ಕುಂಡಿಕೋಪನಿಷತ್ कुण्डिकोपनिषत् kundika upanishad

ಕುಂಡಿಕೋಪನಿಷತ್ 
ಕುಂಡಿಕೋಪನಿಷತ್ಖ್ಯಾತಪರಿವ್ರಾಜಕಸಂತತಿಃ ।
ಯತ್ರ ವಿಶ್ರಾನ್ತಿಮಗಮತ್ತದ್ರಾಮಪದಮಾಶ್ರಯೇ ॥

ಓಂ ಆಪ್ಯಾಯನ್ತು ಮಮಾಂಗಾನಿ ವಾಕ್ಪ್ರಾಣಶ್ಚಕ್ಷುಃ
ಶ್ರೋತ್ರಮಥೋ ಬಲಮಿನ್ದ್ರಿಯಾಣಿ ಚ ॥ ಸರ್ವಾಣಿ ಸರ್ವಂ
ಬ್ರಹ್ಮೋಪನಿಷದಂ ಮಾಹಂ ಬ್ರಹ್ಮ ನಿರಾಕುರ್ಯಾಂ
ಮಾ ಮಾ ಬ್ರಹ್ಮ ನಿರಾಕರೋದನಿರಾಕರಣಮಸ್ತ್ವನಿರಾಕರಣಂ
ಮೇಸ್ತು ತದಾತ್ಮನಿ ನಿರತೇ ಯ ಉಪನಿಷತ್ಸು ಧರ್ಮಾಸ್ತೇ ಮಯಿ
ಸನ್ತು ತೇ ಮಯಿ ಸನ್ತು ॥ ಓಂ ಶಾನ್ತಿಃ ಶಾನ್ತಿಃ ಶಾನ್ತಿಃ ॥

ಹರಿಃ ಓಂ
ಬ್ರಹ್ಮಚರ್ಯಾಶ್ರಮೇ ಕ್ಷೀಣೇ ಗುರುಶುಶ್ರೂಷಣೇ  ರತಃ ।
ವೇದಾನಧೀತ್ಯಾನುಜ್ಞಾತ ಉಚ್ಯತೇ ಗುರುಣಾಶ್ರಮೀ ॥ 1॥

ದಾರಮಾಹೃತ್ಯ ಸದೃಶಮಗ್ನಿಮಾಧಾಯ ಶಕ್ತಿತಃ ।
ಬ್ರಾಹ್ಮೀಮಿಷ್ಟಿಂ ಯಜೇತ್ತಾಸಾಮಹೋರಾತ್ರೇಣ ನಿರ್ವಪೇತ್ ॥ 2॥

ಸಂವಿಭಜ್ಯ ಸುತಾನರ್ಥೇ ಗ್ರಾಮ್ಯಕಾಮಾನ್ವಿಸೃಜ್ಯ ಚ ।
ಸಂಚರನ್ವನಮಾರ್ಗೇಣ ಶುಚೌ ದೇಶೇ ಪರಿಭ್ರಮನ್ ॥ 3॥

ವಾಯುಭಕ್ಷೋಽಮ್ಬುಭಕ್ಷೋ ವಾ ವಿಹಿತೈಃ ಕನ್ದಮೂಲಕೈಃ ।
ಸ್ವಶರೀರೇ ಸಮಾಪ್ಯಾಥ ಪೃಥಿವ್ಯಾಂ ನಾಶ್ರು ಪಾತಯೇತ್ ॥ 4॥

ಸಹ ತೇನೈವ ಪುರುಷಃ ಕಥಂ ಸಂನ್ಯಸ್ತ ಉಚ್ಯತೇ ।
ಸನಾಮಧೇಯೋ ಯಸ್ಮಿಂಸ್ತು ಕಥಂ ಸಂನ್ಯಸ್ತ ಉಚ್ಯತೇ ॥ 5॥

ತಸ್ಮಾತ್ಫಲವಿಶುದ್ಧಾಂಗೀ ಸಂನ್ಯಾಸಂ ಸಂಹಿತಾತ್ಮನಾಮ್ ।
ಅಗ್ನಿವರ್ಣಂ ವಿನಿಷ್ಕ್ರಮ್ಯ ವಾನಪ್ರಸ್ಥಂ ಪ್ರಪದ್ಯತೇ ॥ 6॥

