೇಷಭಯಾಕುಲಮಾಗತಪಾದಸರೋಜಯುಗಮ್ ।
ಋಣಭಯಭೀತಿಮನಿಷ್ಕೃತಿಪಾತಕಕೋಟಿಶತಾಯುತಪುಂಜತರಂ
ಜಯ ಯಮುನೇ ಜಯ ಭೀತಿನಿವಾರಿಣಿ ಸಂಕಟನಾಶಿನಿ ಪಾವಯ ಮಾಮ್ ॥ 4॥
ನವಜಲದದ್ಯುತಿಕೋಟಿಲಸತ್ತನುಹೇಮಭಯಾಭರರಂಜಿತಕೇ
ತಡಿದವಹೇಲಿಪದಾಂಚಲಚಂಚಲಶೋಭಿತಪೀತಸುಚೇಲಧರೇ ।
ಮಣಿಮಯಭೂಷಣಚಿತ್ರಪಟಾಸನರಂಜಿತಗಂಜಿತಭಾನುಕರೇ
ಜಯ ಯಮುನೇ ಜಯ ಭೀತಿನಿವಾರಿಣಿ ಸಂಕಟನಾಶಿನಿ ಪಾವಯ ಮಾಮ್ ॥ 5॥
ಶುಭಪುಲಿನೇ ಮಧುಮತ್ತಯದೂದ್ಭವರಾಸಮಹೋತ್ಸವಕೇಲಿಭರೇ
ಉಚ್ಚಕುಲಾಚಲರಾಜಿತಮೌಕ್ತಿಕಹಾರಮಯಾಭರರೋದಸಿಕೇ ।
ನವಮಣಿಕೋಟಿಕಭಾಸ್ಕರಕಂಚುಕಿಶೋಭಿತತಾರಕಹಾರಯುತೇ
ಜಯ ಯಮುನೇ ಜಯ ಭೀತಿನಿವಾರಿಣಿ ಸಂಕಟನಾಶಿನಿ ಪಾವಯ ಮಾಮ್ ॥ 6॥
ಕರಿವರಮೌಕ್ತಿಕನಾಸಿಕಭೂಷಣವಾತಚಮತ್ಕೃತಚಂಚಲಕೇ
ಮುಖಕಮಲಾಮಲಸೌರಭಚಂಚಲಮತ್ತಮಧುವ್ರತಲೋಚನಿಕೇ ।
ಮಣಿಗಣಕುಂಡಲಲೋಲಪರಿಸ್ಫುರದಾಕುಲಗಂಡಯುಗಾಮಲಕೇ
ಜಯ ಯಮುನೇ ಜಯ ಭೀತಿನಿವಾರಿಣಿ ಸಂಕಟನಾಶಿನಿ ಪಾವಯ ಮಾಮ್ ॥ 7॥
ಕಲರವನೂಪುರಹೇಮಮಯಾಚಿತಪಾದಸರೋರುಹಸಾರುಣಿಕೇ
ಧಿಮಿಧಿಮಿಧಿಮಿಧಿಮಿತಾಲವಿನೋದಿತಮಾನಸಮಂಜುಲಪಾದಗತೇ ।
ತವ ಪದಪಂಕಜಮಾಶ್ರಿತಮಾನವಚಿತ್ತಸದಾಖಿಲತಾಪಹರೇ
ಜಯ ಯಮುನೇ ಜಯ ಭೀತಿನಿವಾರಿಣಿ ಸಂಕಟನಾಶಿನಿ ಪಾವಯ ಮಾಮ್ ॥ 8॥
ಭವೋತ್ತಾಪಾಮ್ಭೋಧೌ ನಿಪತಿತಜನೋ ದುರ್ಗತಿಯುತೋ
ಯದಿ ಸ್ತೌತಿ ಪ್ರಾತಃ ಪ್ರತಿದಿನಮನ್ಯಾಶ್ರಯತಯಾ ।
ಹಯಾಹ್ರೇಷೈಃ ಕಾಮಂ ಕರಕುಸುಮಪುಂಜೈ ರವಿಸುತಾಂ
ಸದಾ ಭೋಕ್ತಾ ಭೋಗಾನ್ಮರಣಸಮಯೇ ಯಾತಿ ಹರಿತಾಮ್ ॥ 9॥
ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ
ಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ
ಶ್ರೀಮಚ್ಛಂಕರಭಗವತಃ ಕೃತೌ
ಯಮುನಾಷ್ಟಕಮ್ ಸಮ್ಪೂರ್ಣಮ್ ॥
*************
यमुनाष्टकम् १
मुरारिकायकालिमाललामवारिधारिणी
तृणीकृतत्रिविष्टपा त्रिलोकशोकहारिणी ।
मनोऽनुकूलकूलकुञ्जपुञ्जधूतदुर्मदा
धुनोतु नो मनोमलं कलिन्दनन्दिनी सदा ॥ १॥
मलापहारिवारिपूरिभूरिमण्डितामृता
भृशं प्रवातकप्रपञ्चनातिपण्डितानिशा ।
सुनन्दनन्दिनाङ्गसङ्गरागरञ्जिता हिता
धुनोतु नो मनोमलं कलिन्दनन्दिनी सदा ॥ २॥
लसत्तरङ्गसङ्गधूतभूतजातपातका
नवीनमाधुरीधुरीणभक्तिजातचातका ।
तटान्तवासदासहंससंसृताह्निकामदा
var1 संसृता हि कामदा var2 संवृताह्निकामदा
धुनोतु नो मनोमलं कलिन्दनन्दिनी सदा ॥ ३॥
विहाररासस्वेदभेदधीरतीरमारुता
गता गिरामगोचरे यदीयनीरचारुता ।
प्रवाहसाहचर्यपूतमेदिनीनदीनदा
धुनोतु नो मनोमलं कलिन्दनन्दिनी सदा ॥ ४॥
तरङ्गसङ्गसैकतान्तरातितं सदासिता
शरन्निशाकरांशुमञ्जुमञ्जरी सभाजिता ।
भवार्चनाप्रचारुणाम्बुनाधुना विशारदा
धुनोतु नो मनोमलं कलिन्दनन्दिनी सदा ॥ ५॥
जलान्तकेलिकारिचारुराधिकाङ्गरागिणी
स्वभर्तुरन्यदुर्लभाङ्गताङ्गतांशभागिनी ।
स्वदत्तसुप्तसप्तसिन्धुभेदिनातिकोविदा
धुनोतु नो मनोमलं कलिन्दनन्दिनी सदा ॥ ६॥
जलच्युताच्युताङ्गरागलम्पटालिशालिनी
विलोलराधिकाकचान्तचम्पकालिमालिनी ।
