ನಾರಾಯಣ ಹೃದಯಮ್ ಭಾರ್ಗವ ಋಷಿ ವಿರಚಿತಮ್ नारायण हृदयम् narayana hridayam by bhargava rishi

॥ ಓಂ ತತ್ಸತ್ ॥
                            ॥ ನಾರಾಯಣ ಹೃದಯಮ್ ॥

ಹರಿಃ ಓಮ್ ॥ ಅಸ್ಯ ಶ್ರೀನಾರಾಯಣ-ಹೃದಯ-ಸ್ತೋತ್ರ-ಮಹಾಮಂತ್ರಸ್ಯ ಭಾರ್ಗವ ಋಷಿಃ,
ಅನುಷ್ಟುಪ್ಛನ್ದಃ, ಲಕ್ಷ್ಮೀನಾರಾಯಣೋ ದೇವತಾ, ನಾರಾಯಣ-ಪ್ರೀತ್ಯರ್ಥೇ ಜಪೇ ವಿನಿಯೋಗಃ ॥

                     ॥ ಕರನ್ಯಾಸಃ ॥

         ನಾರಾಯಣಃ ಪರಂ ಜ್ಯೋತಿರಿತಿ ಅಂಗುಷ್ಠಾಭ್ಯಾಂ ನಮಃ,
         ನಾರಾಯಣಃ ಪರಂ ಬ್ರಹ್ಮೇತಿ ತರ್ಜನೀಭ್ಯಾಂ ನಮಃ,
         ನಾರಾಯಣಃ ಪರೋ ದೇವ ಇತಿ ಮಧ್ಯಮಾಭ್ಯಾಂ ನಮಃ,
         ನಾರಾಯಣಃ ಪರಂ ಧಾಮೇತಿ ಅನಾಮಿಕಾಭ್ಯಾಂ ನಮಃ,
         ನಾರಾಯಣಃ ಪರೋ ಧರ್ಮ ಇತಿ ಕನಿಷ್ಠಿಕಾಭ್ಯಾಂ ನಮಃ,
         ವಿಶ್ವಂ ನಾರಾಯಣ ಇತಿ ಕರತಲಕರಪೃಷ್ಠಾಭ್ಯಾಂ ನಮಃ ॥

                   ॥ ಅಂಗನ್ಯಾಸಃ ॥

         ನಾರಾಯಣಃ ಪರಂ ಜ್ಯೋತಿರಿತಿ ಹೃದಯಾಯ ನಮಃ,
         ನಾರಾಯಣಃ ಪರಂ ಬ್ರಹ್ಮೇತಿ ಶಿರಸೇ ಸ್ವಾಹಾ,
         ನಾರಾಯಣಃ ಪರೋ ದೇವ ಇತಿ ಶಿಖಾಯೈ ವೌಷಟ್,
         ನಾರಾಯಣಃ ಪರಂ ಧಾಮೇತಿ ಕವಚಾಯ ಹುಮ್,
         ನಾರಾಯಣಃ ಪರೋ ಧರ್ಮ ಇತಿ ನೇತ್ರಾಭ್ಯಾಂ ವೌಷಟ್,
         ವಿಶ್ವಂ ನಾರಾಯಣ ಇತಿ ಅಸ್ತ್ರಾಯ ಫಟ್,
         ಭೂರ್ಭುವಸ್ಸುವರೋಮಿತಿ ದಿಗ್ಬನ್ಧಃ ॥

                   ॥ ಅಥ ಧ್ಯಾನಮ್ ॥

ಉದ್ಯಾದಾದಿತ್ಯಸಂಕಾಶಂ ಪೀತವಾಸಂ ಚತುರ್ಭುಜಮ್ ।
ಶಂಖಚಕ್ರಗದಾಪಾಣಿಂ ಧ್ಯಾಯೇಲ್ಲಕ್ಷ್ಮೀಪತಿಂ ಹರಿಮ್ ॥ 1॥