ಲೋಕವದ್ಭಾರ್ಯಯಾಸಕ್ತೋ ವನಂ ಗಚ್ಛತಿ ಸಂಯತಃ ।
ಸಂತ್ಯಕ್ತ್ವಾ ಸಂಸೃತಿಸುಖಮನುತಿಷ್ಠತಿ ಕಿಂ ಮುಧಾ ॥ 7॥

ಕಿಂವಾ ದುಃಖಮನುಸ್ಮೃತ್ಯ ಭೋಗಾಂಸ್ತ್ಯಜತಿ ಚೋಚ್ಛ್ರಿತಾನ್ ।
ಗರ್ಭವಾಸಭಯಾದ್ಭೀತಃ ಶೀತೋಷ್ಣಾಭ್ಯಾಂ ತಥೈವ ಚ ॥ 8॥

ಗುಹ್ಯಂ ಪ್ರವೇಷ್ಟುಮಿಚ್ಛಾಮಿ ಪರಂ ಪದಮನಾಮಯಮಿತಿ ।
ಸಂನ್ಯಸ್ಯಾಗ್ನಿಮಪುನರಾವರ್ತನಂ ಯನ್ಮೃತ್ಯುರ್ಜಾಯಮಾವಹಮಿತಿ ॥

ಅಥಾಧ್ಯಾತ್ಮಮನ್ತ್ರಾಂಜಪೇತ್ । ದೀಕ್ಷಾಮುಪೇಯಾತ್ಕಾಷಾಯವಾಸಾಃ ।
ಕಕ್ಷೋಪಸ್ಥಲೋಮಾನಿ ವರ್ಜಯೇತ್ । ಊರ್ಧ್ವಬಾಹುರ್ವಿಮುಕ್ತಮಾರ್ಗೋ ಭವತಿ ।
ಅನಿಕೇತಶ್ಚರೇಭಿಕ್ಷಾಶೀ । ನಿದಿಧ್ಯಾಸನಂ ದಧ್ಯಾತ್ । ಪವಿತ್ರಂ
ಧಾರಯೇಜ್ಜನ್ತುಸಂರಕ್ಷಣಾರ್ಥಮ್ । ತದಪಿ ಶ್ಲೋಕಾ ಭವನ್ತಿ ।
ಕುಂಡಿಕಾಂ ಚಮಕಂ ಶಿಕ್ಯಂ ತ್ರಿವಿಷ್ಟಪಮುಪಾನಹೌ ।
ಶೀತೋಪಘಾತಿನೀಂ ಕನ್ಥಾಂ ಕೌಪೀನಾಚ್ಛಾದನಂ ತಥಾ ॥ 9॥

ಪವಿತ್ರಂ ಸ್ನಾನಶಾಟೀಂ ಚ ಉತ್ತರಾಸಂಗಮೇವ ಚ ।
ಅತೋಽತಿರಿಕ್ತಂ ಯತ್ಕಿಂಚಿತ್ಸರ್ವಂ ತದ್ವರ್ಜಯೇದ್ಯತಿಃ ॥ 10॥

ನದೀಪುಲಿನಶಾಯೀ ಸ್ಯಾದ್ದೇವಾಗಾರೇಷು ಬಾಹ್ಯತಃ ।
ನಾತ್ಯರ್ಥಂ ಸುಖದುಃಖಾಭ್ಯಾಂ ಶರೀರಮುಪತಾಪಯೇತ್ ॥ 11॥

ಸ್ನಾನಂ ಪಾನಂ ತಥಾ ಶೌಚಮದ್ಭಿಃ ಪೂತಾಭಿರಾಚಿರೇತ್ ।
ಸ್ತೂಯಮಾನೋ ನ ತುಷ್ಯೇತ ನಿನ್ದಿತೋ ನ ಶಪೇತ್ಪರಾನ್ ॥ 12॥

ಭಿಕ್ಷಾದಿವೈದಲಂ ಪಾತ್ರಂ ಸ್ನಾನದ್ರವ್ಯಮವಾರಿತಮ್ ।
ಏವಂ ವೃತ್ತಿಮುಪಾಸೀನೋ ಯತೇನ್ದ್ರಿಯೋ ಜಪೇತ್ಸದಾ ॥ 13॥