सदावगाहनावतीर्णभर्तृभृत्यनारदा
धुनोतु नो मनोमलं कलिन्दनन्दिनी सदा ॥ ७॥
सदैव नन्दिनन्दकेलिशालिकुञ्जमञ्जुला
तटोत्थफुल्लमल्लिकाकदम्बरेणुसूज्ज्वला ।
जलावगाहिनां नृणां भवाब्धिसिन्धुपारदा
धुनोतु नो मनोमलं कलिन्दनन्दिनी सदा ॥ ८॥
इति श्रीमत्परमहंसपरिव्राजकाचार्यस्य
श्रीगोविन्दभगवत्पूज्यपादशिष्यस्य
श्रीमच्छंकरभगवतः कृतौ
यमुनाष्टकम् सम्पूर्णम् ॥
यमुनाष्टकम् २
कृपापारावारां तपनतनयां तापशमनीं
मुरारिप्रेयस्यां भवभयदवां भक्तिवरदाम् ।
वियज्ज्वालोन्मुक्तां श्रियमपि सुखाप्तेः परिदिनं
सदा धीरो नूनं भजति यमुनां नित्यफलदाम् ॥ १॥
मधुवनचारिणि भास्करवाहिनि जाह्नविसङ्गिनि सिन्धुसुते
मधुरिपुभूषणि माधवतोषिणि गोकुलभीतिविनाशकृते ।
जगदघमोचिनि मानसदायिनि केशवकेलिनिदानगते
जय यमुने जय भीतिनिवारिणि संकटनाशिनि पावय माम् ॥ २॥
अयि मधुरे मधुमोदविलासिनि शैलविदारिणि वेगपरे
परिजनपालिनि दुष्टनिषूदिनि वाञ्छितकामविलासधरे ।
व्रजपुरवासिजनार्जितपातकहारिणि विश्वजनोद्धरिके
जय यमुने जय भीतिनिवारिणि संकटनाशिनि पावय माम् ॥ ३॥
अतिविपदम्बुधिमग्नजनं भवतापशताकुलमानसकं
गतिमतिहीनमशेषभयाकुलमागतपादसरोजयुगम् ।
ऋणभयभीतिमनिष्कृतिपातककोटिशतायुतपुञ्जतरं
जय यमुने जय भीतिनिवारिणि संकटनाशिनि पावय माम् ॥ ४॥
नवजलदद्युतिकोटिलसत्तनुहेमभयाभररञ्जितके
तडिदवहेलिपदाञ्चलचञ्चलशोभितपीतसुचेलधरे ।
मणिमयभूषणचित्रपटासनरञ्जितगञ्जितभानुकरे
जय यमुने जय भीतिनिवारिणि संकटनाशिनि पावय माम् ॥ ५॥
शुभपुलिने मधुमत्तयदूद्भवरासमहोत्सवकेलिभरे
उच्चकुलाचलराजितमौक्तिकहारमयाभररोदसिके ।
नवमणिकोटिकभास्करकञ्चुकिशोभिततारकहारयुते
जय यमुने जय भीतिनिवारिणि संकटनाशिनि पावय माम् ॥ ६॥
करिवरमौक्तिकनासिकभूषणवातचमत्कृतचञ्चलके
मुखकमलामलसौरभचञ्चलमत्तमधुव्रतलोचनिके ।
मणिगणकुण्डललोलपरिस्फुरदाकुलगण्डयुगामलके
जय यमुने जय भीतिनिवारिणि संकटनाशिनि पावय माम् ॥ ७॥
कलरवनूपुरहेममयाचितपादसरोरुहसारुणिके
धिमिधिमिधिमिधिमितालविनोदितमानसमञ्जुलपादगते ।
तव पदपङ्कजमाश्रितमानवचित्तसदाखिलतापहरे
जय यमुने जय भीतिनिवारिणि संकटनाशिनि पावय माम् ॥ ८॥
भवोत्तापाम्भोधौ निपतितजनो दुर्गतियुतो
यदि स्तौति प्रातः प्रतिदिनमन्याश्रयतया ।
हयाह्रेषैः कामं करकुसुमपुञ्जै रविसुतां
सदा भोक्ता भोगान्मरणसमये याति हरिताम् ॥ ९॥
इति श्रीमत्परमहंसपरिव्राजकाचार्यस्य
श्रीगोविन्दभगवत्पूज्यपादशिष्यस्य
श्रीमच्छंकरभगवतः कृतौ
यमुनाष्टकम् सम्पूर्णम् ॥
********
No comments:
Post a Comment