ತ್ರೈಲೋಕ್ಯಾಧಾರಚಕ್ರಂ ತದುಪರಿ ಕಮಠಂ ತತ್ರ ಚಾನನ್ತಭೋಗೀ
ತನ್ಮಧ್ಯೇ ಭೂಮಿ-ಪದ್ಮಾಂಕುಶ-ಶಿಖರದಳಂ ಕರ್ಣಿಕಾಭೂತ-ಮೇರುಮ್ ।
ತತ್ರತ್ಯಂ ಶಾನ್ತಮೂರ್ತಿಂ ಮಣಿಮಯ-ಮಕುಟಂ ಕುಂಡಲೋದ್ಭಾಸಿತಾಂಗಂ
ಲಕ್ಷ್ಮೀ-ನಾರಾಯಣಾಖ್ಯಂ ಸರಸಿಜ-ನಯನಂ ಸಂತತಂ ಚಿನ್ತಯಾಮಃ ॥ 2॥

         ಅಸ್ಯ ಶ್ರೀನಾರಾಯಣಾಹೃದಯ-ಸ್ತೋತ್ರ-ಮಹಾಮನ್ತ್ರಸ್ಯ ಬ್ರಹ್ಮಾ ಋಷಿಃ,
         ಅನುಷ್ಟುಪ್ ಛನ್ದಃ, ನಾರಾಯಣೋ ದೇವತಾ, ನಾರಾಯಣ-ಪ್ರೀತ್ಯರ್ಥೇ ಜಪೇ ವಿನಿಯೋಗಃ ॥

ಓಂ ॥  ನಾರಾಯಣಃ ಪರಂ ಜ್ಯೋತಿ-ರಾತ್ಮಾ ನಾರಾಯಣಃ ಪರಃ ।
ನಾರಾಯಣಃ ಪರಂ ಬ್ರಹ್ಮ ನಾರಾಯಣ ನಮೋಽಸ್ತು ತೇ ॥ 3॥

ನಾರಾಯಣಃ ಪರೋ ದೇವೋ ಧಾತಾ ನಾರಾಯಣಃ ಪರಃ ।
ನಾರಾಯಣಃ ಪರೋ ಧಾತಾ ನಾರಾಯಣ ನಮೋಽಸ್ತು ತೇ ॥ 4॥

ನಾರಾಯಣಃ ಪರಂ ಧಾಮ ಧ್ಯಾನಂ ನಾರಾಯಣಃ ಪರಃ ।
ನಾರಾಯಣ ಪರೋ ಧರ್ಮೋ ನಾರಾಯಣ ನಮೋಽಸ್ತು ತೇ ॥ 5॥

ನಾರಾಯಣಃ ಪರೋ ದೇವೋ ವಿದ್ಯಾ ನಾರಾಯಣಃ ಪರಃ ।
ವಿಶ್ವಂ ನಾರಾಯಣಃ ಸಾಕ್ಷಾನ್ ನಾರಾಯಣ ನಮೋಽಸ್ತು ತೇ ॥ 6॥

ನಾರಾಯಣಾದ್ ವಿಧಿ-ರ್ಜಾತೋ ಜಾತೋ ನಾರಾಯಣಾದ್ ಭವಃ ।
ಜಾತೋ ನಾರಾಯಣಾದಿನ್ದ್ರೋ ನಾರಾಯಣ ನಮೋಽಸ್ತು ತೇ ॥ 7॥

ರವಿ-ರ್ನಾರಾಯಣ-ಸ್ತೇಜಃ ಚನ್ದ್ರೋ ನಾರಾಯಣೋ ಮಹಃ ।
ವಹ್ನಿ-ರ್ನಾರಾಯಣಃ ಸಾಕ್ಷಾತ್ ನಾರಾಯಣ ನಮೋಽಸ್ತು ತೇ ॥ 8॥