ವಿಶ್ವಾಯಮನುಸಂಯೋಗಂ ಮನಸಾ ಭಾವಯೇತ್ಸುಧೀಃ ।
ಆಕಾಶಾದ್ವಾಯುರ್ವಾಯೋರ್ಜ್ಯೋತಿರ್ಜ್ಯೋತಿಷ ಆಪೋಽದ್ಭ್ಯಃ ಪೃಥಿವೀ ।
ಏಷಾಂ ಭೂತಾನಾಂ ಬ್ರಹ್ಮ ಪ್ರಪದ್ಯೇ । ಅಜರಮಮರಮಕ್ಷರಮವ್ಯಯಂ ಪ್ರಪದ್ಯೇ ।
ಮಯ್ಯಖಂಡಸುಖಾಂಭೋಧೌ ಬಹುಧಾ ವಿಶ್ವವೀಚಯಃ ।
ಉತ್ಪದ್ಯನ್ತೇ ವಿಲೀಯನ್ತೇ ಮಾಯಾಮಾರುತವಿಭ್ರಮಾತ್ ॥ 14॥

ನ ಮೇ ದೇಹೇನ ಸಂಬನ್ಧೋ ಮೇಘೇನೇವ ವಿಹಾಯಸಃ ।
ಅತಃ ಕುತೋ ಮೇ ತದ್ಧರ್ಮಾ ಜಾಗ್ರತ್ಸ್ವಪ್ನಸುಷುಪ್ತಿಷು ॥ 15॥

ಆಕಾಶವತ್ಕಲ್ಪವಿದೂರಗೋಹ-
     ಮಾದಿತ್ಯವದ್ಭಾಸ್ಯವಿಲಕ್ಷಣೋಽಹಮ್ ।
ಅಹಾರ್ಯವನ್ನಿತ್ಯವಿನಿಶ್ಚಲೋಽಹ-
     ಮಮ್ಭೋಧಿವತ್ಪಾರವಿವರ್ಜಿತೋಽಹಮ್ ॥ 16॥

ನಾರಾಯಣೋಽಹಂ ನರಕಾನ್ತಕೋಽಹಂ
     ಪುರಾನ್ತಕೋಽಹಂ ಪುರುಷೋಽಹಮೀಶಃ ।
ಅಖಂಡಬೋಧೋಽಹಮಶೇಷಸಾಕ್ಷೀ
     ನಿರೀಶ್ವರೋಽಹಂ ನಿರಹಂ ಚ ನಿರ್ಮಮಃ ॥ 17॥

ತದಭ್ಯಾಸೇನ ಪ್ರಾಣಾಪಾನೌ ಸಂಯಮ್ಯ ತತ್ರ ಶ್ಲೋಕಾ ಭವನ್ತಿ ॥

ವೃಷಣಾಪಾನಯೋರ್ಮಧ್ಯೇ ಪಾಣೀ ಆಸ್ಥಾಯ ಸಂಶ್ರಯೇತ್ ।
ಸಂದಶ್ಯ ಶನಕೈರ್ಜಿಹ್ವಾಂ ಯವಮಾತ್ರೇ ವಿನಿರ್ಗತಾಮ್ ॥ 18॥

ಮಾಷಮಾತ್ರಾಂ ತಥಾ ದೃಷ್ಟಿಂ ಶ್ರೋತ್ರೇ ಸ್ಥಾಪ್ಯ ತಥಾ ಭುವಿ ।
ಶ್ರವಣೇ ನಾಸಿಕೇ ಗನ್ಧಾ ಯತಃ ಸ್ವಂ ನ ಚ ಸಂಶ್ರಯೇತ್ ॥ 19॥

ಅಥ ಶೈವಪದಂ ಯತ್ರ ತದ್ಬ್ರಹ್ಮ ಬ್ರಹ್ಮ ತತ್ಪರಮ್ ।
ತದಭ್ಯಾಸೇನ ಲಭ್ಯೇತ ಪೂರ್ವಜನ್ಮಾರ್ಜಿತಾತ್ಮನಾಮ್ ॥ 20॥

ಸಂಭೂತೈರ್ವಾಯುಸಂಶ್ರಾವೈರ್ಹೃದಯಂ ತಪ ಉಚ್ಯತೇ ।
ಊರ್ಧ್ವಂ ಪ್ರಪದ್ಯತೇ ದೇಹಾದ್ಭಿತ್ತ್ವಾ ಮೂರ್ಧಾನಮವ್ಯಯಮ್ ॥ 21॥