ನಾರಾಯಣ ಉಪಾಸ್ಯಃ ಸ್ಯಾದ್ ಗುರು-ರ್ನಾರಾಯಣಃ ಪರಃ ।
ನಾರಾಯಣಃ ಪರೋ ಬೋಧೋ ನಾರಾಯಣ ನಮೋಽಸ್ತು ತೇ ॥ 9॥

ನಾರಾಯಣಃ ಫಲಂ ಮುಖ್ಯಂ ಸಿದ್ಧಿ-ರ್ನಾರಾಯಣಃ ಸುಖಮ್ ।
ಹರಿ-ರ್ನಾರಾಯಣಃ ಶುದ್ಧಿ-ರ್ನಾರಾಯಣ ನಮೋಽಸ್ತು ತೇ ॥ 10॥

ನಿಗಮಾವೇದಿತಾನನ್ತ-ಕಲ್ಯಾಣಗುಣ-ವಾರಿಧೇ ।
ನಾರಾಯಣ ನಮಸ್ತೇಽಸ್ತು ನರಕಾರ್ಣವ-ತಾರಕ ॥ 11॥

ಜನ್ಮ-ಮೃತ್ಯು-ಜರಾ-ವ್ಯಾಧಿ-ಪಾರತನ್ತ್ರ್ಯಾದಿಭಿಃ ಸದಾ ।
ದೋಷೈ-ರಸ್ಪೃಷ್ಟರೂಪಾಯ ನಾರಾಯಣ ನಮೋಽಸ್ತು ತೇ ॥ 12॥

ವೇದಶಾಸ್ತ್ರಾರ್ಥವಿಜ್ಞಾನ-ಸಾಧ್ಯ-ಭಕ್ತ್ಯೇಕ-ಗೋಚರ ।
ನಾರಾಯಣ ನಮಸ್ತೇಽಸ್ತು ಮಾಮುದ್ಧರ ಭವಾರ್ಣವಾತ್ ॥ 13॥

ನಿತ್ಯಾನನ್ದ ಮಹೋದಾರ ಪರಾತ್ಪರ ಜಗತ್ಪತೇ ।
ನಾರಾಯಣ ನಮಸ್ತೇಽಸ್ತು ಮೋಕ್ಷಸಾಮ್ರಾಜ್ಯ-ದಾಯಿನೇ ॥ 14॥

ಆಬ್ರಹ್ಮಸ್ಥಮ್ಬ-ಪರ್ಯನ್ತ-ಮಖಿಲಾತ್ಮ-ಮಹಾಶ್ರಯ ।
ಸರ್ವಭೂತಾತ್ಮ-ಭೂತಾತ್ಮನ್ ನಾರಾಯಣ ನಮೋಽಸ್ತು ತೇ ॥ 15॥

ಪಾಲಿತಾಶೇಷ-ಲೋಕಾಯ ಪುಣ್ಯಶ್ರವಣ-ಕೀರ್ತನ ।
ನಾರಾಯಣ ನಮಸ್ತೇಽಸ್ತು ಪ್ರಲಯೋದಕ-ಶಾಯಿನೇ ॥ 16॥

ನಿರಸ್ತ-ಸರ್ವದೋಷಾಯ ಭಕ್ತ್ಯಾದಿ-ಗುಣದಾಯಿನೇ ।
ನಾರಾಯಣ ನಮಸ್ತೇಽಸ್ತು ತ್ವಾಂ ವಿನಾ ನ ಹಿ ಮೇ ಗತಿಃ ॥ 17॥

ಧರ್ಮಾರ್ಥ-ಕಾಮ-ಮೋಕ್ಷಾಖ್ಯ-ಪುರುಷಾರ್ಥ-ಪ್ರದಾಯಿನೇ ।
ನಾರಾಯಣ ನಮಸ್ತೇಽಸ್ತು ಪುನಸ್ತೇಽಸ್ತು ನಮೋ ನಮಃ ॥ 18॥

॥ ಅಥ ಪ್ರಾರ್ಥನಾ ॥

ನಾರಾಯಣ ತ್ವಮೇವಾಸಿ ದಹರಾಖ್ಯೇ ಹೃದಿ ಸ್ಥಿತಃ ।
ಪ್ರೇರಿತಾ ಪ್ರೇರ್ಯಮಾಣಾನಾಂ ತ್ವಯಾ ಪ್ರೇರಿತ ಮಾನಸಃ ॥ 19॥

ತ್ವದಾಜ್ಞಾಂ ಶಿರಸಾ ಕೃತ್ವಾ ಭಜಾಮಿ ಜನ-ಪಾವನಮ್ ।
ನಾನೋಪಾಸನ-ಮಾರ್ಗಾಣಾಂ ಭವಕೃದ್ ಭಾವಬೋಧಕಃ ॥ 20॥

ಭಾವಾರ್ಥಕೃದ್ ಭವಾತೀತೋ ಭವ ಸೌಖ್ಯಪ್ರದೋ ಮಮ ।
ತ್ವನ್ಮಾಯಾಮೋಹಿತಂ ವಿಶ್ವಂ ತ್ವಯೈವ ಪರಿಕಲ್ಪಿತಮ್ ॥ 21॥

ತ್ವದಧಿಷ್ಠಾನ-ಮಾತ್ರೇಣ ಸಾ ವೈ ಸರ್ವಾರ್ಥಕಾರಿಣೀ ।
ತ್ವಮೇವ ತಾಂ ಪುರಸ್ಕೃತ್ಯ ಮಮ ಕಾಮಾನ್ ಸಮರ್ಥಯ ॥ 22॥

ನ ಮೇ ತ್ವದನ್ಯಸ್ತ್ರಾತಾಸ್ತಿ ತ್ವದನ್ಯನ್ನ ಹಿ ದೈವತಮ್ ।
ತ್ವದನ್ಯಂ ನ ಹಿ ಜಾನಾಮಿ ಪಾಲಕಂ ಪುಣ್ಯವರ್ಧನಮ್ ॥ 23॥

ಯಾವತ್ಸಾಂಸಾರಿಕೋ ಭಾವೋ ಮನಸ್ಸ್ಥೋ ಭಾವನಾತ್ಮಕಃ ।
ತಾವತ್ಸಿದ್ಧಿರ್ಭವೇತ್ ಸಾಧ್ಯಾ ಸರ್ವದಾ ಸರ್ವದಾ ವಿಭೋ ॥ 24॥

ಪಾಪಿನಾ-ಮಹಮೇಕಾಗ್ರೋ ದಯಾಲೂನಾಂ ತ್ವಮಗ್ರಣೀಃ ।
ದಯನೀಯೋ ಮದನ್ಯೋಽಸ್ತಿ ತವ ಕೋಽತ್ರ ಜಗತ್ತ್ರಯೇ ॥ 25॥

ತ್ವಯಾಹಂ ನೈವ ಸೃಷ್ಟಶ್ಚೇತ್ ನ ಸ್ಯಾತ್ತವ ದಯಾಲುತಾ ।
ಆಮಯೋ ವಾ ನ ಸೃಷ್ಟಶ್ಚೇ-ದೌಷಧಸ್ಯ ವೃಥೋದಯಃ ॥ 26॥

ಪಾಪಸಂಗ-ಪರಿಶ್ರಾನ್ತಃ ಪಾಪಾತ್ಮಾ ಪಾಪರೂಪ-ಧೃಕ್ ।
ತ್ವದನ್ಯಃ ಕೋಽತ್ರ ಪಾಪೇಭ್ಯಃ ತ್ರಾತಾಸ್ತಿ ಜಗತೀತಲೇ ॥ 27॥