ಸ್ವದೇಹಸ್ಯ ತು ಮೂರ್ಧಾನಂ ಯೇ ಪ್ರಾಪ್ಯ ಪರಮಾಂ ಗತಿಮ್ ।
ಭೂಯಸ್ತೇ ನ ನಿವರ್ತನ್ತೇ ಪರಾವರವಿದೋ ಜನಾಃ ॥ 22॥

ನ ಸಾಕ್ಷಿಣಂ ಸಾಕ್ಷ್ಯಧರ್ಮಾಃ ಸಂಸ್ಪೃಶನ್ತಿ ವಿಲಕ್ಷಣಮ್ ।
ಅವಿಕಾರಮುದಾಸೀನಂ ಗೃಹಧರ್ಮಾಃ ಪ್ರದೀಪವತ್ ॥ 23॥

ಜಲೇ ವಾಪಿ ಸ್ಥಲೇ ವಾಪಿ ಲುಠತ್ವೇಷ ಜಡಾತ್ಮಕಃ ।
ನಾಹಂ ವಿಲಿಪ್ಯೇ ತದ್ಧರ್ಮೈರ್ಘಟಧರ್ಮೈರ್ನಭೋ ಯಥಾ ॥ 24॥

ನಿಷ್ಕ್ರಿಯೋಽಸ್ಮ್ಯವಿಕಾರೋಽಸ್ಮಿ ನಿಷ್ಕಲೋಽಸ್ಮಿ ನಿರಾಕೃತಿಃ ।
ನಿರ್ವಿಕಲ್ಪೋಽಸ್ಮಿ ನಿತ್ಯೋಽಸ್ಮಿ ನಿರಾಲಮ್ಬೋಽಸ್ಮಿ ನಿರ್ದ್ವಯಃ ॥ 25॥

ಸರ್ವಾತ್ಮಕೋಽಹಂ ಸರ್ವೋಽಹಂ ಸರ್ವಾತೀತೋಽಹಮದ್ವಯಃ ।
ಕೇವಲಾಖಂಡಬೋಧೋಽಹಂ ಸ್ವಾನನ್ದೋಽಹಂ ನಿರನ್ತರಃ ॥ 26॥

ಸ್ವಮೇವ ಸರ್ವತಃ ಪಶ್ಯನ್ಮನ್ಯಮಾನಃ ಸ್ವಮದ್ವಯಮ್ ।
ಸ್ವಾನನ್ದಮನುಭುಂಜಾನೋ ನಿರ್ವಿಕಲ್ಪೋ ಭವಾಮ್ಯಹಮ್ ॥ 27॥

ಗಚ್ಛಂಸ್ತಿಷ್ಠನ್ನುಪವಿಶಂಛಯಾನೋ ವಾನ್ಯಥಾಪಿ ವಾ ।
ಯಥೇಚ್ಛಯಾ ವಸೇದ್ವಿದ್ವಾನಾತ್ಮಾರಾಮಃ ಸದಾ ಮುನಿಃ ॥ 28॥ ಇತ್ಯುಪನಿಷತ್ ॥

ಓಂ ಆಪ್ಯಾಯನ್ತು ಮಮಾಂಗಾನಿ ವಾಕ್ಪ್ರಾಣಶ್ಚಕ್ಷುಃ
ಶ್ರೋತ್ರಮಥೋ ಬಲಮಿನ್ದ್ರಿಯಾಣಿ ಚ ॥ ಸರ್ವಾಣಿ ಸರ್ವಂ
ಬ್ರಹ್ಮೋಪನಿಷದಂ ಮಾಹಂ ಬ್ರಹ್ಮ ನಿರಾಕುರ್ಯಾಂ
ಮಾ ಮಾ ಬ್ರಹ್ಮ ನಿರಾಕರೋದನಿರಾಕರಣಮಸ್ತ್ವನಿರಾಕರಣಂ
ಮೇಸ್ತು ತದಾತ್ಮನಿ ನಿರತೇ ಯ ಉಪನಿಷತ್ಸು ಧರ್ಮಾಸ್ತೇ ಮಯಿ
ಸನ್ತು ತೇ ಮಯಿ ಸನ್ತು ॥ ಓಂ ಶಾನ್ತಿಃ ಶಾನ್ತಿಃ ಶಾನ್ತಿಃ ॥