ತ್ವಮೇವ ಮಾತಾ ಚ ಪಿತಾ ತ್ವಮೇವ ತ್ವಮೇವ ಬನ್ಧುಶ್ಚ ಸಖಾ ತ್ವಮೇವ ।
ತ್ವಮೇವ ವಿದ್ಯಾ ದ್ರವಿಣಂ ತ್ವಮೇವ ತ್ವಮೇವ ಸರ್ವಂ ಮಮ ದೇವ ದೇವ ॥ 28॥

ಪ್ರಾರ್ಥನಾದಶಕಂ ಚೈವ ಮೂಲಷ್ಟಕಮಥಃಪರಮ್ ।
ಯಃ ಪಠೇಚ್ಛೃಣುಯಾನ್ನಿತ್ಯಂ ತಸ್ಯ ಲಕ್ಷ್ಮೀಃ ಸ್ಥಿರಾ ಭವೇತ್ ॥ 29॥

ನಾರಾಯಣಸ್ಯ ಹೃದಯಂ ಸರ್ವಾಭೀಷ್ಟ-ಫಲಪ್ರದಮ್ ।
ಲಕ್ಷ್ಮೀಹೃದಯಕಂ ಸ್ತೋತ್ರಂ ಯದಿ ಚೈತದ್ವಿನಾಕೃತಮ್ ॥ 30॥

ತತ್ಸರ್ವಂ ನಿಷ್ಫಲಂ ಪ್ರೋಕ್ತಂ ಲಕ್ಷ್ಮೀಃ ಕ್ರುಧ್ಯತಿ ಸರ್ವದಾ ।
ಏತತ್ಸಂಕಲಿತಂ ಸ್ತೋತ್ರಂ ಸರ್ವಾಭೀಷ್ಟ-ಫಲಪ್ರದಮ್ ॥ 31॥

ಜಪೇತ್ ಸಂಕಲಿತಂ ಕೃತ್ವಾ ಸರ್ವಾಭೀಷ್ಟ-ಮವಾಪ್ನುಯಾತ್ ।
ನಾರಾಯಣಸ್ಯ ಹೃದಯಂ ಆದೌ ಜಪ್ತ್ವಾ ತತಃಪರಮ್ ॥ 32॥

ಲಕ್ಷ್ಮೀಹೃದಯಕಂ ಸ್ತೋತ್ರಂ ಜಪೇನ್ನಾರಾಯಣಂ ಪುನಃ ।
ಪುನರ್ನಾರಾಯಣಂ ಜಪ್ತ್ವಾ ಪುನರ್ಲಕ್ಷ್ಮೀನುತಿಂ ಜಪೇತ್ ॥ 33॥

ತದ್ವದ್ಧೋಮಾಧಿಕಂ ಕುರ್ಯಾ-ದೇತತ್ಸಂಕಲಿತಂ ಶುಭಮ್ ।
ಏವಂ ಮಧ್ಯೇ ದ್ವಿವಾರೇಣ ಜಪೇತ್ ಸಂಕಲಿತಂ ಶುಭಮ್ ॥ 34॥

ಲಕ್ಷ್ಮೀಹೃದಯಕೇ ಸ್ತೋತ್ರೇ ಸರ್ವಮನ್ಯತ್ ಪ್ರಕಾಶಿತಮ್ ।
ಸರ್ವಾನ್ ಕಾಮಾನವಾಪ್ನೋತಿ ಆಧಿವ್ಯಾಧಿ-ಭಯಂ ಹರೇತ್ ॥ 35॥

ಗೋಪ್ಯಮೇತತ್ ಸದಾ ಕುರ್ಯಾತ್ ನ ಸರ್ವತ್ರ ಪ್ರಕಾಶಯೇತ್ ।
ಇತಿ ಗುಹ್ಯತಮಂ ಶಾಸ್ತ್ರಂ ಪ್ರೋಕ್ತಂ ಬ್ರಹ್ಮಾದಿಭಿಃ ಪುರಾ ॥ 36॥