ಹರಿಃ ಓಂ ತತ್ಸತ್ ॥

ಇತಿ ಕುಂಡಿಕೋಪನಿಷತ್ಸಮಾಪ್ತಾ ॥
************

Kundika Upanishad
 कुण्डिकोपनिषत् 
कुण्डिकोपनिषत्ख्यातपरिव्राजकसंततिः ।
यत्र विश्रान्तिमगमत्तद्रामपदमाश्रये ॥

ॐ आप्यायन्तु ममाङ्गानि वाक्प्राणश्चक्षुः
श्रोत्रमथो बलमिन्द्रियाणि च ॥ सर्वाणि सर्वं
ब्रह्मोपनिषदं माहं ब्रह्म निराकुर्यां
मा मा ब्रह्म निराकरोदनिराकरणमस्त्वनिराकरणं
मेस्तु तदात्मनि निरते य उपनिषत्सु धर्मास्ते मयि
सन्तु ते मयि सन्तु ॥ ॐ शान्तिः शान्तिः शान्तिः ॥

हरिः ॐ
ब्रह्मचर्याश्रमे क्षीणे गुरुशुश्रूषणे  रतः ।
वेदानधीत्यानुज्ञात उच्यते गुरुणाश्रमी ॥ १॥

दारमाहृत्य सदृशमग्निमाधाय शक्तितः ।
ब्राह्मीमिष्टिं यजेत्तासामहोरात्रेण निर्वपेत् ॥ २॥

संविभज्य सुतानर्थे ग्राम्यकामान्विसृज्य च ।
संचरन्वनमार्गेण शुचौ देशे परिभ्रमन् ॥ ३॥

वायुभक्षोऽम्बुभक्षो वा विहितैः कन्दमूलकैः ।
स्वशरीरे समाप्याथ पृथिव्यां नाश्रु पातयेत् ॥ ४॥

सह तेनैव पुरुषः कथं संन्यस्त उच्यते ।
सनामधेयो यस्मिंस्तु कथं संन्यस्त उच्यते ॥ ५॥

तस्मात्फलविशुद्धाङ्गी संन्यासं संहितात्मनाम् ।
अग्निवर्णं विनिष्क्रम्य वानप्रस्थं प्रपद्यते ॥ ६॥

लोकवद्भार्ययासक्तो वनं गच्छति संयतः ।
संत्यक्त्वा संसृतिसुखमनुतिष्ठति किं मुधा ॥ ७॥

किंवा दुःखमनुस्मृत्य भोगांस्त्यजति चोच्छ्रितान् ।
गर्भवासभयाद्भीतः शीतोष्णाभ्यां तथैव च ॥ ८॥

गुह्यं प्रवेष्टुमिच्छामि परं पदमनामयमिति ।
संन्यस्याग्निमपुनरावर्तनं यन्मृत्युर्जायमावहमिति ॥

अथाध्यात्ममन्त्राञ्जपेत् । दीक्षामुपेयात्काषायवासाः ।
कक्षोपस्थलोमानि वर्जयेत् । ऊर्ध्वबाहुर्विमुक्तमार्गो भवति ।
अनिकेतश्चरेभिक्षाशी । निदिध्यासनं दध्यात् । पवित्रं
धारयेज्जन्तुसंरक्षणार्थम् । तदपि श्लोका भवन्ति ।
कुण्डिकां चमकं शिक्यं त्रिविष्टपमुपानहौ ।
शीतोपघातिनीं कन्थां कौपीनाच्छादनं तथा ॥ ९॥

पवित्रं स्नानशाटीं च उत्तरासङ्गमेव च ।
अतोऽतिरिक्तं यत्किंचित्सर्वं तद्वर्जयेद्यतिः ॥ १०॥

नदीपुलिनशायी स्याद्देवागारेषु बाह्यतः ।
नात्यर्थं सुखदुःखाभ्यां शरीरमुपतापयेत् ॥ ११॥

स्नानं पानं तथा शौचमद्भिः पूताभिराचिरेत् ।
स्तूयमानो न तुष्येत निन्दितो न शपेत्परान् ॥ १२॥

भिक्षादिवैदलं पात्रं स्नानद्रव्यमवारितम् ।
एवं वृत्तिमुपासीनो यतेन्द्रियो जपेत्सदा ॥ १३॥

विश्वायमनुसंयोगं मनसा भावयेत्सुधीः ।
आकाशाद्वायुर्वायोर्ज्योतिर्ज्योतिष आपोऽद्भ्यः पृथिवी ।
एषां भूतानां ब्रह्म प्रपद्ये । अजरममरमक्षरमव्ययं प्रपद्ये ।
मय्यखण्डसुखांभोधौ बहुधा विश्ववीचयः ।
उत्पद्यन्ते विलीयन्ते मायामारुतविभ्रमात् ॥ १४॥

न मे देहेन संबन्धो मेघेनेव विहायसः ।
अतः कुतो मे तद्धर्मा जाग्रत्स्वप्नसुषुप्तिषु ॥ १५॥

आकाशवत्कल्पविदूरगोह-
     मादित्यवद्भास्यविलक्षणोऽहम् ।
अहार्यवन्नित्यविनिश्चलोऽह-
     मम्भोधिवत्पारविवर्जितोऽहम् ॥ १६॥

नारायणोऽहं नरकान्तकोऽहं
     पुरान्तकोऽहं पुरुषोऽहमीशः ।
अखण्डबोधोऽहमशेषसाक्षी
     निरीश्वरोऽहं निरहं च निर्ममः ॥ १७॥

तदभ्यासेन प्राणापानौ संयम्य तत्र श्लोका भवन्ति ॥

वृषणापानयोर्मध्ये पाणी आस्थाय संश्रयेत् ।
संदश्य शनकैर्जिह्वां यवमात्रे विनिर्गताम् ॥ १८॥

माषमात्रां तथा दृष्टिं श्रोत्रे स्थाप्य तथा भुवि ।
श्रवणे नासिके गन्धा यतः स्वं न च संश्रयेत् ॥ १९॥

अथ शैवपदं यत्र तद्ब्रह्म ब्रह्म तत्परम् ।
तदभ्यासेन लभ्येत पूर्वजन्मार्जितात्मनाम् ॥ २०॥

संभूतैर्वायुसंश्रावैर्हृदयं तप उच्यते ।
ऊर्ध्वं प्रपद्यते देहाद्भित्त्वा मूर्धानमव्ययम् ॥ २१॥

स्वदेहस्य तु मूर्धानं ये प्राप्य परमां गतिम् ।
भूयस्ते न निवर्तन्ते परावरविदो जनाः ॥ २२॥

न साक्षिणं साक्ष्यधर्माः संस्पृशन्ति विलक्षणम् ।
अविकारमुदासीनं गृहधर्माः प्रदीपवत् ॥ २३॥

जले वापि स्थले वापि लुठत्वेष जडात्मकः ।
नाहं विलिप्ये तद्धर्मैर्घटधर्मैर्नभो यथा ॥ २४॥

निष्क्रियोऽस्म्यविकारोऽस्मि निष्कलोऽस्मि निराकृतिः ।
निर्विकल्पोऽस्मि नित्योऽस्मि निरालम्बोऽस्मि निर्द्वयः ॥ २५॥

सर्वात्मकोऽहं सर्वोऽहं सर्वातीतोऽहमद्वयः ।
केवलाखण्डबोधोऽहं स्वानन्दोऽहं निरन्तरः ॥ २६॥

स्वमेव सर्वतः पश्यन्मन्यमानः स्वमद्वयम् ।
स्वानन्दमनुभुञ्जानो निर्विकल्पो भवाम्यहम् ॥ २७॥

गच्छंस्तिष्ठन्नुपविशञ्छयानो वान्यथापि वा ।
यथेच्छया वसेद्विद्वानात्मारामः सदा मुनिः ॥ २८॥ इत्युपनिषत् ॥

ॐ आप्यायन्तु ममाङ्गानि वाक्प्राणश्चक्षुः
श्रोत्रमथो बलमिन्द्रियाणि च ॥ सर्वाणि सर्वं
ब्रह्मोपनिषदं माहं ब्रह्म निराकुर्यां
मा मा ब्रह्म निराकरोदनिराकरणमस्त्वनिराकरणं
मेस्तु तदात्मनि निरते य उपनिषत्सु धर्मास्ते मयि
सन्तु ते मयि सन्तु ॥ ॐ शान्तिः शान्तिः शान्तिः ॥

हरिः ॐ तत्सत् ॥

इति कुण्डिकोपनिषत्समाप्ता ॥
**********