ಲಕ್ಷ್ಮೀಹೃದಯಪ್ರೋಕ್ತೇನ ವಿಧಿನಾ ಸಾಧಯೇತ್ ಸುಧೀಃ ।
ತಸ್ಮಾತ್ ಸರ್ವಪ್ರಯತ್ನೇನ ಸಾಧಯೇದ್ ಗೋಪಯೇತ್ ಸುಧೀಃ ॥ 37॥

ಯತ್ರೈತತ್ಪುಸ್ತಕಂ ತಿಷ್ಠೇತ್ ಲಕ್ಷ್ಮೀನಾರಾಯಣಾತ್ಮಕಮ್ ।
ಭೂತ ಪೈಶಾಚ ವೇತಾಳ ಭಯಂ ನೈವ ತು ಸರ್ವದಾ ॥ 38॥

ಭೃಗುವಾರೇ ತಥಾ ರಾತ್ರೌ ಪೂಜಯೇತ್ ಪುಸ್ತಕದ್ವಯಮ್ ।
ಸರ್ವದಾ ಸರ್ವದಾ ಸ್ತುತ್ಯಂ ಗೋಪಯೇತ್ ಸಾಧಯೇತ್ ಸುಧೀಃ ।
ಗೋಪನಾತ್ ಸಾಧನಾಲ್ಲೋಕೇ ಧನ್ಯೋ ಭವತಿ ತತ್ತ್ವತಃ ॥ 39॥

 ॥ ಇತ್ಯಥರ್ವರಹಸ್ಯೇ ಉತ್ತರಭಾಗೇ ನಾರಾಯಣ ಹೃದಯ ಸ್ತೋತ್ರಂ ॥

This should be chanted with the complementary Laxmihridayam Sanskrit text.
*********

॥ ॐ तत्सत् ॥

                            ॥ नारायण हृदयम् ॥

हरिः ओम् ॥ अस्य श्रीनारायण-हृदय-स्तोत्र-महामंत्रस्य भार्गव ऋषिः,
अनुष्टुप्छन्दः, लक्ष्मीनारायणो देवता, नारायण-प्रीत्यर्थे जपे विनियोगः ॥

                     ॥ करन्यासः ॥

         नारायणः परं ज्योतिरिति अङ्गुष्ठाभ्यां नमः,
         नारायणः परं ब्रह्मेति तर्जनीभ्यां नमः,
         नारायणः परो देव इति मध्यमाभ्यां नमः,
         नारायणः परं धामेति अनामिकाभ्यां नमः,
         नारायणः परो धर्म इति कनिष्ठिकाभ्यां नमः,
         विश्वं नारायण इति करतलकरपृष्ठाभ्यां नमः ॥

                   ॥ अङ्गन्यासः ॥

         नारायणः परं ज्योतिरिति हृदयाय नमः,
         नारायणः परं ब्रह्मेति शिरसे स्वाहा,
         नारायणः परो देव इति शिखायै वौषट्,
         नारायणः परं धामेति कवचाय हुम्,
         नारायणः परो धर्म इति नेत्राभ्यां वौषट्,
         विश्वं नारायण इति अस्त्राय फट्,
         भूर्भुवस्सुवरोमिति दिग्बन्धः ॥

                   ॥ अथ ध्यानम् ॥

उद्यादादित्यसङ्काशं पीतवासं चतुर्भुजम् ।
शङ्खचक्रगदापाणिं ध्यायेल्लक्ष्मीपतिं हरिम् ॥ १॥

त्रैलोक्याधारचक्रं तदुपरि कमठं तत्र चानन्तभोगी
तन्मध्ये भूमि-पद्माङ्कुश-शिखरदळं कर्णिकाभूत-मेरुम् ।
तत्रत्यं शान्तमूर्तिं मणिमय-मकुटं कुण्डलोद्भासिताङ्गं
लक्ष्मी-नारायणाख्यं सरसिज-नयनं संततं चिन्तयामः ॥ २॥

         अस्य श्रीनारायणाहृदय-स्तोत्र-महामन्त्रस्य ब्रह्मा ऋषिः,
         अनुष्टुप् छन्दः, नारायणो देवता, नारायण-प्रीत्यर्थे जपे विनियोगः ॥

ॐ ॥  नारायणः परं ज्योति-रात्मा नारायणः परः ।
नारायणः परं ब्रह्म नारायण नमोऽस्तु ते ॥ ३॥

नारायणः परो देवो धाता नारायणः परः ।
नारायणः परो धाता नारायण नमोऽस्तु ते ॥ ४॥

नारायणः परं धाम ध्यानं नारायणः परः ।
नारायण परो धर्मो नारायण नमोऽस्तु ते ॥ ५॥

नारायणः परो देवो विद्या नारायणः परः ।
विश्वं नारायणः साक्षान् नारायण नमोऽस्तु ते ॥ ६॥

नारायणाद् विधि-र्जातो जातो नारायणाद् भवः ।
जातो नारायणादिन्द्रो नारायण नमोऽस्तु ते ॥ ७॥

रवि-र्नारायण-स्तेजः चन्द्रो नारायणो महः ।
वह्नि-र्नारायणः साक्षात् नारायण नमोऽस्तु ते ॥ ८॥

नारायण उपास्यः स्याद् गुरु-र्नारायणः परः ।
नारायणः परो बोधो नारायण नमोऽस्तु ते ॥ ९॥

नारायणः फलं मुख्यं सिद्धि-र्नारायणः सुखम् ।
हरि-र्नारायणः शुद्धि-र्नारायण नमोऽस्तु ते ॥ १०॥

निगमावेदितानन्त-कल्याणगुण-वारिधे ।
नारायण नमस्तेऽस्तु नरकार्णव-तारक ॥ ११॥

जन्म-मृत्यु-जरा-व्याधि-पारतन्त्र्यादिभिः सदा ।
दोषै-रस्पृष्टरूपाय नारायण नमोऽस्तु ते ॥ १२॥

वेदशास्त्रार्थविज्ञान-साध्य-भक्त्येक-गोचर ।
नारायण नमस्तेऽस्तु मामुद्धर भवार्णवात् ॥ १३॥

नित्यानन्द महोदार परात्पर जगत्पते ।
नारायण नमस्तेऽस्तु मोक्षसाम्राज्य-दायिने ॥ १४॥

आब्रह्मस्थम्ब-पर्यन्त-मखिलात्म-महाश्रय ।
सर्वभूतात्म-भूतात्मन् नारायण नमोऽस्तु ते ॥ १५॥

पालिताशेष-लोकाय पुण्यश्रवण-कीर्तन ।
नारायण नमस्तेऽस्तु प्रलयोदक-शायिने ॥ १६॥

निरस्त-सर्वदोषाय भक्त्यादि-गुणदायिने ।
नारायण नमस्तेऽस्तु त्वां विना न हि मे गतिः ॥ १७॥

धर्मार्थ-काम-मोक्षाख्य-पुरुषार्थ-प्रदायिने ।
नारायण नमस्तेऽस्तु पुनस्तेऽस्तु नमो नमः ॥ १८॥

॥ अथ प्रार्थना ॥

नारायण त्वमेवासि दहराख्ये हृदि स्थितः ।
प्रेरिता प्रेर्यमाणानां त्वया प्रेरित मानसः ॥ १९॥

त्वदाज्ञां शिरसा कृत्वा भजामि जन-पावनम् ।
नानोपासन-मार्गाणां भवकृद् भावबोधकः ॥ २०॥

भावार्थकृद् भवातीतो भव सौख्यप्रदो मम ।
त्वन्मायामोहितं विश्वं त्वयैव परिकल्पितम् ॥ २१॥

त्वदधिष्ठान-मात्रेण सा वै सर्वार्थकारिणी ।
त्वमेव तां पुरस्कृत्य मम कामान् समर्थय ॥ २२॥

न मे त्वदन्यस्त्रातास्ति त्वदन्यन्न हि दैवतम् ।
त्वदन्यं न हि जानामि पालकं पुण्यवर्धनम् ॥ २३॥

यावत्सांसारिको भावो मनस्स्थो भावनात्मकः ।
तावत्सिद्धिर्भवेत् साध्या सर्वदा सर्वदा विभो ॥ २४॥

पापिना-महमेकाग्रो दयालूनां त्वमग्रणीः ।
दयनीयो मदन्योऽस्ति तव कोऽत्र जगत्त्रये ॥ २५॥

त्वयाहं नैव सृष्टश्चेत् न स्यात्तव दयालुता ।
आमयो वा न सृष्टश्चे-दौषधस्य वृथोदयः ॥ २६॥

पापसङ्ग-परिश्रान्तः पापात्मा पापरूप-धृक् ।
त्वदन्यः कोऽत्र पापेभ्यः त्रातास्ति जगतीतले ॥ २७॥

त्वमेव माता च पिता त्वमेव त्वमेव बन्धुश्च सखा त्वमेव ।
त्वमेव विद्या द्रविणं त्वमेव त्वमेव सर्वं मम देव देव ॥ २८॥

प्रार्थनादशकं चैव मूलष्टकमथःपरम् ।
यः पठेच्छृणुयान्नित्यं तस्य लक्ष्मीः स्थिरा भवेत् ॥ २९॥

नारायणस्य हृदयं सर्वाभीष्ट-फलप्रदम् ।
लक्ष्मीहृदयकं स्तोत्रं यदि चैतद्विनाकृतम् ॥ ३०॥

तत्सर्वं निष्फलं प्रोक्तं लक्ष्मीः क्रुध्यति सर्वदा ।
एतत्सङ्कलितं स्तोत्रं सर्वाभीष्ट-फलप्रदम् ॥ ३१॥

जपेत् सङ्कलितं कृत्वा सर्वाभीष्ट-मवाप्नुयात् ।
नारायणस्य हृदयं आदौ जप्त्वा ततःपरम् ॥ ३२॥

लक्ष्मीहृदयकं स्तोत्रं जपेन्नारायणं पुनः ।
पुनर्नारायणं जप्त्वा पुनर्लक्ष्मीनुतिं जपेत् ॥ ३३॥

तद्वद्धोमाधिकं कुर्या-देतत्सङ्कलितं शुभम् ।
एवं मध्ये द्विवारेण जपेत् सङ्कलितं शुभम् ॥ ३४॥

लक्ष्मीहृदयके स्तोत्रे सर्वमन्यत् प्रकाशितम् ।
सर्वान् कामानवाप्नोति आधिव्याधि-भयं हरेत् ॥ ३५॥

गोप्यमेतत् सदा कुर्यात् न सर्वत्र प्रकाशयेत् ।
इति गुह्यतमं शास्त्रं प्रोक्तं ब्रह्मादिभिः पुरा ॥ ३६॥

लक्ष्मीहृदयप्रोक्तेन विधिना साधयेत् सुधीः ।
तस्मात् सर्वप्रयत्नेन साधयेद् गोपयेत् सुधीः ॥ ३७॥

यत्रैतत्पुस्तकं तिष्ठेत् लक्ष्मीनारायणात्मकम् ।
भूत पैशाच वेताळ भयं नैव तु सर्वदा ॥ ३८॥

भृगुवारे तथा रात्रौ पूजयेत् पुस्तकद्वयम् ।
सर्वदा सर्वदा स्तुत्यं गोपयेत् साधयेत् सुधीः ।
गोपनात् साधनाल्लोके धन्यो भवति तत्त्वतः ॥ ३९॥

 ॥ इत्यथर्वरहस्ये उत्तरभागे नारायण हृदय स्तोत्रं ॥

This should be chanted with the complementary Laxmihridayam Sanskrit text.
***********